Mupala'a 21 - Ata New Testament

Loxotolo ilou lialia muxali alavua

¹ Ioxe, emaleila la emaisou loxotolo alavua xe lialia alavua xo loxotolo ilou lialia ane tei tasiauxu mo mukalu avile. Mo luaki uxolula uasi.

² Sila emaisou taoni noxou Mosinge u'isalili e Ielusalemo alavua. Anu molu noxou no tualasou mululu'e mo tokolomosou lailaixe manina aloxo sema ilalaxi mo itokolomo so itaula'ixu mulu'e.

³ Mukalu la elomusou xoli molu no sia kingi muvikala tatila aloxo 'o, “Ngamalei, tasou Mosinge a uxoxolu noxi'a tamitema mo so anu utalupexa no taine'i. Laso ane'i ixolu tamitemaou mo anu Mosinge molu a uxolu noxi'a.

⁴ Anu uxolu noxi'a laso ie'i lexaxu so mi vilela uasi. Mo soli uxalila uasi. Mo tamitema opone'i tu'umaxusou mi vile xe itama xe ixamulinu navunavula uasi. Mi anene so tateimo, umomomo so uxalila uasi.”

⁵ La anu ane mutalupexa no anu sia kingi muvikala aloxo 'o, “Ngama­lei, eni a axalixu mimi mukalusi alavuala.” La mu'oxo lexe, “Nakau­kavunu vaikala ano'o xo anu uxalixu nene'axu mo anu mani­nasi.”

⁶ Xe muvikalaleli aloxo 'ola, “Anu ane, mukalu. Eni ane tei xe eni kaluxu uasi a. Eni tava'u mimi mukalusi xe mi ma'ia la asivitanoxu avilesi. Loxo itema vile usoliou lexa la eni a'itixu no anu lexa so mauli luxu. A'itixu mo uiesi, ulotonu uasisi.

⁷ Laso noxi'a tami­tema ane iua'uli la mimixeli mukalusi apilixinu noxi'a xo eni axolu a Mosi'a xe ane'i ixolu ta'alixeli ane.

⁸ Ia noxi'a ane'i ane i'umolu vaikala manina mo ilopala uasi xe noxi'a ane'i ane i'oxonu mimi ane masua no iou Mosinge xe ive'ave'a tamitema isoisoli xe ilai no anu ilixo nuni'u olele xe i'oxonu ta'uluxu masua xe i'itinu momosi'a kalavoi xe i'oxo loloxa'a tamitema, ane'i mukalusi ilai no anu tualasi'a mulovosi. Xo ane'i ne ixalisou soli tameisou no anu taxa toxoxu e navu ilou lavo'o axexaxu u'ani'ani no anu.”

Tioni ua'aloxu Ielusalemo alavua

⁹ Ioxe, mukalu la angelo vile mune'e noxilo. Anu vile noxi'a ta'angelo 7 e mitetelisou lisi koli 7 ane muana'ana no anu kaluxusou tu'utu'umaxu e mumamulone'i tamitema. Mune'e noxilo la muvi­kalaleli lexe, “Nane'e 'o mo eni alosoienixe sema ane milalaxi so itaula'ixu Sipisipi Ilie.”

¹⁰ La Ulenu Laixe mupamuxaleli xe angelo mulaixilo no anu la'olu vile teitexi manina. Laso anu mulo­soielixu taoni noxou Mosinge mu'isalili e Ielusalemo a molu no tualasou mululu'e.

¹¹ Mululu'e la iaxu no anu ne, a iaxu Mosingesi. La lamanaxu a loxo lavo'o lailaixe ane lamolisou tatila e tatila manina. Anu loxo lamanaxu lavo'o iaspa ane lamana loxo laxalasi 'o.

¹² Mo kalumo la taoni ne vimelusou mulai teitexi e teitexi manina. Xe no pa'upa'umolu la aitengaxu 12. La ta'angelo 12 a mitutulu milo no anu aitenga vilevilesi ne. Xe no anu aiaitenga la ualaualasi'a laili noxi'a Ta'isilaeli 12 a mukaukavu no anu.

¹³ La no anu taoni pa'umolu loxo isiti e aso uxali la aitengaxu tatalu. Xe no anu pa'umolu loxo noti la aitengaxu tatalu. Xe no anu pa'umolu loxo sauti la aitengaxu tatalu. Xe no anu pa'umolu loxo uesiti e aso ulu'elai la aitengaxu tatalu kalumo.

