Matiu 13 - Ata New Testament

Latilovosou itema mutapu'u uiti ngiaxu

¹ Ioxe, no voxo nesio la Iesua mula no tani ka mulai mutalupexa no pa'umolu kupa tatila ne.

² Xe tamitema latala mixali mipita noxou la anu tanixu uasi. Laso mutelo no pouti vile la mutalupexa no anu. Xe ane'i tamitema latala mitulu no tasii so ilomusou.

³ La Iesua muvotone'i no anu latilovo tapiena. Mutilovo vile aloxo 'o, “Ngalomu. Itema vile mulai mupeinu uiti ngiaxu no xai so utapu'u.

⁴ Mupeipeinu xe ulalai la uiti ngiaxu se'i mulapau no vote'i so xai. La tangiala mine'e mitokinu so mi'ou.

^5-6 Xe uiti ngiaxu se'i mulapau no lavolavo'o taitainu ia lialia ulu'elai malaxo uasi. Laso uiti anene muleme palea ia loxo aso tatila muiesou la muxalo xo lialia ulu'elai so uli'u umulinu uasi.

⁷ Xe uiti ngiaxu se'i mulapau no taitainu lamota ana'anaxu xolanu. Xe uiti muleme ia lamota ana'anaxu muleme la mukuponusi.

⁸ Ia uiti ngiaxu se'i mulapau no lia lailaixe xe munene'a la se'i nene'axu 100 xe se'i nene'axu 60 xe se'i nene'axu 30.

⁹ Itema loxo sangalou la ulomuxu vaikala ano'o.”

Iesua mupela'a tamitema no latilovosi

¹⁰ Xe ili'i la tatisaipeli mine'e mitali'i noxou Iesua lexe, “Axova so nini navikalane'i no anu latilovosi 'o?”

¹¹ La anu muvika­lane'i aloxo 'o, “Vaikala so voxo ane Mosinge molu u'uli laxune'i tamitemaou no tualasou ne mutalume tatei. Ia vaimomo 'o Mosinge mupala'anixu noxingesi 'o. Mupala'anixu noxinge ia noxi'a levianila uasi.

¹² Xo itema ane mimi se'i muai noxou mukalu la Mosinge ulosou se'i no latanula. Xe loxo anu ane uxalisou mi vile uasi, la uxexenu mi se ane muai noxou.

¹³ Laso maixene avikalane'i no anu latilovosi. Xo ane'i isasaxi ia itongonu mi vile uasi. Mo ilolomu ia ilomuxu so upala'a noxi'a uasi.

¹⁴ La noxi'a tamitema ane xo ne la vaikalaou polopeti Aisaia uxalixu nene'axu. Xo muvikala lexe, “Alaxu tavu'alo ngingi ngalolomu ia upala'a noxinge so ngalavusou laxu to uasi. Mo ngingi ngasasaxi utotomu ia ngatongonu mi vile uasi.

¹⁵ La opone'i tamitema ano'o pumuxusi. Xe sangalia muamuaxu so ilolomu. Mo ane'i mi'oxonu ie'i so muvuvu. Xo loxo 'o io ie'i utongonu xe sangali'a ulomuxu xe opone'i upalasiou laso ane'i ilivu ine'e noxilo so apaipoune'i.'

¹⁶ Ia anu laixe noxinge xo iengi utongonu mo sangalinge ulomuxu.

¹⁷ Xo avikalangengi manina lexe tatei tapolopeti oli'a tamitema talapu tapiena mimasaxau manina so imaisou mimi ane a ngasaxisou 'o, ia ane'i imaisou to uasi. Xe ane'i opone'i mutatama so ilomusou vaikala e a ngalolomusou 'o, ia ilomusou to uasi.”

Laxu latilovo so itema mutapu'u uiti ngiaxu

¹⁸ La Iesua muvikala lexe, “Ioxe ngalomu, eni alulusou laxu latilovo so itema mutapu'u uiti ngiaxu.

¹⁹ Aloxo 'o. Tamitema mose'i ilomusou vaikala laixe so Mosinge u'uli laxune'i tamite­maou no tuala­sou. Ilomusou ia upalasi noxi'a uasi laso Uluaou upalea utokinu vaikala ne uxexe. Anu loxo uiti ngiaxu ane mulapau no vote'i so xai.

²⁰ Xe tamitema se'i ne ane'i ilomusou vaikala ia anu ulapau no opone'i loxo uiti ngiaxu mulapau no lavolavo'o taitainu. Loxo ilomusou vaikala la ino'u mo i'osasou.

²¹ Ia opone'i ukasou manina uasi. Anu loxo uiti ngiaxu ane uleme sevile ia uli'u so ulu'elai no lia uasi. Xo loxo tamitema isu'anu anaxa'a noxi'a mo ixililiie'i no anu vaikalaou Mosinge ne, la ane'i i'umesou palea.

