Matiu 16 - Ata New Testament

Tatiatila mivikalanu Iesua lexe u'oxonu sosovo so xavi

¹ Ioxe, ane'i Tapalisi oli'a Tasatusi mine'e mitovonu Iesua mo mitali'i noxou lexe u'oxonu sosovo vile so umaxa'u lexe anu molu no tualasou Mosinge.

² Ia anu mukoline'i lexe, “Loxo no o'olovoxo ngamaisou aso lauoinu la ngalavusou ngavikala lexe, 'Uo, ne'iela aso laixe.'

³ Xe no kakau ngamaisou aso lauoinu mo sauma su'inu la ngavikala lexe, “Masi la'ave une'e.' Ngingi ngala­vusou ngatongonu sosovo no loxotolo axone ia sosovo ane uxaxali no taingengi vaimomo 'o la ngatongonu to uasi.

⁴ Ngingi tamitema ane laili so vaimomo 'o ne ilixo noxinge masuamo. Ngingi opongengi ututuluou sosovo vile, ia avikala lamana lexe sosovo vilesisi ane ngamaisou a sosovo ane muxali noxou Iona.” Muvika­lane'i mukalu la muxexesi'a mulai.

Iesua mu'oxonu latilovo so isiti noxi'a Tapalisi xe Tasatusi

⁵ Ioxe, Iesua oli'a tatisaipeli milutu milai xalevile no kupa pa'umolu ia tatisaipeli tane'ivulusi so ino'u pileti.

⁶ Xe Iesua mupelototosi'a lexe, “Masi ngamalei laixe. Ngala­xa'inu isiti noxi'a Tapalisi oli'a Tasatusi so opongengi ulai no anu uasi.”

⁷ La tatisaipeli me'a mivika­lane'i ngato'o lexe, “Masi muvikala axone xo tano'u pileti une'e uasi.”

⁸ Ia Iesua mulavu no anu vaivai­kalai'a ne la anu muvikala lexe, “Ai ngingi tamitema so lopala isusu'a sesi. Axova so ngingi ngavikala noxinge ngato'o lexe ngingi pileti uasi ne?

⁹ Xo ngingi ngalavu uao? Tangengivulusi lexe tamitema 5000 mi'ani'ani no anu pileti moso ta'uve? Mukalu ka ngetaxusou lakelasou matovinu mose'i, ne?

¹⁰ Xe tangengivulusi lexe tami­tema 4000 mi'ani'ani no anu pileti moso 7? Mukalu la ngetaxusou lakelasou mose'i. Ne, ngexavu­talanu?

¹¹ Laso axova so ngingi ngalamana uasi lexe eni avikalasou pileti noxinge uasi? Eni avikala lexe ngalaxa'i laixe no anu isiti noxi'a Tapalisi oli'a Tasatusi.”

¹² Muvikala axone laso mupalasi noxi'a lexe isiti e mulemolu so ilaxa'i no anu la mi so pileti uasi, anu uvikalasou votovoto noxi'a Tapalisi oli'a Tasatusi.

Pita muvikala lamana lexe Iesua anu ena'ei

¹³ Mukalu la Iesua mulai no xale lia ne Sisalia Pilipai. La no voxo anene mutali'isi'a tatisaipeliou lexe, “Itema e molu noxou Mosinge, tamitema ivikala lexe anu ena'eio?”

¹⁴ La ane'i mivikala lexe, “Tami­tema se'i i'oxo lexe Tioni e itema so kelele xe se'i lexe Elaitia xe se'i lexe Ielemaia o masi polopeti vilela.”

¹⁵ La anu muta­li'ilasi'a lexe, “Xe ngingi? Ngaxa­vutala lexe eni ena'eio?”

¹⁶ La Pita mukolinu lexe, “Nini ane so Kalaisiti a. Nini nami­tema e Mosinge ane umamauli musoso­vosou.”

¹⁷ La Iesua muvikalanu lexe, “A laixe manina noxine Saimoni e Tioni olu xo mi ne itema vile so lialia upela'inexu uasi. Mamilo e uxolu no tualasou lailaixe anu molu mupala'anixu mi ne noxine.

¹⁸ Mo kalumo eni avikalaneni lexe nini Pita ane, la no anu lavo'o anenesi eni atulusou pita noxilo. Atulusou la xavi no anu Tanixu soli uua'ulixu pita ne uasisi.

¹⁹ Laso vote'i so tamitema i'una ixolu no voxo so Mosinge molu u'uli laxune'i tamitemaou no tualasou, la eni alosine lakisou. Xe mi ma'ia nini nasakinu no lialia la Mosinge usakinu no tualasou kalumo. Xe mi ma'ia nalulusou no lialia la Mosinge ululusou no tualasou kalumo.”

²⁰ Mukalu la Iesua mu'apixa'a tatisaipeli pakia'u lexe mamu so ipala'anixu noxi'a tamitema lexe anu ane so Kalaisiti.

Iesua mupela'a tatisaipeliou lexe anu usoli ka umaulila

²¹ Ioxe, no voxo ne Iesua usoko'u so upela'a tatisaipeliou lexe anu a so ulai ne Ielusalemo so utavulenu tu'umaxu iouiou no avo'a tatiatila noxi'a Taiuta oli'a tapilisiti xe noxi'a tamitema so lavulavu no anu lavuloto. Ukalu la ane'i ivau usoli ia no anu voxo tatalusou la anu utulu umaulila.

²² Xe Pita mulomu axone la mulaixu Iesua va'axu sevile mo mulavixu lexe, “Tatana­nexi, Mosinge u'apixu mi ne, umomomo so uxalisine uasisi.”

²³ La Iesua muxiu mo mulavixu Pita lexe, “Nini Uluaou a navikala ne. Na'apixo uasi, nalai no tumalilo. Oponeni ulovou Mosinge oponu uasi, nini a namulinu masamasaxa noxi'a tamitemasi ane.”

²⁴ Mukalu la Iesua muvikalane'i tatisaipeliou lexe, “Loxo itema umasaxa so umulileli la upilixinu masamasaxa noxou. Upilixinu ukalu la ulalaxinu oponu so lexe loxo umulileli xe uxalisou tu'u­maxu o mailasou, la u'ume uasi. Anu loxo u'itinu ovu valautu so usoli no anu mo utavulenu so umulilelisi.

²⁵ Xo aloxo 'o. Loxo itema vile u'apisou maulixu lexe noxoumo, la maulixu usu'a vitanisi ane. Xe loxo itema vile upilixinu maulixu so ua'aloxo, la anu uxalisou maulixu maninasou ane.

²⁶ Xe loxo vote'i so itema utaxusou mimi no lialia mukalusi, ia loxo ulenu usu'a, la mimi ne usu'ulinu axova? Xo loxo uxalisou mimi lailaixe la unava? U'oxo lexe, 'Mimi ano'o ano'u ia uleleli la usu'asi.'? Umomomo so uvikala axone?

²⁷ Xo Itema ane molu noxou Mosinge une'e ili'i no anu iaxu Momu. Une'e la oli'a ta'angelou so ukoline'i tamitema u'isalili no anu ilixo noxi'a.

²⁸ Eni avikalangengi manina aloxo 'o. Se'i noxinge ane nenge'a tatulu 'o, isoli uao la imaisou Itema ane molu noxou Mosinge une'e mo upala'a no anu tanixu kingi.