Matiu 27 - Ata New Testament

Iesua mutulu no laxunu Pailati

¹ Ioxe, mixolu xo xe lamanae la tatiatila noxi'a tapilisiti xe tatiatila noxi'a Taiuta mipita so milalaxinu vote'isi'a lexe ivau Iesua usoli axova.

² Mukalu la misakinu Iesua mo milaixu mipilixinu no anu Pailati avolu.

Iutasi musoli

³ Xe Iutasi e mupilixinu Iesua no avo'a tauluaou mumalei lexe tatiatila noxi'a tapilisiti oli'a tatiatila noxi'a Taiuta misakinu vaikala no lakoti lexe ivau Iesua usoli. Mumalei axone xe muxa­mulinu lexe oponu muto'omolu laso mulivunoxu lamoli siliva 30 olele noxi'a tatiatila ne.

⁴ La muvika­lane'i lexe, “Uo eni esusu. Xo itema e epilixinu no avonge ne anu susu vile so sialuxu unixi no anu uasi.” Ia ane'i mikolinu lexe, “Anene mi noxixe to uasi, mi na'a ninisi.”

⁵ Laso Iutasi mupeinu lamoli nonano no tasou Mosinge sika mulai mu'aili'o mole musoli avile.

⁶ Xe tatiatila noxi'a tapilisiti mino'u lamoli ne la mivikala lexe, “Lamoli ano'o anu lapesou soli noxou itema mo sialuxu unixi. Laso mamu so tapitanu no anu lamoli so tasou Mosinge xo axone la taxola'u lo ane.”

⁷ La mivivikala xo xe opone'i vilesisi laso milotonu apu sevile. Tei la anu liaxa'a tamitema e ilavusou ikapikapinu pilika so i'oxonu lasopeni no anu. Tatiatila noxi'a tapilisiti milotonu xo opone'i lexe anu uxali lamati­matisi'a tamitema taasila.

⁸ Milo­tonu no anu lamoli anene laso tamitema mivotongalelenu lexe apu so sialu. Mo uala anene a ilemolu vaimomo 'osio.

⁹ Laso anene muxalixu nene'axu vaikalaou Mosinge e mulemolu no anaxu polopetiou Ielemaia tatei lexe, “Ane'i mino'u lamoli siliva 30. Anene lape ane Taiuta miso­sovosou so ilotonu mauli noxou.

¹⁰ Mino'u lamoli ne ka milotonu liaxa'a tamitema so ikapikapinu pilika, aloxo Tatana­nenge mupe­la'iloxu.”

Pailati mutali'i noxou Iesua

¹¹ Ioxe, Iesua mutulu no laxunu tila no anu xamani e Pailati la anu mutali'isou Iesua lexe, “Nini kingi noxi'a Taiuta, ne?” La Iesua mukolinu lexe, “Ani, aloxo nini mene nelemolu.”

¹² La ane'i tatiatila noxi'a tapilisiti oli'a tatiatila noxi'a Taiuta mito'omolu Iesua no anu vaikala tapiena ia anu ukoli vile uasi.

¹³ Laso Pailati mutali'isoula lexe, “Axova, nalomusou uasi? Ane'i ito'omene no anu vaikala tapiena 'o, ia nakoline'i uaio?”

¹⁴ Ia no anu mimi mukalusi e mito'omolu no anu ne Iesua ukolinu vile noxou Pailati uasisi, sila tila no anu xamani ne tanulili misevile.

Pailati mupilixinu Iesua so ivau usoli

¹⁵ Ioxe, no anu tautau ie utotomu no anu voxo so lavilelu ne la ilixo noxi'a aloxo 'o. Taiuta milavusou imoxo'u ualasou itema vilesisi noxi'a takalavusu, laso Pailati u'italonu so ula noxi'a tamitema latala ne.

¹⁶ La no voxo anene itema vile so ilixo masua manina a muxolu mukalavusu. Ualasou lexe Iesua Valavasi.

¹⁷ Laso tamitema latala mine'e mipita mukalu la Pailati mutali'isi'a lexe, “Ngingi ngamasaxau lexe apilixinu ena'ei ula noxinge? Valavasi o Iesua ane imoxo'u lexe Kalasiti?”

¹⁸ Pailaiti muvikala axone xo anu mulavu lexe mi'italonu Iesua no avolu axone xo mi'isuxusi.

¹⁹ Xe anu a utalupexa no anu sia so tiasi noxousio la vaikalaie semau muxali noxou aloxo 'o, “Nini na'oxo mi vile noxou itema mulapusi ne uasi. Xo no olovoxo la emaisou no anu aisaxi la etavulenu tu'umaxusou lapilai uasisi.”

²⁰ Ia ane'i tatiatila noxi'a tapilisiti oli'a tatiatila noxi'a Taiuta mi'ou tane'i tamitema latala. Laso ane'i mi'ava mulai noxou Pailati lexe upilixinu Valavasi ula ia u'italonu Iesua so usoli.

