Mupala'a 14 - Ata New Testament

Tamitemaou Sipisipi Ilie mukalusi milexenu lexe alavua

¹ Ioxe, emaleila la emaisou Sipisipi Ilie a mututulu no anu la'olu Saioni. La oli'a tamitemaou 144,000. La noxi'a tamitemaou ne ualasou Sipisipi Ilie xe ualasou Momu a muxolu no alaie'i.

² Xe elomosou xoli vile molu no tualasou Mosinge la tamaxu loxo lexalexa loxu mo loxo lele'e mupau tatila. Mo tamaxu loxo tamitema tavu'alo ipaiti mi loxo kita 'o.

³ La ane'i latala ne mitulu no laxunu sia kingi noxou Mosinge xe no laxune'i tamimi tami'a oli'a tatiatila 24 olele. Mitulu la milexenu lexe vile alavua. Tamitema 144,000 e Mosinge molu mulotone'i so mu'umene'i no lialia ne, ane'isi imomomo so ilavusou lexe ne, evilela uasi.

⁴ Ane'i ne ilai noxi'a tasema so i'oxonu ilixo nuni'u uasi, mi'apixa'a laixe no anu. Xe loxo Sipisipi Ilie ulai ne'ei la ane'i imulinusi. Ane'i laili tei ane Mosinge ilou Sipisipi Ilie milo­tone'i milivu noxi'a.

⁵ Tami­tema anene kalavoi vile uxolu no anaxa'a uasi mo ilixo noxi'a ulapusi.

Ta'angelo tatalu milanu vaikala

⁶ Ioxe, mukalu la emaisou angelo vilela muvava no tainu loxotolo. La anu muvotovotosou vaikala laixe ane uxolu avile. Muvotovoto mulai noxi'a tatemanu lialia xe noxi'a tamitema so xale tuatuala mukalusi xe noxi'a lailaili muka­lusi xe vaikalai'a vilevilesi xe vasime'a iouiou.

⁷ Ioxe, xolinu tatila so mulanu vaikalaou aloxo 'o, “Voxosou Mosinge utilovosi'a tamitema no lakoti a muxali 'oe. Laso ngamama'u noxou Mosinge mo nga'itinu ualasou. Xe ngavi­kalasou ili'ilixou laixe xo anu mukoinu loxotolo ilou lialia mo luaki mo lexa luxuluxu.”

⁸ Mukalu la angelo vilela mumu­linu ane tei. La angelo tameisou 'o muvikala aloxo 'o, “Taoni tatila ne Vaviloni a umamulo 'oe. Anu mumasua xo anu muolexa'a tamitema so xale tuatuala muka­lusi mimulinu ili'ilixo nuni'u so taoni ne. Anu loxo miiexu uaini pakia'u so taoni ne mo misipaki no anu.”

⁹ Mukalu la angelo vilela mumu­line'i tatamei teila. La angelo tatalusi'a 'o muvikala aloxo 'o, “Ane'i ta'ei i'itinu ualasou mi vova ilou mi e musaxi loxo anu mo ino'u sosovosou no anu alaie'i xe no avo'a la ixalisou tu'umaxu aloxo 'o.

¹⁰ Anu loxo iie no anu uaini iou vilemo. Anene, la'ia noxou Mosinge. Loxo iie no anu la'ia noxou Mosinge axone la u'oki e u'okisi. Xo ixolu no iou Sipisipi Ilie oli'a ta'angelo talaixe so navu ilou lavo'o axexaxu uto'ito'isi'a.

¹¹ Ane'i ane i'itinu mi vova ilou mi e usaxi loxo anu xe mino'u sosovo so ualasou ne ixolu itavulenu navunavu axonesi. La navu ane ixolu no anu ne umuxu utelai utelai xo mole ukalu uasisi.”

¹² Ioxe, mimi axone uxali ili'i laso avikalangengi tamitemaou Mosinge u'isalili lexe ngaxolu pumu­ngengesi. Xo ngingi ne ngaxolu ngamulinu lo noxou Mosinge mo lopala noxinge a noxou Iesuasi.

¹³ La elomusou xoli molu no tualasou Mosinge muvikala aloxo 'o, “Nini nakaukavunu vaikala ano'o. Usoko'u vaimomo 'o xe ulai ili'i la ane'i ta'ei loxo ilopala noxou Tatananenge ka isoisoli, ane'i ixalisou osa'ila tatila.” Mukalu la Ulenu muvikala lexe, “Manina. Ane'i i'osa'ilasi xo tei la sasaie'i no anu xaixai noxi'a ia ane'i a ima'ilasi. Mo xaixai loxo mi'oxonu la nene'axu laixe a uxolusi.”

La'ilali tavu'alo momoxo mukalu

¹⁴ Ioxe, emaleila la emaisou sauma kea vile. La evile loxo itema a mutalupexa no anu. Xe no kisou la ati koli loxo noxi'a takingi. Xe laviso uku anaxu misevile a mutetelisou no avolu.

¹⁵ Xe angelo vilela molu no tasou Mosinge mula. Mula la mu'ava tatila noxou anu ane mutalupexa no sauma aloxo 'o, “Nano'u lavisomeni mo na'elesou nene'axu xai 'o xo la'ilali no lialia voxosou a muxali mo momoxo mukalu.”

¹⁶ Laso anu ane mutalupexa no sauma mutangatulu so muvalinu laviso no anu lialia loxo'u. La mu'elesou la'ilali momoxo no lialia mukalusi.

¹⁷ Xe angelo vilela molu no tasou Mosinge no tualasou lailaixe mula. Anu kalumo mutetelisou laviso uku anaxu misevile.

¹⁸ La angelo vilela ane usaxila'u navu molu no tanixu navu mune'e. Mune'e la mu'ava tatila noxou angelo ane mutetelisou laviso uku ne aloxo 'o, “Nano'u laviso anaxu noxine ne so na'elesou uaini ngiaxu no anu lamolamota no lialia xo momoxo mukalu. Na'elesou mukalu laso nasu'anu la'oluxu.”

¹⁹ Laso angelo ne mutangatulu so uvalinu laviso no anu lialia loxo'u. Mukalu la mupitanu uaini ngiaxu ane mu'elesou ka musu'anu la'oluxu mu'una no anu tanixu so imalo­maloxo'u. Tanixu so imaloma­loxo'u uaini ngiaxu ne so usosovosou la'ia noxou Mosinge.

²⁰ La mimalo­maloxo'u no anu tanixu toxoxu noale no anu taoni. Mimaloxo'u mukalu la lexaxu musiali mula sila sialusi. La sialu mutapo mutelo mumomomo no anu aini isakinu no anaxa'a ta'osi mo musu'asou xale lia mumomomo no anu 300 kilomita.