Maki 13 - Ata New Testament

Iesua mulemolu mamulosou tasou Mosinge

¹ Ioxe, Iesuaena milutu mila no tasou Mosinge mo mimuamua'i milai. La tisaipeliou vile muvika­lanu lexe, “Tisa namaisou lavo­lavo'o so tasou Mosinge 'o lailaixe mo ngioungiou no anu ne usaxi laixe misevile.”

² La Iesua mukolinu lexe, “Namaisou tani ngioungiou toxo­xa'a 'o, ili'i la lavo'o vile utoxo no anu menexu uasi, upaxele muka­lusi. Tani ano'o ne umamulosi.”

Iesua mupela'axu tu'utu'umaxu ane so uxali ili'i

³ Xe mune'e la Iesuaena mixolu no la'olu Olivi la iou mulaiou tasou Mosinge muxolu xalevile olele. La Pita xe Tiemisi xe Tioni xe Anitilu mine'e mitali'isou aloxo 'o,

⁴ “Nini napala'anixu noxixe lexe voxosou mi e nelemolu a talu? Axova, sosovo vile so nexi talavu lexe nene'axu mi ne a so uxali?”

⁵ La Iesua mukoline'i lexe, “Ngalaxa'i laixe, xo loxo 'o io tamitema ikala­voingengi ane.

⁶ Tamitema tavu'a­lo ine'ene'e mo ivikala lexe, 'Eni amitema melo noxou Mosinge a.' La ilemolu ualasilo so ikalavoine'i tamitema tapiena.

⁷ Mo ili'i loxo ngalomusou a'alo so oto tatila mo sivo lexe oto tatila so uxali no tuatuala la ngakuluke no anu uasi. Mimi anene uxali, ia kaluxusou voxo a uao.

⁸ Xe tamitema no anu laili se'i i'alivulane'i laili se'i. Xe takingi so xale lia se'i ilai i'alivu­lane'i takingi so xale lia se'i. Mo no xalexale lia se'i la uni'uni tatila mo anene voxo so vitolo kalumo. Mimi anene uxali ia anene soko'u no anu tu'umaxusi. Anu loxo sema ilie ukitikitinesi so ivo'onu, u'oki uao.”

⁹ Mo Iesua musolonu aloxo 'ola, “Ia ngingi ngalaxa'i laixe. Xo ane'i itulusinge so ikotingenge mo ipua­pua­singe no anu tatasou lavu­loto. Mo tava'u xo ngingi ngaa'aloxo laso itulusinge no laxune'i taxa­mani xe takingi. Itulu­singe laso ngingi ngaa'aloxo noxi'a.

¹⁰ Ia loxo vaikalasilo laixe uxali noxi'a tamitema no anu lailaili no tuatuala mukaluasi uao, la anu voxo kaluxusou 'o umomomo so uxali uasi.

¹¹ Mo no voxo loxo itete­lisinge so ngalai no lakoti la mamu so nga'ume. Mo mamu so ngala­laxinu opongengi lumamo so lexe ngalemolu ma'ia no lakoti. Xo ngingi uasi, no voxo loxo ngatulu la Ulenu Laixe molu ulosinge vaikala so ngalemolu.

¹² Xe no voxo anene la tamitema ipilixine'i tavimovimo'a so ikoti­xa'a mo ive'a isoisoli. Xe tamitema i'oxo axone noxi'a ta'ili'a kalumo. Mo ane'i se'i la ixililie'i tamami'a taneni'a mo ipilixine'i so tamitema ive'a isoli.

¹³ Xe loxo ngingi, la tamitema opone'i umatapiangengi xo ngingi tamitemaxeli. Ia ngingi ngaxolu pakia'inge xo mo uxali no anu voxo kaluxusou xo ngingi ngaxalisou pamauli ane.

No voxo anene tu'umaxu e tu'umaxu manina

¹⁴ Ioxe, Iesua musolonu vaika­laou, ia itema ena'ei u'itisou la uxavu­talanu laxu laixe. Muvikala aloxo 'o, “Xe ili'i la ngamaisou mi e so matapia mo mamulo uxolu no tanixu e tavu no anu. No voxo loxo ngamaisou uxolu ne la laixe so Taiutea i'ume'ume ilai italume no la'ola'olu.

¹⁵ Xe itema ane u'ole'ole no laxa'u tani la ulu'e ne u'ume ulaisi. U'unalai no tani so utaxusou mimioula uasi.

¹⁶ Mo loxo itema uxolu no xai la ulivu no tani so uno'u lasiotiou vevenila uasi. Ulai u'ume avile.