¹⁴ Xe no anu vimelusou taoni ne la lavo'o 12 a muta'olu no tava'u so pumuxu no anu. La no anu lavolavo'o ne ualaualasi'a ta'aposeli 12 noxou Sipisipi Ilie a mukaukavu no anu.

¹⁵ Ioxe, angelo e muvikalaleli ne mutetelisou tilovo koli vile so utilovosou taoni mo aiaitengaxu ilou vimelusou.

¹⁶ La taoni ne veveni no anu pa'upa'umolu tami'a mumomomosi. Ioxe, angelo muti­lovosou taoni no anu tilovo noxou ne la veveni no anu mumomomo no anu 2200 kilomita. La tatila no anu xe teitexi no anu la mumo­momo axonesi.

¹⁷ Mukalu la mutilovosou vimelusou kalumo. La vimelu ne papatu e papatu mumomomo no anu 144 mita. Angelo muno'u mita ne la anu iou vilesisi a loxo nenge tamitema talavusou tatilovo no anu mita 'o.

¹⁸ La vimelu ne Mosinge mu'o­xonu no anu lavo'o e iasipasi. Xe no anu taoni noxou mu'isalili la mu'oxonu no anu koli e mi vile uila ilou uasisi. La lamana e lamana loxo laxalasi 'o.

¹⁹ Xe lavolavo'o tatila ane muta'olu so u'oxonu vimelusou taoni pumuxu la mutokolomo no anu lavolavo'o lailaixe ane lamolisou mutiatila musuku. Laso lavo'o so vimelu tava'u ane tei la no anu lavo'o iasipa. Xe ane tameisou la no anu lavo'o ela'ela sapaia. Xe ane tatalusou la axeti. Xe no anu tami'asou la lavo'o kailanu emelali.

²⁰ Xe ta'uvesou la satonikisi, anu lauoinu xe kea. Xe ane 6-sou la anu lavo'o lauoinu koniliani. Xe 7-sou la lavo'o ponu kilisolaiti. Xe no anu 8-sou la anu lavo'o kailanu vile ane velili. Xe 9-sou la anu lavo'o ponu vile ane topasi. Xe 10-sou la anu lavo'o kilisopelesi. Xe 11-sou la lavo'o aiasini. Xe 12-sou la lavo'o vile lauoinu ane ametisi.

²¹ Xe aite­ngaxu taoni 12 ne la no anu mi e talemolu lexe peli. Mi ne ixalisou no anu kalamiseli no luaki ka i'oxonu xapo no anu. Ia no anu taoni ne la mino'u peli toxoxu vilevilesi so mi'oxonu aitengaxu 12 vilevilesi no anu. Xe votevote'isou la no anu koli e mi vile uila ilou uasisi. La lamana e lamana loxo laxalasi 'o.

²² Xe no taoni ne la amaisou tasou Mosinge vile uasi xo Tatananenge anu Mosinge U'uli'uli ilou Sipisipi Ilie ne ane'i me'a a ixolu no taine'i tatemanusi.

²³ Xe kalumo no taoni ne la tava'u so aso ilou so'io iiesou uasisi. Xo iaxu Mosinge a ulusou lamanaxu mo Sipisipi Ilie anu uxolu loxo lalamosou kalumo.

²⁴ La ane'i tatemanu xale tuatuala ixixaoxao no anu lamanaxu taoni nesi. Mo takingi so tuatuala no lialia ine'enu mimi lailaixe so i'unalaixu.

²⁵ Mo loxo no aso la vimelu aiaitengaxu uxolu ukisi. Ukisi no aso laso uxolu axonesi, utatu uasisi xo olovoxo uxali no taoni ne uasi.

²⁶ Xe no anu xale tuatuala loxo mi vile laixe uxolu so takulukemolu mo tataxanu la ine'e i'unanu no taoni ne.

²⁷ Ia mi ane malemalenga uasi xe tamitema ane i'oxonu ili'ilixo ane loxo tuma'u masua noxou Mosinge xe vaikala kalavoi la umomomo uasi manina so u'unalai ne. Ane'isi ane ualasi'a uai no anu lavuku so mauli noxou Sipisipi Ilie la ixolu no taoni ne, evilela uasi.