Mupala'a 16 - Ata New Testament

Minixi'u lisi 7 e muana'ana no anu la'ia noxou Mosinge

¹ Ioxe, elomu la xoli tatila molu no tasou Mosinge la muvikalane'i ta'angelo 7 aloxo 'o, “Ngingi ngano'u lisi 7 e muana'ana no anu la'ia noxou Mosinge mo ngani­xinixi'u ulu'elai no lialia.”

² Laso angelo ane tei mulai munixi'u lisi noxou mulu'elai no lialia. Munixi'u la muxalixu xalexalevi kole masua manina no vasime'a tamitema. Muxali noxi'a ane'i ane sosovo noxou mi vova uxolu noxi'a mo mi'itinu mi e musaxi loxo anu.

³ La angelo tameisi'a munixi'u lisi noxou mulu'elai no luaki. Munixi'u la luaki muxiu muxali sialu aloxo itema musoli vasimolu sialuxu. La tamimi no luaki mukalusi ne misoisoli avile.

⁴ La angelo tatalusi'a munixi'u lisi noxou mulu'elai no lexalexa xe no anu luxuluxu mukalusi la muxali sialusi.

⁵ Sila elomusou angelo e usaxila'u lexalexa muvikala aloxo 'o, “Mosixe, nini nexolu tei tei manina mo vaimomo 'o a naxo­xolusi. Ilixomeni mulapu mo malemalengasi. Nini netilovosi'a tamitema laso nekolinu aloxo 'o la ne'oxonu mulapusi.

⁶ Xo ane'i tamitema ne mive'ave'a tamite­mameni mu'isalili oli'a tapolopeti. Mive'ave'a la sialuxa'a munixisi. Laso nexiunu lexaxa'a muxali sialu so iiexu la nekoline'i mulovo xo tava'u noxi'asi.”

⁷ La elomusou xoli molu no tanixu navu muvikala aloxo 'ola, “Ani, manina. Tatana­nexi nini Mosixe. Nini na'uli'uli avile, mo loxo nini natilovosou ili'ilixo so nakolinu la manina mo ulapusi.”

⁸ Mukalu la angelo tami'asi'a munixi'u lisi noxou mulu'elai no anu aso. Munixi'u laso aso ialuxu misevile la muxutu lala'a tami­tema.

⁹ La aso ialuxu mu'oki e mu'oki mo muxutu lala'a tamitema ia ixiunu opone'i mo so i'itinu ualasou Mosinge uasi. Ane'i milemolu vaikala masua so mipu­puiou ualasou xo mimi tu'utu'u­maxu ne muxali no anu xavi noxousi.

¹⁰ La angelo ta'uvesi'a munixi'u lisi noxou mulu'elai no anu sia kingi noxou mi vova. Munixi'u laso isivoxo musu'asi'a tatemanu xale tuatuala ane mixolu no anu xavi noxou. La navunavu mukasi'a e mukasi'a mole miko­lokolonu levexa'asi.

¹¹ Ane'i mitavulenu navunavu mo vasime'a xalevi kolesi ia ixiunu opone'i so ilixo masua noxi'a uasi. Mixolu milemolu vaikala masua so mipu­puiou ualasou Mosinge e uxolu no tualasou lailaixe.

¹² La angelo 6-si'a munixi'u lisi noxou mulu'elai no lexa tatila Iupeletisi. Munixi'u laso lexa musi so mulalaxinu vote'isi'a takingi me'a loxo aso uxali.

¹³ Xe no anaxa'a mi loxo sineke tatila xe mi vova xe polopeti kalavoi la emaisi'a ta'ulenu tamasua a loxo talokoloko milala.

¹⁴ Ta'ulenu ne ane'i ta'angelo tamasua ane ilavusou i'oxonu sosovo so xavi iouiou. Ane'i milailai mipitane'i takingi so xale tuatuala mo so ilalaxi no anu uo. Uo anene so voxo tatila noxou Mosinge e u'uli'uli avile.

¹⁵ La Tatananenge vaikalaou aloxo 'o, “Ai ngalomu. Ane'e la tamitema ikulukemelo aloxo ikulukemolu itema so pakali. Laso ngingi la ngaai uasi, ngasakinu lavalava so ngaxolu ngalalaxi. Mo so axone la ngaxalisou osa. Xo loxo uasi la ngingi loxo itema ane ukuluke xe ula mo uxalisou maila no ie'i tamitema xo pangapanga'usi.”

¹⁶ Ioxe, ta'angelo tamasua mipi­tane'i takingi mine'ene'e no anu xale lia ilemolu no anu vaikala Ipilu lexe Alimaxetoni.

¹⁷ La angelo 7-si'a munixi'u lisi noxou mulu'elai no loxotolosi. Munixi'u sila xoli tatila nonano no tasou Mosinge molu no sia kingi muvikala lexe, “Anu ane, mukalu.”

¹⁸ La lele'e mulamilami mo mupaupau xe uni'uni tatila e tatila. No voxo loxo tamitema mixali no lialia mo mune'e avile la ixamulinu uni'uni axone uasi.

¹⁹ La taoni tatila ne Vaviloni mumamulo xe muvala muxali pa'usou tatalu mo taotaoni no anu xale tuatuala mumamulo kalumo. Xo Mosinge muxavutalanu ili'ilixo masua noxi'a tatemanu taoni ne Vaviloni la mukolinu. Mukolinu la mixa­mulinu la'ia noxou Mosinge toxoxu a loxo itema uxamulinu uaini no anaxu loxo uiexu.

²⁰ La ai'ailani no luaki tasiauxu avile xe loxo tasu'anu ienge no lialia la tasaxisou la'olu vile uasisi.

²¹ Mo kalumo uali loxo aisi mulapalapau mulu'e. La aisi vilevilesi ne tu'umaxu e tu'umaxu, mumomomo no anu 50 kilo. Aisi mulapalapau no loxotolo mulu'e xe mutuvusi'a tamitema la mitavulenu navuna­vusou mu'oki e mu'oki avile. Laso ane'i mivikala masuaou ualasou Mosinge so mupalusou tu'umaxu ne.