Matiu 18 - Ata New Testament

Iesua mupelototo lexe ena'ei so u'uli laxune'i tamenexu

¹ Xe no voxo ne tatisaipeli mine'e mitali'i noxou Iesua lexe, “Ena'ei noxixe ane so u'uli'uli no voxo so Mosinge molu u'uli laxune'i tamitemaou no tualasou?”

² La Iesua mu'avalou molomolo vile mune'e noxou ka mutulusou no laxune'i.

³ La muvikala lexe, “Eni avikalangengi manina aloxo 'o. Loxo ngaxiu avile so ngaxali aloxo tamolomolo uasi, la vote'i uasi so ngingi nga'una ngaxolu no voxo so Mosinge molu u'uli laxune'i tamitemaou no tualasou.

⁴ Loxo itema vile molu ulu'enu so uxali vitanisi a loxo molomolo soxu 'o, la no anu voxou e no tualasou Mosinge ne, anu so u'uli laxune'i tamenexu ane.

⁵ Itema aneva usexelaxu molomolo aloxo 'o so usu'ulinu no anu ualasilo, la anu loxo usexelaxu molomolo nesi uasi. Eni ane.”

Vasimenge pa'upa'usou uolenenge no anu susu

⁶ Xe Iesua musolonu aloxo 'ola, “Noxi'a tamolomolo ane ilopala noxilo 'o, loxo itema vile uxovu­lau­lanixu lopala noxi'a la utavulenu tu'umaxusou ane. Xo loxo tami­tema isakinu lavo'o toxoxu ulili no limilaxu ka isu'anu no luaki xe uuo'uo la anu loxo mi vitanisi ane. Ia loxo Mosinge ukolinu susu noxou ne la tu'umaxu e tu'umaxu manina.

⁷ Anu masua manina noxi'a laili so lialia 'o xo ane'i ixalixu mimi ane so u'oxone'i tamenexi'a itulaki ka ilapau no anu susu. Laso noxinge, la anu manina lexe mimi uxali so ngatulatulaki no anu. Ia masua noxou itema aneva uxalixu tulaki mo upalusi'a tamenexu no anu susu axone.

⁸ Xe aloxola. Loxo avone o tava'ine ulapuneni no anu susu la naxotonu uxexe. Xo loxo naxolu avone vilesisi o tava'ine vilesisi la ialuxu sevile. Ia anu umomomo uasi no anu tu'umaxu so naxalisou no anu navu so mamulo e usita uasi.

⁹ Mo ieni kalumo. Loxo ieni vile ulapuneni no anu susu la naxexenu mo usua'si. Xo loxo naxolu ieni vilesisi ia namauli la anu laixe no anu ane so ieni tamei ia nasu'a no navu so mamulosi.

¹⁰ Laso ngingi ngalaxa'i laixe lexe ngingi ngamatapiane'i ta'aliku moso 'o uasi. Xo eni avikalangengi lexe ta'angelo so isaxila'a a utotomu isaxisou iou Mamilo no tualasou.

¹¹ Xe loxo Itema ane molu noxou Mosinge la anu mune'e so upamauline'i ane'i ta'ei milusi.

Latilovo so itema ukamulinu sipisipiou loxo ulusi

¹² La Iesua mu'oxonu latilovo aloxo 'o, “Ngingi ngaxavutala axova? Loxo itema vile tasipisi­piou 100 ia soxu vilesisi mupolo va'axu mo mulusi la unava? Anu u'italone'i tasipisipi 99 olele ixolu no la'ola'olu ia anu ulai ukamulinu soxu vilesisi ane mupolo va'axu.

¹³ Ukamulinu xo xe uxalisoui laso u'osa'ilasou misevile. La avikala­ngengi manina lexe osa noxou so muxalisou soxu ne uua'ulixu osa noxou si'a 99 ane ipolo va'axu uasi.

¹⁴ Laso anu axone kalumo noxou Maminge e uxolu no tualasou lailaixe. Xo anu oponu ututulu lexe vile noxi'a ta'aliku moso 'o imamulo uasisi.

Vote'i so talovonixu vivinge ane mususu

¹⁵ Ioxe, Iesua muvikala aloxo 'ola, “Loxo vivine vile ususu la nalai noxou so ngingisi ngaxolu la nalemolu vaikala so nalovo­nixu. Xe loxo ulomuxene la nelivunoxu vivine mulivu ane.

¹⁶ Ia loxo ulomuxene uasi la na'avalou tangaxene vile o tameila so ngalai ngavikalanula. Laso axone la anu umulinu vaikalaou Mosinge lexe tamitema tamei o tatalu so ivalaxu vaika­lai'a mukalusi lexe manina.

