Luku 23 - Ata New Testament

Iesua mutulu no laxunu Pailati

¹ Ioxe, tatiatila mukalusi ne mi'a­vuti la milaixu Iesua so itulusou no laxunu Pailati.

² La ane'i misoko'u so ito'omolu no anu vaikala lexe, “Nexi temaisou itema ano'o anu ulapune'i tami­temamexi ipolo va'axu. Mo anu u'apixa'a lexe isu'anu taxisi noxou Sisa uasi. Xe anu molu uvikalasou lexe anu ukingi xo anu ane so Kalaisiti.”

³ La Pailati mutali'isou Iesua lexe, “Nini kingi noxi'a Taiuta, ne?” La Iesua mukolinu lexe, “A loxo nini mene nelemolu ne.”

⁴ Sila Pailati muvikalane'i tatiatila noxi'a tapilisiti xe tami­tema latala lexe, “Eni atongonu susu vile noxou itema ano'o uasi.”

⁵ Ia ane'i miuolotete pakia'u lexe, “O anu ulavusou uxixao ne Iutea mukalusi, musoko'u ne Xalili xo mo mune'e avile no taoni noxinge 'o. Uxixao mo ulanu vaikala so u'unanu tanu noxi'a tamitema la u'avutinoxu opone'i to!”

Iesua mutulu no laxunu Eloti

⁶ Xe Pailati mulomusou vaikala ne la mutali'i lexe, “Xo itema ano'o so Xalili, ne?”

⁷ Ioxe Pailati mulavu lexe Iesua molu no xale lia e Eloti mu'uli laxunu ne laso mupalusou so ulai noxou Eloti. Xo no voxo anene Eloti a muxolu ne Ielusa­lemo kalumo.

⁸ Ioxe, milaixu Iesua xo xe Eloti mumaisoui la mu'osa misevile xo tateimo anu umasaxau lexe umaisou. Anu mulomusou a'alosou iouiou laso oponu ututulu lexe umaisou u'oxonu sosovo so xavi vile.

⁹ La Eloti mumaititi noxou maxuveni sevile ia Iesua ukolinu vile uasi.

¹⁰ Xe ane'i tatiatila noxi'a tapilisiti xe tamitema so lavulavu no anu lavuloto a mitutulu ne mo mito'omolu no anu vaikala pakia'u manina.

¹¹ Xe Eloti oli'a ta'amiou milemolu vila'isou mo mimolo sukusou. Mukalu la misakinu lavalava tokolomosou laixe noxou ka mipalusou mulivu mulai noxou Pailati.

¹² Tatei la Eloti ilou Pailati mixolu tauluai'a ngato'o ia mu­soko'u no voxo ano'osi la opone'i mulu'e mo mi'osasi'a ngato'o.

Pailati mupilixinu Iesua so ivau usoli

¹³ Ioxe, la Pailati mu'avali'a tatiatila noxi'a tapilisiti oli'a tatiatila noxi'a Taiuta xe tamitema latala mine'e mipita.

¹⁴ La muvikalane'i lexe, “Ngingi ngetulusou itema ano'o no laxuleli mo ngeto'omolu lexe anu mu'unanu tanu noxi'a tamitema so u'avutinoxu opone'i. Ia ngalomu, eni etali'isou no iengi la eni etongonu lexe ususu no anu mi e ngeto'omoluxu ne uasi.

¹⁵ Mo Eloti kalumo mutongonu axone xo mupalusou mulivu mune'e noxilo 'osi. Laso ngalomu, itema ano'o u'oxonu susu vile so apilixinu usolixu uasi.

¹⁶ Eni avikala lexe ipuapuasou sika apilixinu ulaisi.”

¹⁷ No anu tautau ie utotomu no anu voxo so lavilelu la Pailati ulavusou upilixinu vile noxi'a takalavusu so ula.

¹⁸ Laso tamitema mukalusi mikeinoxu mi'ava tatila lexe, “Navau itema ano'o usoli ia na'italonu Valavasi so ula noxixe.”

¹⁹ Valavasi ne anu itema vile mu'avutinixi'a tamitema se'i so mi'otoxa'a taxamani no taoni ne la muve'ave'a se'i misoisoli.

