Mupala'a 2 - Ata New Testament

Pelototo so pita ne Epesusi

¹ La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Epesusi. Eni ane atetelisou tataoto 7 no avolo tema, mo axixao no tainu lalamo koli 7. Akalanu vaikala ano'o ulai noxinge.

² No anu mi ma'ia nga'oxonu la elavusou mukalu. Elavu lexe nga'oxonu xaixai ialuxu mo ngatulu pakia'inge. Mo opongengi u'oasi'a tamitema tamasua uasi. Xe ane'i mose'i ane mi'oxo lexe ane'i ta'aposeli kalumo la ngetilovosi'a lexe ane'i mikalavoisi ane.

³ La ngata­vulenu tu'umaxusou ualasilo xo tamitema ito'omengexu ia ngatulu pumu­ngenge mo kalakalangenge uasi.

⁴ Ia mi vile a'osasingexu uasi aloxo 'o. Tei loxo ngelopala la ngesexelaxo misevile, ia vaimomo 'o malaxo uasi.

⁵ Xo ngaxa­vutalanu vote'i laixe ngemulinu tei a ngapolo no anula uasi. Laso ngaxiunu opongengi mo nga'isa­lilinoxu no anu ilixo laixe noxinge tei. Ia loxo nga'oxonu axone uasi la eni ane'e noxinge so axexenu lalamo noxinge no anu tanixu ne.

⁶ Ia mi ane noxinge a'osasingexu ane ngamatapianu ili'ilixo noxi'a Tanikolasi. Xo eni kalumo amatapianu ilixo noxi'a.

⁷ Anu ane, loxo itema sangalou la ulomuxu vaikalaou Ulenu Laixe anu upilixinu noxinge no anu pitapita. Noxi'a tamitema ane so iua'uli, la apilixine'i so i'ani no anu ovu so mauli ane uxolu no xai noxou Mosinge no tualasou.”

Pelototo so pita ne Semelena

⁸ La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Semelena. Eni ane tei xe eni kaluxu uasi a. Eni ane esoli ka emauli mo a axoxolu 'o. Akalanu vaikala ano'o ulai noxinge.

⁹ Eni elavu no anu tu'utu'umaxu ngatata­vulenu mo ngingi nga'oloxola no anu mimi so vasimenge. Ia ngepa­lava no anu mimi so ulengengi. Mo elavusou vaikalai'a tamitema ane ipupuienge. Ane'i ikalavoi lexe ane'i Taiuta, ia uasi, ane'i tatemanu pita noxou Uluaou ane.

¹⁰ Xe ngingi la maxuveni uasi la ngata­­vulenu navunavu ia opongengi kalaua uasi. Xo ngalomu, Uluaou upamuxane'i tamitema so ikalavu­sungengi ngingi mose'i. Utovo­ngengi mo ngatavulenu tu'umaxu ulai ulai umomomo no anu voxo 10. Ia ngatetelisou lopala noxinge pumuxu umomomo no anu soli, xo ili'i la eni alosinge mauli so palaisi na'a ngingi.

¹¹ Anu ane, loxo itema sangalou la ulomuxu vaika­­laou Ulenu Laixe anu upilixinu noxinge no anu pitapita. Noxi'a tamitema ane so iua'uli, la ixalisou soli tameisou uasi.”

Pelototo so pita ne Pelexamumi

¹² La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Pelexamumi. Eni ane laviso anaxu xalevile tamei ula no anaxo 'o. Akalanu vaikala ano'o ulai noxinge.

¹³ Eni elavu no anu tuala ane ngaxoxolu no anu lexe xavi noxou Uluaxeli u'okisi. La mala'o se'o tamitema mivau Anitipasi xo mulanu vaikalaxeli mo mulopala­­lelisi. Anu vile noxinge ia ngingi ngapilixinu ualasilo uasi, ngeka­makulunusi. Mo ngaxiunu tuma­lingeou lopala noxinge uasi, ngexolu pumungenge no anu tuala ane Uluaxeli ukasou ne.

¹⁴ Ia mimi se'i a'osasingexu uasi aloxo 'o. No taingengi ne tami­tema se'i imulinu ili'ilixou Valamu. Xo tatei la anu mupa­muxanu Valaki so mu'unanu tanu noxi'a Ta'isilaeli la mi'ou misoposi ane tamitema milo­­sou mosi'a kalavoi mo milailai noxi'a tasema vitanisi.

