Matiu 24 - Ata New Testament

Iesua mulemolu mamulosou tasou Mosinge

¹ Ioxe, Iesua mula no tasou Mosinge mo a so ulai la tatisaipeli mine'e noxou milosilosi so loxo ilosoiouxu ngiongiou no tasou Mosinge.

² Ia anu mulemolu vaikala ano'o noxi'a, “Ngingi ngamaisou ngiongiou laixe ano'o ia avikalangengi manina lexe ili'i la lavo'o vile utoxo no anu menexu uasi, upaxele mukalusi. Tani ano'o ne umamulosi.

Iesua mupela'axu tu'utu'umaxu ane so uxali ili'i

³ Xe ili'i la Iesua mutalupexa no la'olu Olivi la tatisaipeli ane'isisi mine'e noxou mo mitatali'i noxou lexe, “Nini napala'anixu noxixe lexe voxosou mi e nelemolu a talu? Axova, sosovo vile so nexi talavu lexe nini a so nalivu nane'e mo talavu lexe lialia 'o so ukalu?”

⁴ La Iesua mukoline'i lexe, “Nga­laxa'i laixe, xo loxo 'o io tamitema ikalavoingengi ane.

⁵ Xo tami­tema tavu'alo ine'ene'e mo ivikala lexe, 'Eni ane so Kalaisiti a.' La ilemolu ualasilo so ikalavoine'i tamitema tapiena.

⁶ Mo ili'i loxo ngalomusou a'alo so oto tatila mo sivo lexe oto tatila so uxali no tuatuala la ngakuluke no anu uasi. Mimi anene uxali, ia kaluxusou voxo a uao.

⁷ Xe tamitema no anu laili se'i i'alivulane'i laili se'i. Xe takingi so xale lia se'i ilai i'alivulane'i takingi so xale lia se'i. Mo no xalexale lia se'i la uni'uni tatila mo anene voxo so vitolo kalumo.

⁸ Mimi anene uxali ia anene soko'u no anu tu'umaxusi. Anu loxo sema ilie ukitikitinesi so ivo'onu, u'oki uao.

⁹ Xe ngingi, la taxilili ilosinge navunavu mo tu'umaxu mole se'i noxinge la ivenge ngasoli. Mo tatemanu xale tuatuala mukalusi opone'i umatapiangengi xo ngingi a ngatavulenu ualasilo.

¹⁰ La no voxo anene ane'i tavu'alo ixiunu tumali'aou lopala. Laso ane'i imatapiane'i ngato'o sika ipili­xine'i tamenexi'a no avo'a tauluai'a.

¹¹ Xe tapolopeti kalaka­lavoi tavu'alo i'avuti so i'oxo loloxa'a tamitema latala.

¹² La ilixo so ixolaxola'u lo u'oki laso leviani ipilixinu vote'i so isexela.

¹³ Ia ane'i ane so ixolu pakia'a ulai uxali avile no anu kaluxusou voxo la ixalisou pamauli.

¹⁴ Xe vaikala laixe so voxo ane Mosinge u'uli'uli avile ne ula no lialia loloni mo so tatemanu xale tuatuala mukalusi ilomusou. Laso ane, kaluxusou voxovoxo ne uxali.

No voxo anene tu'umaxu e tu'umaxu manina

¹⁵ Ioxe, Iesua musolonu vaika­laou, ia itema ena'ei u'itisou la uxavutalanu laxu laixe. Muvikala aloxo 'o, “Laso ili'i la ngamaisou mi e so matapia mo mamulo uxolu no tanixu malemalenga. Vaikala­sou mi ne Mosinge mupolonu noxou polopetiou Tanieli tatei.

¹⁶ No voxo ne la laixe so Taiutea i'ume'ume ilai italume no la'o­la'olu.

¹⁷ Xe itema ane u'ole'ole no laxa'u tani la ulu'e ne u'ume ulaisi. Uxavutalanu mi vile so uno'u no tasoula uasi.

