Mupala'a 17 - Ata New Testament

Tilasi'a tasema so vote'i mixalisou lakolisou ilixo noxie

¹ Ioxe, vile noxi'a ta'angelo 7 e mitetelisou lisi 7 mune'e muvika­laleli aloxo 'o, “Nane'e 'o mo alosoienixe tilasi'a tasema so vote'i a italupexa no lexalexa loxo'u xo ane a so ixalisou lakolisou ilixo noxie ne.

² Ane'i takingi so xale tuatuala oli'a tatemanu lialia milailai noxie so i'oxonu ilixo nuni'u. Milailai la ilixo nuni'u ne muxovulaulaunixi'a a loxo itema uie mo usipaki.”

³ Angelo muvikalaleli mukalu laso Ulenu Laixe mupamuxaleli mo mulaixilo no xale lia esi'esi. Sila emaisie sema vile mitalupexa noxou mi vova e lauoinu. Xe no vasimolu mukalusi la ualauala tavu'alo masua so ulu'enu Mosinge ualasou mo uxililiou no anu. La mi vova ne kisou 7 xe komonu 10.

⁴ Xe noxie sema ne lavulutiie lauoinu xe vile loxo ela'ela 'o. Mo mitokolomo no anu koli xe lavo'o lailaixe xe xapo ane lamolisou mutiatila musuku. Xe no avole la mitetelisou kapu koli. La ili'ilixo nuni'u noxie loxo mu'ui mo tuma'u masua a muana'ana no anu kapu ne.

⁵ Xe no alaiei la uala vile latilovo mo laxu uasi'asi muxolu. Kaukavu so uala ne aloxo 'o, “Taoni toxoxu ne Vaviloni. Neni'a tasema so vote'i mukalusi. Mosou ili'ilixo tuma'u masumasua no lialia.”

⁶ La emaisie sema ne miiexu sialuxa'a tamitemaou Mosinge u'isalili xe sialuxa'a tamitema ane mia'aloxu Iesua. Emaisie lexe miie no anu la loxo misipaki. La talelilili manina.

⁷ Ioxe, angelo muvikalaleli lexe, “Tanenilili xo ma'ia? Eni apala'a­nixu laxu latilovosie sema. Xe apala'anixu latilovo so mi vova e utavulene 'o, ane kisou 7 mo komonu 10.

⁸ Aloxo 'o. Mi vova e nemaisou mukalu, tei anu muxolu ia vaimomo 'o uxolula uasi. Ia anu a so utelo ula no taxa e ulu'elai avile. Utelo ukalu la ulai uxalisou mamulosi. La tamitema no lialia mukalusi ikulukemolu mi vova xo imaisou muxolu tei xe uxolu vaimomo 'o uasi ia ili'i uxolula. Tamitema anene Mosinge ukauka­vunu ualasi'a uasi no anu lavuku so mauli mi ne ukoinu lialia uao.

⁹ Ioxe, loxo itema lavulavuou u'asi'asi la mi 'o upala'a noxou. Anu kisou 7 ne usosovosou la'ola'olu 7 e sema mitalupexa no anu.

¹⁰ Xe kalumo la kisou 7 ne usosovosi'a takingi 7. La ta'uve noxi'a mimamulo mukalu, xe vile a uxoxolu, xe vile uxali uao. Ia loxo uxali la uxolu voxo ataxusi.

¹¹ Xe noxou mi vova ane muxolu tei ia vaimomo 'o uxolu uasi la anu vile noxi'a takingi 7 ne. Anu vile noxi'a xe ili'i la uxali 8-sia kalumo, ia anu so uxalisou mamulo ane.

¹² Xe no anu komonu 10 e nemaisou la usosovosi'a takingi 10. Ane'i 10 ne itulu uao ia ili'i ino'u xavi noxou mi vova ne so itulu takingi. Itulu takingi ia itulu maxuveni uasi, aso iou soxu vilesisi.

¹³ Ane'i itulu takingi axone tava'u vilesisi ane so ipilixinu xavi ilou ualasi'a ulai noxou mi vova olele.

¹⁴ La ane'i i'otoxu Sipisipi Ilie. I'otoxu ia anu oli'a tamitemaou ane mu'avali'a xe musosovosi'a xe milopalanu ne, iua'ulixa'a. Iua'ulixa'a tauluaou Sipisipi Ilie xo anu Tila manina noxi'a tatiatila xe anu Kingi manina noxi'a takingi.”

¹⁵ La muvikalaleli aloxo 'ola, “Lexalexa e nemaisie sema so vote'i italupexa no anu ne usoso­vosi'a lailaili mukalusi xe tatemanu tuatuala xe vasime'a iouiou xe vaikalai'a vilevilesi.

¹⁶ Xe no anu komonu 10 nemai­sou la ane'i oli'a mi vova ne ixililiie sema so vote'i olele. Ixililiie la imasuane mo isisinu lavulutiie mo i'ou vasimele xe mukalu la itauxu navu ka i'elaxe avile.

¹⁷ Ane'i i'oxo axone xo Mosinge molu upamu­xanu tane'i laso loxo ane'i, la i'oxo lexe imulinu masaxa noxi'asi. Ia no anu mi e i'oxonu ne Mosinge uxalixu masaxa noxoumo. Xe takingi ipilixinu xavi noxi'a ulai noxou mi vova olele la anene uxalixu nene'axu vaikalaou Mosingesi ane.

¹⁸ Xe noxie sema e nemaisie la isosovosou taoni toxoxu e u'uli laxune'i takingi so lialia mukalusi.”