Luku 20 - Ata New Testament

Tatiatila mitali'isou Iesua lexe, “Ena'ei mutulusine natiatila 'o?”

¹ Mune'e xe voxo vile la Iesua muvotone'i tamitema so vaikala laixe nonano no vimelusou tasou Mosinge. La tatiatila noxi'a tapilisiti xe tamitema so lavulavu no anu lavuloto xe tatiatila noxi'a Taiuta mine'ene'e noxou.

² La mitali'isou lexe, “Navikalanexi, nini neno'u xavi ne'ei so na'oxonu ilixo te'o? Xo axova, evile mutulusine so naxali natiatila aloxo 'o?”

³ La anu mukoline'i lexe, “O eni kalumo amasaxau atali'isingexu mi vile so ngavikalalelixu.

⁴ No voxo loxo Tioni mu'oxonu ilixo so kelele la ngaxavutala axova? Mosinge molu mupalusou o anene mi noxi'a tamitemasi?

⁵ La ane'i mivivi­kalane'i ngato'o mo mi'oxo lexe, “Ai loxo nenge ta'oxo lexe mi noxou Mosinge, la anu masi uto'omenge lexe, 'La axova so ngalomuxu vaikalaou uasi?'

⁶ Ia loxo nenge ta'oxo lexe anu mi noxi'a tamitemasi, la ane'i latala masi ipalenenge no lavo'o ane. Xo ane'i milopala lexe Tioni ne anu polopeti manina.”

⁷ Tane'ilili axone laso ane'i mikolinu lexe, “E, nexi talavu lexe Tioni muxalisou xavi noxou a ne'ei uasi.”

⁸ La Iesua muvikalane'i lexe, “Ioxe, laso mamu so eni kalumo apela'inge lexe ena'ei mulosilo xavi so axaxai 'o.”

Latilovo so tamitema tamasua misaxila'u xaisou uaini

⁹ Mukalu la Iesua mu'oxonu latilovo noxi'a tamitema latala ne aloxo 'o, “Itema vile mu'oxo xaisou uaini. Mukalu la mupilixinu xai ne no avo'a tamitema se'i so isaxila'u xo anu uxolu uasi ulai no tuala vile nopaxa.

¹⁰ Mulai muxolu xo xe voxo so uaini lingamoe la anu mupalusou voiou vile so ulai noxi'a tamitema ane misaxila'u xaixu ne. Mupalusou mulai noxi'a so ilosou xai temanu se'i. Ia voiou mulutu xo xe muxali la tamitema so isaxila'u xai ne mi'otu'otunu mo mikusaou la mulivu muxaxasi.

¹¹ Mukalu la mosou xai mupalusou voiou vilela so mulai noxi'a. Ia tameisou 'o kalumo mi'otu'otunu mo mivila'isou ka mikusaou mulivu muxaxasila.

¹² Xe mune'e la mupalusou voiou vilela ia tatalusi'a 'o kalumo mipoposou ka miku­saousi.

¹³ Ioxe, laso mosou xai mu'oxo lexe, 'Eni anava io? E, apalusou alixeli soxu vilesisi e asexelaxu misevile 'o xo ane'i masi itaxanu ane.'

¹⁴ Ioxe, olu mulai xe tamitema so isaxila'u xai mimaisou la mivikalane'i ngato'o lexe, 'Ano'o ne mosou xai olu a. Ili'i la anu uxalisou mimiou momu mukalusi. Laso nenge tavau aliku 'o usoli mo so nenge menge tamosou xai ano'o.'

¹⁵ Sila ane'i mivau musoli, mo misu'anu vasimolu noale no xai. Laso masi mosou xai ne unava?

¹⁶ Ngalomu. A une'e umamulone'i tamitema so isaxila'u xaixu ne. Umamulone'i mo upilixinu xai no avo'a tamitema se'i ta'alavua.” la ane'i e mitulu milo­lomu ne mivikala lexe, “Ai, mamu so uxali axone!”