²⁰ La Pailati muvikala noxi'ala lexe anu umasaxau upilixinu Iesua ulaisi.

²¹ Ia ane'i mi'ava'ava tatila lexe, “Nalilinu no ovu valautu so usoli. Nalilinu no ovu valautu so usoli.”

²² La alaxu tatalusou muvikalane'ila lexe, “Xo axova? Itema ano'o mu'oxo susu ma'ia? E atongonu susu vile noxou so apilixinu usolixu uasi 'o. Eni avikala lexe ipuapuasou sika apilixinu ulaisi.”

²³ Ia ane'i miuolotetesi mo mi'ava tatila noxou Pailati so lexe ulilinu Iesua no ovu valautu so usoli. La ava noxi'a musu'asou vaikalaou Pailati mo mipamuxanu xavutalaousi.

²⁴ Laso Pailati muvikala lamana lexe, “Ioxe, amulinu linga noxinge mo Iesua masi usoli.”

²⁵ Xe itema ane Talomu mikalavusunu xo mu'avutinoxu oto mo muve'ave'a se'i la Pailati mumulinu linga noxi'a so mu'italonu mula. Io noxou Iesua la anu mupilixinu no avo'a ta'ami so i'oxonu loxo tamitema miuloteteou.

Ane'i mililinu Iesua no ovu valautu

²⁶ Ioxe, ta'ami a ilalaixu Iesua la mixalisou itema vile a mumuamua'i so lexe u'una no taoni. Itema ne ualasou lexe Saimoni so tuala Sailini. Mixalisou la mitetelisou ka mi'italonu ovu valautu no laxasou xe muili'i noxou Iesua so anu molu mutavulenu.

²⁷ La tamitema latala e latala mumulimulinu xe tasema leviani mitatama mo mielielisi.

²⁸ Ia Iesua muxiu mo muvikalane'i lexe, “Ngingi tasema so Ielusalemo ngatatamasilo uasi. Laixe loxo ngingi menge ngatamasinge ngoli'a ta'ilinge.

²⁹ Xo ngalomu, voxo tu'umaxu uxali ili'i la ngalomusou vaikala lexe, 'Laixe noxi'a ane'i ane ipala mo ivo'one'i ta'ili'a uasi. Mo laixe noxi'a ane'i ane ta'ili'a so isusune'i uasi.'

³⁰ Mo no voxo anene ane'i ivikalanu la'ola'olu lexe, 'Nga'atasixe,' mo ivikalanu laxalaxa'ilu lexe, 'Ngasu'asixe 'o.'

³¹ Xo loxo ane'i i'oxonu aloxo 'o no anu ovu mi ne umaulisio la masi i'oxo axova no anu ovu loxo uxalo mukalu?”

³² La ta'ami mine'ene'i tamitema tamei kalumo. Ane'i ilou ne mikalavusu so susu se'i mi'oxonu laso Talomu mi'oxo lexe ive'a oli'a Iesua isoli.

³³ Milutu xo xe mixali no apu vile ilemolu lexe Kisou Xinu laso lai ne ane'i mililixu Iesua no ovu valautu. Xe tamitema so susu tamei ne la mililixa'a no pa'umolu, vile no avolu tema xe vile no avolu kaisi.

³⁴ Mililixu Iesua mukalu la muvikala lexe, “Papao, oponeni ulu'e so susu noxi'a tamitema 'o xo ane'i ilavusou mi ma'ia i'oxonu 'o uasi.” La ta'ami mitaxusou lavulutiou ka mi'oxonu ilixo so uala so lexe ena'ei uno'u aneva.

³⁵ Ioxe, tamitema latala a mitulu imalei ia tatiatila noxi'a mimolo vila'isou lexe, “Anu mupamauline'i tamitema mose'i. Laso loxo anu ane Mosinge muilounu mo musosovosou so Kalaisiti la anu molu upamaulinu.”

³⁶ La ane'i ta'ami kalumo mimolo sukusou. Xe mine'enu uaini sixula so lexe ilosou.

³⁷ Mo mivikala lexe, “Loxo nini kingi noxi'a Taiuta manina la nini mene napamaulinenisi.”

