Mupala'a 15 - Ata New Testament

Ta'angelo 7 mitetelisou mimi masumasua 7

¹ Ioxe, emaisou mi vilela iou vilemo manina mo so tanengelili no anu mupa no loxotolo. Aloxo 'o. Ta'angelo 7 a mixoxolu la mitete­lisou mimi 7 ane so ulosi'a tamitema tu'utu'umaxu mo umamu­lone'i. Tu'umaxu anene uxali ukalu la mi vile axone uxali ili'ila uasi. Xo no anu mimi 7 ne la usivitanoxu la'ia noxou Mosinge avile.

² Mo kalumo emaisou mi vile loxo luaki ia titilosi. La navu mu'ani'ani no anu. Xe emaisi'a tamitema latala a itutulu no pa'umolu luaki titilo ne mo itetelisou mi loxo kitakita noxou Mosinge. Ane'i tamitema anene miua'ulixu mi vova ilou mi e tamitema mixalixu so usaxi loxo anu xe navasou ualasou kalumo.

³ Mitulu la milexenu lexe noxou itema so xaixai noxou Mosinge e Mosisi. Mo milexenu lexe noxou Sipisipi Ilie kalumo. Lexe ne aloxo 'o, “Tatananexi nini Mosixesi. Nini Na'ulu'ulisi. Mi ma'ia na'oxonu la xavinu mo lailaixesi. Ili'ilixo noxine malemalenga mo maninasi. Nini Kingi so tuatuala mukalusi.

⁴ Tatananexi, nini ninisisi nelapusi. Laso vote'i so tamitema ixililiieni uasi. Ane'i mukalusi imama'u noxine mo ivikalasou ualasine laixe. Mo tamitema so tuatuala mukalusi ine'e no laxuneni so i'itineni xo mimi ane ne'oxonu malemalengasi a mupala'a.”

⁵ Xe mukalu la emaisou tasou Mosinge laseli a muxolu mukisi no tualasou lailaixe. Tani laseli ne Mosinge mupala'anixu masaxa noxou no anu tatei.

⁶ La emaisi'a ta'angelo 7 e mitetelisou mimi tu'umaxu 7 a mila no tasou Mosinge. Lavulutii'a malemalenga mo muvalukeasi. La misinixu laleti koli no lutune'i.

⁷ La vile noxi'a tamimi tami'a muno'u lisi koli 7 ka mulosi'a ta'angelo 7 vilevilesi. Lisi ne muana'ana no anu la'ia noxou Mosinge. Mosinge e uxoxolu kaluxu uasi.

⁸ Xe no anu tasou Mosinge la mutomu no anu umuxu iaxu ilou xavi noxou Mosinge. Tasou mutomu laso loxo ta'angelo 7 a ipilipilixinu tu'umaxu 7 noxi'a­sio la evile umomomo so u'unalai uasi manina.