Mupala'a 20 - Ata New Testament

Uluaou mukalavusu tau iexu 1000

¹ Ioxe, mukalu la emaisou angelo vile molu no tualasou Mosinge mulu'e. Mulu'e la mutetelisou lakisou taxa e ulu'elai avile mo mutetelisou seni vile toxoxu kalumo.

² La musavunoxu mi loxo sineke tatila e sineke ane muxolu tateimo. Anu mosou tovotovo e Uluaou to! Musavunoxu ka muloi­lokisou no anu seni so uxolu axone umomomo no anu tau ie 1000.

³ Muloilokisou mukalu ka musu'anu mulu'e no taxa e ulu'elai avile. Musu'anu mukalu la muto­munu taxa anaxu pakia'u e pakia'u mo so Uluaou ula u'oxonu loloxa'a tatemanu tuatuala uasi. Uxolu uxolu xo xe tau iexu 1000 ukalui laso ane, ipilixinu ula so uxixao se voxo ataxusi.

⁴ Xe emaleila la emaisou siasia tavu'alo a loxo sia kingi a muta'olu. La ane'i ane mitalupexa no anu la Mosinge mulosi'a xavi so itilo­vosi'a tamitema no lakoti. Xe tamitema ane taxilili mixotosou xolane'i xo no anu vaikala laixe so Iesua ilou Mosinge vaikalaou, la emaisou ule'ulene'i a uxolu ne. Mo tamitema ane i'itinu mi vova olele ilou mi ane musaxi loxo anu uasi mo ino'u sosovo noxou no alaie'i xe no avo'a uasi la mixolu ne kalumo. Ioxe, ane'i mukalusi ne, mixalisou mauli la mitulu mivei­sa'inu Kalaisiti no anu tanixu kingi mumomomo no anu tau ie 1000.

⁵ Ane'i ano'o ne, tei so itulu imauli no anu soli. Ioxe noxi'a tamitema ane misosoli loxo itulu uaosio la soli ukasi'a ulai ulai xo xe tau ie 1000 ukalui, laso ane, ane'i kalumo itulu.

⁶ Ioxe, noxi'a tamitema ane mitulu tei olele ne ane'i ixalisou osa'ila. Ane'i tamalemalengasi mo soli tameisou xavinu so ulosi'a tu'umaxu uasi. La ane'i ne tapilisiti so i'oxonu xaixai noxou Mosinge xe noxou Kalaisiti. Mo ane'i ixolu iveisa'inu Kalaisiti no anu tanixu kingi umomomo no anu tau ie 1000.

Uluaou muxalisou mamulosi

⁷ Ioxe, loxo tau ie 1000 ukalui la ikisinu taxa e Uluaou mukalavusu no anu so ula.

⁸ Xe loxo ula la u'oxonu loloxa'a tatemanu xale tuatuala mukalusi. Tuatuala ne itotokalasou lexe Xoxu xe Maxoxu. La anu upitane'i so ilalaxisou i'oto no anu uo. Ane'i tavu'alo e tavu'alo aloxo io'iio'i no luaki 'o, tamomomo so ta'itisi'a uasisi.

⁹ Ane'i me'a no xale tuatuala mukalusi so ixixaosou kemu noxi'a tamitemaou Mosinge mu'isalili xe taoni ane Mosinge u'osasou misevile. Ixixaousou ia alaxu vilesisi la navu molu no tualasou Mosinge ulu'e la u'i'a mukalusi.

¹⁰ Ioxe, Uluaou u'oxo loloxa'a tamitema axone laso Mosinge usu'anu no anu taxa toxoxu ane navu ilou lavo'o axexaxu u'ani'ani no anu. Taxa e mi vova ilou polopeti kalavoi a ixolu no anu kalumo. La ane'i tatalu ne itavulenu navunavu no aso xe olovoxo ulai ulai xo mole kalu­xusou uasisi.

Voxosou lakoti toxoxu

¹¹ Ioxe, ieli muka loxo 'o la emaisou sia vile noxou kingi. Anu kea mo toxoxu e toxoxu. La emaisou evile muxolu no anu sila lialia ilou loxotolo mi'umolu mo tasiauxu avilesi.

¹² Mukalu la emaisi'a tamitema ane misoisoli mukalusi a mitulu no laxunu sia kingi. Ane'i tamitema tatiatila xe tamitema vitavitanisi a mitulu ne. La ane'i ta'angelo mixavulalanu lavulavuku ane ili'ilixone'i tami­tema muxolu mukaukavu no anu. Xe mixavulalanu lavuku so mauli kalumo. Mukalu la anu ane muta­lupexa no anu sia kingi muititi no anu lavulavuku ne so utilovosi'a tamitema no anu ili'ilixo mi ma'ia mi'oxonu.

¹³ La luaki mu'italone'i tamitema misoisoli no anu so mimauli. Xe soli ilou tanixu soli kalumo mi'italone'i tamitema ane mikasi'a no anu soli. Mi'italone'i xe mitulu mimauli laso ane'i mukalusi mikoti so ixalisou nene'axu ilixo noxi'a.

¹⁴ Mutilovosi'a tamitema xo xe mukalu laso ane, musu'anu soli ilou tanixu soli mulu'elai no taxa so navu. Taxa so navu ne, anu tanixu soli tameisou ane.

¹⁵ La tamitema ta'ei ane ualasi'a uxolu no anu lavuku so mauli uasi, la ane'i muka­lusi misu'a no taxa so navu kalumo.