Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Maki 6 - Ata New Testament


Tatemanu tualasou Iesua mixiunu tumali'a noxou

1 Ioxe, Iesua mulutu no apu ne mo mulai no nunisou. Mulai la tatisaipeli mimulinu so oli'a milai.

2 Ane'i mixolu xe Voxo so Ma'ila la anu muvotovoto no tasou lavuloto. Muvotovoto la tamitema tavu'alo milomu la mikuluke mo mi'oxo lexe, “Iu, itema ano'o muno'u vaikalaou a ne'ei? Mo axova no anu lavulavu noxou 'o? Xe sosovo so xavi u'oxonu axova?

3 Ano'o ne telavusou. Anu kapenitasi to! Anu Malia ilie. Nenge telavusi'a tavimovimou e Tiemisi xe Iosepu xe Iutasi xe Saimoni. Xe tavimo­vimou tasema a nenge'a taxolu 'osi.” Ane'i mivikala axone la opone'i masuaou.

4 La Iesua muvikalane'i lexe, “Loxo polopeti vile uxixao xe uxali no tuala ne'ei la tamitema itaxanu ane. Ia loxo uxali no anu nunisou mo uxolu no taine'i tatulanu no tasou u'isalili la ane'i itaxanu to uasi!”

5 La anu vote'i so u'oxonu sosovo so xavi no tuala ne uasi. Ia ane'i vilevilesi loxo mipi­piena la mumulaxu avolu no kisi'a so mupaipoune'i.

6 La anu tanu­lilii'a tatemanu tualasou ne xo ane'i opone'i mamalaxu so ilopalanu uasisi. La anu mulutu muxixao no tuatuala no xale lia ne so uvoto­voto.


Iesua mupalupalusi'a tatisaipeli no anu xaixai vile

7 Xe mune'e la anu mu'avali'a tatisaipeliou 12 mipita noxou. La anu muvikalane'i aloxo 'o, “Ngingi tametamei ngalai ngaxixao no tuatuala. Ngalai, la ngalai no anu xavi noxilo so ngakusai'a ta'angelo tamasua ane ikasi'a tamitema.

8 Ngamuamua'i la ngatavulenu mi vile uasi, ngano'u vilaxosi. Ngano'u mi loxo pileti o ngatavulenu tiva o ngano'u lamoli sevile no anu paki uasi.

9 Mo ngatanu lasumengi xe lasioti veveni ia ngano'u senisi uasi.”

10 Xe musolonu aloxo 'ola, “Loxo ngalutu xe ngaxali no tuala vile xe nga'una no tani aneva, la ngaxolu anesi xo mo ngalutula.

11 Xe loxo ngaxali no tuala aneva xe i'osasinge mo ilomungenge uasi la nga'umesou tuala ne. Xe loxo so ngalutu no iouxalengae la ngapu­panu tava'inge so io'isou tuala ne uxexe. Mo so axone la anu latilovosou ilixo masua noxi'a ane.”

12 Iesua mupela'a tatisaipeliou axone mukalu la ane'i milai. Milai la milanu vaikala noxi'a tamitema lexe ane'i ixiunu opone'i so susu noxi'a.

13 Mo mikusai'a ta'angelo tamasua ane mikasi'a tamitema. Xe loxo mixalisi'a tamitema pipiena la ane'i milutunu ueli no kisi'a mo mipamauline'i.


A'alosou soli noxou Tioni e itema so u'oxonu ilixo so kelele

14 Ioxe, mune'e la tamitema tapiena no tuatuala milavusou ualasou Iesua. La anu Kingi Eloti kalumo mulomusi'a tamitema ivikalasou lexe, “Mane Tioni e itema so u'oxonu ilixo so kelele mutulu mumaulila ne. Laso maixene anu umomomo so u'oxonu sosovo so xavi 'o.”

15 Xe se'i mivikala lexe, “Anu masi Elaitia ane.” Xe se'i mi'oxo lexe, “Anu polopeti kaini loxo ane'i tapolopeti tatei ane.”

16 Eloti mulomusi'a ivikala axone la anu mu'oxo lexe, “Uasi, anu Tioni ane. Exotonu limilaxu musoli mala'o ia mutulu mumaulila 'o.”

17-18 Anu Eloti muvau Tioni musoli xo tava'u aloxo 'o. Tei la Eloti mutaula'ixe sema vile ualasie lexe Elotiasi. Ane Eloti vimou Pilipi semau ane. Mutaula'ixe la Tioni mupelototo noxou lexe, “Nini netaula'ixe vivine semau axone, la anene ulapu uasi manina.” Mupelototo axone xe Eloti la'iaxu laso mupalusi'a ta'amiou mitetelisou Tioni. Mitetelisou mo misakisakinu no anu seni so mikalavusunu.

