Mupala'a 12 - Ata New Testament

Tioni mumaisie sema ilou mi loxo sineke toxoxu

¹ Ioxe, mi vile iou vilemo manina mo so tanengelili no anu mupa no loxotolo. Mi ne aloxo 'o. Sema vile lavulutie no anu aso a mixoxolu. Xe so'io muai no tava'e laxu. Xe tataoto 12 muxixaosou kisie a loxo ati.

² La sema ne opone mo ilie a ukiline so ivo'onu la mi'unga tatila xo navunavu mu'okisi.

³ Ioxe, mi vile iou vilemo manina mupa no loxotolola. Mi ne, a loxo sineke toxoxu lauoinu. La kisou seveni xe komonu 10. La ati loxo noxi'a takingi mumomoxu kisokisou 7 ne.

⁴ Xe mumua'inu xela'u la musilapanu tataoto tavu'alo e tavu'alo mipei no lialia mukalusi. La loxo takalipalane'i tataoto pa'usi'a tatalu la pa'usou vile ane mipei milu'e. La mi loxo sineke toxoxu ne mutulu no laxune sema mo so loxo ilie ulapau la uloxu so u'ou.

⁵ La sema mivo'o la ilie mulu. Ilie ne Mosinge musosovosou so u'uli laxune'i tatemanu tuatuala muka­lusi. La utetelisou aini so usoso­vosou xavi noxou. Mivo'o sila Mosinge mu'umenu ilie mulaixu teitexi no siasou kingi noxou no tualasou.

⁶ Ia sema ne mi'ume milai no xale lia esi'esi la mixolu no tanixe Mosinge mulalaxinusie. Mixolu so ane'i ia'a'ane umomomo anu aso 1260.

⁷ Ioxe, no tualasou Mosinge la oto tatila mu'avuti. Xo Maikeli oli'a ta'angelou mi'oto noxou mi loxo sineke tatila. La mi ne oli'a ta'angelou mikoline'i so mi'oto.

⁸ Mikoline'i ia imomomo to uasi, la ane'i vote'i so ixolu no tualasou Mosingela uasi.

⁹ Laso mikusaou mi loxo sineke tatila ne. Anu ane talemolu lexe Uluaou. Anu muxolu tatei mune'e avile vaimomo 'o xe anu mosou so u'oxo loloxa'a tatemanu lialia mukalusi. Miku­saou no tualasou Mosinge la oli'a ta'angelou.

¹⁰ Xe no tualasou Mosinge la elomusou xoli tatila muvikala aloxo 'o, “Vaimomo 'o pamauli mo xavi noxou Mosinge mupala'a avile. Xo ano'o voxo so Mosinge molu u'uli laxune'i tamitemaou. Xe Itema e musosovosou lexe Kalaisiti, xavi noxou mupala'a kalumo. Xo anu e kakau olovoxo mukusukusu'a tavivinge no anu lopala no iou Mosinge ne miua'ulixu mo mikusaou avile.

¹¹ Mukusukusu'a tavivinge axone ia loxo manina la ane'i miua'ulixu lumamo no anu xavinu sialuxu Sipisipi Ilie. Xe miua'ulixu kalumo no anu vaikala laixe milanu. Milanu laso maulixa'a ne ixavu­talanu uasi, mi'italone'i umomomo no anu solisi.

¹² Laso ngingi tatemanu tualasou Mosinge nga'o­sailasi. Ia ngingi tatemanu lialia ilou luaki la ngalaxa'ingengi xo Uluaou a mulu'e noxinge ne. Mulu'e ne la la'iaxu misevile xo ulavu lexe voxosou ataxusi.”

¹³ Ioxe, mi loxo sineke tatila ne musaxi loxo 'o la mulavu lexe mikusaou so uxolu avile no lialia. Laso anu mu'avuti xe sema ane mivo'onu ilie mulu la mulele­muline so ulosie tu'umaxu.

¹⁴ Ia ane'i milosie sema ne vivisou suluvi nenu so ivava i'ume ilai no xale lia esiesi. La mixolu no tanixe mo mi'a'ane tau ie tatalu xe pa'usou. Mixolu so italumexu mi loxo sineke tatila olele.

¹⁵ La sineke anu loxo mu'exinu lexa toxoxu so usiali mo umuline sema so upuatinixie imamulo avile.

¹⁶ Ia lia musu'uline sema mo mu'a'a so lexa e sineke mu'exinu mu'una no anu. Anu a loxo itema anaxu u'a'a so umalukusou lexa.

¹⁷ Mukalu la sineke la'iaxuie sema laso mulai so u'otoxa'a ta'ilie se'ila. Ane'i ane ilavusou ilomuxu lo noxou Mosinge xe ikasou vaikalasou Iesua lexe maninasou.

¹⁸ Laso sineke mulai mutulu no luaki pa'umolu.