Maki 15 - Ata New Testament

Iesua mutulu no laxunu Pailati

¹ Mixolu mixolu xo xe no kakau manina la tatiatila mukalusi ne mipita. Ane'i tatiatila noxi'a tapilisiti oli'a tatiatila noxi'a Taiuta xe tamitema so lavulavu no anu lavuloto. Mipita so ivikala lexe i'oxo axova noxou Iesua. Mivikala mivikala xo xe opone'i vilesisi mukalui la misakinu Iesua mo milaixu mipilixinu no anu Pailati avolu.

² La Pailati mutali'isou lexe, “Nini kingi noxi'a Taiuta, ne?” La Iesua mukolinu lexe, “Ani, aloxo nini mene nelemolu.”

³ La tatiatila noxi'a tapilisiti mito'omolu Iesua no anu vaikala tu'utu'umaxu tapiena.

⁴ La Pailati mutali'isoula lexe, “Nelomusou vaikala tavu'alo ano'o ito'omene no anu. Ia axova, nakolinu uasi?”

⁵ Ia Iesua ukolinu vaikala vilela uasi. La Pailati tanulili manina noxou.

⁶ Ioxe, no anu tautau ie utotomu no anu voxo so lavilelu so Mualasi'a la ilixo noxi'a aloxo 'o. Taiuta milavusou imoxo'u ualasou itema vilesisi noxi'a takalavusu, laso Pailati u'italonu so ula no lakalavusu.

⁷ Xe no voxo anene la itema vile ualasou lexe Valavasi a muxolu no lakalavusu. Ane'i mika­la­vusunu oli'a tamenexu se'i xo mi'otoxa'a taxamani mo mive'ave'a se'i noxi'a.

⁸ Ioxe, tamitema latala mine'e noxou Pailati la milinga noxou so umulinu ilixo loxo u'italonu soxu vile noxi'a takala­vusu so ula.

⁹ La Pailati muta­li'isi'a lexe, “Loxova, a'italonu kingi noxi'a Taiuta ula noxinge?”

¹⁰ Pailaiti muvikala axone xo anu mulavu lexe tatiatila noxi'a tapili­siti mi'italonu Iesua no avolu axone xo mi'isuxusi.

¹¹ Ia tatiatila noxi'a tapilisiti mi'ou tane'i tamitema so ane'i ilinga noxou Pailati lexe u'italonu Iesua uasi. U'italonu Valavasi uuatu noxi'a.

¹² La Palaiti mutali'isi'a tamitema lexe, “Loxo eni a'italonu Valavasi uuatu la eni a'oxonu mi ma'ia noxou itema ano'o ngamoxo'u lexe kingi noxi'a Taiuta?”

¹³ La ane'i mi'ava lexe, “Nalilinu no ovu valautu so usoli.”

¹⁴ Xe Pailati mutali'i lexe, “Xo ma'ia? Susu noxou axova?” Ia ane'i mi'ava tatilala lexe, “Nalilinu no ovu valautu so usoli.”

¹⁵ Laso Pailati mumulinu masaxa noxi'a tamitema xo mumasaxa lexe ane'i i'osasou. Laso anu mu'italonu Valavasi mula noxi'a. Mukalu laso mupalusi'a ta'ami se'i so ipuapuasou Iesua. Mipuapuasou mukalu la Pailati mu'italonu Iesua no avo'a ta'ami so ililinu no ovu valautu so usoli.

Ta'ami mimolo sukusou Iesua

¹⁶ La ane'i ta'ami milaixu Iesua nonano no tasou xamani. Mukalu laso mi'avali'a ta'ami so xale lia ne mine'ene'e mukalusi.

¹⁷ Mine'ene'e mukalu laso mino'u lavalava lauoinu vile xe misu'asou Iesua no anu. Misu'asou no anu mukalu la mipalixoxonu lamota ana'anaxu so muxali loxo atiou kingi ka mimu­laxu no kisou.

¹⁸ La ane'i misu­kunu mivikala lexe, “Kakau, kingi noxi'a Taiuta.”

¹⁹ Xe ane'i mino'u vilaxo maxei mo mipuapuasou kisou no anu alaxu tavu'alo xe mituvetuvesou. Xe ane'i mixolasou tava'a mo mikalavoi lexe i'itinu ualasou.

²⁰ Ane'i mimolo sukusou axone mukalu la mixexenu lavalava lauoinu la misu'asou no anu lavalava noxou mu'isalili. Mo ane'i mino'u milaixu so ililinu no anu ovu valautu so usoli.

Mililinu Iesua no ovu valautu

²¹ Ane'i mino'u milaixu xe mixalisou itema vile ualasou lexe Saimoni. Anu so tuala ne Sailini mo anu a unene'e so u'una no tuala ne Ielusalemo ne. Anu Alekisana ilou Luvusi mami'a. Ane'i mixa­lisou laso ta'ami mipalupa­lusou so utavu­lenu ovu valautusou Iesua.

²² Ioxe, ane'i mixalixu Iesua no apu ane ilemolu lexe Xoloxota. Laxu vaikalai'a anene lexe apu so kisou xinu.

²³ Mixalixu mukalu la ane'i i'oxo so ilosou Iesua uaini miilanu ilou lamalasini, ia anu umasaxau uasi.

²⁴ Mukalu la mililinu avo'avolu no ovu ane muvalautu xe tava'u no anu ovu ane so utulu. Mukalu la mitulusou so mulili ne. La ta'ami mi'oxonu ilixo so uala so lexe ta'ei ualasi'a uxali, la mivelunu mimiou.

