Matiu 25 - Ata New Testament

Latilovosi'a tavuanga 10

¹ Ioxe, Iesua musolonu vaikalaou lexe, “No anu voxo olele so Mosinge molu u'uli laxune'i tami­temaou no tualasou la latilovosou aloxo 'o. Tavuanga 10 milai no vote'i so ialaxu itema vile mutaula'i alavua. La mino'u lalamo xo masi olovoxoie'i.

² La ta'uve noxi'a mixovulaulausi ia ta'uve noxi'a la lone'imatana.

³ Xo ane'i ane mixovulaulau la mine'enu lalamo ia ino'u uelisou uasi.

⁴ Xe ane'i ane lone'imatana la mitau ueli no anu lavotoni so mino'u ilou lalamo.

⁵ Milai xe itema mutaula'i alavua olele une'e palea uasi la mixomaiou xo mole ie'i muvuvu sila miai.

⁶ Miai xo xe no olovoxo lixinu sila milomusou ava lexe, 'Ngamalei, itema mutaula'i alavua a so uxali! Ngane'e mo talai ta'alaxu no vote'i so tane'enu.'

⁷ Ioxe, ane'i tavuanga ne mitulu la milalaxinu lalamoi'a.

⁸ La ane'i ane mixovulaulau mivikalane'i ane'i ane lone'imatana lexe, 'Ai, ngalosixe uelimengi sevile xo lalamo noxixe a so usita 'oe!'

⁹ Ia ane'i ane lone'imatana mikoline'i lexe, 'Uasi. Ueli ano'o umomomosinge nenge'a uasi to! Laixe loxo ngalai no lasitua so ngalotonu mengimo.'

¹⁰ Laso ane'i milutu milai so ilotonu ueli mo ilivu ine'e uao ia itema mutaula'i alavua olele a muxali. Laso oli'a tavuanga ane mixolu milo laixe mi'unalai no tasou lavilelu so taula'i, ka tamitema mitatusou aitenga.

¹¹ Xe ili'i la ane'i tavuanga ta'uve olele mine'e mixali la mivikala noale mu'una lexe, 'Tatilao, tatila, nane'e nakisinu aitengasixe.'

¹² Ia anu mukoline'i lexe, 'A avikalangengi manina lexe eni alavusinge to uasi.'”

¹³ La Iesua muvikala lexe, “Anu axone. Ngingi ngalo laixe xo ngalavusou voxo so Tatanangengi uxali uasi ane.”

Latilovo so tauokivoi mipamuxanu lamoli

¹⁴ Ioxe, Iesua musolonu aloxo 'ola, “Voxosou Mosinge molu u'uli laxune'i tamitemaou no tualasou la anu aloxo itema vile so mulutu mulai no tuala vile nopaxa. Anu so mulutui la mu'avali'a tauokivoiou mine'e noxou so mupilixinu mimiou no avo'a so isaxila'u.

¹⁵ La anu mutilovosou ilixone'i vilevilesi ka mukalipalanu lamoli noxi'a. Laso noxou vile la mulosou 5,000 kina xe vile la mulosou 2,000 xe vile la 1,000. Mukalu la anu mulutu mo mulai.

¹⁶ Xe no anu voxo se anenesi la anu ane muno'u 5,000 kina ne musoko'u so uxaxaisou. Muxaxaisou xo la muxalisou 5,000 no latanula.

¹⁷ La anu axone kalumo noxou anu ane muno'u 2,000 kina xo muxalisou 2,000 no latanula.

¹⁸ Ia noxou anu ane muno'u 1,000 kina la mulai mu'asou taxa ka mu'asixu lamoliou tilasou no anu.

¹⁹ Ioxe, mixolu xo xe voxo maxuveni mukalui xe ili'i la tilasi'a tauokuvoi ne mulivu muxali. Laso anu mumasaxau mukiloloi'axu lamoli e mupilixinu noxi'a.

²⁰ La anu e muno'u 5,000 kina mune'enu ilou 5,000 ane no latanu. Mune'enu la muvikala lexe, 'Tatila, namaisou. Nelosilo 5,000 kina xe exaxaisou la exalixu 5,000 no latanu a.'

²¹ La tilasou muvikalanu lexe, 'O nini uokuvoi laixe, xaixai e epilixinu noxine la nexalixu nene'axu. Epilixinu mi se kitua noxine la nesaxila'u laixe laso atulusine so nasaxila'u mimi tavu'alo. Laso nane'e mo nengei ta'osasi.'

²² La anu axone kalumo noxou anu e muno'u 2,000 kina. Xo mune'e muvikala lexe, 'Tatila namalei, nini nelosilo 2,000 kina xe exaxaisou la exalixu 2,000 no latanu a.'

²³ La tilasou muvikalanu lexe, 'O nini uokuvoi laixe, xaixai e epilixinu noxine la nexalixu nene'axu. Epilixinu mi se kitua noxinge la nesaxila'u laixe laso atulusine so nasaxila'u mimi tavu'alo. Laso nane'e mo nengei ta'osasi.'

²⁴ Ia noxou anu e muno'u 1,000 kina la mune'e muvikala lexe, 'Tila, eni alavusine lexe nini itema so loxo tamitema isusunixine la nalosi'a ialuxu. Nini nalavusou namolo xai temanu ane natounu uasi xe na'elesou uiti ngiaxu ane natapu'u uasi.

