Matiu 28 - Ata New Testament

Iesua mutulu mumaulila

¹ Ioxe, Voxo so Ma'ila mukalu xe aso so uxali no anu voxo tei no anu viki la Malia so Makatala olie Malia ane vile milai so imaleisou lulu.

² Milai mixali sila mimalei lexe uni'uni toxoxu muxali. Xo angelou Tatananenge vile mulu'e no tuala­sou Mosinge mo mupi­palo'u lavo'o muxexesou lulu anaxu ka mutalu­pexa no latanu.

³ La alaiou lama­naxu aloxo lele'e lamixu xe lavulutiou muvalukea aloxo aisi 'o.

⁴ Xe ane'i ta'ami e mi'oxo latolo ne mi'ume la vasime'a mu'olo'olo kena mole vasime'a musoisolisi.

⁵ Xe tasema mimalei axone la angelo muvikane'i lexe, “Mamu so nga'ume. Xo eni alavu lexe ngingi ngene'e so ngakamulinu Iesua e mililixu no ovu valautu ka musoli.

⁶ Anu uai 'o uasi, anu mutulu mumauli a loxo molu mulemolu mala'o. Xo ngane'e mo ngamalei, tanixu muai no anu a.

⁷ Laso ngilou ngapalea ngalai ngavikalane'i tati­sai­pelou lexe anu mutulu no anu soli. Mo ngalomu, anu mu'uli noxinge mulai ne Xalili, laso ngingi ngalai ngamaisou ne. A eni ene'e so apela'inge axonesi.”

⁸ La tasema tamei ne mimama'u ia osa'ila misevile sika mipalea milutu so ilai ia'aloi'a tatisaipeli.

⁹ Ane'i a milalai sila Iesua muxalisi'a no vote'i la muvikala lexe, “Kakau laixe.” Sila ilou milai noxou ka misavunoxu tava'u mo mimaxa'u mama'u mo osa noxi'a noxou.

¹⁰ La Iesua muvikalane'i ilou lexe, “Ngilou ngamama'u uasi. Ngalai ngavikalane'i tavivilo so ilai ne Xalili xo ane'i imaisilo ne.”

Vaikalai'a ta'ami

¹¹ Ioxe, tasema tamei a ilalaisio la se'i noxi'a ta'ami e milosou lulu milutu mi'unalai no taoni so ia'aloi'a tatiatila noxi'a tapilisti no anu mimi e muxali.

¹² Tatiatila noxi'a tapilisiti milomusou a'alo noxi'a mukalu la milai mipita noxi'a tatiatila noxi'a Taiuta. Mipita xe opone'i vilesisi mukalu laso mipi­lixinu lamoli tatila noxi'a ta'ami ne.

¹³ La mipeloto­tosi'a lexe, “Ngavi­ka­lane'i tamitema aloxo 'o, 'Tatisai­peliou mine'e no olovoxo ka mitokenixu Iesua vasimolu mi ne nexi teiasio.'

¹⁴ Xe loxo tila no anu xamani ulomu axone la nexi mexe tavikalanu mo so ngingi ngatavu­lenu tu'umaxusou mi 'o uasi.

¹⁵ Laso ta'ami mino'u lamoli ne xe mivulunu a'alo a loxo tatiatila mipe­lo­totosi'axu. La a'alo anene muia­veiave no taine'i Taiuta mo a uxoxolu vaimomo 'osio.

Iesua mupilixinu xaixai noxi'a tatisaipeli

¹⁶ Ioxe, tatisaipeli 11 mimuamua'i xo la mixali ne Xalili mo milai avile no anu la'olu e Iesua mupela'axu lumamo.

¹⁷ Milai xe mixalisou la mimaxa'u mama'u mo osa noxi'a noxou. Ia ane'i vilevilesi lopala noxi'a muvaxa mune'esio.

¹⁸ Xe Iesua mune'e alai noxi'a la muvikalane'i lexe, “Mosinge mulosilo xavi so a'uli laxunu mimi mukalusi no lialia xe no tualasou.

¹⁹ Laso ngingi ngalai no xale tuatuala mukalusi mo ngalapune'i tamitema mukalusi so ixali tatisaipelixeli. Mo nga'oxonu ilixo so kelele noxi'a no anu ualasou Maminge xe Olu xe Ulenu Laixe.

²⁰ Xe ngavotone'i lexe imulinu pelototo ane epilixinu noxinge mukalusi. Mo ngalomu, eni axolu noxinge utotomu xo mo ulai uxali avile no anu kaluxusou lialia 'o.”