Matiu 22 - Ata New Testament

Latilovosou lavilelu so taula'i

¹ Ioxe, Iesua mu'oxonu latilovo vilela noxi'a tatiatila ne aloxo 'o,

² “No voxo so Mosinge molu u'uli laxune'i tamitemaou no tualasou la anu aloxo kingi vile u'oxonu lavilelu so olu utaula'i.

³ Ia tei la anu mupalusi'a tauokuvoiou so ilai noxi'a ane'i ane muali'a lumamo so i'avali'a ine'e. Mi'avali'a lexe ine'e ia imasaxau to uasi.

⁴ Mukalu la anu mupalusi'a tauokuvoi se'ila milai la muvikalane'i lexe, 'Ngalai noxi'a tamitema e eali'a mo ngavikalane'i aloxo 'o, “Ngalomu, eni elalaxinu la'ilali mukalu. Xo tamisoposixeli loxo takau tamulu xe ane'i se'ila tatongotongolixa'a la teve'ave'a mukalu mo mimi mukalusi a mulalaxi muai 'oe. Laso ngane'e no anu lavilelu so taula'i 'osi.'”

⁵ Laso ane'i tauokuvoiou milai milemolu vaikalaou noxi'a tami­tema ne ia milomua avilesi mo milailai no anu masaxa na'asi. Vile mulai no xaixu xe vile mulai no anu xaixai noxou e so lailoto.

⁶ Xe se'i noxi'a mitetelisi'a tauokuvoiou kingi sika mi'otu'otune'i lapilai uasisi mole misoisoli avile.

⁷ Laso la'ia mutetelosou kingi sika mupa­lusi'a ta'amiou so milai mimamu­lone'i tamitema e mive'a tavoiou misoisoli. Mukalu la misexeteluxu tualasi'asi.

⁸ Ioxe, mukalu la kingi muvika­lane'i tauokuvoiou lexe, “Lavilelu so taula'i a mulalaxi muai ia ane'i ane eali'a so ine'e la ane'i tamitema talaixe umomomo no anu uasi.

⁹ Laso ngingi ngalailai no anu ioxuioxu vote'i so loxo ngaxalisi'a tamitema ta'ei la ngaali'a ine'e no anu lavilelu so taula'i 'o.”

¹⁰ Anu mupalusi'a axone la ane'i tauo­kuvoi mipaxele milai no votevote'i. Milai xe mixalisi'a tamitema ta'ei talaixe xe tamasua, la mipitane'i mukalusi. Mipitane'i ka mine'e mitalupexasi'a no anu tasou lavilelu so taula'i ne xo mole muana'ana avile.

¹¹ Ioxe, kingi mu'una so usaxisi'a tamitema ane mita'olu so i'ani nonano ne. La mumaisou vile noxi'a umulaxu lavuluti u'isalili no anu voxo so taula'i uasi.

¹² La mutali'isou lexe, 'Ai maula, axova so namulaxu lavuluti so taula'i uasi ka ne'una vitanisi aloxo 'o?' Ia itema ne saexu muxolasi.

¹³ Laso kingi muvikalane'i tauokuvoiou lexe, 'Ngingi ngasakinu tava'u ilou avolu sika ngasu'anu ulai noale no isivoxo, xo tanixu anene tatemanu itatama mo anaxa'a ukalakikisi.'

¹⁴ Xo ngalomu, ava uxali noxi'a tamotu tavu'alo ia sosovo uxali noxi'a tata'eisi so i'unalai.”

Mitali'i lexe anu laixe so isu'anu taxisi o uasi

¹⁵ Xe mune'e la Tapalisi milai mipitanu xavutalai'a lexe i'oxo loloxu axova no anu vaikala so loxo u'amo no anu.

¹⁶ Laso ane'i mipalusi'a tatisaipelii'a oli'a laili e mivalaxu Eloti se'i milai noxou Iesua mo mivikalanu lexe, “Tisao, nexi talavu lexe nini namitema so vaikala maninasi. Nini napelototo no anu vaikalaou Mosinge manina­sousi mo namama'u noxi'a tamitema uasi. Ane'i tatiatila o tamitema vitanisi ne navikalane'i iou vilesisi.

¹⁷ Laso naxavutala axova? Anu laixe so nenge tasu'anu taxisi ulai noxou kingi noxi'a Talomu e Sisa, o uasi?

¹⁸ Ia Iesua mulavu no anu mi e masua muxolu no opone'i ne la muvikala lexe, “Ngingi tamitema so kalavoi to! Axova so ngatovoleli aloxo 'o?

¹⁹ Ngamaxa'u lamoli siliva e ngalavusou ngasu'anu so taxisi ne.” Sila ane'i mine'enu ka mimaxa'u noxou.

²⁰ La Iesua mutali'isi'a lexe, “Pikisa mo uala no lamoli 'o noxou eio?” La ane'i mi'oxo lexe, “A noxou kingi Sisa to!”

²¹ La Iesua muvikalane'i lexe, “Laso ane. Loxo mi noxou Sisa la ngapilixinu noxou u'isalili. Xe mi noxou Mosinge la ngapilixinu noxou u'isalili kalumo.”

