Matiu 5 - Ata New Testament

Iesua mupala'anixu xoluxolu ane laixe

¹ Ioxe, Iesua mumaisi'a tamitema latala milasi mine'ene'e laso anu mutelai no la'olu vile mo mutalupexa. Mutalupexa mukalu la tatisaipeli mine'ene'e noxou.

² La mulanu vaikala so pelototo noxi'a aloxo 'o,

³ “Laixe noxi'a ane'i ane ilavu lexe no anu xoluxoluxu ulene'i la ane'i ta'olo­xolasi. Xo voxo so Mosinge molu u'uli laxune'i tamitemaou no tualasou la ane'i ixolu nonano ne.

⁴ Laixe noxi'a ane'i ane itatama vaimomo 'o xo ili'i la ixalisou mamatola ane.

⁵ Laixe noxi'a ane'i ane me'a ilu'ene'i xo Mosinge muvavalima lexe anu upilixinu lialia mukalusi noxi'a.

⁶ Laixe noxi'a ane'i ane opone'i ututuluou ilixo mulapusi aloxo itema usolixu la'ilali ilou lexa. Xo opone'i ututuluou ilixo malemalenga axone la uxali u'isalili no anu masaxa noxi'a ne.

⁷ Laixe noxi'a ane'i ane opone'i lelemesou so susu noxi'a tamenexi'a xo ane'i ixalisou iaiama ane.

⁸ Laixe noxi'a ane'i ane opone'i malemalenga xo ane'i imaisou Mosinge ane.

⁹ Laixe noxi'a tamitema ane xavine'i so ikalusou oto mo tu'umaxu xo ane'i itavulenu uala lexe Mosinge ta'olu.

¹⁰ Laixe noxi'a ane'i ane imulinu ilixo mulapusi ka itavulenu tu'umaxusou no avo'a tamitema. Xo voxo so Mosinge molu u'uli laxune'i tamitemaou no tualasou la ane'i a nonano ne kalumo.

¹¹ Laixe noxinge loxo ngatavu­lenu navuna­vusou ualasilo. Loxo tamitema ipupuiengi mo ilosinge tu'umaxu mo ikalavoisinge no anu vaikala masua iouiou.

¹² Loxo i'oxo noxinge axone la nga'osa'osasi xo ngaxalisou lapesou lailaixe no tualasou Mosinge. Mo ngalavu lexe tatei noxi'a tapolopeti ane mi'uli noxinge la tamitema milosi'a tu'umaxu iou vilesisi axone.”

Latilovo so au xe lalamo

¹³ Xe Iesua muvikala aloxo 'ola, “Ngingi loxo ausou lialia. Ia loxo au tu'axu ukalu la vote'i so taxalisou tu'axula axova? E uasi, anu xaixai no anula uasi. Anu usu'a vitanisi ka tamitema imuamua'isousi.

¹⁴ Mo ngingi loxo lalamo so lialia. Xe ngaxavutalanu, loxo taoni vile uxolu teitexi no la'olu kisou la anu upala'asi, utalume to uasi.

¹⁵ Mo aloxo 'ola. Loxo itema ulexexu lalamo la anu usu'asou no anu ti'a uasi. Anu umulaxu no tanixu lalamo u'isalili so tatemanu tani mukalusi ie'i lamana no anu.

¹⁶ La anu axonesi, lamanangenge utalo­sou ie'i tamitema mo so imaisou ilixo laixe noxinge. Imaisou laso ane'i i'itinu ualasou Maminge ane uxolu no tualasou lailaixe.

Iesua mupela'axu lo noxou Mosinge

¹⁷ Xe musolonu aloxo 'ola, “Mamu so ngaxavutala lexe eni ene'e so amamulonu lo xe vaika­lai'a tapolopeti. Ene'e so axililiou uasi, ene'e so amomoxu.

¹⁸ Xo avikalangengi manina aloxo 'o. Vaimomo 'o ulai avile uxali no anu kaluxusou loxotolo ilou lialia 'o la vaikala sevile utuxu no anu lo tasiauxu vitanisi uasisi. Anu uxolu axonesi xo mo nene'axu mimi mukalusi uxali.

