Luku 6 - Ata New Testament

Iesua muvikalasou Voxo so Ma'ila

¹ Ioxe, no Voxo so Ma'ila vile la Iesua oli'a tatisaipeliou mimua­mua'i. Mimuamua'i la mipolo no vote'isou xai so uiti vile. Mipolo la ane'i tatisaipeliou mipitisou uiti ngiaxu se'i mo miloloinu no avo'a so mixexenu sosou ka mi'ou.

² Xe Tapalisi se'i mimaisi'a la mivika­lanu lexe, “Ai axova so ane'i i'oxonu mi ane mamu so ta'oxonu no anu Voxo so Ma'ila?”

³ La Iesua mukoline'i lexe, “Xo ngingi nga'itisou a'alosou mi e Tevitiena mi'oxonu tatei uasi? No anu voxo vile anu oli'a tame­nexu la'ilalixa'a uasi mo misolixa'a.

⁴ Misolixa'a laso anu mu'unalai no tasou Mosinge la muno'u mo mu'ou pileti ane tapilisiti mikalipalanu lexe noxou Mosingesi. No anu lo la uvikala lexe mamu so tamitema vitanisi i'ou pileti ne, anene noxi'a tapilisitisi. Ia Teviti mu'ou mo mulosi'a tamenexu so mi'ou kalumo, la Mosinge la'iaxui'a uasi.”

⁵ La muvikala lexe, “Laso ane, Itema ane molu noxou Mosinge anu Tatatananu Voxo so Ma'ila ane.”

No Voxo so Ma'ila vile la Iesua mupaipounu itema vile avolu musoli

⁶ Xe mune'e no Voxo so Ma'ila vile la Iesua mu'unalai no tasou lavuloto mo a muvotovoto. La itema vile avolu tema musoli a muxolu ne.

⁷ La tamitema so lavulavu no anu lavuloto oli'a Tapalisi mixolu itulu­xu Iesua lexe upaipounu itema ne no anu Voxo so Ma'ila. Ane'i mituluxu axone xo loxo anu upaipounu no anu Voxo so Ma'ila la anene tava'u so itulusou no anu vaivaikala.

⁸ Ia Iesua mulavusou xavutala no opone'i ne laso muvi­ka­lanu itema ane avolu musoli lexe, “Nane'e mo natulu no talaxa'a tamitema 'o.” La anu mu'avuti mulai mutulu.

⁹ Xe mukalu la Iesua muvikalane'i tamitema ne aloxo 'o, “Loxova. Mosinge u'osa loxo ta'oxo mi ma'i no anu Voxo so Ma'ila? U'osa loxo ta'oxo alauna o loxo tamasuane'i tamenexinge? Anu u'osa loxo tapamaulinu itema vile o loxo tavau usoli?”

¹⁰ La Iesua iou mukakai'a mukalusi mo muvika­lanu itema ne lexe, “Namexinu avone.” Xe mumexinu avolu sila laixenu avile.

¹¹ Ia ane'i tamitema so lavulavu no anu lavuloto oli'a Tapalisi la'iaxa'a manina la mivikalane'i ngato'o mo milalaxi lexe i'oxo axova noxou Iesua.

Iesua muiloune'i tatisaipeliou 12

¹² Ioxe, no voxo anene Iesua mutelai no la'olu vile so uvikala noxou Mosinge. La muxolu olovoxo loloni muvikala noxou Mosingesi xo mo lamana mukea.

¹³ Ioxe, aso muxali la anu mu'a­va­li'a tatisaipeliou mo muilou­ne'i 12 noxi'a so umoxo'a lexe ta'aposeliou.

¹⁴ La tamitema 12 ane musoso­vosi'a ne ualaualasi'a aloxo 'o. Saimoni ane Iesua mulemolu lexe Pita. Xe Pita vimou Anitilu. Xe Tiemisi mo Tioni mo Pilipi mo Patolomiu.

¹⁵ Xe Matiu mo Tomasi. Xe Tiemisi e Alipiusi olu mo Saimoni anu so laili noxi'a Taseloti.

¹⁶ Xe Iutasi anu Tiemisi olu mo Iutasi Isikalioti e itema ane so upilixinu Iesua no avo'a tauluaou.

Iesua mupaipoune'i tamitema ipipiena mose'i

¹⁷ Xe mukalu la oli'a Iesua milivu milu'e no la'olu mo anu mutulu no anu apu latia vile. La oli'a tatisaipeliou tavu'alo mukalusi xe tamitema se'ila e lapilai uasisi a mixolu mipita ne. Ane'i tatemanu xale lia ne Iutea xe so taoni Ielusalemo xe so luaki pa'umolu no taoni Taili mo Saitoni.

