Maki 11 - Ata New Testament

Iesua mu'unalai ne Ielusalemo la tamitema mi'itinu ualasou a loxo kingi 'o

¹ La oli'a Iesua milai xo xe mine'e alai ne Ielusalemo la mixali no tuala ne Petivaxe xe no tuala ne Vetani, no anu la'olu Olivi. La Iesua mupalusi'a tatisaipeliou tamei.

² La muvikalane'i lexe, “Ngingi ngilou ngalai no tuala no laxunenge olele. Ngaxali no iou xalenga la ngamai­sou toniki vile maulu a misakinu ne. Toniki ne itema vile utelo no anu uao. La ngalulusou mo ngane'enu.

³ Xe loxo itema vile utali'isinge lexe, 'Ngilou nganava ne?' la ngakolinu lexe, 'Tatana­nenge umasaxau so mi vile. Uno'u maxuveni uasi, ulivu­noxu palea.'”

⁴ Laso ilou milai la mixalisou toniki maulu anu a ututulu no vote'i xo mosou musakinu no aitengaxu tani. La ilou milulusou lamotasou.

⁵ Milulusou la tami­tema se'i mixolu alai mo misaxisi'a la mitali'isi'a lexe, “Ngingi ngilou nganava so ngalulusou toniki ne?”

⁶ La ilou mikoline'i aloxo Iesua mupe­la'axu tei. Laso ane'i tami­tema ne mi'oxo lexe, “Io', mi vile uasi, ngano'usi.”

⁷ Ioxe, la ilou mine'enu toniki noxou Iesua mo misia'u lasiotii'a veveni no xinu toniki so Iesua muxolusou.

⁸ Xe tamitema tapie­na mixexenu lasiotii'a veveni so misia'u no vote'i. Xe se'i milai no xaixai alai se ne mo mixotosou ovu avo'avolu so misia'u no vote'i kalumo.

⁹ Mukalu la tamitema se'i mi'uli noxou Iesua no vote'i xe se'i miili'i. La ane'i latala mi'a­va'ava lexe, “Oponenge u'osa­sou Mosi­nge misevile mo ta'itinu ualasou. Tatananenge u'oxonu laixe noxou Itema anu molu mupalusou.

¹⁰ Mo Mosinge u'oxonu ilusunu Teviti ano'o laixe xo anu ukingi no tanixu mo u'uli laxunenge. Ta'itinu Mosinge uala­sou teitexi avile.”

¹¹ Tamitema mi'ava'ava xo mo oli'a mixali ne Ielusalemo. La Iesua oli'a tatisai­peli mi'unalai mo mixali avile no tasou Mosinge. Mixali no tasou Mosinge la mixixao mo misaxi­saxi sevile. Mixolu xo xe aso so u'unae la milivu se miai ne Vetani.

Iesua muvikalanu ovu viki so unene'ala uasi

¹² Miai ne Vetani xe milutu la mimua­mua'i. Mimuamua'i xo mole Iesua musolixu.

¹³ Musolixu xe musu'anu iou la mumaisou ovu viki vile mutulu va'axu sevile. Ovu viki ulavusou unene'a no voxo anene uasi. Ia mumaisou soxu nesi volo­vo­loxu mulolutu laso mulai so lexe uxalisou nene'axu sevile. Mulai musaxi la uasi, nene'axu vile uasi, volovoloxusi.

¹⁴ Mumalei lexe ne­ne'axu uasi, laso muvikalanu ovu ne lexe, “Nini nanene'a mo tami­tema i'ou ngiaxene la uasi,” La ane'i ta­tisai­peliou milomusou vaikalaou ne.

Iesua mukusai'a tamitema ane mimaketi no tasou Mosinge

¹⁵ Ioxe, Iesuaena milutu xo xe mixali ne Ielusalemo la anu mu'unalai no tasou Mosinge. Mu'unalai la tamitema imaketi nonano ne, sila mukusakusai'a. Xe anu mutitalenu latevoloi'a tami­tema ane isenisimunu lamoli mo mupei­peinu siasia noxi'a tamitema so isalimune'i tangiala.

¹⁶ La tami­tema se'i miuliulixu mimi mi'u­na'una no tasou Mosinge. La anu mu'apixa'a lexe, “Mamu so nga­polo 'o, vote'i ano'o uasi.”