¹⁹ Laso loxo itema vile ulomuanu lo pa'usou ane tamitema i'oxo lexe mi vitanisi mo ulapune'i se'i so ilomuanu kalumo, la itema anene uxolu mi vitanisi no voxo loxo Mosinge molu u'uli laxune'i tamitemaou. Ia itema ane umulinu lo mo ulapune'i tamitema so imulinu kalumo, la no voxo so Mosinge molu u'uli laxune'i tamitemaou no tualasou, itema ne uxalisou uala tatila.

²⁰ Xo tamitema so lavulavu no anu lo oli'a Tapalisi i'oxo lexe ane'i tamitema talapusi. Ia avikala­ngengi aloxo 'o. Loxo ngingi ngaxali talapu manina so uua'ulixa'a avile uasi, la umomomo uasi manina so nga'una ngaxolu no voxo so Mosinge molu u'uli laxune'i tamitemaou no tualasou.

Talovonixu vaikala noxou ena'ei so ukotinenge

²¹ La Iesua muvikala aloxo 'ola, “Ngingi ngelomusou voto noxi'a tatiatila tatei lexe, 'Mamu so ngave'a tamitema isoli. Xo loxo itema uvau menexu usoli la anu ukoti ane.'

²² Ia eni avikalangengi aloxo 'o. Loxo itema la'iaxuou vimou la anu utulu no lakoti mo so susu noxou upala'a. Xe itema loxo usa'isa'isou vimou la utulu no anu lakoti ane mutiatila manina. Xe itema loxo uvikalanu menexu vile lexe, 'Nini longulongu to!' la itema ne susu noxou anene masua umomomo so upalusou no navu so mamulomo.

²³ Laso loxo nane'enu mi vile no tanixu navu so lexe noxou Mosinge. Nane'enu ka naxavutalanu tu'umaxu vile ane uxolu no taingengi ngilou vivine la na'oxo aloxo 'o.

²⁴ Napilixinu mi e nene'enu ne no pa'umolu tanixu navu io nini nalai noxou vivine so ngalovonixu mi e uxolu no taingengi ne. Mukalu laso nalivu nalai no tanixu navu so napilixinu mi e nene'enu ulai noxou Mosinge.

²⁵ Mo aloxo 'o. Loxo itema vile so ukotixene la napalea so nasolixu tu'umaxu mo opongengi vilesisila. Xo loxo 'o io ulapuneni natulu no laxunu tiasi la masi tiasi upilixi­neni no avo'a tapolisi ka ikalavu­sunenisi.

²⁶ Avikalaneni manina lexe loxo axone la nini naxolu nakalavusu xo mo nalotonu lamoli umomomo u'isalili loxo misosovo­sousi ane.”

Iesua muvikala lamana so itema u'oxonu ilixo nuni'u

²⁷ La Iesua muvikala aloxo 'ola, “Ngingi ngelomusou voto so tatei lexe, 'Ngingi ane ngatautaula'i la mamu so ngaxola'u taula'i no anu ilixo nuni'u.'

²⁸ Ia avikalangengi aloxo 'o. Loxo itema vile umaisie sema vile mo oponu umuline so u'isuxe la anu mu'oxonu ilixo nuni'u noxie no anu oponui ane.

²⁹ Xe loxo ieni tema ulapuneni no anu susu la naluvunu usu'a. Xo loxo vasimene pa'usou usu'a axone la anu ialuxu sevile. Ia loxo anu ulapuneni no anu susu ka nasu'a avile no navu so mamulo la natavulenu tu'umaxusou lapilai uasisi.

³⁰ Mo loxo avone tema ulapuneni no anu susu la naxotonu uxexe. Xo loxo vasimene pa'usou usu'a axone la anu ialuxu sevile. Ia loxo ulapuneni no anu susu ka nasu'a avile no navu so mamulo la natavulenu tu'umaxusou lapilai uasisi.”

Iesua muvikalasou ilixo so taula'i uxoto

³¹ La Iesua musolonu lexe, “Voto vile tatei aloxo 'o. 'Loxo itema vile ukusaie semau la anu ulosie lapepa so taula'i uxoto ne.'

