Maki 3 - Ata New Testament

¹ Xe voxo vilela la Iesua mu'una­lai no tasou votovoto vile la itema vile avolu musoli a uxoxolu ne.

² La tamitema mixolu ituluxu Iesua lexe upaipounu itema ne no anu Voxo so Ma'ila. Xo axone la tava'u so itulusou no anu vaivai­kala.

³ La Iesua muvikalanu itema ane avolu musoli lexe, “Nane'e mo natulu no talaxa'a tamitema 'o.”

⁴ Xe mukalu la anu muvikalane'i tamitema ne aloxo 'o, “Loxova? Mosinge u'osa loxo ta'oxo mi ma'ia no anu Voxo so Ma'ila? U'osa loxo ta'oxonu alauna o loxo tamasuane'i tamenexinge? Anu u'osa loxo tapamaulinu itema vile o loxo tavau usoli?” Ia tamitema ikolinu uasi mixolu tasiausi.

⁵ La Iesua iou mukakai'a mukalusi la oponu ialuxu noxi'a xo opone'i pakia'u. La muvikalanu itema ne lexe, “Namexinu avone.” Xe itema ne mumexinu avolu sila avolu muxali laixe avile.

⁶ Mukalu la Tapalisi milala xe no anu voxo nesi la mipita noxi'a laili e imoxo'a lexe Ta'eloti so oli'a ikamulinu vote'i so ivau Iesua usoli.

⁷ Ia Iesua oli'a tatisaipeliou mixexesou tuala ne la milai no kupa toxoxu. Milutu xe milai la tamitema latala e latala so xale lia ne Xalili mimuline'i.

⁸ Xe tamitema so xale lia ne Iutea milomusou a'alosou mimi ane Iesua mu'oxonu laso ane'i kalumo milailai noxou. Tamitema loxo Taielusalemo xe Ta'itumea xe ane'i so tuala xalevile ne Tiotani xe ane'i tatemanu tuala ne Taili xe Saitoni.

⁹ Mine'ene'e la miveli e miveli laso Iesua muvikalane'i tatisapeli lexe ilalaxinu pouti vile. Ilalaxinu so loxo anu tanixu uasi mo tamitema ikapikapinu la utelo no anu pouti so usuku sevile ulai no kupa.

¹⁰ Ikapikapinu axone xo anu mupaipoune'i tamitema pipiena iouiou mukalu. Laso ane'i tapipiena ane upaipoune'i uao la isousoune'i ngato'o so itovonu ikasi noxou.

¹¹ Xe tamitema ane loxo ta'angelo tamasua mikasi'a mixali mo isaxisou, la milalusi no talaxu mo miunga lexe, “Nini Mosinge Olu.”

¹² Ia utotomu Iesua mu'apixa'a pakia'u lexe mamu so ipala'anixu.

Iesua muiloune'i tatisaipeliou 12

¹³ Ioxe, ili'i la Iesua mulai teitexi no la'olu vile. La tamitema ta'ei mumasaxai'a lexe imulinu la mu'avali'a so oli'a milai.

¹⁴ Oli'a mitelai no la'olu mukalu la anu musosovosi'a 12 so ivaitami noxou utotomu. Xe muvikala lamana lexe ane'i so ta'aposeliou xo ili'i la upalusi'a so ixixao ilanu vaikalaou Mosinge.

¹⁵ Mo mulosi'a xavi so ikusai'a ta'angelo tamasua ane ikasi'a tamitema.

¹⁶ La tamitema 12 ane musoso­vosi'a ualaualasi'a aloxo 'o. Saimoni ane Iesua mulemolu lexe Pita.

¹⁷ Xe Tiemisi ilou vimou Tioni e Sepeti ta'olu. Ane'i tamei ne Iesua muvotongalelene'i lexe Tapoanexesi xo laxu lexe tamitema so su.

¹⁸ Xe Anitilu xe Pilipi xe Patolomiu xe Matiu xe Tomasi xe Tiemisi e Alipiusu olu xe Tatiusi xe Saimoni anu so laili noxi'a Taseloti.

¹⁹ Xe Iutasi Isikalioti itema ane so upilixinu Iesua no avo'a tauluaou.

Tamitema mikalavoi lexe Iesua muxaxai no anu xavinu Uluaou

²⁰ Xe mune'e la Iesua muxali no tani mo mu'unalai. Mu'unalai la tamitema mine'e mipitapita. Mipita­­pita axone laso Iesuaena mi'au'au misevile mole i'ani uasi.

²¹ A'alo­sou mi ne muxali noxi'a taminu­minu laso ane'i milai so i'umenu xo mivikala lexe, “Anu masi xavuta­laou mupaolu mane.”

²² Xe tamitema se'i so lavulavu no anu lavuloto so tuala Ielusalemo milu'e mixali la mivikala lexe, “Ai, Velisevuli e tila noxi'a ta'angelo tamasua mukasou ane.” Ane'i mikalavoi lexe Uluaou mukasou Iesua axone mo mi'oxo lexe, “Ngamaisou. Anu ukusai'a ta'angelo tamasua no anu xavinu Velisevuli to!”

²³ Ane'i mivikala axone laso Iesua mupitane'i tamotu mo muvikalane'i no anu latilovo se'i aloxo 'o, “Xo axova? Umomomo so Uluaou anu molu ukusaou?

²⁴ O loxo tatemanu tuala vile ikalipa­lane'i so i'otoxa'a ngato'o la anu tuala ne umomomo so utulu pumuxu?

²⁵ O loxo tatemanu tani vile ixiliie'i ngato'o la ane'i ixolu opone'i vilesisi? Uasi, ane'i ipaxelele ane.

²⁶ Laso axova? Loxo vaikalamengi manina, la Uluaou oli'a tamenexu ixililie'i ngato'o ane. Mo axone la ane'i xavine'i ukalu mole imasua avile.

²⁷ Xo aloxo 'o. Loxo mosou tani xavinu musuku uxoxolu la itema vile umomomo so u'unalai mo u'umenu mimiou uasi. Ia loxo vote'i so usakisakinu mosou tani ne, laso ane. Anu u'unalai so utaxusou mimi no tani mo u'umenu avile.

²⁸ Ia ngalomu xo avikalangengi manina aloxo 'o. Loxo susu ma'ia o vaikala masua ma'ia tamitema ilemolu, la anu vote'i uxolu so Mosinge uiasou susu anene.

²⁹ Ia loxo tamitema ivikala masua so ixililiou Ulenu Laixe la anu vote'i so Mosinge uiasou susu noxi'a uasi manina. Susu noxi'a uxolu avile kaluxu uasi.”

³⁰ Iesua muvikala axone xo no anu vaikalai'a se'i ne lexe, “Angelo masua uxolu noxou”.

³¹ Ioxe, no voxo anene la Iesua nenu oli'a tavimovimou mixali la mitulu noale. Mitulu noale la mikalanu vaikala mu'unalai lexe anu uuatu noxi'a.

³² La ane'i tamitema tavu'alo mixolu mixi­xaosou ne mivikalanu lexe, “Ai nalomu. Nenine oli'a tavivine a ixolu noale mo ikakamulineni.”

³³ La anu mukoline'i lexe, “Xo ena'ei nenilo xe ta'ei tavivilo?”

³⁴ La iou mukakai'a mukalusi mo muvikala lexe, “Ngamalei. Ngingi tanenilo mo tavivilo.

³⁵ Xo tamitema ta'ei ane imulinu masaxa noxou Mosinge, la ane'i tavivilo mo tanenilosi ane.”