¹⁸ Ane'i mipita so ilomusou votovoto noxou xe so upaipoune'i no anu siki iouiou. Xe ane'i ane ta'angelo tamasua milosi'a xoluxolu masua la anu mu'isalilinixi'a.

¹⁹ La ane'i tamitema latala mitovonu so ikasi noxou xo anu xaviou a mulutu noxou mo mupaipoune'i.

Iesua mupala'anixu xoluxolu aneva laixe xe masua

²⁰ La Iesua iou muxiu mulaii'a tatisaipeliou la muvikala aloxo 'o, “Laixe noxinge ane xoluxolu­ngenge loxo ta'oloxola xo ili'i la ngingi ngaxolu nonano no voxo so Mosinge molu u'uli laxune'i tamitemaou.

²¹ Laixe noxinge ngingi a ngasolingenge vaimomo 'o xo ili'i la ngakalusou masaxa avile. Laixe noxinge ngingi a ngatatama vaimomo 'o xo ili'i ngingi nga'osa mo ngakekesi ane.

²² Laixe noxinge ngingi a so tamitema imatapiangengi. Xo ngingi ngatavulenu ualasou Itema ane molu noxou Mosinge laso tamitema ikalitotongengi xe ivi­kala masuainge xe ixililiou ualasinge.

²³ Ia loxo mi axone uxali noxinge la nga'osa mo opongengi ulei. Xo ngalomu, palaisimengi la'oluxu to a uai ulalaxi no tualasou Mosinge. Mo ngalavu aloxo 'ola, tatei ta'ilusune'i mi'oxo axone noxi'a tapolopeti kalumo.

²⁴ Ia masua noxinge ngingi ane ngaxolu no anu mimi latanu xo osa noxinge se a ngexolu no anu mukalu 'oe.

²⁵ Masua noxinge ngingi ane nga'ani laixe vaimomo 'o xo ili'i la ngasolingenge ane. Masua noxinge ngingi ane ngakeke vaimomo 'o xo ili'i la ngatatama mo iengi lexaxu upeipei.

²⁶ Masua noxinge loxo tamitema mukalusi i'itinu uala­singe xo tatei ta'ilusungengi mi'oxo axone noxi'a tapolopeti kalavoi.

Pelototo lexe tasexelaxa'a tauluamenge

²⁷ Mo musolonu aloxo 'ola, “Noxi­nge ta'ei so ngalomuxu vaikalaxeli la apelototo aloxo 'o. Ngingi ngasexelaxa'a tauluamengi mo nga'oxonu alauna noxi'a ta'ei imatapiangengi.

²⁸ Mo loxo se'i masi opone'i utatamasou mamulo­singe ia ngingi la ngalingau mimi laixe so xoluxoluxa'asi. Xe ane'i ane i'oxongengi masua la ngapili­xine'i noxou Mosinge so u'oxone'i laixesi.

²⁹ Loxo itema usavaline xalevile la naxiu so usavaline xale­vi­lela. Loxo itema vile u'umenu saketimeni la napilixinu lasioti­meni noxou so uno'u kalumo.

³⁰ Xe loxo tamitema ilingau mimimeni la mi vile uasi, nalo­si'asi. Mo loxo evile ulaixu mi vile noxine la nakaitolonu mamu so ulivunoxu.

³¹ No anu vote'i axova namasaxau lexe tamitema i'oxo­neni la na'oxone'i axonesi.

³² Xe loxo ngasexelaxa'a ane'i ane loxo isexelangengesi la anu mi lailaixe so tamitema ikulukemolu malaxo to uasi. Xo tamitema so susu kalumo isexelaxa'a ngato'o axone.

³³ Xe loxo nga'oxo laixe noxi'a ane'i ane i'oxo laixe noxi­ngesi la anu mi vile no anu malaxo uasi. Xo tamitema so susu kalumo i'oxo axonesi.

³⁴ Xe loxo tami­tema ixalisou tina'u noxinge ia ngalavu lexe ikolinu, la anu mi so tamitema ivikalasingexu laixe uasi. Xo tamitema so susu ixalisou tina'u noxi'a ngato'o axone kalumo, xo ilavu lexe ili'i la ixalisou lakolisou ane.

