Luku 8 - Ata New Testament

Tasema se'i mimulimulinu Iesua

¹ Ioxe, Iesua muxolu xe maxuveni uasi la musoko'u so muxixao no taotaoni xe tuatuala so ulanu vaikala laixe so voxo ane Mosinge molu u'uli laxune'i tamitemaou. La tatisaipeliou 12 a oli'a mixixao mikei.

² Mo oli'a tasema se'i ane tei la mukusai'a ta'angelo tamasua mixolu noxi'a xe se'i ane mupai­poune'i no anu siki noxi'a. Vile ualasie lexe Malia e ilemele lexe Malia so Makatala. Sema ne tei la Iesua mukusai'a ta'angelo tamasua 7 noxie.

³ Xe vile ane Tioana e Kusa semau. Anu Kusa ne anu itema tila vile no anu tasou Eloti. Xe vilela ualasie lexe Susana, mo tasema se'ila. Ane'i tasema ne milavusou ino'u mixamixa'a u'isalili so isu'uline'i Iesua oli'a tatisaipeliou.

Latilovosou itema mutapu'u uiti ngiaxu

⁴ Xe mune'e la tamitema latala e latala me'a no taotaoni mine'ene'e mipitapita noxou Iesua mo a oli'a mixoxolu. La mu'oxonu latilovo vile noxi'a aloxo 'o,

⁵ “Itema vile mulai mupeinu uiti ngiaxu no xai so utapu'u. Mupeipeinu xe ulalai la uiti ngiaxu se'i mulapau no vote'i so xai. Xe tamitema mimuamua'i la mimalomaloxo'u sila tangiala mine'e mitokinu so mi'ou.

⁶ Xe uiti ngiaxu se'i mulapau no lavolavo'o taitainu ka muleme ia lexa no anu lialia to uasi, laso mupalea muxalosi.

⁷ Xe uiti ngiaxu se'i mulapau no taitainu lamota ana'anaxu xolanu. La uiti muleme ia lamota ana'anaxu muleme kalumo sila mukuponu avile.

⁸ Ia uiti ngiaxu se'i mulapau no lia lailaixe la muleme xe unene'a laixe mo ai'ainu vilevilesi muxalixu 100.” Iesua mutilovo axone mukalu laso mu'ava lexe, “Itema loxo sangalou la ulomuxu vaikala ano'o.”

⁹ Ioxe, ili'i la tatisaipeliou mita­li'isou no anu latilovo ne laxu.

¹⁰ La anu muvikalane'i aloxo 'o, “Vaikala so voxo ane Mosinge molu u'uli laxune'i tamitemaou ne mutalume tatei. Ia vaimomo 'o Mosinge mupala'anixu noxingesi 'o. Mupala'anixu noxinge ia noxi'a leviani la eni avikalane'i no anu latilovosi. A'oxo axone so umulinu vaikalou polopeti mukaukavunu tatei lexe, 'Ane'i utotomu isaxisou mi vile laixe ia itongonu to uasi. Xe ane'i utotomu ilomusou kalumo ia ilamana no anu to uasi.”

¹¹ Muvikala axone xe mukalu la musolonu aloxo 'o. “Latilovo ne laxu aloxo 'o. Itema ane mutapu'u uiti ngiaxu ne anu loxo itema uvotovoto no anu Mosinge vaikalaou.

¹² Xe tamitema se'i la opone'i loxo lialia pakia'u no vote'isou xai ane uiti ngiaxu se'i mulapau no anu. Xo loxo ilomusou votovoto la vaikala uleme uasi xo Uluaou upalea une'e utokinu so uxexenu no opone'i mo so vote'i so ilopala mo ixalisou pamauli uasi.