¹⁵ Anu iou vilesisi a loxo se'i no taingengi e imulinu vaikalaou Nikolasi ne.

¹⁶ Laso ngingi ngaxiunu opo­ngengi mo nga'isalilinoxu no anu vaika­laxeli. Xo loxo uasi la eni ane'e a'oto noxinge no anu laviso no anaxo 'o.

¹⁷ Anu ane, loxo itema sangalou la ulomuxu vaika­laou Ulenu Laixe anu upili­xinu noxinge no anu pitapita. Noxi'a tamitema ane so iua'uli la alosi'a la'ilali mana e uxolu utalume. Mo alosi'a lavo'o kea vilevilesi. No anu lavo'o vilevilesi ne akaukavunu ualaua­lasi'a mo ane'i tamosousi ilavusou, se'ila uasi.”

Pelototo so pita ne Taiataila

¹⁸ La anu muvikala aloxo 'ola, “Nini nakaukavunu vaikala ano'o ulai noxou angelosou pita noxilo ne Taiataila. Eni Mosinge Olu a. Eni ane ieli kaxu a loxo navu mo tava'ilo loxo valasi ane mi'elaxu mo so axexaxu. Akalanu vaikala ano'o ulai noxinge.

¹⁹ Eni elavu­sou ili'ilixo noxinge lexe ngingi ngasexelaxa'a tamenexinge mo ngalopalalelisi. Mo xavingengiou xaixai so ngasu'ulingengi ngato'o mo loxo tu'umaxu muxalisinge la ngetulu pumungengesi. Mo elavusou ilixo laixe nge'oxonu a uleleme.

²⁰ Ia mi vile a'osasingexu uasi aloxo 'o. Sema e Ieseveli ixolu no taingengi mo ikalavoi lexe ane sema so pela'a. Ane i'unanu tane noxi'a tamitema so xaixai noxilo mo ilapune'i no anu susu so ilailai noxi'a tasema vitanisi mo i'ou misoposi ane tamitema milosi'a momosi'a kalavoi. I'oxo axone ia iengi si'isou ilixo noxie mo nga'apixe no anu to uasi.

²¹ Ako­line kolokolo uasi xo mo ixiunu opone so susu noxie. La uasi, imasaxau so ixiunu opone so ilixo nuni'u ne uasi.

²² Laso ngalomu. Eni apilixinu pipiena tu'umaxu misevile so ukasie. Xe noxi'a ta'ei oli'a mi'oxonu ilixo nuni'u ne, la ixiunu tumali'aou mo i'isalilinoxu opone'i no anu vaikalaxeli. Xo loxo uasi la ane'i kalumo itavulenu navunavu mutiatila musuku.

²³ Mo kalumo noxi'a ta'ilie la ave'ave'a isoisoli. Mo so axone la tatemanu pitapita mukalusi ilavu lexe eni atilovosou xavutala mo opone'i tamitema mukalusi. Atilo­vosou ukalu la alosi'a nene'axu umomomo no anu ilixo noxi'a vilevilesi.

²⁴ Ioxe, eni avikalangengi ngingi ta'ei so pita na Taiataila ane ngamulinu vaikalaie sema ne uasi. Mo ngaxolu va'axu no anu mi e ilemolu lexe, 'vaikala mu'asi'asi mo mutatalume noxou Uluaou'. Ngingi ne, eni vaikala vile tu'umaxu so apilixinu noxinge uasi.

²⁵ Ia avikalangengi lexe ili'ilixo laixe ane ngatetelisou ne la ngakamakulunu xo mo eni ane'e noxinge.

²⁶ Ioxe, noxi'a tamitema ane so iua'uli mo imulinu ili'ilixo noxilo ulai umomomo no anu kaluxusou lialia la a'oxo aloxo 'o. Eni alosi'a xavi so i'uli laxune'i tatemanu xale tuatuala mukalusi.

²⁷ I'uli laxu­ne'i mo so loxo tamitema ta'ei ixilili la ikasi'asi. Anu loxo itema ukapikapinu pilika so u'oxo lasopeni xe umaisou lexe masua la uno'u aini so umamulonu. Xavi anene exalisou noxou Mamilo laso apilixinu noxi'a kalumo.

²⁸ Mo kalumo alosi'a taoto ane uiei no maxasesela.

²⁹ Anu ane, loxo itema sangalou la ulomuxu vaikalaou Ulenu Laixe anu upilixinu noxinge no anu pita­pita.”