Matiu 17 - Ata New Testament

Iesua vasimolu muxiu musaxi iou vilemo

¹ Ioxe, voxo 6 mulai mukalu laso Iesua mu'avali'a Pita xe Tiemisi xe Tioni so imulinu. Mimulinu la mitelai no la'olu vile teitexi mo ane'isisi mixoxolu ne.

² Mixolu xe mimalei loxo 'o la vasimolu muxiu musaxi iou vilemo. Anu alaiou lamanaxu loxo aso xe lavulutiou muvalukea aloxo laiti 'o.

³ Sila Mosisi ilou Elaitia mipa ne mo tatisaipeli tatalu mimaisi'a ivikala noxou Iesua.

⁴ Mimaisi'a axone la Pita muvikala lexe, “Tatananexi, laixe so nenge taxolu aloxo 'osi. Loxo nini namasaxau la ta'alaxu tani tatalu 'o. Vile sine xe vile noxou Mosisi xe vile noxou Elaitia.”

⁵ La Pita a uvikalasio sila sauma vile muvalukeasi musuasi'a. Laso xoli vile molu no sauma ne muvikala lexe, “Ano'o alixeli ane asexalaxu, eni a'osasou misevile. Ngingi ngalomuxu.”

⁶ Xe tatisai­peli milomusou vaikala ne la milalusi miai no lia mo ume mukasi'asi.

⁷ Ia Iesua mune'e mukasi noxi'a la muvikala lexe, “Ngatulu, nga'ume uasi.”

⁸ Xe ie'i muka mutelo xo'o la imaisou evilela uasi, Iesua anusisi muxolu ne.

⁹ Ioxe, oli'a milutu no la'olu mo a ilulu'e la anu muvikalane'i pakia'u aloxo 'o, “Mimi ngesaxisou 'o ngapala'anixu noxou evile uasi, ulai xo mo Itema ane molu noxou Mosinge utulu no anu soli, laso ane.”

¹⁰ La tatisaipeliou mitali'isou lexe, “Axova so tamitema so lavulavu no anu lavuloto ivikala lexe Elaitia u'uli une'e tei kaio Itema ane molu noxou Mosinge uxali ili'i?”

¹¹ La anu mukoline'i lexe, “Ia xo ma'i, anene manina. Mosinge vaikalaou lexe Elaitia u'uli so upaipounu vote'i.

¹² Ia no anu tali'i noxinge ne la avikalangengi aloxo 'o. Elaitia a mune'e mukalu ia tamitema itongonu uasi, mi'oxonu ili'ilixo masua noxou no anu masama­saxa noxi'a. Xe loxo Itema ane molu noxou Mosinge la utavulenu navunavu no avo'a iou vilesisi axonesi.”

¹³ Iesua muvi­kala axone laso anu mupalasi noxi'a tatisaipeli lexe anu muvivi­kalasou Tioni itema so u'oxonu kelele ane.

Iesua mukusaou angelo masua vile ane tatisaipeli imomomo no anu uasi

¹⁴ Ioxe, Iesua oli'a tatisaipeli tatalu milai xo la mixali noxi'a tamitema tavu'alo e milolutusi. La itema vile mune'e noxou Iesua ka muxolasou tava'u no laxunu mo muvikala lexe,

¹⁵ “Tatilao, naiaiama noxou alixeli xo xovulaulau ukasou utotomu mo mi ne uvila'isou vasimolu. Xo alaxu tavu'alo anu usu'anu u'una no navu xe alaxu tavu'alo usu'anu u'una no lexa.

¹⁶ Mo ene'enu noxi'a tatisaipelimeni ia imomomo so ipaipounu uasi.”

¹⁷ Iesua mulomusou itema ne mukalu la muvikalane'i tamitema latala ne lexe, “Uo, ngingi tamitema vaimomo 'o ne ngalopala uasisi. Axolu noxinge voxo veveni axova mo so ngano'u lavulavu? Ngamolo kalakala'ilo axo'o la ukalu talu? Ngano'u molomolo ne une'e noxilo.”

¹⁸ Xe Iesua mulavixu angelo masua ne sila alaxu vilesisi muxexesou molomolo ne sika laixenusi.

¹⁹ Mukalu xe ili'i ane'isisi mixolu la tatisaipeli mitali'isou Iesua lexe, “Axova so nexi tamomomo so takusaou angelo masua ne uasio?”

²⁰ La anu mukoline'i lexe, “Ngingi ngalopala malaxo uasi, laso maixene ngamomomo uasi ne. Xo eni avikalangengi manina lexe loxo lopala noxinge manina ia isusu'a se aloxo masiteti ngiaxu se isusu'a ne, la ngingi ngamomomo so ngavikalanu la'olu 'o lexe, “Navula nalai olele,” la anu uvula ane. Axone la ngamomomo no anu xaixai mukalusi.

²¹ Ia angelo masua kaini axone, anu vote'i vilesisi so ngakusaou, a no anu ilixo so nga'apingenge avile no anu ani'ani voxo se'i mo ngavivikala noxou Mosingesi.”

Vaikalaou Iesua e lexe usoli ka umaulila, a mulemolula

²² Mukalu la Iesua oli'a tatisaipeli mipita no xale lia ne Xalili. La muvikalane'i lexe, “Anu Itema ane molu noxou Mosinge la usu'a no avo'a tamitema.

²³ Laso ane'i ivau usoli ia no anu voxo tatalusou la anu utulu umaulila.” Xe ane'i tatisaipeli milomu axone la opone'i tu'umaxu misevile.

Iesua musu'anu taxisi e so tasou Mosinge

²⁴ Ioxe, ili'i la Iesuaena milai mixali ne Kapeniamu. La tami­tema so itaxusou taxisi so tasou Mosinge mine'e mitali'i noxou Pita lexe, “Axova, tisamengi ulavusou usu'anu taxisi so tasou Mosinge uasi?”

²⁵ La Pita mu'oxo lexe, “Ia xo ma'i, anu usu'anu ane.” Mukalu xe Pita mu'unalai no tani mo uvikala uao la Iesua muvikalanu lexe, “Saimoni, naxa­vu­tala axova? Ane'i takingi so lialia itaxusou taxisi iouiou noxi'a ta'ei? Noxi'a ta'ili'a u'isalili o noxi'a leviani?”

²⁶ La Pita muko­linu lexe, “A noxi'a leviani to.” La Iesua mu'oxo lexe, “Ia xo ma'i, ane'i ta'olu u'isalili ixolu lalavulusi no anu, isu'anu uasi.

²⁷ Ia mi vile uasi, masi opone'i tu'umaxuinge ane. Laso na'oxo aloxo 'o. Nalai na'uku no kupa xe sinana ane u'ala tei la nano'u ka na'a'anixu anaxu. La nano'u lamoli a uai nonano no anaxu ne. Mukalu la nalai nalosi'a so ulotonu taxisi noxinge nengei.”