¹³ Xe tamitema se'i ne ane'i ilomusou vaikala ia anu ulapau no opone'i loxo uiti ngiaxu mulapau no lavolavo'o taitainu. Loxo ilomusou vaikala la i'osasou ia loxo uli'u ulu'elai so pumuxu uasi. Anu loxo ilopala se ia maxuveni uasi xe tovotovoto uxalisi'a sila isasalo mo ilapau ixexesi.

¹⁴ Xe se'i la ilomusou votovoto kalumo ia anu loxo uiti ngiaxu ane mulapau no taitainu lamota ana'anaxu. Xo tamitema ane xo ne iuali no anu xoluxolu so vasime'a mo opone'i ututuluou lamoli xe vote'i so imomoxu masamasaxa no anu vasime'a. I'oxo axone laso maixene vaikala uleme no opone'i ka unene'a uasisi.

¹⁵ Ia tamitema se'i ne opone'i ulapu mo laixe laso uloxu vaikalaou mo ikasou lexe manina. Anu loxo uiti ngiaxu ane mulapau no anu lialia laixe. Ikasou lexe manina laso ane'i ixolu pumuxa'a no anu lopala noxi'a mo uxalixu nene'axu.”

Latilovo so lalamo

¹⁶ Ioxe, mo Iesua muvikalane'i no anu latilovo vile aloxo 'ola, “Loxo itema ulexexu lalamo la anu usu'asou no anu ti'a o ukalanu no laxu lu to uasi. Anu umulaxu no tanixu lalamo u'isalili mo so ane'i ane i'una la ie'i lamana no anu.

¹⁷ Xo mimi ma'ia utalume la upala'asi. Xe mimi ma'ia tamitema isaxisou uasi la lamana uieisousi.”

¹⁸ Mo muvikalane'i aloxo 'ola, “Vaikala ano'o ne ngalaxa'i laixe no anu, ngaxililiou uasi. Xo itema aneva ukasou vaikalaxeli la alosou nene'axu tavu'alo no latanu. Ia itema ane ukasou manina uasi, la axexenu sevile e muai noxou ne.”

Iesua nenu oli'a tavimovimou mine'e noxou

¹⁹ Ioxe, mune'e xe no voxo vile la Iesua nenu oli'a tavimovimou mine'e so lexe isaxisou. Ia ane'i imomomo so ixali avile noxou uasi xo ane'i tamitema tavu'alo mixolu mixixaosou mo mivelisi.

²⁰ Laso tamitema se'i mivikalanu lexe, “Ai, nenine oli'a tavivine a itulutulu noale 'o. Ane'i imasaxa lexe imaisine.”

²¹ Ia anu mukoline'i lexe, “Tamitema ta'ei ane ilomusou vaikalaou Mosinge kaio imulinu, la ane'i tavivilo mo tanenilo ane.”

Iesua mutalosou la'ave

²² Ioxe, voxo vile ili'ila la Iesua oli'a tatisaipeliou mitelo no anu pouti vile. La muvikalane'i lexe, “Nenge'a talai xalevile no kupa.” Laso ane'i milutu.

²³ Ane'i miave no anu pouti mo a ilalai xe Iesua muai la muai avile. Milalai sila la'ave tatila mu'avuti la mukasou kupa mo xasi mupeipei mu'una no anu pouti mole ane'i so i'uo'uo.

²⁴ La ane'i milai mitulusou Iesua lexe, “Tilao, Tatila, nenge masi tamamulo ane!” Xe anu mu'avuti mutulu sika mulavixu sivo ilou xasi tatila loxo kisou ulu ne. Mulavixu sila alaxu vilesisi mutalo mo muai e muai se'isisi.

²⁵ La anu mutali'isi'a lexe, “Lopala noxinge uxolu ne'eio?” La ane'i mimama'u mo tane'ililiou manina mo mivika­lane'i ngato'o lexe, “Ai, itema ano'o ena'ei a? Xo upalusou sivo ilou lexa la ulomuxu kenasi!”