19 La Elotiasi kalumo milomusou vaikalaou Tioni xe muto'omele la la'iaxeou mo mimolo soli noxou. Ia vote'i uasi,

20 xo Eloti mumama'u noxou Tioni. Mumama'u xo mulavu lexe anu itema ulapu mo ilixo noxou malemalenga no iou Mosinge. Laso anu mu'utululunu Tioni so umasua uasi. Xe loxo mulomusou vototovo noxou Tioni la anu mu'avutinoxu oponu mo tanulili. Ia anu mu'osa so ulomu­sousi.

21 Ioxe, Eloti mu'utululunu Tioni axone, ia semau Elotiasi ne opone mutulu no anu soli noxousi. Mixolu xo xe voxo vile mutiatila muxali la mixavutala no anu opone lexe, “Anu ane, tienisi laixe a.” Voxo mutiatila ne so tamitema isovososou lavulo'o noxou Eloti. Anu mulalaxinu la'ilali tatila mo mulingai'a tatiatila no anu xamani xe noxi'a ta'ami xe no xale lia ne Xalili.

22 Mulingai'a xe oli'a mixolu i'ani'ani la Elotiasi ilie vuanga mi'una milei no laxune'i. La Kingi Eloti oli'a tatiatila mi'osasou lei noxie misevile. Laso anu muvikalane lexe, “Nalingau mi ma'ia noxilo la eni alosinesi ane. Nalemolusi.”

23 Mo muvavalima aloxo 'ola, “Manina misevile, mi ma'ia nalemolu ne alosinesi. Loxo nalinga noxilo lexe akalipalanu mimixeli uxali pa'usou tamei mo so pa'usou noxine xe pa'usou noxilo, la eni a'oxonu ane.”

24 La vuanga ne milai noale mo mitali'isie nenie lexe, “Alingau ma'ia noxou?” La nenie mivikalane lexe, “Nalingau kisou Tioni e itema so u'oxonu ilixo so kelele.”

25 Nenie mivikalane axone la ane mipalea milivu mo mivikalanu Eloti lexe, “Alala'e se'osi nano'u kisou Tioni e itema so u'oxonu ilixo so kelele. Nano'u mo namu­laxu no lapelete ka nalosilo.”

26 Kingi mulomusou vaikalaie axone la anu oponu tu'umaxu misevile. Ia anu muxavutala lexe, “Ai, eni evavalima no ie'i tatiatila e noxi'a te'ani'ani 'o. Laso loxo amulinu linga noxie uasi la atavulenu maila tatila ane. Eni vote'i so axililie uasi.”

27 La alaxu vilesisi kingi mupalusou ami vile so ulai uno'u Tioni kisou une'e. Anu mulai no tasou lakalavusu sila muxotonu limilaxu Tioni so kisou muxexe avile.

28 Muxotonu mukalu la mumulaxu no anu lapelete vile la mune'enu noxie vuanga ne. Mukalu la vuanga ne milosie nenie.

29 Xe ane'i tatisai­peliou Tioni milomusou mi ne laso ane'i mine'e mino'u vasimolu ka mino'u milaixu so mi'asixu no lulu.


Iesua muvelunu la'ilali xa'a tamitema 5000

30 Ioxe, tatisaipeliou Iesua mixi­xao­xao xo xe milivu mipita noxou. La mia'alo noxou no anu xaixai mo votovoto e mi'oxonu no tuatuala.

31 Oli'a mixolu axone ia tamitema ilai ine'e noxi'a xo ane'i tavu'alo mimasaxau so imaisou Iesua. Tamotu ilai ine'e xo mole Iesua oli'a tatisaipeliou taimu so i'ani uae. Laso anu muvikalane'i lexe, “Ai, nenge nenge'asi talai no apu vile tamitema uasi. Mo so axone la ngama'ila sevileo.”

32 Laso oli'a mitelo no pouti xo la milai no apu vile so ane'isisi mixolu ne.

33 Milai ia tamitema mimaisi'a mi ne milai la mitongone'i lexe ane'i Iesuaena ane. Laso ane'i tamitema tavu'alo me'a no tuatuala miiave milailai. Milailai la mixali tei no anu apu e lexe Iesuaena ilai no anu.

34 La pouti a so usua no tasii la Iesua mumalei la tamitema tavu'alo e tavu'alo. Mumalei axone la anu tanuxa'a misevile xo ane'i loxo tasipisipi ane tatanane'i so usaxila'a uasi. Laso anu musoko'u so upala'anixu mimi tavu'alo noxi'a.

35 Mixoxolu xo xe o'olovoxoe la tatisaipeli mine'e noxou mo mivikala lexe, “Ai, apu ano'o ne tuala vile so tamitema 'o ino'u xa'a la'ilali uasi. Mo aso a uai no laxa'ilu oe.