³⁸ La ane'i mikaukavu no anu mi vile mo miteinoxu no ovu valautu teitexi no kisou. Kaukavu ne aloxo 'o, “Ano'o kingi noxi'a Taiuta.”

³⁹ La vile noxi'a tamitema so susu tamei e milili ne anu kalumo mupupuiou Iesua lexe, “Nini ane so Kalaisiti, ne? Ioxe, nini mene napamaulineni mo nexi noxou 'o kalumo.”

⁴⁰ Ia anu ane vile mulomusou vaikalaou la mulavixu lexe, “Nini kalumo masi nasoli. Laso axova, namama'u noxou Mosinge uasi?

⁴¹ Xo nenge nengei a so tasoli la anene nene'axu ulovou ilixo noxingesi ane. Ia itema ano'o u'oxo susu vile uasi.”

⁴² La muvikala lexe, “Iesuao, no voxo loxo na'uli laxune'i tamitemameni la naxavutalaleli kalumo.”

⁴³ La Iesua mukolinu lexe, “A avika­laneni manina aloxo 'o. Masi 'osi nengei taxolu no tualasou Mosinge lailaixe.”

Iesua musoli

⁴⁴ Ioxe, anu a aso lixinu 'oe. Sila isivoxo toxoxu musu'asou lialia mukalusi xo mo aso iou tatalu no o'olovoxo.

⁴⁵ Anu isivoxo ne mutanuxu aso avile. La no voxo anene lavalava tatila e mulili no tasou Mosinge ne mutea avile, la muxali alelaxu tamei.

⁴⁶ Xe Iesua mu'ava tatila lexe, “Papao eni apilixinu uleleli no avone.” Sila tauxu mukalu so musoli.

⁴⁷ La tilasi'a ta'ami 100 a muxolu ne mo mumalei. Laso anu mu'itinu Mosinge ualasou mo muvikala lexe, “Manina misevile, susu vile noxou itema ano'o uasisi e uasisi.”

⁴⁸ Xe tamitema latala e mipita so mimalei lexe ma'ia muxali ne loxo mimaisou axone la mi'otu'otunu lutune'i xo opone'i tu'umaxu manina. La mipaxepaxele milivu no tatasi'asi.

⁴⁹ Xe tavaitamiou mo tasema e mimulinu Iesua so oli'a me'a ne Xalili mine'e la mitulu va'axu sevile so mimalei lexe mi ma'ia uxali ne.

Mimulaxu Iesua vasimolu no lulu

⁵⁰ Ioxe, vile noxi'a tatiatila noxi'a Taiuta ualasou lexe Iosepu. Anu itema laixe mo ilixo noxou mulapusi.

⁵¹ Xe loxo tamenexu tatiatila milalaxinu opone'i mo mi'oxonu Iesua masua la anu umuline'i no anu uasi. Anu mu­lavusou uxomaiou voxo so Mosinge molu u'uli laxune'i tamitemaou. Anu so taoni vile noxi'a Taiuta e ilemolu lexe Alimatea.

⁵² Itema ano'o mulai noxou Pailati mo mulinga noxou lexe upilixinu Iesua vasimolu noxou. La Pailati muvikala lexe, “Mi vile uasi, nano'usi.”

⁵³ Laso anu Iosepu muno'u Iesua vasimolu ka muisisinu no anu lavalava kea. Mukalu la mulaixu mumulaxu no lulu ane mi'asou mu'unalai no maia tava'u. Lulu ne alavuasi, imulaxu itema vasimolu no anu uao.

⁵⁴ Ioxe, voxo anene ilalaxixu Voxo so Ma'ila mo anu a so uxali.

⁵⁵ La ane'i tasema e oli'a Iesua me'a ne Xalili mine'e ne, mimulinu Iosepu so imaisou lulu. Mo imasaxau ilavu lexe Iosepu mumulaxu Iesua vasimolu axova.

⁵⁶ Milai xo xe mimaisou mukalui la milivu no tani so milalaxinu lamalasini xe ueli e tuma'u lailaixe so vasimolu. Ia no Voxo so Ma'ila la mimulinu lo so voxo ne mo mixolu se'isisi.