Iesua mukusai'a ta'angelo tamasua tavu'alo noxou itema vile

²⁶ Ioxe, milutu miave no pouti xo la oli'a milai mixali xalevile no tumalou kupa Xalili no xale lia ne Xatala.

²⁷ Mixali la Iesua mulu'e no pouti so ulai noale la muxa­lisou itema vile so taoni no anu xale lia ne. Itema ne ta'angelo tamasua to a mixolu noxou mole usakinu lavalava uasi xe uxolu no tani uasi, muxoxolu no lamati­matisi.

²⁸ Itema ne musaxisou Iesua la mu'ava tatila xe mutanga­tuluou mo mu'unga noxou lexe, “Iesua, Mosinge anu Mu'uli'uli Olu, nini nene'e so na'oxo ma'i noxilo? Eni alinga pakia'u noxine lexe namasualeli mamu.”

²⁹ Mu'unga axone xo Iesua muvikala lumamo so upalusou angelo masua uxexe­sou itema ne. Angelo masua ulavusou ukasou axone la u'okinu manina xo alaxu tavu'alo tamitema misakinu no anu seniseni mo miloilokisou avolu no anu aini. Mitovonu so i'utululunu axone mo mituluxu laixe ia loxo ulapunu seni ilou aini no avolu la alaxu vilesisi upaxelelesi. Mukalu la angelo masua upatetenixu ulaixu avile no xale lia esi'esi.

³⁰ Ioxe, Iesua mutali'isou lexe, “Ualasine axova?” La anu muko­linu lexe, “Ualasilo lexe Tavu'alo.” Mulemolu ualasou axone xo ta'angelo tamasua tavu'alo a mixolu noxou.

³¹ La ane'i milinga noxou Iesua pakia'u lexe upalusi'a ilai no taxa ane ulu'elai avile mamu.

³² La tameme tavu'alo a mixoxolu mi'ani'ani no alaele vile se ne. Sila ta'angelo tamasua milinga noxou lexe u'italone'i so i'una noxi'a tameme ne. Laso Iesua mu'oxo lexe, “Io', ngalaisi.”

³³ Laso ane'i ta'angelo tamasua ne mixexesou itema la mi'una noxi'a tameme. Mi'una noxi'a sila alaxu vilesisi miiave mitalotaloxo no anu maiaxu kupa ka mi'uo'uo avilesi.

³⁴ Mi'uo'uo mukalu xe tamitema so isaxila'a mimaisou mi e muxali ne la ane'i mi'ume'ume mo mia'alo no taoni xe no xale lia no pa'upa'umolu.

³⁵ A'alosou mulailai xe tamitema mine'ene'e so lexe imalei. Mine'e­ne'e xe mixali noxou Iesua la mimaisou itema e ta'angelo tama­sua tapiena mixexesou ne a muxo­xolu no tava'u Iesua. Mimaisou la anu uxovulaulau loxo tei la uasi, xavutalaou mulamana mo anu a musakinu lavalava. Tamitema mimaisou aloxo ne la mimama'u manina.

³⁶ La ane'i tamitema ane mixolu mimaisou Iesua upai­pounu itema e ta'angelo tamasua mikasou ne, la mia'aloi'a tami­tema e milasi mine'e ne.

³⁷ Ane'i tatemanu xale lia ne Xatala milomusou a'alo so sosovo so xavi ne la mama'u mukasi'asi. Laso ane'i milinga noxou Iesua lexe anu uxexesi'a ulai. La Iesua mulo­muxu linga noxi'a la mu'avuti mutelo no pouti so mulivu.

³⁸ Anu so ulutu la itema e ta'angelo tamasua mixexesou mukatu noxou Iesua lexe anu oli'a. Ia Iesua mu'apixu mo muvikalanu lexe,

³⁹ “Nini nalivu no tualasine mo naa'aloxu su'uli lailiaxe ane Mosinge mu'oxonu noxine 'o” Laso ane, itema ne mulutu mulai la anu muxixao no tatani mukalusi no taoni ne so ua'aloxu su'uli lailaixe ane Iesua mu'oxonu noxou.

