Maki 4 - Ata New Testament

Latilovo so itema mutapu'u uiti ngiaxu

¹ Xe voxo vilela la Iesua muxoxolu no pa'umolu kupa toxoxu ne la musoko'u so muvotovotola. Tamitema latala mixali mipita noxou la anu tanixu uasi. Laso mutelo no pouti vile so musuku sevile no lexa la mutalupexa no anu. Xe ane'i tamitema latala mita'olu no tasii so ilomusou.

² La Iesua muvotone'i no anu latilovo tapiena. Mutilovo vile aloxo 'o,

³ “Ngalomu. Itema vile mulai mupeinu uiti ngiaxu no xai so utapu'u.

⁴ Mupeipeinu xe ulalai la uiti ngiaxu se'i mulapau no vote'i so xai. La tangiala mine'e mitokinu ka mi'ou.

^5-6 Xe uiti ngiaxu se'i mulapau no lavolavo'o taitainu ia lialia ulu'elai malaxo uasi. Laso uiti anene muleme palea ia loxo aso tatila muiesou la muxalo xo lialia ulu'elai so uli'u umulinu uasi.

⁷ Xe uiti ngiaxu se'i mulapau no taitainu lamota ana'anaxu xolanu. Xe uiti muleme ia lamota ana'anaxu muleme la mukuponu laso anu unene'a uasi.

⁸ Ia uiti ngiaxu se'i mulapau no lia lailaixe mo muleme la munene'a laixe. Munene'a la se'i nene'axu 30 xe se'i nene'axu 60 xe se'i nene'axu 100.”

⁹ Iesua muti­lovo axone mukalu laso muvika­lane'i lexe, “Itema loxo sangalou la ulomuxu vaikala ano'o.”

¹⁰ Mutilovo axone mukalu xe ili'i la tamitema latala milailai la Iesua oli'a tatisapaieliou 12 nesi mixolu. Ane'i mixolu laso tatisaipeli mitali'isou no anu latilovo ne laxu.

¹¹ La anu muvikalane'i aloxo 'o, “Vaikala so voxo ane Mosinge molu u'uli laxune'i tamitemaou ne mutalume tatei. Ia vaimomo 'o Mosinge mupala'anixu noxingesi 'o. Mupala'anixu noxinge ia ane'i ane opone'i uxolu va'axu noxou la eni avikalane'i no anu latilovosi.

¹² Eni atilotilovo aloxo ne la umulinu vaikalou polepeti mukau­ka­vunu tatei lexe, 'Ane'i utotomu isaxisou mi vile laixe ia itongonu uasi. Xe ane'i utotomu ilomusou kalumo ia ilamana no anu uasi. Xo loxo 'o io masi opone'i ulivu noxou Mosinge mo anu ukalusou tina'u­xa'a so susu.'”

¹³ Mukalu la Iesua muvikalane'i tatisaipeliou aloxo 'ola, “Ngingi ngalavusou laxu latilovo ano'o uasi, ne? Loxo ngalavusou ano'o uasi la ngalavu no anu laxu latilovo se'ila ili'i axova?”

¹⁴ Laso mululusou noxi'a aloxo 'o, “Itema ane mutapu'u uiti ngiaxu ne anu loxo itema uvotovoto no anu Mosinge vaikalaou.

¹⁵ Xe tami­tema se'i la opone'i loxo lialia pakia'u no vote'isou xai ane uiti ngiaxu se'i mulapau no anu. Xo loxo ilomusou votovoto la vaikala uleme uasi xo Uluaou upalea utokinu.

¹⁶ Xe tamitema se'i ne ane'i ilomusou vaikala ia anu ulapau no opone'i loxo uiti ngiaxu mulapau no lavolavo'o taitainu. Loxo ilomusou vaikala la ino'u mo i'osasou.

¹⁷ Ia opone'i ukasou manina uasi. Anu loxo uiti ngiaxu ane uleme sevile ia uli'u so ulu'elai no lia uasi. Xo loxo tamitema isu'anu anaxa'a noxi'a mo ixililiie'ixu vaikalaou Mosinge ne, la ane'i i'umesou palea.

¹⁸ Xe se'i la ilomusou votovoto kalumo, ia anu loxo uiti ngiaxu ane mulapau no taitainu lamota ana'anaxu.

¹⁹ Xo tamitema ne opone'i ututulu no anu xoluxolu so vasime'a. Mo ane'i ixavutala no anu lamolisi xe masamasaxa so mimi iouiou. Xavutala na'a no anu mimi axone ukuponu votovoto loxo lamota ana'anaxu mukuponu uiti xolanu, laso unene'a uasi.

²⁰ Ia tamitema se'i ne opone'i uloxu votovoto no anu Mosinge vaikalaou mo ikasou lexe manina. Anu loxo uiti ngiaxu ane mulapau no anu lialia laixe. Ikasou lexe manina laso xoluxolu noxi'a uxalixu nene'axu laixe loxo uiti ane muleme mo muxalixu nene'axu laixe. Se'i ne nene'axu 30 xe se'i nene'axu 60 xe se'i nene'axu 100.

