Luku 7 - Ata New Testament

Iesua mupaipounu voiou tila vile no anu ami

¹ Ioxe, Iesua muvotovoto noxi'a tamitema xo xe mukalu laso mulutu mu'unalai no taoni ne Kapeniamu.

² La tila vile no anu ami e u'uli laxune'i ta'ami 100 a muxolu ne. Anu voiou vile e mu'osasou misevile musiki tatila mo anu a so usoli.

³ Anu tila no anu ami ne mulomusou a'alosou Iesua laso mupalusi'a tatiatila noxi'a Taiuta se'i milai so ilinga noxou lexe une'e upamaulinu voiou ne.

⁴ Ioxe, ane'i milutu xo xe mixali noxou Iesua la milinga mo mitama noxou lexe, “Itema tila ne anu ilixo noxou laixe umomo so nasu'ulinu.

⁵ Xo anu usexelanenge Taiuta manina. Mo anu mutulusou tasou lavuloto noxixe 'o.”

⁶ Ioxe, Iesua mulomuxu vaikalai'a mo oli'a milai. Milai xo la mixali alai no tani ia tila no anu ami mupalusi'a tamenexu se'i so i'alaxu. Mi'alaxu se noale la mivulunu vaikalaou menexi'a lexe, “Ai Tilao, navila'isine so nane'e avile uasi. Eni amitema alaixe so na'una no tasilo uasi.

⁷ Mo tava'u so eni melo ane'e noxine uasi a xo eni amitema alaixe to uasi. Loxo vote'i, la naxolu ane mo navikalasi, mo voixeli 'o laixenusi.

⁸ Eni avikala axone xo eni axolu no laxu tilasilo no anu ami e u'uli laxuleli. Xe ta'ami ane a'uli laxune'i la ane'i ixolu no laxo kalumo. Xo loxo avikalanu vile lexe, 'Nalai!' la anu ulutusi. Xe loxo avikalanu vile lexe, 'Nane'e 'o,' la anu une'esi. Xe loxo avikalanu voixeli vile lexe, 'Na'oxo aloxo 'o.' la anu u'oxonusi ane.”

⁹ Iesua mulomusou vaikala noxou itema e mivulunu ne la mukisikula. Mo muxiu muvikalane'i tamitema latala ane mimulinu ne aloxo 'o, “Avikalangengi aloxo 'o. No tai­ngengi Ta'isilaeli la axalisou itema vile lopala noxou pakia'u aloxo itema ano'o to uasi.”

¹⁰ Mukalu xe ane'i e tila noxi'a ta'ami mupalusi'a so i'ala milivu no tani la mimaisou voiou ne laixenusi.

Iesua mutulusou maulu vile no anu soli

¹¹ Ioxe, maxuveni uasi la Iesua mulutu mulai no taoni vile ilemolu lexe Naini. La oli'a tatisaipeliou xe tamitema latala e latala.

¹² Mulutu xo xe muxali alai mo anu a so u'una no anu aitengaxu vimelusou taoni ne. Sila muxalisi'a tamitema a milala mo mitavulenu vasimolu itema musoli. Mitavulenu la nenu itema musoli xe tatemanu tuala leviani a mimuline'i. Sema ne mulue musoli tatei mo ilie soxu vilesisi a musoli ne kalumo.

¹³ Tatananenge mumaisie sema ne la tanuxe misevile la muvikalane lexe, “Natama uasi.”

¹⁴ Muvika­lane mukalu la mulai mumulaxu avolu no lusou itema vasimolu laso ane'i ane mitavulenu la mitulusi. Xe Iesua muvikala lexe, “Mauluo, eni avikalaneni lexe natulu.”

¹⁵ Sila alaxu vilesisi itema musoli ne mu'avuti mutulu mutalupexa mo muvivikalasi. La Iesua muno'u mulaixu noxie nenu.

¹⁶ Tamitema mimaisou mi ne la mama'u mukasi'asi mo misoko'u so i'itinu Mosinge ualasou. La mivikala lexe, “Ai, polopeti vile tila manina a muxali no tainenge 'oe!” Mo mivikala lexe, “Mosinge a mune'e noxi'a tamitemaou 'o.”

¹⁷ Xe a'alosou mi e Iesua mu'oxonu la muiaveiave musu'asou xale lia ne Iutea mo mulai avile no tuatuala no pa'upa'umolu.