Iesua mupamauline vuanga vile misoli xe mupaipoune sema vile sialuxe munixinixi

⁴⁰ Ioxe, Iesua mulivu xo xe muxali xalevile no kupa la tamitema latala mimaxa'u osa noxi'a noxou xo ane'i a mixoxomaiou.

⁴¹ La tatila vile no anu tasou lavuloto ne ualasou lexe Tiailusi mune'e mulalusi no tava'u Iesua. Mulalusi no tava'u la mukatu noxou lexe une'e no tasou.

⁴² Mukatu axone xo olu sema sevilesisi ane so isoli. Ane tau iexe 12 sesi. Ioxe, Iesua mulutu so ulai no tasou ia tamitema latala ne miveli noxousi.

⁴³ Xe no taine'i tamitema latala ne la sema vile a oli'a. Sema ne sialu munixinixi noxie mumo­momo no anu tau ie 12. La mitovonu votevote'i so lexe ipai­poune ia evile umomomo so usu'uline uasi.

⁴⁴ Sema ne mine'e alai no tumalou Iesua la mikasou lasioti veveni noxou Iesua telexu sesi. Mikasou sila alaxu vilesisi sialuxe mumasasa.

⁴⁵ La Iesua mutali'i lexe, “Ena'ei mukasilo 'o?” La ane'i vilevilesi mi'oxo lexe, “Eni uasi!” Xe Pita muvikalanu lexe, “Tatilao, tamitema tavu'alo e tavu'alo mixalilixene mo a miveli noxine to ne.”

⁴⁶ Ia Iesua muvikala lexe, “Uasi. Evile mukasilo ane. Xo eni examulinu xavi se'i a mulutu noxilo.”

⁴⁷ Muvikala axone xe sema ne milavu lexe vote'i so italumela uasi. Laso ane mi'olo'olo mo mine'e milalusi no laxunu Iesua la no ie'i tamitema mukalusi ne mipala'anixu tava'u so mikasou. Mo mivikala lamana lexe mikasou axone la alaxu vilesisi laixenesi.

⁴⁸ Laso Iesua muvikalane lexe, “Alixeli, nini nelopalaleli laso laixeneni 'o. Nalai mo oponeni uai se'isisi.”

⁴⁹ Iesua a uvikalanesio la se'i so laili noxou tatila no anu tasou lavuloto a mixali. La mivikalanu itema ne lexe, “Iline ne misoli mukalu. Laso tava'u so na'au'ausou Tisamengela uasi. Vote'i so usu'ulinela uasi.”

⁵⁰ Iesua mulomu axone ia muvikalanu itema ne lexe, “Na'ume uasi. Nalopalasi, xo ane masi ipamauli ane.”

⁵¹ Ioxe, Iesua mulutu xo xe muxali no tasou itema tila ne la tamitema latala ne mu'apixa'a lexe ixolu. Ia muvikalane'i Pita xe Tiemisi xe Tioni xe molomolo mamie mo nenie lexe ane'i oli'asi i'unalai.

⁵² La tamitema tavu'alo mixoxolu ne mielieli no anu tama toxoxu. Ia anu muvikalane'i lexe, “Ngatalo, ngatama uasi. Xo ane isoli uasi, miaisi.”

⁵³ La ane'i mikekeu xo milavu lexe misoli mukalu.

⁵⁴ Ia Iesua mulai noxie mo mutila'e no avole mo muvikalane lexe, “Aliku seo, natulusi.”

⁵⁵ Sila ulene mulivu no vasimele la alaxu vilesisi mitulusi. Mukalu la Iesua muvikalane'i lexe ilosie la'ilali sevile.

⁵⁶ La mamie olie nenie mikisikula kena ia anu mupelototosi'a lexe ipala'anixu mi e muxali ne noxou itema vile uasi.