¹⁷ La anu muvikalane'i latala ne lexe, “Mosinge vaikalaou uvikala aloxo 'o, 'Tasilo 'o anu tasi'a tamitema so tuatuala mukalusi so ine'e ivikala noxilo.' Ia ngingi nge'oxonu muxali loxo tasi'a talasikelisi e so italumeu mimi ipakalinu.”

¹⁸ Mu­vikala axone xe tatiatila noxi'a tapilisiti xe tamitema so lavulavu no anu lavuloto milomusou la la'iaxa'a. La'iaxa'a la mimolo vote'i so ivau Iesua usoli. Ia ane'i mi'ume so i'oxonu mi vile noxou xo tamitema tavu'alo mikuluke mo mi'osasou votovoto noxou.

¹⁹ Mi­xolu xo xe no olovoxoe laso Iesua oli'a tatisaipeliou milutu ne Ielusa­lemo la milai.

Ovu viki e muvikalanu a muxalo

²⁰ Ioxe, no kakau la Iesuaena mimuamua'i mipolola, la ane'i mimaisou ovu viki e Iesua mulavixu a muxalo mukalu. Anu tava'u mulai avile no ainu mo volovoxu ne muxalo avile.

²¹ Sila Pita muxavutalanu mo muvikalanu Iesua lexe, “Tisa, namalei. Nele­molu mamulosou ovu viki 'o la muxalo mukalu oe!”

²² La Iesua muvikalane'i lexe, “Ngalopala noxou Mosingesi.

²³ Avikala­ngengi manina aloxo 'o. Loxo itema vile uvikalanu la'olu ano'o lexe uvula mo utulu no luaki olele, xe loxo itema ne oponu tamei uasi ulopala noxou Mosingesi, la anu uxali loxo ulemolu.

²⁴ Laso aloxo 'o. Loxo ngavikala noxou Mosinge so ngalinga, la ngalopala noxousi. Mo so axone, la anu ulosinge mimi ma'ia ngalingau ne.

²⁵ Xe ngingi vilevilesi, loxo so navikala noxou Mosinge xe oponeni tu'umaxu so menexine vile la naxiunu oponeni so ulu'e noxou. Xo Mosinge anu Maminge a uxoxolu no tualasou mo anu kalumo uiasou susu noxinge.

²⁶ Ia loxo nini naxiunu oponeni so ulu'e noxou menexine uasi, la Mosinge anu Maminge uxolu no tualasou mo uiasou susu noxine uasi.”

Mose'i mitali'isou Iesua lexe, “Ena'ei mutulusine natiatila 'o?”

²⁷ Ioxe, Iesuaena milivu mixali ne Ielusalemola. La anu mumuamua'i muxixao no tasou Mosinge. Mu­xixao la tatiatila noxi'a tapilisiti xe tamitema so lavuloto xe tatiatila noxi'a Taiuta mine'ene'e noxou.

²⁸ Mine'e la mitali'isou lexe, “Nini neno'u xavi ne'ei so na'oxonu ilixo te'o? Xo axova, evile mutulusine so naxali natiatila aloxo 'o?”

²⁹ La Iesua mu'oxo lexe, “Eni tali'i vile so alemolu noxinge kalumo. Xe loxo ngakolileli laso ane, eni apela'inge lexe ena'ei mulosilo xavi ano'o.

³⁰ Tali'i noxilo aloxo 'o. No voxo loxo Tioni mu'oxonu ilixo so kelele la ngaxavutala axova? Mosinge molu mupalusou o anene mi noxi'a tamitemasi? Ioxe, ngako­linu.”

³¹ La ane'i mivivikalane'i ngato'o mo mi'oxo lexe, “Ai, loxo nenge ta'oxo lexe mi noxou Mosinge, la anu masi uto'omenge lexe, 'La axova so ngalomuxu vaikalaou uasi?'

³² Ia loxo nenge ta'oxo lexe anu mi noxi'a tamite­masi, la ane'i latala 'o masi la'iaxa'ainge ane. Xo ane'i milopala lexe Tioni ne anu polopeti manina.”

³³ Tane'ilili axone laso ane'i mikolinu lexe, “E, talavu uasi.” La Iesua muvikalane'i lexe, “Ioxe, laso mamu so eni kalumo apela'inge lexe ena'ei mulosilo xavi so axaxai 'o.”