¹⁸ Mo loxo itema uxolu no xai la ulivu no tani so uno'u lasiotiou vevenila uasi. Ulai u'ume avile.

¹⁹ La tanengexa'a tasema ane opo'opone'i xe ane'i ane ta'ili'a i'ou sususio. Xo masi i'au'ausi'a la i'ume palea uae.

²⁰ Mo ngalinga noxou Mosinge lexe voxo so nga'ume axone la no anu tau lelemesou o Voxo so Ma'ila uasi.

²¹ Voxo anene tu'umaxu e tu'umaxu manina. Musoko'u no voxo loxo lialia muxali xe mune'e muxali avile vaimomo 'o la tu'umaxu axone uxali uasi. Mo uxali ili'i kalumo axone uasi.

²² Xe loxo Tatana­nenge uxotonu voxosou tu'utu'u­maxu anene uasi la itema vile umauli uasi. Ia anu uxavutalane'i tamitema ane musososvosi'a luma­mo lexe tanoxou. Uxavutalane'i laso uxotonu voxo anene.

²³ Mo aloxo 'o. No voxo anene loxo itema vile uvikalangengi lexe, 'Ngamaisou Kalaisiti a.' o loxo vile u'oxo lexe, 'Kalaisiti a olele.' la ngalomuxa'a uasi.

²⁴ Xo tamitema se'i ixali la ikalavoi lexe ane'i Kalaisiti xe se'i lexe ane'i tapolopeti. La ane'i ixalixu sosovo so xavi iouiou mo i'oxonu mimi ane tamitema tane'ilili no anu. Xo ane'i imasaxau ilapune'i mo ixovulaulaunixi'a tamitema, mole loxo vote'i la i'oxonu kalumo noxi'a ane'i ane Mosinge musoso­vosi'a lexe tanoxou.

²⁵ Laso ngalomu laixe xo epela'ingexu mimi ne lumamo 'oe.

²⁶ Ioxe, laso loxo ivikalangengi lexe, 'Ngamalei, anu a uxolu no anu xale lia esi'esi,' la mamu so ngalai. O loxo i'oxo lexe, 'Ngamalei anu a uxoxolu no ngiongiou nonano 'o,' la ngalomuxa'a to uasi.

²⁷ Xo ngelavu, lele'e lamixu ukelele no loxotolo ulutu no isiti ka upisikei uxali avile no anu uesiti. La Itema ane molu noxou Mosinge upala'a axone no anu voxosou loxo uxali.

²⁸ No anu tanixu loxo tamitema vasime'a usoli uta'olu no anu la ane'i tangiala ta'ola ipita no anu kalumo.”

Iesua mupala'anixu lailivu noxou

²⁹ Muvikala axone mukalu la musolonu aloxo 'ola, “Tu'utu'u­maxu anene uxali ukalui la aso uxali isivoxosi mo so'io ukala uasi. Mo mimi xavixavinu no loxotolo ukunikuni la tataoto ilapalapau ulu'e.

³⁰ Mukalu la sosovosou Itema ane molu noxou Mosinge upa no loxotolo la tatemanu xale lialia mukalusi itatama. La ane'i imaisou Itema ane molu noxou Mosinge une'e no anu sausauma. La une'e no anu xavi mo iaxu tatila.

³¹ Mo piuka utama tatila so upalusi'a ta'angelo­xeli ilailai. Ilailai no anu noti xe sauti xe uesiti xe isiti no loxotolo teletelexu. La ipitane'i tamitema ane Mosinge musosovosi'a lexe tanoxou.”

³² La Iesua mutilovo aloxo 'o, “Ngingi ngano'u lavulavu no anu ovu viki. Loxo avolu umauli mo uxata la ngalavu lexe voxo so aso laixe so uxali.

