Mupala'a 19 - Ata New Testament

Tatemanu tualasou Mosinge mi'osa xo Vaviloni mumamulo

¹ Ioxe mukalu la elomusou xoline'i tamitema tavu'alo no tualasou Mosinge la mivikala tatila lexe, “Ta'itinu ualasou Mosinge. Xo anu Mosinge anusisi mosou pamauli xe iaxu xe xavinu.

² Xe loxo Mosinge utilovosou xe ukolinu ili'ilixo la manina mo ulapusi. Xo anu mukoline tilasi'a tasema so vote'i e mimasuane'i tatemanu lialia no anu ilixo nuni'u noxie. Xe ane mive'ave'a tamitema so xaixai noxou Mosinge ia anu mukolinu sialuxa'a noxie mukalu.”

³ La ane'i mivikala tatila alaxu tameisoula lexe, “Ta'itinu ualasou Mosinge. Umuxu navu ane u'elaxu taoni tatila a utetelai utetelai kaluxusou uasi.”

⁴ La ane'i tatiatila 24 oli'a tamimi tami'a milalusi so mitanga­tuluou Mosinge e utalupexa no anu sia kingi noxou. Mo mivikala lexe, “Ai, manina misevile. Ta'itinu ualasou Mosingesi.”

⁵ Xe xoli molu no anu sia kingi noxou Mosinge muvikala aloxo 'o, “Ngingi tamitema so xaixai noxou Mosinge, ngingi ane ngamama'u noxou, ngingi tamitema vitavi­tanisi o ngingi tatatila, ngingi mukalusi ne nga'itinu ualasou Mosingesi.”

Lavilelu so Sipisipi Ilie mutaula'i

⁶ Xe mukalu, la elomusou xoline'i tamitema tavu'alola. La tamaxu loxo lexalexa loxu xe loxo lele'e upaupau tatila. La mivikala lexe, “Ta'itinu ualasou Mosingesi. Xo Tatananenge anu Mosinge mo anusisi U'uli'uli mo anu kingi no anu mimi mukalusi.

⁷ Laso nenge oponenge u'osa'ila mo tavikala laixe mo ta'itinu ualasou. Xo voxo a muxali mukalu so Sipisipi Ilie utala'i la semau a milalaxi mukalu.

⁸ Xo Mosinge mulosie lavuluti kea lailaixe ane muvalukea mo male­malengasi.” Lavuluti kea lailaixe ne anu usosovosou ili'ilixo male­malenga noxi'a tamitemaou mu'isa­lili.

⁹ La angelo muvikalaleli aloxo 'ola, “Nakaukavunu vaikala 'o. Tamitema ta'ei Mosinge muali'a so ine'e no anu lavilelu so taula'i noxou Sipisipi Ilie la ixalisou osa'ilasi.” Mo mu'oxo lexe anene vaikala manina noxou Mosingesi.

¹⁰ Muvikalaleli mukalu sila eni elalusi no tava'u so atangatuluou. Ia anu muvikala lexe, “Ai, na'oxo axone mamu. Eni kalumo amitema so xaixai aloxo ngingi ngoli'a tavivine ane ngekamakulunu vaikala laixe so Iesua. Na'itileli uasi, na'itinu Mosingesi. Xo loxo telavu, vaikala laixe so Iesua ne anu u'avutinoxu ulene'i tamitema so ilanu vaikala so pela'a.”

Tioni mumaisou evile mutalupexa no anu osi kea

¹¹ Ioxe, mukalu la emaisou loxo­tolo mukisi sila osi kea vile. La anu ane mutalupexa no anu osi la ilemolu ualasou vile lexe Vaika­laou Uxalixu Nene'axu, xe no anu vile lexe Vaikalaou Maninasi. Mo loxo anu utilovosou ili'ilixo so ukolinu xe loxo ulai no anu oto la mi ma'ia u'oxonu ne ulapusi.

¹² La iou kaxu a loxo navu 'o. Xe no kisou la ati'ati tavu'alo a loxo ati noxi'a takingi. Xe no vasimolu la uala a muxolu no anu. Uala ne anu anusisi mulavusou, evilela uasi.

¹³ Xe no anu lavulutiou la sialu musu'asousi. La imoxo'u ualasou lexe Vaikalaou Mosinge.

¹⁴ Xe ane'i ta'amisou tualasou Mosinge mitalupexa noxi'a ta'osi kea so mimulinu milai. Ta'ami ne lavu­lutii'a kea lailaixe mo malema­lengasi.

¹⁵ Xe noxou anu ane mu'uli laxune'i la laviso so oto anaxu misevile muxolu mula no anaxu. Laviso ne so uu'aulixa'a tatemanu tuatuala mukalusi no anu. Uua'ulixa'a ukalu la anu u'uli laxune'i mo a utetelisou aini so umaxa'u lexe evile umomomo so uxililioula uasi. Mo anu umalo­maloxo'a tauluaou a loxo tamitema imalomaloxo'u uaini ngiaxu no anu tanixu. Ia loxo anu, la umalo­maloxo'a no anu la'ia toxoxu noxou Mosinge e U'uli'uli.

¹⁶ La no lavulutiou veveni xe no poxo'u la ualasou muxolu lexe, Kingi manina noxi'a takingi xe Tila manina noxi'a tatiatila.

¹⁷ Ioxe, mune'e la emaisou angelo vile mutulu no aso. La mu'ava tatila noxi'a tangiangiala ane mivavava no tainu loxotolo lexe, “Ngane'e ngapita 'o so ngaxomaiou la'ilali tatila noxou Mosinge.

¹⁸ Mo so nga'ou vasime'a takingi xe vasime'a tatiatilasi'a ta'ami xe vasime'a tamitema xavine'i xe vasime'a ta'osi oli'a tamosi'a e mitalupexa noxi'a. Ngingi nga'ou vasime'a tamitema mukalusi, ane'i loxo mixolu lalavulusi oli'a tasilevi xe tamitema vitanisi oli'a tatiatila.”

¹⁹ Mukalu la emaisi'a tami vova olele xe takingi so lialia oli'a ta'amii'a a mixolu mipita so i'oto­xa'a anu ane mutalupexa no anu osi xe ta'amiou.

²⁰ Mixolu so i'otoxa'a ia anu oli'a ta'amiou mikasi'a mi vova ilou polopeti kalavoi. Polopeti kalavoi ne anu mosou e mu'oxonu sosovo so xavi no iou mi vova olele. Laso no anu vote'i anene la mu'oxo loloxa'a tamitema so mino'u sosovo noxou mi vova mo mi'itinu mi e musaxi loxo anu. Mikasi'a ilou xe imamaulisio ia misu'ane'i milu'elai no anu taxa e navu ilou lavo'o axexaxu u'ani'ani no anu.

²¹ Xe ane'i ta'amii'a loxo mixolusio la anu ane mutalupexa no anu osi muve'ave'a no anu laviso so oto ane muxolu mula no anaxu. Muve'ave'a misoisoli la tangiangiala mine'e mikalusou masaxa na'a no anu vasime'a ne.