Luku 24 - Ata New Testament

Iesua mutulu mumaulila

¹ Ioxe, no kakau manina no voxo tei no anu viki la tasema mitaxusou mimi e tuma'u lailaixe ane milalaxinu ka milai no lulu.

² Milutu xo xe mixali la mimaisou lavo'o e so utanuxu lulu anaxu a mupipau muxexesou.

³ La ane'i mi'unalai ia imaisou lexe vasimolu Tatananenge Iesua uai ne uasi.

⁴ Mo ane'i a mitulu tane'ilili sila alaxu vilesisi misaxisi'a tamitema tamei lavulutii'a lamanaxu mitulu no pa'ume'a.

⁵ Misaxisi'a laso ane'i tane'i kalaua mo mitangatulu. Ia tatamei ne mivikalane'i lexe, “Axova so ngakamulinu anu ane mumauli no taine'i tamitema so soli 'o?

⁶ Anu uai 'o uasi, mutulu mumauli ne. Ngaxavutalanu vai­kalaou e mupilixinu noxinge loxo ngexolu ne Xalilisio.

⁷ Anu muvikala lexe ane'i ipilixinu Itema ane molu noxou Mosinge no avo'a tamitema so susu ka ililixu no ovu valautu so usoli. Ia no anu voxo tatalusou la anu utulu umaulila.”

⁸ Milemolu axone sila ane'i tasema ne mixavutalanu vaikalaou ne.

⁹ Laso ane'i mixexesou lulu mo milivu. Milivu xe mixali la ane'i mia'aloi'a tatisaipeli 11 oli'a tamenexi'a se'i ane mixolu ne.

¹⁰ Ane'i tasema e milai mia'aloi'a ta'aposeli ne a Malia so taoni Makatala xe Tioana xe Malia e Tiemisi nenu xe tasema se'ila.

¹¹ Mia'alo xe ta'aposeli milomusou ia mi'oxo lexe anene vaikala sivo vitanisi laso ilomuxu uasi.

¹² Ia Pita mu'avuti muiave mulai no lulu. Mulai xe muxali la mukelele muia'ili so usaxi ulai nonano la mumaisou lavalava keasi a muta'olu. Mukalu la mulivu no tani mo tanulili manina no anu mi e muxali ne.

Iesua muxali noxi'a tamulimuliou tamei no vote'i e so Emeusi

¹³ Ioxe, no anu voxo anenesio la tamulimuliou Iesua tamei mimua­mua'i so lexe ilai no tuala ne Emeusi. Tuala anene muxolu va'axu sevile ne Ielusalemo, kilo­mitasou loxo 11 'o.

¹⁴ Ane'i ilou a imuamua'i ilalai la ivivika­lasou mimi mukalusi e muxali ne.

¹⁵ Ane'i ilou a ivivikala piena mo ana'anaxa'asou mimi ne sila Iesua mune'e se alai noxi'a so oli'a mikei mimuamua'i.

¹⁶ Ia mi vile muta­nuxu ie'i so itongonu uasi.

¹⁷ La anu muvikalane'i lexe, “Ngingi ngilou ngalalai 'o mo ngalivulivungenge ngato'o so ngavi­kalasou mi ma'ia to ne?” Mutali'i axone la ilou mitulu mo ie'i lusi'usi xo opone'i tu'umaxu.

¹⁸ Laso vile noxi'a e ualasou lexe Kiliopasi muvikalanu lexe, “Axova? No taine'i taasila muka­lusi mixolu no Ielusalemo no anu voxo mukalu se 'o la ninisisi nala­vusou mimi e muxali ne uasi?”

¹⁹ La Iesua mutali'isi'a lexe, “Mimi ma'ia e ngalemolu ne?” Laso ilou mivikalanu aloxo 'o, “A telemolu mimi e muxali noxou Iesua so Nasaleti. Anu polopeti vile ane mu'oxonu xaixai xavinu mo mulanu vaikala mutiatila manina no iou Mosinge xe no ie'i tamitema latala.

²⁰ Ia tatiatila noxi'a tapilisiti oli'a tatiatilasinge mipilixinu no avolu xamani so isakinu vaikala lexe ivau. Mukalu la mililinu no ovu valautu ka musoli ne.

²¹ Laso axova, xo nexi tei telopala lexe anu Itema ane so pamaulisinge nenge Ta'isilaeli ane. Mo mi vilela aloxo 'o. Mimi ne muxali mo vaimomo 'o voxo tatalusou a.

²² La vaimomo 'osi tasema se'i noxixe mikulukenexi kena. Xo no kakau manina ane'i milai no lulu.

²³ Milai ia imaisou Iesua vasimolu uai uasi. Xe milivu mine'e la mivikalanexi lexe ane'i mimaisou mi vile loxo no anu ai saxi. Xo ta'angelo mipa noxi'a mo mivikala lexe anu a mumaulila ne.

²⁴ Xe se'i noxixe milai no lulu la mimalei mu'isalili a loxo tasema milemolu. Ia anu, la ane'i kalumo imaisou to uasi.”

²⁵ Ioxe, la Iesua muvikalane'i ilou lexe, “Ai, ngingi tamitema so ngano'u lavulavu palea uasi. Ngavovoxo misevile so ngalo­palanu vaikalai'a tapolopeti muka­lusi.

