Matiu 11 - Ata New Testament

Tioni e itema so kelele mupalusi'a tatisaipeliou se'i so itali'i noxou Iesua

¹ Ioxe, Iesua mupelototosi'a tatisai­peliou 12 ne mukalu la anu mulutu mulai no taotaoni no anu xale lia ne so muvotovotone'i tamitema mo mulalanu Mosinge vaikalaou noxi'a.

² La Tioni e itema so u'oxonu kelele a muxolu no lakalavusu xe mulo­musou a'alosou xaixai noxou Kalaisiti e mu'oxonu ne. Laso anu mupalusi'a tatisaipeliou milai so itatali'i noxou.

³ Ioxe, mixali noxou Iesua mukalu la mivulunu tali'i noxou Tioni aloxo 'o, “Nini itema Mosinge muvavalimasou e texoxo­maiou o tautitiou evilela masi a uaosio?”

⁴ La Iesua mukoline'i lexe, “Ngingi ngalivu la ngaa'alou Tioni no anu mimi e ngemaisou mo ngelomusou 'o.

⁵ Xo tamitema ane ie'i mutomu la imaleila. Xe ane'i ane tava'a musoisoli la imua­mua'isi. Xe tamitema so siki lepelesi la vasime'a malemalengala. Xe ane'i ane sangali'a mutomu la ilolomula. Xe se'i ane misoisoli la itulutulu imaulila. Xe tamitema ta'oloxola la ilomusou votovotosou vaikala laixe.

⁶ La anu laixe noxou itema aneva ulopalaleli mo usasalo uasi.”

⁷ Ioxe, tatisaipeliou Tioni a milu­tu so ilivu la Iesua musoko'u so uvikala lamana so Tioni noxi'a tamitema latala ne aloxo 'o, “No voxo loxo ngelailai no xale lia esi'esi la ngesaxisou mi ma'ia? Ngesaxisou itema pelesou loxo lele'i ane sivo utaotaonu?

⁸ O masi axova, ngelai so ngasaxisou itema lavulutiou lailaixe? Ai ngalomu, tamitema ane ivilasi no anu mimi lailaixe, ne ane'i ixoxolu no tasi'a takingisi.

⁹ O masi ngelai so ngasaxisou mi ma'ia, polopeti vile, ne? Ani, ngesaxisou polopeti vile ane. Ia avikalangengi lexe polopeti anene uua'ulixa'a tapolo­peti muka­lusi.

¹⁰ Xo anu mosou e vaikalaou Mosinge uvikalasou lexe, 'Nalo­mu, eni apalusou itemaxeli vile no laxuneni so ulanu vaikalaxeli. Anu u'uli noxine so ulalaxinu vote'i­sine.'

¹¹ Eni avikalangengi manina aloxo 'o. No taine'i tatemanu lialia muka­lusi, la Tioni e itema so u'oxonu ilixo so kelele uua'ulixa'a avile. Ia no voxo so Mosinge molu u'uli laxune'i tamitemaou no tualasou xe ena'ei noxi'a ualasou vitanisi, la uua'u­lixu Tioni ane.

¹² La oto'oto musoko'u no voxo loxo Tioni e itema so u'oxonu kelele mulanu vaikala la mune'e muxali vaimomo 'o. Oto'oto ne mu'avuti xo tamitema so su xavine'i so i'una ixolu no voxo ane Mosinge molu u'uli laxune'i tamitemaou no tualasou. Laso maixene tu'umaxusou tavu'alo a muxali 'oe.

¹³ Xo tapolopeti mukalusi xe no lavuku so lo ane'i milanu vaikala so pela'a xo mo mune'e muxali noxou Tioni.

¹⁴ Laso loxo opongengi uloxu la ngakasou vaikala ano'o lexe manina. Vaikalai'a e milemolu so Elaitia e lexe une'e, la anene mivikalasou Tionisi ane.

¹⁵ Itema loxo sangalou la ulomuxu vaikala ano'o.”

¹⁶ La Iesua muvikala aloxo 'ola, “A'oxonu latilovo so apala'anixu ilixone'i tamitema so vaimomo 'o axova? E aloxo 'o. Ane'i loxo tamolomolo ixoxolu no loxomala mo i'ava noxi'a tamenexi'a lexe,

¹⁷ 'Nexi tetausou mavusinge ia ngingi ngalei uasi. Xe nexi tetalingalele ia ngingi ngatama uasi.'

