Matiu 8 - Ata New Testament

Iesua mupaipounu itema vile so siki lepelesi

¹ Ioxe, Iesua mulutu no la'olu so mulu'elai la tamitema latala e latala mimulimulinu.

² La itema vile so siki lepelesi mune'e mutangatuluou Iesua la muvikalanu lexe, “Tatilao, loxo nini namasaxa la nini namomomo so naxexenu pipiena ano'o so eni axali amalemalenga.”

³ Laso Iesua mumexinu avolu mo mumulaxu no vasimolu itema ne la muvikala lexe, “Eni amasaxa. Nini namalemalenga.” Xe alaxu vilesisi la pipiena lepelesi ne muxexesou itema ne sila mumalemalenga.

⁴ Ia Iesua muvikalanu lexe, “Nalaxa'i laixe. Mamu so napala'anixu mi ane muxali noxine 'o. Na'oxo aloxo 'o. Nalai namaxa'ine noxou pilisiti mo napilixinu mi so lexe noxou Mosinge no anu vote'i u'isalili loxo Mosisi mulemolu. Mo so axone la tamitema ilavu lexe nini namale­malengala.”

Iesua mupaipounu voiou tila vile no anu ami

⁵ Xe mune'e la Iesua mu'unalai ne Kapeniamu. La tila vile noxi'a ta'ami so Lomu 100 mune'e muli­nga pakia'u noxou.

⁶ Muvikala lexe, “Tatilao, eni voixeli vile pipiena mukasou mo a muai no tani. Anu vasimolu musoisoli la utavulenu navunavusou e lapilai uasisi.”

⁷ Laso Iesua mukolinu lexe, “Io'o, eni alai apamaulinu.”

⁸ Ia tila noxi'a ta'ami muvikalanu lexe, “Uo, Tilao, eni amitema alaixe so na'una no tasilo uasi. Nini naxolu 'o mo navikalasi mo so voixeli laixenula.

⁹ Eni avikala axone xo eni axolu no laxu tilasilo no anu ami e u'uli laxuleli. Xe ta'ami ane a'uli laxune'i la ane'i ixolu no laxo kalumo. Xo loxo avikalanu vile lexe, 'Nalai!' la anu ulutusi. Xe loxo avikalanu vile lexe, 'Nane'e 'o,' la anu une'esi. Xe loxo avikalanu voixeli vile lexe, 'Na'oxo aloxo 'o,' la anu u'oxonusi ane.”

¹⁰ Iesua mulo­mu­sou vaikala noxou itema ne la mukisikula. Mo muvikalane'i tamitema latala ane mimulinu ne lexe, “Avikalangengi manina aloxo 'o. No taingengi Ta'isilaeli la axalisou itema vile lopala noxou laixe aloxo itema ano'o to uasi.

¹¹ La avikalangengi lexe ili'i tamitema tavu'alo me'a loxo no aso uxali xe loxo no aso ulu'elai. Ane'i ine'e so oli'a Apala'amu xe Aisaki xe Iakovo italupexa so i'ani no latevolo nonano no voxo so Mosinge molu u'uli laxune'i tamitemaou no tualasou.

¹² Ia noxi'a tamitema ane Mosinge muiloune'i tei so i'una ixolu nonano no voxo loxo molu u'uli laxune'i tamitemaou la usupeine'i noale no isivoxo. La ixolu ne itama tatila mo anaxa'a ukala­kikisi.”

¹³ Mukalu la Iesua muvikalanu tila noxi'a ta'ami lexe, “Nalutu nalaisi, xo mi ane nelopala lexe uxali la uxali noxine axonesi.” La alala'e se nesi voiou ne laixenu avile.

Iesua mupaipoune'i tamitema ipipiena mose'i

¹⁴ Ioxe, ili'i la Iesua mu'unalai no tasou Pita la mumaisie Pita leuanu a miai no lu xo mipipiena mo vasimele lumotosou.

¹⁵ Xe Iesua mukasi no avole sila pipiena mupaxelesie ka mi'avuti milala­xinu xou la'ilali.

¹⁶ Mixolu xe no olovoxo la tamitema latala mine'ene'i tame­nexi'a ane ta'angelo tamasua mikasi'a noxou. Mine'ene'i noxou laso anu mukusakusai'a noxi'a tamitema ne no anu vaikalaousi. Xe tamitema ane misiki la mupai­poune'isi.