³³ La anu axonesi. Loxo ngamaisou tu'utu'umaxu elemolu 'o uxali la ngalavu lexe anu Itema ne a uxali mo no iouxalengasi.

³⁴ Mo avikala­ngengi manina aloxo 'o. Laili ano'o ixolu mo ixalisou mimi ne, isoisoli tei uasi.

³⁵ Mo ili'i la loxotolo ilou lialia tasiauxu ia vaikalaxelisi umomomo so tasiau­xu uasi.”

Evile ulavusou voxosou mimi anene uasi

³⁶ Mo musolonu aloxo 'ola, “Ia evile ulavusou voxo o aso iou so mimi anene uxali uasi. Ta'angelo talaixe no tualasou Mosinge ilavu uasi kalumo. Mo eni a Olu kalumo alavusou uasi. A Mosinge anu Mamingesi ulavusou.

³⁷ Xo voxo so Itema ane molu noxou Mosinge uxali la aloxo voxo so Noa muxoxolu.

³⁸ Xo ane'i tatei ne mixolu mi'ani'ani mo miie mo mitataula'i xo mo mumomomo no anu voxo loxo Noa mu'unalai no lasipi.

³⁹ La ane'i ilavu lexe mi ma'ia uxali uasi. La xoluxoluxa'a axonesi xo mole anipa muxali sika mukalusi'a tamitema anene avile. Ioxe, loxo Itema ane molu noxou Mosinge uxali la anu axonesi.

⁴⁰ Xo masi tamitema tamei ixolu no xai la Mosinge uno'u vile xe vile uxolusi.

⁴¹ O loxo tasema tamei ixolu tanixa'a vilesisi so imamulonu uiti ngiaxu so palaua la uno'e vile ia vile la ixolu ane.

⁴² Laso ngingi ngalo laixe xo ngalavusou voxo so Tatanangengi uxali uasi ane.

⁴³ Xo loxo ngelavu, loxo mosou tani ulavusou aso iou u'isalili no olovoxo so lasikeli une'e upakali, la anu ulo laixe ane. Vote'i uasisi so itema lasikeli ne upakisi u'unalai no tasou.

⁴⁴ Laso ngingi kalumo ngaxolu ngalo laixe xo Itema ane molu noxou Mosinge une'e no anu aso iou ane ngalavusou uasi.

Latilovo so uokuvoi ane laixe xe ane masua

⁴⁵ La Tatananenge muvikala lexe, “Xo itema tila utulusi'a tauokuvoi kaini axova no taine'i tamenexi'a so isaxila'a tatemanu tasou mo ivelunu xa'a la'ilali no anu voxosou u'isalili? Anu utulusi'a ane'i ane ulopalane'i lexe i'oxonu xaixai noxou laixe mo lavulavui'a.

⁴⁶ Laso loxo tila ulivu uxali xe umaisou uokuvoi ena'ei e mutulusou ne a uxaxai axonesio la uxali laixe manina noxou.

⁴⁷ Xo avikalangengi manina lexe tila ne utulusou uokuvoi ne so usaxila'u mimiou mukalusi.

⁴⁸ Ia loxo uokuvoi masua vile ane u'uli laxune'i tamenexu axone uxavu­tala no oponu lexe, 'Ai, tilasilo ulivu une'e palea uasi ane.'

⁴⁹ Xe loxo usoko'u so uve'ave'a tame­nexu tamitema so xaixai ne mo u'ani'ani mo uie noxi'a tamitema so usipaki, la masi axova noxou?

⁵⁰ Aloxo 'o. Voxo vile masi uxolu ulo laixe uasi sila tilasou uxali no aso iou vile ka ukulukenusi.

⁵¹ Uxali xe umaisou ilixo noxou axone la ukiaenu ka umulaxu uveisa'ine'i tamitema so kalaka­lavoi. Oli'a ixolu no anu tanixu anene tatemanu itatama mo ana­xa'a ukalakikisi