¹⁷ Ia Iesua musaxi noxi'a la muvikalane'i lexe, “Ne? Laso axova so kaukavu muai no anu vaikalaou Mosinge aloxo 'o, 'Ane'i tamitema so itulusou tani mimatapianu lavo'o vile. Ia lavo'o nesi Mosinge muilounu so muxali lavo'o so tani kisou.'

¹⁸ Loxo itema utulaki mo ulapau no latanu lavo'o ne la ukakaka e lapilai uasisi. Ia loxo lavo'o ne ulapau utuvusou itema la anu umamulo e utuxu upaxepaxelesi.”

¹⁹ Xe tamitema so lavulavu no anu lavuloto oli'a tatiatila noxi'a tapilisiti milomusou latilovo mu'o­xonu ne la milavu lexe anu so uto'ome'a no anu ane. La opone'i ialuxu manina so lexe itetelisou alala'e se nesi ia vote'i uasi xo i'ume'a tamitema latala ne.

Se'i mitali'isou lexe anu laixe so isu'anu taxisi o uasi

²⁰ Ioxe, ane'i tatiatila mituluxu Iesua laixe mo so loxo upolo va'axu no anu vaikalaou vile la itetelisou ka ipilixinu no avolu tila no anu xamani so ukotixu. Laso mipalusi'a tamitema se'i ane mikalavoi lexe ilolomu laixe noxou ia loxo manina la mine'e so milakokongoxusi.

²¹ La mivikala noxou lexe, “Tisao, nexi talavu lexe nini namitema so vaikala maninasi. Ane'i tatiatila o tamitema vitanisi ne navikalane'i iou vilesisi. Ane'i latala ne napelototosi'a no anu vaikalaou Mosinge mani­nasousi.

²² Laso naxavutala axova? Anu laixe so nenge tasu'anu taxisi ulai noxou kingi noxi'a Talomu e Sisa, o uasi?”

²³ Ia Iesua mulavu no anu lolo noxi'a to ne laso muvikalane'i lexe,

²⁴ “Ngane'enu lamoli siliva vile mo ngamaxa'uielixu.” Mine'enu laso mutali'isi'a lexe, “Pikisa mo uala no lamoli 'o noxou eio?” La ane'i mi'oxo lexe, “A noxou kingi Sisa to!”

²⁵ La Iesua muvikalane'i lexe, “Laso ane. Loxo mi noxou Sisa la ngapilixinu noxou u'isalili. Xe mi noxou Mosinge la ngapilixinu noxou u'isalili kalu­mo.”

²⁶ Mukoli axone la ane'i tane'ilili xo ane'i vote'i so i'oxo loloxu uasi. Vaikala ma'ia mule­molu no ie'i tamitema ne mulovosi, mi vile so tatiatila ikotixu no anu uasi. Laso mixolu tasiausi.

Tasatusi mitali'isou Iesua so tamitema isoli ka imauli

²⁷ Ioxe, mune'e la Tasatusi se'i mine'e mixali noxou Iesua. Ane'i Tasatusi ne xavutalai'a lexe loxo itema usoli la ukalu avile, Mosinge utulusoula uasi. Mine'e mixali noxou Iesua la mitali'isou aloxo 'o,

²⁸ “Tisa, Mosisi mukaukavunu lavuloto aloxo 'o. 'Loxo itema vile utaula'i xe olu uasi ia usoli, la vimou uno'u tanixu mo utaula'ixe ou ne. La ixalixa'a tali'a mo so laili noxou vimou e musoli la utalo uasi, usuku axone.'

²⁹ Ioxe, anene lavuloto e Mosisi mukaukavunu. Laso tatovonu latilovo aloxo 'o. Loxo tamulu 7 ane'i tavimovi­mo'asi. Xe laposalaxa'a mutaula'ixe sema vile xe olu uasi ia usoli.

³⁰ Xe mune'e la vimou tameisou mutaula'ixe sema nela.