¹⁸ Xo Tioni anu itema so u'ani mo uie uasi. Sila ngingi ngevikala lexe, 'Iu, ulenu masua uxolu noxou to ne!'

¹⁹ Mo vaimomo 'o Itema ane molu noxou Mosinge a muxali mo u'ani mo uie. Sila ngingi ngevikalasou lexe, 'Ngamaisou anu itema so vune mo ulavusou usipaki. Xe anu vaitami'a tamitema so itaxusou taxisi oli'a tamitema so susu to!' Ngingi ngalavusou ngavikala axone ia tamitema ane ilomuxu vaikalasou lavulavu u'asi'asi noxou Mosinge la xaixai noxi'a umaxa'u lexe vaikala ne manina ane.”

Anu uxali masua manina noxi'a ane'i ane ixiunu mo i'isalilinoxu opone'i uasi

²⁰ Ioxe, anu muxavutalanu tao­taoni se'i e anu mu'oxonu sosovo so xavi tapiena no anu la tatemanu ixiunu mo i'isalilinoxu opone'i uasi. Laso anu musoko'u so uvikala lamana so ilixo masua noxi'a tamitema anene.

²¹ La muvikala lexe, “Auo, anu uxali masua manina noxinge ne Kolasini, mo uxali masua manina noxinge ne Vetisaita to. Xo loxo sosovo so xavi muxali no taoni ne Taili mo Saitoni a loxo muxali no taingengi ne la ane'i masi mixiunu mo mi'isalilinoxu opone'i tateimo. Xe axone la masi a isakinu lavalava so tama mo ipeipenu lomulo no kisi'a so imaxa'u mama'u so susu noxi'a.

²² Ia no voxo so Mosinge ukolinu susu la tu'umaxu ane uxalisinge la uua'ulixu ane noxi'a Tataili xe Tasaitoni.

²³ Xe ngingi Takape­niamu, ngingi nga'oxo lexe nga'itingengi so ngaxali no tuala­sou Mosinge, ne? Uasisi ane, ngingi ngasu'a ulu'e no tanixu solisi ane! Xo loxo sosovo so xavi uxali tatei ne Sotomu a loxo anene muxali noxinge 'o la anu tuala ne masi a uxoxolusio.

²⁴ Laso maixene avikalangengi lexe no voxo so Mosinge ukolinu susu la tu'umaxu ane uxalisinge la uua'u­lixu ane noxi'a Tasotomu.

Iesua muvikala lamana lexe tamitema ixalisou ma'ila a noxousi

²⁵ Ioxe, no voxo ne la Iesua muvikala aloxo 'o, “Papao, nini Tatananu tualasine mo lialia 'o. Eni a'itinu ualasine xo nini netalumeu mimi ano'o noxi'a tamitema so lavulavu xe takeleva. Ia a nepa­la'anixu noxi'a tamitema pelesi'a a loxo takeakeasi 'o.

²⁶ E Papa, muxali aloxo 'o xo mumulinu masaxa noxine u'isalilisi.”

²⁷ La Iesua muvikala aloxo 'ola, “Mamilo mupilixinu mimi mukalusi no avolo 'o. La itema vile ulavusou Olu uasi, Momusi ulavusou. Xe itema molu ulavusou Momu uasi, Olusi xe ane'i ta'ei upela'axu Momu no anu masaxa noxou, la ilavu­sousi.

²⁸ Laso ngingi tamitema ane ngatotosa no anu mimi tu'umaxu ngatavalenu ne, ngingi mukalusi ngane'e noxilo xo eni alosinge ma'ila a.

²⁹ Vaikalaxeli ne anu loxo lapalanga imulaxu no xola­ne'i takau so ilapunu mimi no anu. Laso ngingi nga'italongengi so ngatavulenu lapalanga noxilo axone mo ngano'u lavulavu noxilo. Xo eni ilixoleli se'isisi mo alavu­sou alu'eleli so opoleli lexa noxi'a tamitema. Laso loxo ngane'e noxilo la ngingi ngaxa­lisou ma'ila no anu ulengengi.

³⁰ Xo lapalanga e amulaxu no laxasinge ne anu se'isisi noxinge xe mi e alosinge so ngatavulenu ne anu papaxexusi.