²¹ Xe anu tila no anu xamani ne mutali'ila lexe, “Noxi'a ilou 'o la a'italonu aneva ula noxinge?” La ane'i mikolinu lexe, “A Valavasisi.”

²² Xe anu mutali'i lexe, “Laso eni a'oxo mi ma'ia noxou Iesua e ilemolu lexe Kalaisiti 'o?” La ane'i mikeinoxu lexe, “Na'italonu so ililinu no ovu valautu so usoli.”

²³ Xe Pailati mutali'i lexe, “Xo axova, mu'oxo susu ma'ia to?” Ia ava noxi'a mutila lexe, “Na'italonu so ililinu no ovu valautu so usoli.”

²⁴ Ioxe, Pailati mulavu lexe anu mupuninusi xo ane'i opone'i pakia'usi mo a so i'avutinoxu oto. Laso anu muno'u lexa sevile ka mu'uinu avolu no ie'i tamitema latala ne mo muvikala lexe, “Ngamalei, ano'o latilovosou sialu­xu itema ne. Xo loxo usoli la anu sialuxu uai no avolo uasi. Tava'u soli noxou a ngingi nesi.”

²⁵ Ia ane'i tamitema latala ne mikolinu lexe, “Io' mi vile uasi, tava'u noxixesi. Sialuxu uai noxixe mo uxali avile noxi'a ta'ilixe.”

²⁶ Laso Pailati mu'italonu Vala­vasi mula noxi'a. Ia anu mupalusi'a ta'ami so mipua­puasou Iesua. Xe mukalu la mu'italonu no avo'a ta'ami so ililinu no ovu valautu so usoli.

Ta'ami mimolo sukusou Iesua

²⁷ Ioxe, mukalu la ta'amiou tila no anu xamani mi'unalaixu Iesua no tasou xamani ka ane'i laili mukalusi noxi'a mipita mixalilixu.

²⁸ Mukalu la mixexenu lavulutiou xe misu'asou no anu lavalava lauoinu.

²⁹ Mo mino'u lamota ana'anaxu la mipalixoxonu so muxali loxo atiou kingi ka mitanu no kisou. Xe milosou kulue sevile so mutetelisou no avolu tema. Mukalu la mixolasou tava'a no laxunu so ikalavoi lexe i'itinu ualasou mo mimolo sukusou lexe, “Aso, Kingi noxi'a Taiuta!”

³⁰ Xe mituvetuvesou kaio mino'u kulue se no avolu so mipuapuasou kisou no anu.

³¹ Ane'i mimolo sukusou no anu votevote'i axone xo xe mukalu la mixexenu lavalava lauoinu e misu'asou no anu mo milosou lavulutiou mu'isalili. Mukalu laso mino'u milaixu so mililinu no ovu valautu so usoli.

Mililinu Iesua no ovu valautu

³² Ioxe, ane'i a mila la mixalisou itema vile so tuala Sailini ualasou lexe Saimoni. La mipalupalusou so utavulenu ovu valautusou Iesua.

³³ Milutu xo la mixalixu Iesua no apu ane ilemolu lexe Xoloxota. Laxu vaikala anene lexe apu so kisou xinu.

³⁴ Mixa­lixu mukalu la ane'i milosou Iesua uaini ane miilanu ilou lamalasini sixula so lexe uiexu, ia muxamulinu no anaxu la uiexu uasi.

³⁵ Xe ane'i ta'ami mililinu no ovu valautu mukalu laso mi'oxonu ilixo so uala so lexe ta'ei ualasi'a uxali, la mivelunu mimiou.

³⁶ Mukalu la ane'i mixoxolu ane so mixoxo­maiou.

³⁷ Anu ilixo noxi'a so ikaukavunu susu noxi'a tamitema mililinu no ovu valautu. Ia ane'i mikaukavu no ovu valautu teitexi no anu kisou Iesua lexe “Ano'o Iesua, anu kingi noxi'a Taiuta.”

³⁸ Mililixu Iesua la no pa'upa'u­molu mililixa'a tamitema so pakali tamei no ovu valavalautusi'a. Vile mulili no avolu tema xe vile no avolu kaisi.

³⁹ La tamitema ane milai mine'e no apu ne milulu kisi'a mo misukunu Iesua lexe,

⁴⁰ “Ai, nini ane ne'oxo lexe namamulonu tasou Mosinge ka natulusoula voxo tatalu, nini mene napamaulineni. Loxo nini Mosinge Olu la nalu'e no ovu valautu ne.”

⁴¹ Xe ane'i tatiatila noxi'a tapilisiti xe tamitema so lavulavu no anu lavuloto xe tatiatila ane'i kalumo misukunu mo mivikala lexe,

⁴² “Anu mupamauline'i leviani ia anu molu umomomo so upamau­linu uasi. Anu kingi noxi'a Ta'isilaeli laso anu molu ulu'e no ovu valautu. Loxo nenge tamaisou axone laso ane, talopala noxou.

⁴³ Xo mulopala noxou Mosinge la mu'oxo lexe anu Mosinge Olu. Ioxe loxo Mosinge u'osasou la upamaulinu ane.