¹⁷ La tane­ngexa'a tasema ane opo'opone'i xe ane'i ane ta'ili'a i'ou sususio. Xo masi i'au'ausi'a la i'ume palea uasi.

¹⁸ Mo ngalinga noxou Mosinge lexe voxo ne uxali no anu tau la'ave mo lelemesou uasi. Xo polovu uvenge la xalengenge so nga'u­me'ume axova?

¹⁹ Mo no voxo anene tu'umaxu e tu'umaxu manina. Musoko'u no voxo loxo Mosinge mukokoinu mimi mune'e muxali avile vaimomo 'o la tu'umaxu axone uxali uasi. Mo uxali ili'i kalumo axone uasi.

²⁰ Xe loxo Tatananenge uxotonu voxosou tu'utu'umaxu anene uasi la itema vile umauli uasi. Ia anu uxavutalane'i tamitema ane muso­so­vosi'a lumamo lexe tanoxou. Uxavutalane'i laso uxotonu voxo anene.

²¹ Mo aloxo 'o. No voxo anene loxo itema vile uvikalangengi lexe, 'Ngamaisou Kalaisiti a.' O loxo vile u'oxo lexe, 'Kalaisiti a olele.' la ngalomuxa'a uasi.

²² Xo Takalai­siti kalavoi se'i mo tamitema so pela'a kalavoi se'i itulu no voxo anene. Itulu mo i'oxonu sosovo so xavi so itovonu so ilapune'i tamitema ane Mosinge mososo­vosi'a lexe tanoxou.

²³ Laso ngalaxa'i laixe xo eni epela'ingexu mimi ane so uxali ili'i mukalusi.”

Iesua mupala'anixu lailivu noxou

²⁴ Muvikala axone mukalu la musolonu aloxo 'ola, “Tu'utu'u­maxu anene uxali ukalui la aso uxali isivoxosi mo so'io ukala uasi.

²⁵ Mo loxotolo ukunikuni la tataoto ulapalapau ulu'e.

²⁶ Laso ane. Tamitema imaisou Itema ane molu noxou Mosinge une'e no anu sausauma. La une'e no anu xavi mo iaxu tatila.

²⁷ Mo no voxo anene anu upalusi'a ta'angelo talaixe ilailai. Ilailai no anu noti xe sauti xe uesiti xe isiti no anu lialia ilou loxotolo teletelexu. Mo ipitane'i tamitema ane Mosinge musoso­vosi'a lexe tanoxou.”

²⁸ La Iesua mu'oxonu latilovo aloxo 'o, “Ngingi ngano'u lavulavu no anu ovu viki. Loxo avolu umauli mo uxata la ngalavu lexe voxo so aso laixe so uxali.

²⁹ La anu axonesi. Loxo ngamaisou tu'utu'umaxu elemolu 'o uxali la ngalavu lexe eni a axali mo no iou xalengasi.

³⁰ Mo avikalangengi manina aloxo 'o. Laili ano'o ixolu mo ixalisou mimi ne, isoisoli tei uasi.

³¹ Mo ili'i la loxotolo ilou lialia tasiauxu ia vaikalaxelisi umomomo so tasiauxu uasi.”

Evile ulavusou voxosou mimi anene uasi

³² Mo musolonu aloxo 'ola, “Ia evile ulavusou voxo o aso iou so mimi anene uxali uasi. Ta'angelo talaixe no tualasou Mosinge ilavu uasi kalumo. Mo eni a Olu kalumo alavusou uasi. A Mosinge anu Mamingesi ulavusou.

³³ Laso ngalaxa'i laixe mo ngaxolu ngau­titisi, xo ngalavusou voxo e Mosinge musosovosou uasi.

³⁴ Aloxo 'o. Loxo itema vile u'umesou tasou so uxixao ulai nopaxa. So ulutu la utulusi'a tamitema so xaixai noxou no anu xaixai noxi'a vilevilesi. Mo itema so ulo no aitenga la upeloto­tosou lexe uloxu laixe xo ulavusou voxosou lailivuxu uasi.

³⁵ Laso ngingi ngaloxo laixe axone. Xo eni loxo tatananu tani, mo ngalavusou voxo so alivu ane'e uasi. Masi ane'e no aso ulu'elai o no olovoxo lixinu o no anu koko'a u'ava o no kakau. Laso ngalaxa'i laixe.

³⁶ Xo masi axali la ngingi ngaaisio.

³⁷ Vaikala ane a'italonu noxinge 'o ne noxi'a latala. Ngalaxa'i mo ngautiti laixe.”