²² Xe se'i la ilomusou votovoto kalumo. Ia anu loxo uiti ngiaxu ane mulapau no taitainu lamota ana'anaxu. Xo tamitema ne opone'i ututulu no anu xoluxolu so vasime'a. Mo anu masaxa so lamoli ne u'oxo loloxa'a laso utanuxu vaikala aloxo lamota ana'anaxu mukuponu uiti xolanu mole unene'a uasi.

²³ Ia tamitema se'i ne opone'i uloxu Mosinge vaikalaou mo ikasou lexe manina. Anu loxo uiti ngiaxu ane mulapau no anu lialia laixe. Ikasou lexe manina laso xoluxolu noxi'a uxalixu nene'axu laixe loxo uiti ane muleme mo muxalixu nene'axu laixe. Se'i ne nene'axu 100 xe se'i nene'axu 60 xe se'i nene'axu 30.”

Latilovo so laxalasi masua muleme no xai

²⁴ Ioxe, anu mu'oxonu latilovo vilela noxi'a lexe, “Alulusou voxo so Mosinge molu u'uli laxune'i tamitemaou no tualasou aloxo 'o. Anu loxo itema vile mupeinu uiti ngiaxu laixe so utapu'u no xai.

²⁵ Ia no olovoxo loxo tamitema a miai mukalu la uluaou itema ne mutoke mune'e ka mupeinu laxalasi masua sesenu no taitainu uiti sika mulai.

²⁶ Ioxe, ili'i uiti ngiaxu muleme mo munene'a ia laxalasi masua a mupala'a no taitainu kalumo.

²⁷ Laso ane'i tauokuvoiou mosou xai milutu milai noxou mo mivikalanu lexe, 'Tilao, nexi telavu lexe netapu'u uiti ngiaxu laixesi no xaixene. Ia axova so laxalasi masua muleme kalumo 'o?'

²⁸ La anu muvika­lane'i lexe, 'A uluaxeli vile masi mu'oxonu.' La ane'i tauokuvoi mitali'isou lexe, 'Nini nemasaxau lexe nexi talai taluvusou ka tasu'anu la'oluxu?'

²⁹ Ia anu mu'oxo lexe, 'Uasi. Xo loxo 'o io ngaluvusou laxalasi masua la ilou uiti ane.

³⁰ Ta'oxo aloxo 'o. Ngapilixinu uxolu mo ilou ileme xo mo uiti lingamo. Xe no anu voxo so tamitema so i'elesoui la eni avikalane'i lexe tei ane'i itaxusou laxalasi masua ka isa­kinu tavata­valanu so i'elaxu no navusi. Ukalu la i'elesou uiti temanu mo ita'olunu no tasou iauvaxe noxilo.'”

Latilovo so masiteti ngiaxu xe isiti

³¹ Xe anu mulosi'a latilovo vile lexe, “Alulusou voxo so Mosinge molu u'uli laxune'i tamitemaou no tualasou aloxo 'ola. Anu loxo ovu masiteti ngiaxu ane itema vile muno'u la mutapu'u no xaixu.

³² Ngiaxu ne anu loxo ovu ngiangiaxu se'i uasi, anu isusu'a e isusu'a manina. Ia loxo mutapu'u no lia xe muleme la anu mulai tatila e tatila manina mo muua'ulixu toutou no xaixai mukalusi. Laso ane'i tangiala mine'e mitulusou tasi'a no avo'avolu.”

³³ Xe muvikalala lexe, “Voxo so Mosinge molu u'uli laxune'i tamitemaou no tualasou la anu aloxo 'ola. Sema vile mino'u isiti se ka miilanu ilou palaua latala­musou. Miilanu mukalu xe muai sevile sila palaua loloni ne musoxo kena.”

Iesua mulanu vaikala ne no anu latilovosi

³⁴ La Iesua mulanu vaikala ano'o mukalusi noxi'a tamitema latala ne no anu latilovosi. Ulemolu mi vile lamana avile uasi, anu mutoka­lasou no anu latilotilovosi.

³⁵ Laso anene muxalixu nene'axu vaika­laou polo­peti vile mulemolu tatei aloxo 'o, “Eni alanu vaika­laxeli no anu latilovosi. Mimi iouiou e mutalume tatei musoko'u no tava'u lialia xo mo muxali vaimomo 'o, ne eni alemolusi.”

Iesua mupala'anixu laxu latilovo so laxalasi masua

³⁶ Mukalu la Iesua muxexesi'a tamitema latala ka mu'unalai no tani. La tatisaipeliou mine'e noxou mo mivikalanu lexe, “Nalulusou laxu latilovo e so laxalasi masua muleme no xai.”

³⁷ La anu muvikalane'i lexe, “Itema mutapu'u uiti ngiaxu laixe ne anu Itema ane molu noxou Mosinge.

³⁸ Xe xai ne a lialia 'o. Xe loxo uiti ngiaxu laixe ne a tamitema ane ixolu nonano no voxo loxo Mosinge molu u'uli laxune'i tamitemaou. Xe laxalasi masua ne a tamitemaou Uluaou.

³⁹ Xe itema uluaou ane mupeinu laxalasi masua sesenu no xai ne a Mosinge Uluaou. Xe voxo so mi'elesou uiti lingamo ne a kaluxusou lialia. Xe tamitema so mi'elesou ne a ta'angelo talaixe 'osi.