⁴⁴ La tamitema so pakali tamei e mililixa'a no pa'umolu Iesua ane'i kalumo mimolo sukusou axonesi.

Iesua musoli

⁴⁵ Iesua mulili ne xo xe no veloe la isivoxo toxoxu musu'asou lialia mukalusi. Isivoxo ne muxoxolu xo mo aso iou 3 no olo'olovoxo.

⁴⁶ Xe loxo no aso iou 3 ne la Iesua mu'ava tatila lexe, “Eloi, Eloi, lama savakatani?” Laxu vaikala ne lexe, “Mosilo, Mosilo, loxova so na'ita­loleli mo na'umesilo?”

⁴⁷ Mu'ava axone la tamitema se'i a mitulu alai milomusou la mi'oxo lexe, “Itema ne a u'avalou Elaitia.”

⁴⁸ La itema vile muiave mumulaxu lavalava xasixu no anu uaini sisielixu. Mukalu la musakinu no ovu so mutolosou so Iesua uiexu.

⁴⁹ Ia leviani mi'oxo lexe, “Uasi, taxolu sevile mo tamalei lexe Elaitia une'e usu'ulinu o uasi.”

⁵⁰ Xe Iesua mu'ava tatilala sila mupilixinu ulenu kaio musoli.

⁵¹ La no voxo se nesi lavalava tatila e mulili nonano no tasou Mosinge mutea teitexi mo muxali avile no lia laso muxali alelaxu tamei. La uni'uni tatila mo lavo'o toxotoxoxu muvalavalasi.

⁵² Xe noxi'a tamitemaou Mosinge u'isa­lili e misoisoli tatei la lulusi'a leviani mu'a'a sila mitulutulu.

⁵³ Mitulu­tulu axone xe ili'i loxo Iesua mutulu mumaulila la ane'i mi'unalai no anu taoni noxou Mosinge mo mipa noxi'a tamitema tavu'alo.

⁵⁴ Ioxe, tilasi'a ta'ami oli'a ta'ami ane mixolu milosou Iesua ne mimalei lexe uni'uni toxoxu xe mimi e muxali ne la ume mukasi'a. La mivikala lexe, “Ai manina misevile, itema ano'o Mosinge Olu ane!”

⁵⁵ Xe no voxo ne la tasema tavu'alo mixolu va'axu sevile so mimalei kalumo. Ane'i tasema ne no voxo loxo Iesua mulutu ne Xalili mune'e la ane'i oli'a so mivu'ulinu.

⁵⁶ La Malia so Makatala xe Malia vilela e Tiemisi ilou Iosepu neni'a xe neni'a Sepeti ta'olu tamei a mixolu no taine'i tasema ne.

Ane'i mimulaxu Iesua vasimolu no lulu

⁵⁷ Ioxe, aso so u'unae la itema so lamoli vile so tuala ne Alimatea ualasou lexe Iosepu mune'e. Anu kalumo muxali tisaipeliou Iesua.

⁵⁸ Mune'e la muxali noxou Pailati so ulinga lexe anu upilixinu Iesua vasimolu noxou. La Pailati muvi­kalane'i ta'amiou lexe ilosou Iosepu.

⁵⁹ La Iosepu muno'u lavalava kea alavua ka muisinu Iesua vasimolu no anu.

⁶⁰ Mukalu la mulai mu'unalaixu no lulu alavua noxou. Lulu ne anu lavo'o taxanu ane mala'o se'osi mulotone'i tamitema so i'asou. Mu'unalaixu mukalu la mupipalo'u lavo'o toxoxu so mutanuxu lulu anaxu ka mulai.

⁶¹ La Malia so Makatala xe Malia ane vile la mixolu xalevile so misu'anu ie'iou lulu.

Ta'ami milosou lulu

⁶² Ioxe, voxo so lalaxisou Voxo so Ma'ila mukalu xe loxo ne'ielae la tatiatila noxi'a tapilisiti oli'a Tapalisi milai noxou Pailati.

⁶³ Milutu xe mixali la mivikala lexe, “Tatila, nexi texavutalanu vaikalaou itema so kalavoi olele e mulemolu loxo muxoxolusio. Mu'oxo lexe, 'Voxo tatalu upolo ukalu la eni atulu amaulila.'

⁶⁴ Laso nini navikala mo so ane'i itomunu lulu anaxu mo ilosou laixe umomomo no anu voxo tatalu. Xo loxo 'o io tatisaipeliou masi ilai itokenixu vasimolu ia ikalavoine'i tamitema lexe anu mutulu no anu soli. Laso axone la kalavoi alavua anene uua'ulixu kalavoi noxou tei olele.”

⁶⁵ La Pailati mu'oxo lexe, “Io', ngingi ngano'a ta'ami se'i so ilosou laixe. Mo nga'oxonu mi ma'ia no anu lavulavu noxinge mo so vote'i so ukisi uasi.”

⁶⁶ Laso ane'i milai mitomunu lulu pakia'u ka mimu­laxu sosovo no anaxu xe mitulusi'a ta'ami se'i so i'oxo lato­losou.