³⁵ Ia ngingi nga'oxo aloxo 'o. Ngasexelaxa'a taulua­mengi mo nga'oxonu alauna noxi'asi. Mo loxo tamitema ixalixu tina'u noxinge la mi vile uasi, ngalosi'a mi ma'ia imasaxau io opongengi ututuluou lakolisou uasi. Xo ngingi ngaxalisou lakolisou lailaixe ili'i ane. Mo ngaxolu Anu U'uli'uli ta'olu xo anu ilixo noxou alaunasi noxi'a tamitema tamasua ane ivikala laixe so su'uli noxou uasi.

³⁶ Xe opongengi mamalaxu noxi'a tamenexinge a loxo Maminge oponu mamalaxu noxi'a tamitema mukalusi.

Tatilovosi'a tamenexinge so tato'ome'axu susu noxi'a uasi

³⁷ Ioxe, Iesua musolonu aloxo 'ola, “Ngingi ngatilovosi'a tamene­xinge so ngato'oto'ome'axu susu noxi'a uasi, xo loxo 'o io tilovo no anu susu noxinge uto'omenge u'isalili axone. Xe loxo evile ususunixinge la opongengi uiasou susu noxou xo susu noxinge so uiasi axone kalumo.

³⁸ Mo avonge temanusi noxi'a tamene­xinge mo so ngingi kalumo ngaxalisou avonge temanu ane. Ngalosi'a tamenexinge, ia ane so ngaxalisou la la'oluxusi mo upeipeisingesi ane. Lasixeli axova so ngalosi'a la lasixeli so lakolisou ulivu noxinge ili'i ne a iou vilesisi.”

³⁹ La mu'oxonu latilovo aloxo 'o, “Axova, itema iou mutomu umomomo so ulosoiouxu menexu iou mutomu kalumo vote'i? Ilou masi ilapau no taxa e lautu ane.

⁴⁰ Itema usikulu uua'ulixu tisaou uasi. Ia loxo usikulu xo xe ukalui laso ane, anu uxali iou vilesisi loxo tisaou ne.

⁴¹ Xe axova so namaisou lapipia utuxu se uai noxou menexine iou ia naxavu­talanu ovu alelaxu uai no ieni ne ua'?

⁴² Loxo natilovosou ovu alelaxu ane uai no ieni uasi, la axova so navikala lexe, “Ai vivilo, eni axexenu lapipia utuxu se emaisou uai no ieni ne.” Uo kalavoi, nini naxexenu ovu alelaxu tatila to e uai no ieni teio. Mo so axone la nini nasaxi laixe so naxexenu lapipia utuxu se uai no iou menexine ne.”

Ovu masua uxali nene'axu masuasi

⁴³ Iesua muvikala aloxo 'ola, “Ovu laixe uxalixu nene'axu masua uasisi. Xe axone kalumo no anu ovu masua, umomomo so uxalixu nene'axu laixe to uasi.

⁴⁴ Vote'i so tatilovosou ovu lexe anu laixe o masua a no anu nene'axusi. Xo tamitema ilai itaxusou viki ngiaxu no anu lamota ana'anaxu uasi. Xe i'elesou uaini ngiaxu no anu ovu kitukitu ane uleleme vitanisi.

⁴⁵ Itema ane laixe la oponu ututuluou mimi lailaixe ane uxolu no oponu, laso maixene uxalixu nene'axu laixe. Xe ane itema masua la oponu ututuluou mimi masumasua, laso maixene uxalixu nene'axu masua to ne. Mi ma'ia uuana'ananixu itema oponu la ula no anaxusi ane.”

Latilovo so tani utulu no anu mi ma'ia

⁴⁶ Mo musolonu lexe, “Axova so ngamoxomoxo'ilo lexe, 'Tatana­nexi, Tatananexi,' ia ngalomuxu vaikalaxeli to uasi?

⁴⁷ Loxo itema une'e noxilo ulomusou vaikalaxeli mo ulomuxu la apela'ingexu ilixo noxou aloxo 'o.

⁴⁸ Anu loxo itema umasaxau utulusou tani. Utulusou ia tei la u'asou tanixu ulu'elai avile xe uxalisou lavo'osi laso utulusou tani tava'u no anu. Utulusou xo xe tani ukalui sila anipa toxoxu uxali la lexa u'otu'otunu tani. U'otu'o­tunu ia ukunikuni uasisi, utulu pumuxusi xo tava'u no anu lavo'osi.

⁴⁹ Ia loxo itema ulomu­sou vaikalaxeli ia ulomuxu uasi la anu loxo itema utulusou tasou no anu io'i vitanisi. Laso loxo lexa no anipa u'otonu tani la alaxu vilesisi ulume mo umamulo avile.