¹⁷ Ia loxo ulomuxu vaikalai'a kalumo uasi la ngalai ngapala'a­nixu mi ne no anu pita. Xe loxo ulomuxu vaikali'a tatemanu pita mukalusi uasi la nga'oxonu noxou a loxo anu itema so isivoxo o itema so utaxusou taxisi.

¹⁸ Eni avikalangengi manina lexe mi ma'ia ngingi ngasakinu no lialia la Mosinge usakinu no tualasou kalumo. Xe mi ma'ia ngalulusou no lialia la Mosinge ululusou no tualasou kalumo.

¹⁹ Mo avikalangengi aloxo 'ola. Loxo tatamei noxinge no lialia 'o opongengi vilesisi no anu mi vile so ngalingau la Mamilo no tualasou uxalixu noxi'a ane.

²⁰ Xo loxo tamitema tamei o tatalu ine'e ipita no anu ualasilo la eni axolu no taine'i to ne.”

Latilovo so uokuvoi uiasou tina'uxu menexu uasi

²¹ Ioxe, no voxo anene la Pita mune'e noxou Iesua ka mutali'isou aloxo 'o, “Tatananexi, loxo vivilo vile utotomu ususunixilo la opoleli ululu'e so susu noxou ne alaxu ta'eimo? Ulai umomomo no anu alaxu 7 o axova?”

²² La Iesua mukolinu lexe, “Eni avikalaneni lexe oponeni ulu'e so susu alaxu 7-si uasi. Avikala lexe umomomo no anu 70, ia vilesisi uasi, 70 alaxu 7.

²³ Laso ngalomu, eni a'oxonu latilovosou voxo so Mosinge molu u'uli laxune'i tamitemaou no tualasou aloxo 'o. Anu loxo kingi vile mumasaxau lexe tamitema ta'ei tinatina'uxa'a noxou la ilovonixu.

²⁴ Ioxe, musoko'u so u'ava'avali'a tamitema ine'e ilovonixu la mine'enu itema vile ane tina'uxu muai noxou mumomomo no anu 10 milioni kina.

²⁵ Ia itema ne lomolixu so ulotonu tina'uxu uasi. Laso kingi muvikala lexe isali­mune'i oli'a ta'olu ixali tasilevi mo isalimunu mimi'a mukalusi xe lamolisou la une'e so lakolisou tina'uxu ne.

²⁶ Xe uokuvoi mulomu axone la mulalusi muai avile no lia mo muvikalanu kingi lexe, 'Nini naiaiama noxilo mo navisimelo sevileo so eni akolinu tina'uxo noxine mukalusi.”

²⁷ Laso tilasou ne tanuxu sika mu'italonu mulai mo muiasou tina'uxu avile.

²⁸ Ioxe, mukalu xe uokuvoi ne mulai noale la muxalisou menexu uokuvoi vile ane tina'uxu 10 kina muai noxou. La mutetelisou ka mukapi laxu mo muvikala lexe, 'Napalea nakolinu tina'uxene muai noxilo 'o.'

²⁹ La menexu uokuvoi ne mulalusi mo mukatu noxou lexe, 'Nini naiaiama noxilo mo navisimelo sevileo so eni akolinu tina'uxo noxine.'

³⁰ Ia itema ne u'osa so uvisimolu axone uasi laso mulaixu no tasou lakalavusu so uxolu xo mo ukolinu tina'uxu ne.

³¹ Ia loxo tamenexu tauokuvoi leviani mimaisou mi e muxali ne la opone'i tu'umaxuou manina xo mole milai mia'aloxu noxou tilasi'a.

³² Ioxe, laso tilasi'a ne mu'avalou mune'e ka muvikalanu lexe, 'Nini uokuvoi ne, ilixomeni masuamo. Xo tei nini nekatu noxilo laso eiasou tina'uxene ne avile.

³³ Eni eiaiama noxine, laso axova so nini kalumo naiaiama noxou menexine uokuvoi ne ua?'

³⁴ La tilasou ne la'iaxu manina mo mupilixinu no avo'a tamitema so ilosou navunavu. La muvikala lexe uxolu axonesi xo mo uokuvoi ne ukolinu tina'uxu noxou avile.

³⁵ Ioxe, Mamilo e uxolu no tualasou lailaixe u'oxo iou vilesisi axonesi noxinge loxo opongengi ulu'e manina so susu noxi'a tavi­vinge uasi.”