²⁶ Xo anu ane so Kalaisiti mutavulenu tu'utumaxu anene kaio mu'una no anu xoluxoluxu iaxu. Muxali axone la anene vote'isou mulovo u'isalili.”

²⁷ Laso anu musoko'u noxou Mosisi mo mulai avile no anu vaikalai'a tapolopeti mukalusi so mupalapalasinoxu vaikalasou ane muai no anu lavukuou Mosinge loloni.

²⁸ Mimuamua'i xo xe so ixali no tuala e ilou ilai no anu ne la Iesua mu'oxo lexe ulai avilesi.

²⁹ Ia ane'i ilou mitanuxu lexe, “Uasi, nenge'a taxolu 'o xo aso a ulu'elai, mo anu so olovoxo 'oe.” Laso anu mu'unalai so oli'a ixolu.

³⁰ Mixolu mo ane'i a so i'ani la anu oli'a mixolu mipita so i'ani no latevolo. Xe anu muno'u pileti ka muvikalasou laixe noxou Mosinge. Mukalu la anu muse'inu mo muvelunuxa'a.

³¹ Sila ilou ie'i mulamana mo mitongonu lexe anu. La alaxu vilesisi anu tasiauxu no ie'i.

³² Laso ilou mivikalane'i ngato'o lexe, “Ai manina misevile. Nenge nenge'a temuamua'i no vote'i xe muvivikalanenge mo mupalapalasinoxu laxu vaikalaou Mosinge noxinge la oponenge muleilaxusi.”

³³ Ilou mivikala axone xe mukalu la alala'e se nesi mi'avuti milivu milai ne Ielusalemo. Mixali ne Ielusalemo la mixalisi'a tatisaipeli 11 oli'a tamenexi'a se'i a mipita ixoxolu.

³⁴ La ane'i mivikalane'i ilou lexe, “Ai anu manina lexe Tatananenge mutulu mumauli ne. Xo anu mupa noxou Saimoni.”

³⁵ Xe ane'i ilou la misisimulinu mimi mukalusi e muxali noxi'a no vote'i. Mo mivikala lexe mune'e xo mo muse'inu pileti laso ane, ilou mitongonu lexe anusi.

Iesua mupala'a noxi'a tatisaipeliou mukalusi

³⁶ Ioxe, ane'i tatisaipeli a ivivikalasio, sila anu a mutulu no taine'i. La anu muvikalane'i lexe, “Opongengi uai se'isisi.”

³⁷ La ane'i mikuluke mo mi'ume xo mikalavoi lexe anu ulenu vile ane.

³⁸ Ia anu muvikalane'i lexe, “Axova so opongengi uauavuti mo lopala no opongengi usasalo aloxo 'o?

³⁹ Xo ngamaisou avolo mo tava'ilo 'o. Enisi a. Mo ngakasou vasimelo. Ulenu vasimolu mo xinuxinu a loxo ngamaisou noxilo 'o uasi.”

⁴⁰ Anu muvikala axone mo mulosoie'ixu avolu mo tava'u.

⁴¹ Ane'i mi'osa manina ia ilopala manina uao xo tane'ililisio. Laso anu muvikalane'i lexe, “Ngingi la'ilali sevile a uai 'o?”

⁴² La ane'i milosou silanga pa'usou sevile muxutu ne.

⁴³ Milosou ka anu mu'ou no ie'i.

⁴⁴ Mukalu la anu muvikalane'i lexe, “Mala'o loxo nenge'a texolusio la epela'inge lexe vaikalasilo e mukaukavu muai no anu lavuku so lo noxou Mosisi xe tapolopeti xe no anu Lexelexe la uxalixu nene'axu ane.”

⁴⁵ La anu mukisinu xavutalai'a mo so vaikalaou Mosinge laxulaxu mupalapala'a noxi'a.

⁴⁶ Mo muvikalane'i aloxo 'o, “Kaukavu muai no anu Mosinge vaikalaou lexe anu ane so Kalaisiti utavulenu navunavu tei kaio no voxo tatalu la anu utulu no anu solila.

⁴⁷ Xe no anu ualasou la ane'i tamitemaou ilanu vaikala noxi'a tamitema so xale tuatuala mukalusi. Ilanu vaikala lexe ane'i ixiunu mo i'isalilinoxu opone'i laso Mosinge uiasou tina'uxa'a so susu. Laso ane, xaixai anene ngasoko'u ne Ielusalemo 'o.

⁴⁸ Xo ngingi menge ngemaisou mimi ano'o laso ngaa'aloxu.

⁴⁹ Mo ngalomu. Anu ane Mamilo muvavalimasou la eni a so apalusou une'e noxinge. Laso ngingi ngaxolu no taoni 'o xo mo xavi ane molu teitexi une'e usu'asinge.

Iesua mulivu mutelai no tualasou Mosinge

⁵⁰ Ioxe, Iesua mulaixi'a tatisai­peliou xo la mixali ne Vetani. La anu mutolosou avolu mo muvika­lasou xoluxoluxa'a laixe.

⁵¹ La anu a uvivikalasio sila Mosinge muno'u mulaixu no tualasou.

⁵² Laso ane'i mi'iti'itinu Mosinge ualasou7 mo mi'osa'osa manina so milivu milai ne Ielusalemo.

⁵³ Xe no voxovoxo utotomu ane'i milai no tasou Mosinge so i'itinu ualasou.