Tioni e itema so kelele mupalusi'a tatisaipeliou tamei so itali'i noxou Iesua

¹⁸ La tatisaipeliou Tioni milai mia'alou no anu mimi ane Iesua mu'oxonu.

¹⁹ Laso Tioni mu'avali'a tamei noxi'a mo mupalusi'a ilai noxou Tatananenge so utalai'isou aloxo 'o, “Nini itema Mosinge muvavalimasou e texoxomaiou o tautitiou evilela masi a uaosio?”

²⁰ Ioxe, milutu xo xe mixali noxou Iesua la mivikalanu lexe, “Tioni e itema so kelele mupalusixe tene'e noxine so tatali'i noxine aloxo 'o. Nini itema Mosinge muvavali­masou e texoxomaiou o tautitiou evilela masi a uaosio?”

²¹ No voxo loxo mine'e mitali'i noxou la anu a upaipoune'i tamitema tavu'alo ane mitavulenu siki mo navunavu iouiou no vasime'a. Mo a mukusai'a ta'angelo tamasua noxi'a tamitema se'i xe ane'i tavu'alo loxo ie'i mutomu la mupaipounu so mimaleila.

²² La Iesua mukoline'i tatisaipeliou Tioni aloxo 'o, “Ngilou ngalivu la ngaa'alou Tioni no anu mimi e ngemaisou mo ngelomusou 'o. Xo tamitema ane ie'i mutomu la imaleila. Xe ane'i ane tava'a musoisoli la imuamua'isi. Xe tamitema so siki lepelesi la vasime'a malemalengala. Xe ane'i ane sangali'a mutomu la ilolomula. Xe se'i ane misoisoli la itulutulu imaulila. Xe tamitema ta'oloxola la ilomusou votovotosou vaikala laixe.

²³ La anu laixe noxou itema aneva ulopalaleli mo usasalo uasi.”

²⁴ Ioxe, tatamei e Tioni mupalusi'a ne milivui laso Iesua musoko'u so uvikala lamana so Tioni noxi'a tamitema latala ne aloxo 'o, “No voxo loxo ngelailai no xale lia esi'esi la ngelai so ngesaxisou mi ma'ia? Ngesaxisou itema pelesou loxo lele'i ane sivo utaotaonu?

²⁵ O masi axova, ngelai so ngasaxisou itema lavulutiou lailaixe? Ai ngalomu, tamitema ane ivilasi no anu mimi lailaixe mo ixoxolu no latanu mimi lailaixe so vasime'a ne ane'i ixoxolu no tasi'a takingisi.

²⁶ O masi ngelai so ngasaxisou mi ma'ia, polopeti vile, ne? Ani, ngesaxisou polopeti vile ane. Ia avikalangengi lexe polopeti anene uua'ulixa'a tapolopeti mukalusi.

²⁷ Xo anu mosou e vaikalaou Mosinge uvikalasou lexe, 'Nalomu, eni apalusou itemaxeli vile no laxuneni so ulanu vaikalaxeli. Anu u'uli noxine so ulalaxinu vote'isine.'

²⁸ Eni avikalangengi aloxo 'o. No taine'i tatemanu lialia mukalusi, la Tioni uua'ulixa'a avile. Ia no voxo so Mosinge molu u'uli laxune'i tamitemaou xe ena'ei noxi'a ualasou vitanisi, la uua'ulixu Tioni ane.”

²⁹ Iesua muvikalasou Tioni axone xe tamitema vitavitanisi oli'a tamitema so itaxusou taxisi loxo milomusou la mivikala aloxo 'o, “Ai, ilixou Mosinge ne mulapu e mulapusi.” Ane'i mivikala axone xo Tioni mu'oxonu ilixo so kelele noxi'a.

³⁰ Ia ane'i Tapalisi oli'a tamitema so lavulavu no anu lavuloto la mixiunu tumali'aou vote'i laixe e Mosinge mulala­xisi'a ne. Ane'i anene ilai so Tioni u'oxonu ilixo so kelele noxi'a uasi.

³¹ La Iesua muvikala aloxo 'ola, “A'oxonu latilovo so apala'anixu ilixone'i tamitema so vaimomo 'o axova? Ane'i tamitema kaini axovao?

³² E aloxo 'o. Ane'i loxo tamolomolo ixoxolu no loxomala mo i'ava noxi'a tamenexi'a lexe, 'Nexi tetausou mavusinge ia ngingi ngalei uasi. Xe nexi tetalingalele ia ngingi ngatama uasi.'