³² Ia avikala­ngengi aloxo 'o. Loxo itema semau ixola'u taula'i no anu ilixo nuni'u uasi ia anu ukusaiesi la anu upalusie no anu ilixo nuni'u ane. Xo loxo ane itaula'ixu itema vilela la anu taula'i maninasou uasi, ixolu noxou vitanisi. Xe itema utaula'ixe sema ane mulue mukusaie tei la anu utaula'ixe manina uasi, anu uxolu noxie vitanisi ane.

Mupela'a lexe mamu so talemolu Mosinge ualasou so tasakinu vaikala

³³ Xe voto vile noxi'a tatiatila tatei aloxo 'ola, 'Mamu so ngakalavoi no anu vavalima ane nga'oxonu noxou Tatananenge. Loxo ngavavalima noxou la ngaxalixu nene'axusi.'

³⁴ Ia eni avikalangengi aloxo 'o. Ngasakinu vaikalamengi lexe manina teitexi mamu. Ngalemolu tualasou Mosinge axone so ngasakinu vavalima noxinge uasi xo anene tanixu sia kingi noxou Mosinge.

³⁵ Mo ngalemolu lialia so ngasakinu vaikala uasi xo lialia ne anu tanixu Mosinge tava'u. Mo ngalemolu Ielusalemo so usakinu vaikalamengi uasi xo anu so taoni noxou Kingi Tatila.

³⁶ Mo mamu so ngalemolu kisinge so u'oxonu pakia'u vaikalamengi. Xo axova, ngingi menge ngamomomo so ngaxiunu kisinge laxusou uxali sisilisou o ulivu uxali su'inula? Uasi to!

³⁷ Laso ane, vaikalamengi utalo no anu ani o uasi. Anesi. Xo loxo ngasikinu no anu vaikala se'ila la anu molu noxou mosou sususi ane.

Pelototo lexe tasusunoxu itema so takolinu susu noxou mamu

³⁸ Xe Iesua muvikala aloxo 'ola, “Ngingi ngelomusou voto tatei lexe, 'Loxo itema vile umasuanu menexu iou la ngakolinu axonesi. Xe loxo itema vile uxola'u menexu anaxu ilanu la ngakolinu axonesi.'

³⁹ Ia eni avikalangengi aloxo 'o. Nakolinu susu noxou itema ane ususunixine uasi. Na'oxo aloxo 'o. Loxo usavaline la naxiu xalevile so usavalou kalumo.

⁴⁰ Xe loxo itema vile umasaxau ukotixene so uno'u lasiotimeni la nalosou lasingilisi so sivo kalumo.

⁴¹ Mo loxo itema usouneni so natavulenu mimiou umomomo no anu kilo­mita vile la nini natavulenu umomomo no anu tamei.

⁴² Loxo itema vile ulingau mi ma'ia noxine la nalosousi. O loxo itema une'e uxalixu tina'u noxine la naxililiou uasi.”

Pelototo lexe tasexelaxa'a tauluamenge

⁴³ La musolonu aloxo 'ola, “Ngingi ngelomusou voto tatei lexe, 'Ngingi ngasexelaxa'a tamenexinge no pa'upa'umenge ia loxo tauluamengi la ngamatapiane'isi.'

⁴⁴ Ia eni avikalangengi aloxo 'o. Ngasexe­laxa'a tauluamengi xe ane'i ane ilosinge tu'umaxu la ngalingau su'ulisi'a noxou Mosinge.

⁴⁵ Xo ngingi ne ngaxolu ta'olu Maminge e uxolu no tualasou lailaixe. Anu ulavusou u'oxonu aso noxou uieisi'a tamitema tamasua xe tamitema talaixe. Mo anu ulavusou u'oxonu la'iua usilisi'a tamitema talapusi xe tamitema so ili'ilixo ukilikalu.

⁴⁶ Xo loxo ngasexe­laxa'a tamitema ane isexelangengesi la ngaxalisou lakolisou axovao? Ai, ane'i tamitema so itaxusou taxisi ilavusou i'oxo axone to kalumo.

⁴⁷ Mo loxo ngavikala aso noxi'a tavivingesi la anene ilixo laixe noxi'a se'i axova? Xo ane'i tami­tema so isivoxo i'oxo axone to kalumo.

⁴⁸ Laso ane, telexu aloxo 'o. Ngingi ngaxolu talapu no anu ngiou ngiou mukalusi a loxo xoluxoluxu Maminge e uxoxolu no tualasou lailaixe.