¹⁷ La no anu vote'i anene muxalixu nene'axu vaikalaou Mosinge e mulemolu no anaxu polopeti Aisaia aloxo 'o, “Anu molu mu'umenu navunavu na'a nenge mo muxexenu pipiena noxinge.”

Iesua muvikalasou vote'i so tamitema imulinu

¹⁸ La mixoxolu xo xe ili'i Iesua mumaisi'a tamitema tavu'alo mitulu mixixausou laso anu muvikalane'i tatisaipeliou lexe oli'a ilai xale­vile no kupa.

¹⁹ Xe itema vile so lavulavu no anu lavuloto mune'e la muvikalanu Iesua lexe, “Tisao, no tuala aneva loxo nini nalai no anu la eni amulinenisi ane.”

²⁰ Ia Iesua muvikalanu lexe, “Ta'a'a tavova taxataxasi'a no lia so ixolu no anu. Xe tangiala tasi'a kalumo. Ia Itema ane molu noxou Mosinge anu tanixu so uai uasi.”

²¹ Xe itema vilela ne anu mulimuliou Iesua muvikalanu lexe, “Tatilao, na'ita­loleli so alai a'asixu mamilo teio.”

²² Ia Iesua mukolinu lexe, “Tami­tema ane misoli mukalu la me'a i'asixa'a tamenexi'a isoisoli, ia loxo nini la namulilelisi.”

Iesua mutalosou la'ave

²³ Ioxe, mukalu la Iesua mutelo no anu pouti la tatisaipeliou mimulinu kalumo.

²⁴ La oli'a milutu milai xo la la'ave tatila muxalisi'a no kupa. Muxalisi'a la xasi mupeipei mu'una no pouti tanu xo mole so u'uo'uosou. Ia Iesua muai la muai avile.

²⁵ La ane'i milai mitulusou mo mivika­lanu lexe, “Tatananexi, nasu'uli­nexi uaio? Nenge'a so tamamulo 'oe!”

²⁶ Xe anu muvi­ka­lane'i lexe, “Ngingi to ne tamitema so lopala isusu'a sesi. Ngingi nga'olo'olo xo ma'ia?” Mukalu la anu mu'avuti mutulu mulavixu la'ave ilou xasi. Sila sivo mutalo xe kupa muai se'isisi avile.

²⁷ Laso ane'i tane'ililiou lexe, “Itema kaini axova ano'o, xo anu uvikalasi ka sivo ilou lexa ulomuxusi.”

Iesua mukusai'a ta'angelo tamasua tavu'alo noxi'a tamitema tamei

²⁸ Ioxe, Iesuaena milutu xo la mixali xalevile no kupa la misua no lia xa'a Taxatala. La tamitema tamei ta'angelo tamasua mikasi'a me'a no lamatimati mine'e mixa­lisou. Ilou ne mixolu mivovasi la tamitema imuamua'i ipolo no vote'i ne uasisi.

²⁹ La ilou mi'ava tatila lexe, “Nini Mosinge Olu, nene'e so na'oxo mi ma'ia noxixe 'o? E voxo a uao, ia nene'e kolo­kolo aloxo 'o so namasuanexi, ne?”

³⁰ Ioxe, no voxo ne la tameme la'oluxa'a to a mixolu mi'ani'ani va'axu sevile.

³¹ Laso ane'i ta'angelo tamasua milinga pakia'u noxou Iesua lexe, “Loxo nini a so nakusa'ixe la napalusixe ta'unalai noxi'a tameme olele.”

³² La anu muvikalane'i lexe, “Io, ngalaisi!” Laso ta'angelo tamasua mixexesi'a tamei ne mo mi'unlai noxi'a tameme sila tameme miaveiave mitaloxo no maiaxu kupa sika mi'uo'uo avile.

³³ Xe tamitema e misaxila'a tameme ne mimalei axone la mi'ume'ume mo mixali avile no taoni. Milai mixali la mia'aloi'a tatemanu no anu mimi ne mo mipala'anixu mi e muxali noxi'a tatamei e ta'angelo tamasua mikasi'a olele.

³⁴ Laso tatemanu taoni ne mukalusi mine'e so ixalisou Iesua. Mine'e xe mimaisou la milinga pakia'u noxou lexe uxexesou xale lia noxi'a mo ulaisi.