³³ Xo Tioni e itema so kelele u'ou pileti mo uie uaini uasi. Sila ngingi ngevikala lexe, 'Iu, ulenu masua uxolu noxou to ne!'

³⁴ Mo vaimomo 'o Itema ane molu noxou Mosinge a muxali mo u'ani mo uie. Sila ngingi ngevi­kalasou lexe, 'Ngamaisou anu itema so vune mo ulavusou usipaki. Xe anu vaitami'a tami­tema so itaxusou taxisi oli'a tamitema so susu to!'

³⁵ Ngingi ngalavusou ngavikala axone ia tamitema ane ilomuxu lavulavu u'asi'asi noxou Mosinge la imaxa'u lexe manina ane.”

Sema vile milutunu ueli no tava'u Iesua

³⁶ Xe ili'i la Palisi vile mu'avalou Iesua so ilou i'ani. La anu mulai no tasou Palisi ne mo a oli'a italupexa i'ani no latevolo.

³⁷ La sema vile so taoni ne ane sema so sususi. Ane milomu lexe Iesua u'ani'ani no tasou Palisi ne laso mino'u lavotoni so ueli tuma'u lailaixe. Lavotoni ne tamitema mi'oxonu no anu lavo'o lailaixe.

³⁸ Mino'u la mine'enu ka mitulu no tumalou lu e Iesua tava'u muai no anu. La mitatama mo iei lexaxu totoloxuou Iesua tava'u mo miasouiasou no anu kisie laxusou. La mimaxa'u sexela noxie noxou mo milutunu ueli tuma'u lailaixe no tava'u ne.

³⁹ Mi'oxo axone xe Palisi e mu'avalou Iesua mune'e ne mumaisie la muxavutala no oponu lexe, “Uo, loxo anu polopeti manina la anu ulavusie sema e ikasou 'o lexe ane sema so sususi ane.”

⁴⁰ Ia Iesua mulavusou xavutalaou ne la muvikalanu lexe, “Saimonio, eni vaikala vile so alemolu noxine 'o.” La anu mu'oxe, “Io'o, Tisa nalemolusi.”

⁴¹ La Iesua mu'oxonu latilovo aloxo 'o, “Tamitema tamei mixa­lixu tina'u­xa'a noxou itema so lamoli vile. La vile tina'uxu 100 xe vile tina'uxu 10-si.

⁴² Ioxe, ilou ne vote'i so ikolinu tina'uxa'a ne uasi. Laso itema ne muiaiama noxi'a mo muiasou tina'uxa'a ne. La nexavu­tala lexe ena'ei noxi'a ilou usexe­laxu mosou lamoli ne manina?”

⁴³ La Saimoni muko­linu lexe, “Eni axavutala lexe anu ane tina'uxu tatila muiasi.” La Iesua muvika­lanu lexe, “Anu ane, nelemolu mulovo.”

⁴⁴ Xe Iesua muxiu noxie sema la muvikala noxou Saimoni lexe, “Namaisie sema ano'o. Eni e'una no tasine la nalosilo lexa so a'uinu tava'ilo uasi. Ia ane mi'oxonu tava'ilo pita'u no anu iei lexaxu ka milutunu no kisie laxusou.

⁴⁵ Mo ene'e no tasine la namaxa'u sexelasilo uasi. Ia ane la misoko'u loxo exali mo a imaxa'u sexela noxilosio.

⁴⁶ Mo kalumo la nalutunu ueli so kisilo uasi, ia ane sema ano'o milutunu ueli e tuma'u lailaixe no tava'ilo 'o.

⁴⁷ Laso avikalaneni aloxo 'o. Sema ano'o susu noxie mulolutu, ia tina'uxe muiasi mukalu. Laso maixene isexelaxo tatila 'o. Ia itema ane tina'uxu so uiasi malaxo uasi, la usexelaxo malaxo to uasi.”

⁴⁸ La muvikalane sema lexe, “Tina'u so susu noxine muiasi mukalu.”

⁴⁹ Xe tamitema oli'a ita'olu so i'ani no latevolo ne mivikalane'i ngato'o lexe, “Itema ano'o ena'ei so ulemolu tina'u so susu lexe uiasou aloxo 'o.”

⁵⁰ Ia Iesua muvikalane sema ne lexe, “Nini nelopala laso nexalisou pamauli ane. Nalai naxolu lalavulusi.”