Matiu 9 - Ata New Testament

Iesua mupaipounu itema xixinu musoisoli

¹ Ioxe, Iesua mutelo no pouti so ulivu ulai xalevile no kupa no tualasou u'isalili.

² Muxali la tami­tema se'i mitavulenu itema vile xixinu musoisoli no lusou so mine'e­nu noxou Iesua. La mumaisi'a lexe milopala noxousi laso anu muvika­lanu itema e xixinu musoisoli ne lexe, “Alixeli, oponeni uai se'isisi. Tina'uxene so susu muiasi mukalu.”

³ La tamitema se'i so lavulavu no anu lavuloto milomu lexe Iesua muvikala axone laso mimunumunu noxi'a ngato'o lexe, “Ai, vaikala ane noxou Mosinge u'isalili a itema ano'o ulemolu vuluvulusi 'o.”

⁴ Ia Iesua mulavusou opone'i la muvi­kala lexe, “Axova so xavutala masua ane xo ne uxolu no opongengi?

⁵ Ma'ia ane ialuxu so alemolu? Ialuxu so avikala lexe tina'uxene so susu muiasi mukalu o ialuxu so avikala lexe natulu nano'u lusine mo nalai?

⁶ Ia eni emasaxa lexe ngingi ngalavu lexe Itema ane molu noxou Mosinge uxoxolu no lialia mo xavinu so ukalusou tina'u so susu.” Anu muvikalane'i tami­tema so lavulavu axone mukalu la muvika­lanu itema e xixinu musoi­soli ne lexe, “Nini natulu xe nano'u lusine mo nalai no tasine.”

⁷ Sila itema ne muavutu mutulu la mulai no tasou.

⁸ Xe tamitema latala ne mimalei axone la mama'u mukasi'a mo mi'iti'itinu Mosinge ualasou xo anu molu mupilixinu xavi anene noxi'a tamitema.

Iesua mu'avalou Matiu so umulinu

⁹ Ioxe, ili'i la Iesua mumuamua'i mulai xe mumaisou itema vile ualasou lexe Matiu a uxoxolu no tasou taxisi. La muvikalanu lexe, “Nane'e namulileli.” Sila Matiu mu'avuti mumulinusi.

¹⁰ Xe ili'i la Iesua oli'a tatisaipeliou mixolu mi'ani no tasou Matiu. Mi'ani la oli'a tamitema so itaxusou taxisi tapiena xe tamitema so ili'ilixo masua iouiou.

¹¹ Xe Tapalisi mimaisi'a la mitali'isi'a tatisaipeliou lexe, “Axova so tisamengi upita so u'ani noxi'a tamitema so itaxusou taxisi xe tamitema so ili'ilixo masua iouiou to ne?”

¹² Xe Iesua mulomusou vaikalai'a ne la muvikalane'i lexe, “Tamitema ipipiena uasi la ilai noxou tokota uasi. Ane'i ane ipipienasi a ilai noxou tokota.

¹³ Laso ngingi ngalai ngano'u lavulavu no anu laxu vaikalaou Mosinge vile aloxo 'o, 'Tami ane ngalavusou ngave'a lexe noxilo la amasaxau to uasi. Mi ane a'osasousi a so tangengixa'a tamene­xinge.'” Xe Iesua muvikala aloxo 'ola, “Ane'i ane me'a i'oxo lexe ane'i tamalemalenga, la ene'e so a'avali'a uasi. Eni ene'e so a'avali'a ane'i ane ilamana no anu susu noxi'asi.”

Iesua mu'oxonu latilovo se'i so ilixo e so i'apixa'a no anu la'ilali

¹⁴ Ioxe, la no voxo anene tatisai­peliou Tioni mine'e noxou Iesua la mitali'isou aloxo 'o, “Nexi noxi'a Tapalisi talavusou ta'oxonu ilixo so ta'apinexe no anu la'ilali. Ia axova, xo tatisaipelimeni ilavusou i'oxonu to uasi?”

¹⁵ Laso Iesua mu'oxonu latilovo so mukoline'i aloxo 'o, “Loxo itema vile so utaula'i ia uxolu noxi'a tamenexusio la ane'i opone'i tu'umaxu uasi, ne? Ia loxo ili'i isaxanu mo ulai mukalui laso ane'i i'apixa'a no anu ani'ani.

¹⁶ Xe vile aloxo 'o. Loxo lavalava teinu ukaka la umomomo so mosou uno'u lavalava xasixu alavua so usimenu no anu uasisi. Xo loxo 'o io u'uinu la xasixu alavua ne upipi mo ukakanu teinu ne avile.

¹⁷ Xe vile aloxo 'ola. Loxo itema vile uno'u uaini alavua la anu unava? Anu uno'u lexa vexasou teinu e mu'oxonu no anu misoposi sosoiou so utau no anu? Uasi! Xo loxo 'o io uaini alavua masi usoxonixu mole upaunoxu mo usu'a avile sila lexaxu ukasavalasi. Ia loxo utau uaini alavua no anu vexasou alavua laso ane, ilou ne uai laixesi.”