⁴⁰ Laso loxo tamitema mitaxusou laxalasi masua ka mi'elaxu la anu uxali axonesi no anu kaluxusou lialia.

⁴¹ Xo Itema ane molu noxou Mosinge upalusi'a ta'angelou no taine'i tamitema ane so anu molu u'uli laxune'i ne. Upalusi'a so itaxusi'a ane'i ane iolexa'a tame­nexi'a no anu susu xe ane'i ane ilixone'i upolo va'axu. Itaxusi'a so ixexene'i ne avile.

⁴² Mukalu la ipeine'i no navu toxoxu. Mo no navu toxoxu ne la itatama tatilasi xo mole anaxa'a ukalakikisi.

⁴³ Xe noxi'a ane'i ane ixolu nonano so Mami'a molu u'uli laxune'i la lamanaxa'a a loxo aso 'osi. Itema loxo sangalou la ulomuxu vaikala ano'o.”

Latilovo so kesi so lamoli a muai mutalume no lia

⁴⁴ Xe muvikalala lexe, “Voxo so Mosinge molu u'uli laxune'i tamitemaou no tualasou la aloxo kesi so lamoli e mi'asixu so mitalumeu no xai vile. Xe itema vilela loxo uxalisou la utalumeula. Mukalu la anu u'osasou misevile mo ulai usalimunu mimiou mukalusi so lamolisou la ulotonu xai ne.”

Latilovo so xapo peli lamolisou tatila musuku

⁴⁵ Xe muvikalala lexe, “Voxo so Mosinge molu u'uli laxune'i tamitemaou no tualasou la aloxo 'ola. Anu loxo itema so lailoto ane ukakamulinu xapo e ilemolu lexe peli lailaixe so ulotonu.

⁴⁶ Ukaka­mulinu xo xe umaisou vile ane lamolisou mutiatila musuku laso ane. Anu ulai usalimunu mimiou mukalusi so lamolisou la ulotonu xapo peli lailaixe ne.”

Latilovo so kae

⁴⁷ Xe muvikala aloxo 'ola, “Voxo so Mosinge molu u'uli laxune'i tamitemaou no tualasou la aloxo 'o kalumo. Anu loxo kae ane tamitema isu'anu ulu'elai no luaki so ilapune'i tasinana iouiou.

⁴⁸ Ioxe, kae uana'anae laso ane'i ilai isu'a no tasii so ikaline'i tasinana. Ikaline'i xe ane'i ane talaixe la ipitanu no anu lisi xe ane'i ane tamasua la ipeine'i isu'asi.

⁴⁹ La anu uxali iou vilesisi axone no anu kaluxusou lialia 'o. Xo ta'angelo talaixe ine'e ikaline'i tamitema tamasua e ixolu no taine'i tamitema talapu.

⁵⁰ Muka­lu la ipeine'i no navu toxoxu. Mo no navu toxoxu ne la itatama tatilasi xo mole anaxa'a ukala­kikisi.”

⁵¹ Mukalu la Iesua mutali'isi'a tatisaipeli lexe, “Axova, vaivai­kala ano'o mukalusi mupalasi noxinge?” La ane'i mikolinu lexe, “Ani, mupalasisi.”

⁵² Laso anu muvika­lane'i lexe, “Tamitema so lavulavu no anu lo se'i mixalisou lavulavu no anu voxo so Mosinge molu u'uli laxune'i tamitemaou no tualasou. La ane'i ne loxo mosou tani tatila vile. Anu ulai no tasou iauvaxe noxou so uliulixu mimi lailiaxe e teiteinu xe alavua ula.”

Tatemanu tualasou Iesua mixiunu tumali'a noxou

⁵³ Ioxe, Iesua mu'oxonu latilo­tilovo axone mukalu ka mulutu no tuala ne so mulai.

⁵⁴ Mulai la muxali avile no nunisou mo musoko'u so uvotovoto no anu tasou lavuloto noxi'a. Xe ane'i milomusou vaikalaou la mikulu­kemolu mo mi'oxo lexe, “Iu, itema ano'o muno'u lavulavuou a ne'eio? Xe sosovo so xavi u'oxonu axova?

⁵⁵ Ano'o ne telavusou. Anu kapenita olusi to! Anu nenu ne Malia. Xe tavimo­vimou a Tiemisi xe Iosepu xe Saimoni xe Iutasi, ne?

⁵⁶ Xe tavimovimou tasema a nenge'a taxoxolu 'o. Laso umomomo no anu mimi 'o xo muno'u axova?”

⁵⁷ La ane'i opone'i muxililiou. Laso Iesua muvikalane'i lexe, “Loxo polopeti vile uxixao xe uxali no tuala ne'ei la tamitema itaxanu ane. Ia loxo uxali no anu nunisou mo no tasou u'isalili la ane'i itaxanu to uasi!”

⁵⁸ Laso anu u'oxonu sosovo so xavi tavu'alo no tuala ne uasi xo ane'i ilopalanu uasi.