²⁵ Laso eni e'ume ka elai e'asixu 1,000 kina noxine muai vitanisi, la anu ano'osi.

²⁶ Ia tilasou mukolinu lexe, 'O nini uokuvoi masua to, nini nepauxe ane. Xo nini nelavu lexe eni itema so alavusou amolo xai temanu ane atounu uasi xe a'elesou uiti ngiaxu ane atapu'u uasi.

²⁷ Laso axova so namulaxu lamolixeli no bengi uasi? Xo axone xe loxo elivu exali 'o la alanu lamoli ilou ane upita no latanu. La ua'.'

²⁸ Xe mukalu la tila ne muvikalane'i leviani lexe ino'u 1,000 kina noxou uokuvoi ne mo ilosou anu ane 10,000 kina muai noxou olele.

²⁹ Xo aloxo 'o. Tamitema ane mimi se'i muai noxi'a mukalu la alosi'a se'i no latanula. Xe loxo ane'i ane ixalisou mi vile uasi, la axexenu mi se ane muai noxi'a.

³⁰ Xe noxou uoku­voi masua 'o la ngakusaou usu'a noale no isivoxosi. Xo tanixu anene tatemanu itatama mo ana­xa'a ukalakikisi.”

Itema ane molu noxou Mosinge utilovosi'a lailaili mukalusi

³¹ Ioxe, Iesua muvikala aloxo 'ola, “Voxo so lailivuxu Itema ane molu noxou Mosinge la une'e aloxo kingi. Xo une'e la oli'a ta'angelou mukalusi so utalupexa no anu sia kingi noxou.

³² Mu­kalu la tami­tema no anu lailaili mukalusi ipita itulu no laxunu. Laso anu ukalipa­lane'i no anu laili tamei a loxo tatanane'i tasipisipi ukalipalane'i tasipisipiou noxi'a takoti.

³³ La anu upalusi'a tasipisipiou no avolu tema xe takoti no avolu kaisi.

³⁴ Laso anu kingi uvikalane'i ane'i ane no avolu tema lexe, 'Ngingi ane Mamilo mulosinge xoluxolu laixe, ngane'e 'o. Ngane'e mo ngaxolu so eni melo akingi noxinge mo a'uli laxungengi. Xo mi ne mulalaxisinge tatei no voxo loxo Mosinge mukoinu lialia.

³⁵ Xo tatei exolu esolixo la nga'itixo la'ilali. Mo esolisou lexa la ngelosilo so eiexu. Mo exolu asila la nge'avalilo so e'una no tasinge.

³⁶ Mo eni lava­lava uasi la ngingi ngeitixeli. Mo pipiena mukasilo la ngingi ngesaxi­la'ilo. Mo exolu no lakala­vusu la ngene'e ngekiloloilo.'

³⁷ Ia ane'i tamitema talapusi ne itali'isou lexe, 'O Tatananexi. No voxo aneva temaisine nexolu nesolixene la teitixene la'ilali, mo nesoliou lexa la telosine so neiexu?

³⁸ Xe talu ane temaisine nexolu nasila la te'avaline ne'una no tasixe, mo meni lavalava uasi la teitimeni?

³⁹ Xe voxo aneva temaisine lexe pipiena mukasine mo nexolu no tasou lakalavusu la tekiloloine?'

⁴⁰ Laso kingi ukoline'i lexe, 'Avika­langengi manina aloxo 'o. Mi ma'ia nge'oxonu noxi'a tavivilo tatiatila o tami vitanisi, la nge'o­xonu noxilo ane.'

⁴¹ Ioxe mukalu la kingi uvikalane'i laili ane no avolu kaisi lexe, 'Ngingi ane so ngaxalisou mamulo, ngaxexe noxilo mo ngalai no navu so mamulo e u'ani'ani kaluxu uasi. Navu so mamulo anene mulalaxisi'a Uluaou oli'a ta'angelou.

⁴² Xo tatei exolu esolixo la nga'itixo la'ilali uasi. Mo esoliou lexa la ngalosilo so aiexu uasi.

⁴³ Mo exolu asila la nga'avalilo so a'una no tasinge uasi. Mo eni lavalava uasi la ngingi ngaitixeli uasi. Mo pipiena muka­silo mo exolu no lakalavusu la ngane'e ngakiloloilo uasi.'

⁴⁴ Ia ane'i mitali'isou lexe, 'O Tatananexi. No voxo aneva temai­sine nexolu nesolixene mo neso­liou lexa mo nexolu nasila mo meni lavalava uasi mo pipiena mukasine mo nexolu no lakalavusu la tasaxila'ine uasio?'

⁴⁵ Laso anu ukoline'i lexe, 'Avikalangengi manina aloxo 'o. Mi ma'ia nga'o­xonu noxi'a tanoxilo 'o e tatiatila o tami vitanisi uasi, la nga'oxonu noxilo kalumo uasi ane.'

⁴⁶ La ane'i tamitema anene ilai so itavulenu lakolisou susu noxi'a kaluxu uasi. Ia ane'i tamitema talapusi ilai ino'u mauli kaluxu uasi.”