Iesua mupamauline vuanga vile misoli xe mupaipoune sema vile sialuxe munixinixi

¹⁸ La Iesua a uvikala axone noxi'a­sio la tila vile no anu tasou lavuloto mune'e ka mutangatulu no laxunu mo muvikala lexe, “Alixeli sema misoli se alala'e 'osi. Ia nini nane'e namulaxu avone noxie laso imauli.”

¹⁹ Xe Iesua mulutu so mumulinu mulai la oli'a tatisai­peliou.

²⁰ Ioxe, mulai la sema vile ane sialuxe munixinixe mumomomo no anu tau ie 12 mine'e alai no tumalou Iesua. Mine'e laso mika­sou lasio­tiou veveni no telexu se.

²¹ Xo mixavutala no opone lexe, “Loxo eni akasi se no mimiou 'o la eni masi laixeleli a.”

²² Ia Iesua muxiu loxo 'o mo mumaisie la muvikala lexe, “Alixeli, oponeni uai se'isisi. Nini nelopalaleli laso a laixeneni ne.” Sila alaxu vilesisi sema ne laixenesi.

²³ Mukalu la Iesua mulutu xo xe muxali no tasou itema tila ne la mumaisi'a tamitema mixolu mita­tama. Xe leviani a mitausou mi loxo iu mo ane'i tamitema latala mipi­tanu anaxa'a mu'oki manina.

²⁴ la Iesua muvikalane'i lexe, “Ngingi ngalailai. Sema ne isoli uasi, miaisi a.” La ane'i mukalusi mikekeusi.

²⁵ Ia mikusakusai'a tamitema ne milala mukalu laso Iesua mu'unalai mo mutila'e sema no avole sila mitulusi.

²⁶ La a'alo so mi e Iesua mu'oxonu ne muia­veiave musu'asou xale lia ne mukalusi.

Iesua mupaipoune'i tamitema tamei ie'i mutomu xe vile anaxu mutomu

²⁷ Ioxe, ili'i la Iesua mulutu mo mumuamua'i mulai. La tamitema tamei ie'i mutomu mimulinu xe mi'ava noxou lexe, “Nini ilusunu Tevitio, naiaiama noxixe.”

²⁸ Xe anu a mu'unalai no tani la ane'i ilou mi'una noxou. La Iesua muta­li'isi'a lexe, “Ningi ngilou ngalo­pa­laleli lexe amomomo so asu'ulingengi?” La ilou mikolinu lexe, “Ani, Tatila. Nexi telopala axone.”

²⁹ Mukalu xe anu mumu­laxu avolu no ie'i la muvikala lexe, “Anu uxali a loxo ngelopala ne.”

³⁰ Sila ilou ie'i muka. La Iesua muvikala pakia'u noxi'a lexe, “Ngalomu, mamu so ngapa­la'anixu mi 'o noxou evile.”

³¹ Ia ilou milai mivulavulanu a'alosou no xale tuatuala mukalusi.

³² Xe ilou a mila la tamitema se'i mine'enu itema vile anaxu mutomu xo angelo masua muxolu noxou.

³³ Laso Iesua mukusaou angelo masua ne sila itema ne muvivi­kalala. La tamitema latala tane'ilili mo mivikala lexe, “Ai, tatei mi aloxo 'o uxali lai ne Isilaeli 'o uasisi.”

³⁴ Ia Tapalisi mi'oxo lexe, “Anu uno'u xavi noxou tila noxi'a ta'angelo tamasua so ukusai'a to axone!”

Iesua tanuxa'a tamitema latala ne

³⁵ Ioxe, no voxo ne Iesua mumo­moxu taotaoni xe tuatuala mo mu'una'una so uvotovoto no tata­sou lavuloto noxi'a. La mulanu vaikala laixe so voxo ane Mosinge molu u'uli laxune'i tamitemaou. Xe mupaipoune'i tamitema no anu tu'utu'umaxu mitavulenu no vasime'a mo no anu siki iouiou.

³⁶ Mo loxo mumaisi'a tamitema latala axone la anu tanuxa'a misevile xo ane'i opone'i muvaxa mune'e mo xoluxoluxa'a masua. Ane'i loxo tasipisipi ane tatanane'i so usaxila'a uasi.

³⁷ Laso anu muvi­kalane'i tatisai­peliou lexe, “Xai lingamo mo nene'axu tavu'alo a mulalaxi mukalu, ia tavokuvoi so itaxusou a tata'ei mososi.

³⁸ Laso ngalinga noxou Tatananu xai so upalusi'a tavo­kuvoi se'ila mo so itaxusou nene'axu xaixu.”