²² Ane'i milomusou vaikalaou ne la mikuluke misevile sila ane'i mipaxelesou ka milailaisi.

Tasatusi mitali'isou Iesua so tamitema isoli ka imaulila

²³ Ioxe, no voxo anenesi la Tasatusi se'i mine'e mixali noxou Iesua. Ane'i Tasatusi ne xavutalai'a lexe loxo itema usoli la ukalu avile, Mosinge utulusoula uasi. Mine'e mixali noxou Iesua la mitali'isou aloxo 'o,

²⁴ “Tisa, lavuloto vile Mosisi mulemolu aloxo 'o, 'Loxo itema vile upala uasi ia usoli la vimou utaula'ixe ou ne mo ukolinu vimou e musoli ne so uxalixu olu noxie.'

²⁵ Ioxe, tatei la tamulu 7 ane tavimovimo'asi mixoli no tainexi. La anu ane tei mutaula'ixe sema vile xe upala uasi ia musolisi.

²⁶ Laso vimou tameisou mutau­la'ixe ou ia upala noxie kalumo uasi, musolila. La anu axone noxou tatalusou mo mulai avile muxali noxou anu ane 7-si'a.

²⁷ Ane'i tavimovimo'a 7 ne misoi­soli mukalusi, xe ili'i la sema ne misoli kalumo.

²⁸ Io' napela'ixe. Loxo ili'i no voxo so Mosinge utulusi'a tamitema misoisoli, la axova? Sema ne mulue ena'ei manina, xo mitaula'ixa'a tavimo­vimo'a 7 mukalusi.”

²⁹ La Iesua mukoline'i lexe, “Ngingi ngaxovulaulau to! Ngingi ngalamana no anu vaikalaou Mosinge mo no anu xaviou kalumo uasi.

³⁰ Xo loxo Mosinge utulusi'a tamitema misoisoli la xoluxoluxa'a no anu taula'i uasi. No anu anene la ixolusi, kaini loxo ta'angelo no tualasou Mosinge.

³¹ Ia no anu ngiou so tamitema isoli ka itulu la masi nga'itisou Mosinge vaikalaou pa'usou vile uasi. E mulemolu noxinge lexe,

³² 'Eni a Mosi'a Apala'amu xe Aisaki xe Iakovo a.' Ne ngamaisou, Mosinge uvika­lasi'a ta'ilusungengi axone xo ixolu imauli ane. Mamu so ngaxavutala lexe Mosinge anu Mosi'a tamitema ane soli muka­lusi'a avile. Anu Mosi'a tamitema ane imaulusi.”

³³ La tamitema latala e milomusou votovoto noxou ne mikulukemolu.

Lo noxou Mosinge aneva mutiatila?

³⁴ Ioxe, Tapalisi milomu lexe vaikalaou Iesua mutomunu anaxa'a Tasatusi laso mine'e mipita noxou.

³⁵ Xe vile noxi'a ne anu itema so lavulavu no anu laxu lo. La anu mumaititiou Iesua mo mutali'i aloxo 'o,

³⁶ “Tisa, lo aneva mu'uli'uli avile no anu lo lo mukalusi?”

³⁷ La anu muvikalanu lexe, “Aloxo 'o. 'Ngingi opongengi xe xavutala­mengi utulu so ngasexelaxu Tatananenge anu Mosingesi. Mo xavingengi so ngalomuxu no anu xoluxolungenge mukalusi.'

³⁸ Anu ane, lo ane mutiatila mo mu'uli'uli avile ane.

³⁹ Ia no anu tameisou la anu axonela. Xo axo'o, 'Ngingi ngasexelaxa'a tamenexinge a loxo ngingi menge ngasexelangenge.'

⁴⁰ Lo tatamei ne anu tava'u lo loloni xe vaikalai'a tapolopeti mukalusi.”

Iesua mutali'isi'a Tapalisi so itema ane Mosinge musosovosou

⁴¹ Xe ane'i Tapalisi a mipita mixolusio la Iesua mutali'isi'a aloxo 'o,

⁴² “Ngingi ngaxavutala axova, anu ane so Kalaisiti, ne anu so uxali ena'ei olu?” La ane'i mikolinu lexe, “A Teviti ilusunu.”

⁴³ La Iesua mutali'isi'ala lexe, “Laso axova so Ulenu Laixe mupamuxanu Teviti so umoxo'u itema ne lexe anu Tatananu. Xo muvikala lexe,

⁴⁴ 'Tatananenge muvikalanu Tatanaleli lexe, “Nini natalupexa no avolo tema. Natalu­pexa ne xo mo eni apili­xine'i tauluameni no laxene so nama­loxo'a.'”

⁴⁵ "Ioxe, Teviti mulemolu lexe anu Tatananu, laso vote'i axova so anu uxali Teviti ilusunu?”

⁴⁶ Ia vile noxi'a umomomo so ukolinu Iesua uasisi. Xe musoko'u no voxo anene la itema vile utali'isouxu tali'i vilela uasi xo mimama'u.