²⁵ Xe mililixu no ovu valautu ne la anu aso iou 9 no kakau.

²⁶ Anu ilixo noxi'a so ikaukavunu susu noxi'a tamitema mililinu no ovu valautu. Ia ane'i mikaukavunu no ovu valautu noxou Iesua lexe “Ano'o kingi noxi'a Taiuta.”

²⁷ Mililixu Iesua la no pa'upa'u­molu mililixa'a tamitema so pakali tamei. Vile mulili no avolu tema xe vile no avolu kaisi.

²⁸ Laso vaikalou polopetiou vile ane muxolu no lavukuou Mosinge munene'a xo muvikala lexe, “Ane'i misaxisou la loxo anu vile noxi'a tamitema tamasua.”

²⁹ La tami­tema ane milai mine'e no apu ne milulu kisi'a mo misukunu Iesua lexe, “Ai, nini ane ne'oxo lexe namamulonu tasou Mosinge ka natulusoula voxo tatalu.

³⁰ Nini mene napamaulineni mo nalu'e no ovu valautu ne.”

³¹ Xe ane'i tatiatila noxi'a tapilisiti xe tami­tema so lavulavu no anu lavuloto ane'i kalumo misukunu mo mivikalane'i ngato'o lexe, “Anu mupamauline'i leviani ia anu molu umomomo so upamaulinu uasi.

³² Loxo anu ane so Kalaisiti e Mosinge musoso­vosou so kingi noxinge Ta'isilaeli maninasou la anu umomomo so ulu'e no ovu valautu ne. Xe tamaisou axone la nenge talavu lexe manina mo talopala noxou.” La tamitema tamei milili no pa'upa'umolu ne, ane'i kalumo mimolo sukusou axone.

Iesua musoli

³³ Iesua mulili ne xo xe no veloe la isivoxo toxoxu musu'asou lialia mukalusi. Isivoxo ne muxoxolu xo mo aso iou 3 no olo'olovoxo.

³⁴ Xe aso iou 3 ne la Iesua mu'ava tatila lexe, “Eloi, Eloi, lama savakatani?” Laxu vaikala ne lexe, “Mosilo, Mosilo, loxova so ne'ita­loleli mo ne'umesilo?”

³⁵ Mu'ava axone la tamitema se'i a mitulu alai milomusou la mi'oxo lexe, “Ngalomu. Anu a u'avalou Elaitia.”

³⁶ La itema vile muiave mumu­laxu lavalava xasixu no anu uaini sisielixu. Mukalu la musa­kinu no ovu so mutolosou so lexe Iesua uiexu. Xe muvikala lexe, “Taxo­lusi. Tamalei lexe Elaitia une'e ulu'enu no ovu valautu o uasi.”

³⁷ La Iesua mu'ava toxoxu mukalu sila tauxu mukalu.

³⁸ Xe alaxu vilesisi lavalava tatila e mulili no tasou Mosinge ne mutea teitexi mulu'e no lia avile, la muxali alelaxu tamei.

³⁹ Xe ami vile tatila noxi'a ta'ami 100 mutulu no laxunu Iesua. Anu mulomusou ava noxou Iesua mo mumaisou soli noxou la mu'oxo lexe, “Ai, manina misevile, ano'o Mosinge Olu.”

⁴⁰ Xe tasema se'i kalumo mitulu va'axu sevile mo mimalei lexe mi ma'ia muxali no voxo anene. Tasema ane Malia Makatala xe Malia vilela neni'a Tiemisi kitua ilou Iosepu. Xe sema vile ualasie lexe Salomi.

⁴¹ No voxo ane Iesua muxoxolu ne Xalilisio la ane'i tasema ano'o mimulimulinu so mivu'ulinu. Xe tasema tapiena se'i kalumo oli'a Iesua mine'e ne Ielusalemo mixolu ne kalumo.

Mimulaxu Iesua vasimolu no lulu

⁴² Voxo ne anu so lalaxi no anu Voxo so Ma'ila xo anu uxali loxo ne'iela. Ioxe, aso so u'unae,

⁴³ la Iosepu so tuala ne Alimatea mulai noxou Pailati so mutali'isouxu Iesua vasimolu. Mutali'isou lexe umomomo so uno'u vasimolu so u'asixu no voxo nesi, xo ne'iela la Voxo so Ma'ila. Iosepu ne anu vile noxi'a takaniseli noxi'a Taiuta. Anu kalumo muxomaiou voxo so Mosinge molu u'uli laxune'i tamitemaou. Mune'e so utali'isou Pailati ia oponu u'olo'olo lexe masi u'oxo axova noxou. Oponu mu'olo'olo ia mutali'isi.

⁴⁴ La Pailati mukuluke mo tanulili lexe Iesua musoli palea axova. La mu'avalou tatila noxi'a ta'ami mo mutali'isou lexe, “Iesua musoli mukalu, ne?”

⁴⁵ Tatila noxi'a ta'ami mukolinu lexe musoli mukalu, laso Pailati mu'italonu Iesua vasimolu noxou Iosepu.

⁴⁶ Mu'italonu axone laso Iosepu mulotonu lavalava kea mo mulu'enu Iesua vasimolu no ovu valautu. Mulu'enu mukalu la muisisinu vasimolu no anu lavalava kea. Mukalu la mulaixu mumulaxu no lulu ane mi'asou mu'unalai no maia tava'u. Mumulaxu mukalu la mupipalo'u lavo'o toxoxu so mutanuxu lulu anaxu.

⁴⁷ La Malia Makatala olie Malia ane Iosepu nenu mitulu mimalei lexe mumulaxu Iesua a ne'ei.