³¹ Xe mune'e la tatalusi'a muno'ela. Mo anu axone noxi'a tavimovimo'a 7 ne mukalusi. Ia ipala to uasi.

³² Mune'e xo xe ili'i la sema ne kalumo misoli.

³³ Laso tali'i noxixe axo'. Loxo ili'i no voxo so Mosinge utulusi'a tamitema misoisoli, la axova? Sema ne mulue ena'ei manina, xo mitaula'ixa'a tavimovimo'a 7 mukalusi?”

³⁴ Laso Iesua mukoline'i aloxo 'o, “Ane'i tamulu xe tasema so vaimomo 'o ne ane'i itautaula'i.

³⁵ Ia ili'i loxo Mosinge utulusi'a tamitema ane utilovosi'a lexe laixe so ixolu noxou avile la ane'i itataula'i uasi.

³⁶ Ane'i loxo ta'angelosi, xo ane'i isolila uasi, ixoxolusi. Mosinge u'umene'i no anu soli mukalu laso ane'i ixolu ta'olu u'isalilisi.

³⁷ Ia no anu telexu so lexe tamitema isoli ka itulula la Mosisi mupela'ingexu mi ne loxo mua'aloxu ovu kitu'a navu mu'ani no anu. Xo anu mulemolu Tata­nanenge lexe anu Mosi'a Apa­la'amu xe Aisaki xe Iakovo.

³⁸ Ne ngamaisou, Mosinge uvikalasi'a ta'ilusungengi axone xo ixolu imauli ane. Mamu so ngaxavutala lexe Mosinge anu Mosi'a tamitema ane soli mukalusi'a avile. Anu Mosi'a tamitema ane imaulisi.”

³⁹ Muvikala axone xe tamitema se'i so lavulavu no anu lavuloto milomusou la mivikalanu lexe, “Tisa, vaikalameni ne laixesi.”

⁴⁰ La ane'i mimama'u so italitali'i noxou no anu mi vilela.

Iesua muvotone'i tamitema so Itema ane Mosinge musosovosou

⁴¹ Ioxe, mune'e la Iesua mutali'isi'a tamitema latala lexe, “Tamitema ivikala lexe anu ane so Kalaisiti la ilusunu Teviti. Axova so ivikala axone?

⁴² Xo no anu Lexelexe la Teviti mukaukavunu vaikala aloxo 'o, 'Tatananenge muvikalanu Tatanaleli lexe, “Nini natalupexa no avolo tema.

⁴³ Natalupexa ne xo mo eni apilixine'i tauluameni no laxene so namaloxo'a.”

⁴⁴ La Teviti molu mulemolu Itema ane Mosinge musosovosou ne lexe Tatananu. Laso vote'i axova so Tatananu Teviti ne anu muxali ilusunu?”

Iesua mupela'axu ilixo noxi'a tamitema so lavulavu no anu lavuloto

⁴⁵ Xe tamitema latala a ilolomu noxou Iesuasio la anu muvikalane'i tatisaipeliou aloxo 'o,

⁴⁶ “Ngingi masi ngalaxa'i laixe noxi'a tamitema so lavulavu no anu lavuloto. Ane'i ilavusou imulaxu lavuluti lailaixe so ixixao no loxoloxomala mo so tamitema itaxane'i mo ivikala kakau aso noxi'a. Xe no anu tatasou lavuloto la ane'i italupexa no anu lu u'uli. O loxo no anu la'ilali la imasaxau tanixa'a tatiatilasi.

⁴⁷ Mo loxo sema vile mulue usoli la i'oxo loloxe so isalimunu tasie, ia lamolisou la ane'i me'a ino'u. Mo itoxa'a no anu lakilaka so ivikala veveni musuku. Tamitema axone, no voxo loxo Mosinge utilovo mo ukolinu ili'ilixo la itavulenu tu'umaxusou ilixo noxi'a u'oki avile.”