36 Masi napalusi'a so ilailai no tuatuala no pa'upa'umolu xale lia 'o so iloto xa'a la'ilali.”

37 Ia Iesua muvikalane'i lexe, “Ngingi menge ngaitixa'a la'ilali.” La ane'i mikolinu lexe, “Xo axova, nexi 1000 kina a uai noxixe so taloto xa'a la'ilali?”

38 La Iesua mutali'isi'a lexe, “Xo ngasaxisaxi lexe pileti ta'ei mo a uai noxinge?” Ane'i milai mitalitali'i xe milivu noxou la mi'oxo lexe, “Nexi pileti ta'uve xe sinana tameisi.”

39 La Iesua muvikalane'i tamitema latala lexe ane'i ikalipalane'i mo ixolu kulukulupi no laxalasi lailaixe ne.

40 Ioxe, mixolu no lia la kulupi se'i tamitemasou 100 xe se'i 50.

41 Mukalu la Iesua muno'u pileti ta'uve xe sinana tamei ne. La anu mutala telo no loxotolo mo muvikala laixe noxou Mosinge so la'ilali ne. Mukalu la anu muse'ise'inu pileti ilou sinana tamei ne mo mulosi'a tatisaipeliou so ivelunuxa'a tamitema.

42 Mive­lunuxa'a mivelunuxa'a xo la ane'i mukalusi mi'ou mo mikalusou masaxa na'asi.

43 Mikalusou masaxa na'a mole la'ilali matovinu muta'olu. Laso ane'i mipitanu la mumomomo no anu lakela 12.

44 La tamitema ane mi'ou la'ilali ne tavu'alo e lapilai uasisi. Xo loxo tamulu noxi'asi, la navasi'a 5000.


Iesua mumuamua'i no kupa loxo'u

45 Ioxe, mukalu la Iesua mupalea mupalusi'a tatisaipeliou mo muvi­kala lexe, “Ngingi ngatelo no pouti mo nga'uli ngalai xalevile olele ne Vetisaita. Ia eni axolu sevile so apalupalusi'a tamitema latala 'o ilailaio. Ukalu laso amulingengi.”

46 Ioxe, mupalupalusi'a tamitema milailai mukalu la anu mulutu mutelai no la'olu vile ne so muxolu muvikala noxou Mosinge.

47 Muxolu xo xe olovoxo la anu anusisi muxolu no tasii. Ia ane'i tatisaipeli mixolu no pouti mo ane'i a uao no kupa lixinusio.

48 La anu musaxisi'a lexe mivo­voxo axone xo sivo molu loxo no laxune'i. Xe ane'i xavine'i so ipulu ia sivo mutanutanuxa'a. Mutanu­tanuxa'a xo mo anu so lamana mukea la Iesua mumuamua'i teitexi no kupa loxo'u. Anu muxa­lisi'a mo anu so upolope­pene'isi.

49 Ia tatisaipeli mimaisou mi ne mumuamua'i teitexi no kupa loxo'u la mi'oxo lexe itema vile ulenu ane sila miiaukakasi.

50 Miiaukaka xo mimaisou Iesua ia ilavusou uasi mo ane'i mi'ume kena. Ia alaxu vilesisi Iesua mumamatolane'i lexe, “Opongengi uai se'isisi, nga'ume uasi. Xo eni to!”

51 La anu mutelo noxi'a no pouti sila sivo mutalo. La ane'i tane'ilili manina.

52 Tane'ilili xo ino'u lavulavu laixe noxou uasi. Ane'i mimaisou sosovo so xavi so muvelunuxa'a tamitema tavu'alo la'ilali ia kisi'a mutomusi. Ilavusou tava'u so u'oxonu mimi iouiou axone uasi.


Iesua mupaipoune'i tamitema pipiena ne Xenesaleti

53 Iesua oli'a tatisaipeli mixali xalevile no kupa mukalu la misua no tuala Xenesaleti mo misakinu pouti ane.

54 Misakinu xe milu'e no pouti sila alaxu vilesisi tamitema mitongonu Iesua.

55 Mitongonu la alaxu vilesisi miiaveiave no tuatuala no xale lia ne so ia'aloi'a tamitema. Mia'aloi'a laso misoko'u so itavulene'i tamitema ipipiena iouiou. Ane'i mimulaxa'a no lusi'a so mine'ene'i noxou Iesua no apu e milavu lexe muxolu no anu.

56 Xe loxo Iesua mulai no tuala o taoni o xale lia ne'ei la tamitema ilavusou ipitane'i tapipiena no anu tanixu maketi. Mipitane'i miai ne xe loxo anu mupolo noxi'a la milinga noxou lexe ikasou lasiotiou veveni telexu se no lia. Xe ane'i ta'ei mikasou axone la laixene'i avile.

Copyright 1999 New Tribes Mission, Sanford, FL 32771-1487

New Tribes Mission
ကြှနျုပျတို့နောကျလိုကျပါ:



ကြော်ငြာတွေ