Mupala'a 10 - Ata New Testament

Angelo vile mulosou Tioni lavuku se la mu'ou

¹ Ioxe, emalei loxo 'o sila emaisou angelo vile ane xavinu misevile molu no tualasou Mosinge mulu'e. Mulu'e la loxo lavulutiou no anu saumasi. Xe sosovo so vavalima muxolu no kisou. La no alaiou lamanaxu a loxo aso. Xe no tava'u la kaxu loxo navu.

² Xe kalumo mutetelisou lavuku sevile kitua muxavulala no avolu. Xe tava'u la mutulusou ane tema no luaki xe ane kaisi la mutulusou no lialia.

³ Mutulusou mukalu la mu'ava tatila a loxo laioni xolinu tatila so la'iaxu. Mu'ava mukalu xe lele'e mupau alaxu 7 la vaivaikala muxali no anu.

⁴ Ioxe, lele'e mupau alaxu 7 axone mo eni a so akaukavunu vaivaikala ne. Sila elomusou xoli molu no tualasou Mosinge muvi­kalaleli lexe, “Mamu. Vaikala ane nelomusou no anu lele'e mupau alaxu 7 ne natalumeu no oponenisi, nakaukavunu uasi.”

⁵ Ioxe, angelo e emaisou mutulu no anu luaki xe no lialia mutolosou avolu tema mulai teitexi loxo no tualasou Mosinge.

⁶ La anu muvi­kala aloxo 'o, “Eni avavalima no anu ualasou anu ane uxoxolu kaluxu uasi. Anu e mukoinu loxotolo xe lialia xe luaki oli'a tatemanu mukalusi. Avavalima lexe voxo voxo a mukalu 'oe. Mosinge ulosi'a tamitema voxola uasi.

⁷ Xo loxo angelo 7-si'a utaunu piuka noxou xe lauxu uxali, laso ane. Masaxa noxou Mosinge ane muxolu mutatalume tatei ia mupala'anixu noxi'a tamitema so xaixai noxou e tapolopeti ne, anu usivita avilesi.”

⁸ Ioxe, angelo muvikala axone mukalu la xoli molu no tualasou Mosinge muvikalaleli aloxo 'ola, “Nini nalai noxou angelo e utulu no luaki xe no lialia mo nano'u lavuku se muxavulala no avolu.”

⁹ Ioxe, elai noxou angelo la evikalanu lexe, “Nalosilo lavuku se ne.” La anu muvikalaleli lexe, “Nini nano'u mo na'ou. No anaxene la tuaxu loxo unuxu, ia no oponeni la sixulasi.”

¹⁰ Laso eno'u lavuku se ne no avolu angelo, mukalu la e'ou. E'ou la no anaxo tu'axu loxo unuxu, ia emalukusou la alaxu vilesisi no opoleli sixulasi.

¹¹ La xoli muvikalaleli aloxo 'ola, “Avikalaneni lamana aloxo 'o. Nini nalanu vaikala so pela'a noxi'a lailaili latala xe noxi'a tatemanu tuatuala xe noxi'a tamitema so vaikala vilevilesi xe noxi'a takingii'a kalumo.”