Latilovo so lalamo

²¹ Ioxe, mo Iesua muvikalane'i no anu latilovo vile aloxo 'ola, “Xo axova, itema uno'u lalamo mo so ukalanu no laxu ti'a o no laxu lu? Uasi, anu umulaxu teitexi no anu tanixu lalamo u'isalili.

²² Xo mimi ma'ia utalume la upala'asi. Xe mimi ma'ia tamitema isaxisou uasi la lamana uieisousi.

²³ Itema loxo sangalou la ulomuxu vaikala ano'o.”

²⁴ Mo muvikalane'i aloxo 'ola, “Vaikala ano'o ne ngalaxa'inu laixe, ngaxililiou uasi. Xo loxo ngingi nga'osasou la ngaxalisou se'i upita no latanula. Ia loxo nga'osasou malaxo uasi, la ngaxa­lisou se'ila uasi.

²⁵ Xo itema aneva ukasou vaikalaxeli la alosou nene'axu tavu'alo no latanu. Ia itema ane ukasou manina uasi, la axexenu sevile e muai noxou ne.”

Latilovo so ngiaxu upau

²⁶ Mo Iesua muvikala aloxo 'ola, “A'oxonu latilovo so voxo ane Mosinge molu u'uli laxune'i tamitemaou aloxo 'o. Anu loxo itema upeipeinu ngiangiaxu no lia so utapu'u.

²⁷ Upeipeinu ukalu la uxolusi. No olovoxo utotomu la uai xe no aso la utulu uxixaoxaosi. Ia umalei loxo 'o la ngiangiaxu upau mo a uleleme. Uleleme ia itema ne ulavusou lexe lemexu uxali axova uasi.

²⁸ Anu uleme no anu liasi. Tei la voloxusi upau. Xe une'e la xolanu ulutu xe uxolu uxolu xo xe une'e sila unene'a.

²⁹ Unene'a laso itema uno'u laviso uku so u'elexu no anu. U'elexu avile xo anu voxo so lingamo. Anu ane, latilovo axone. No voxo so Mosinge molu u'uli laxune'i tamitemaou la anu u'oxo axone.”

Latilovo so masiteti ngiaxu

³⁰ Ioxe, mixolu la Iesua musolonu vaikalaou lexe, “Laso nenge ta'oxonu latilovo vilela so voxo so Mosinge u'uli'uli axova? Atovonu vile aloxo 'ola.

³¹ Anu loxo ovu masiteti ngiaxu. Ngiaxu ne anu loxo ovu ngiangiaxu se'i no lialia 'o uasi, isusu'a e isusu'a manina. Ia masiteti ngiaxu ne tatapu'u kalumo.

³² Tatapu'u no lia xe uleme la anu ulai tatila e tatila manina mo uua'ulixu toutou no xaixai muka­lusi. Uleme xe ukalanu avo'avolu la uialaiala avile mo tangiala itulusou tasi'a no anu maimaixu.”

³³ La Iesua mulanu vaikalaou Mosinge noxi'a tamitema no anu latilotilovo axone. Mutilovo axone laso loxo xavutalai'a umomomo so uno'usio la usolosolonu, ia loxo uasi la utalosi.

³⁴ Mu'oxo aloxo 'o. Loxo tamitema tavu'alo mipita la anu mulanu vaikala no anu latilovosi. Xe ili'i loxo oli'a tatisaipeliou ane'isisi mixolu laso anu mululusou laxulaxu noxi'a.

Iesua mutalosou la'ave

³⁵ Xe no olovoxo la Iesua muvikalane'i tatisaipeliou lexe, “Nenge'a talai xalevile no kupa.”

³⁶ Ioxe, ane'i milutu la mi'umesi'a tamitema latala. Mi'umesi'a xo mitelo no pouti toxoxu e Iesua muxolu no anu la oli'a milai. Xe pouti se'i musaxane'i milailai kalumo.

³⁷ Milailai no kupa lixinu xe la'ave tatila mu'avuti. Mu'avuti la xasi muxolaxola mu'una no pouti tanu xo mole lexa so unononu.

³⁸ La Iesua muai no lapilo ili'i no pouti. La tatisaipeliou milai mitulusou mo mivikala lexe, “Tisa, nenge ta'uo'uo masi. Nini naxavutala mi vile no anene uasi?”

³⁹ Laso Iesua mutulu la mulavixu la'ave mo muvikalanu xasi lexe, “Natalo. Naxolu se'isisi.” La sivo ne muai se'isi mo kupa muaisi.

⁴⁰ La anu mutali'isi'a tatisaipeliou lexe, “Loxova so nge'ume. Ngalo­pa­laleli uasi?”

⁴¹ La ane'i mimama'u misevile mo mivika­lane'i ngato'o lexe, “Ai, itema ano'o iou vilemo. Xo la'ave ilou xasi ulomuxu kalumo.”