Luku 2 - Ata New Testament

Malia mivo'onu ilie Iesua

¹ No voxo ne la Sisa Oxasitusi mu'oxonu voto vile mo mukalanu mulai no tuatula ane mu'uli laxunu ne. Mu'oxo lexe i'oxonu senisisi mo ino'u ualaualasi'a tatemanu mukalusi.

² Anene alaxu tei so mi'oxonu senisisi no voxo loxo Kuiniliusi muxolu tatila no anu xamani no anu polovinisi ne Silia.

³ Laso tamitema latala a mililivu no anu tuatualasi'a u'isalili mo so taxamani ino'u ualaualasi'a.

⁴ Ioxe, Iosepu kalumo mulutu so ulivu no tualasou. Anu ilusunu Teviti xo anu so laili noxou u'isalili laso mulutu no tuala Nasaleti ne Xalili e muxolu no anu ne. Mulutu la mulai no tualasou ane Peteliemu ne Iutea xo anene tuala noxou Teviti.

⁵ Iosepu mulai, la olie sema misosovosie lexe noxou e Malia milai so taxamani ikaukavunu ualasi'a. La no voxo anene Malia opone.

⁶ Ilou a mixoxolu ne Petelie­musio sila voxo so Malia ivo'onu ilie muxali.

⁷ Laso no voxo anene mivo'onu ilie anu laposa­laxu. Mivo'onu mukalu la misu'a­sou no anu lavalava mo miaisou no anu lusou la'ilalixa'a takau. Ane'i a mixolu no anu ngiou noxi'a tami­soposi axone xo tasi'a tami­tema taasila a mua'anana, mole tanixa'a nonano uasisi.

Ta'angelo milaixu vaikala lamana noxi'a tamitema so isaxila'a tasipisipi

⁸ Ioxe, no apu ne tamitema se'i so isaxila'a tasipisipi. La mixolu noale va'axu no taoni no olovoxo ne so isaxila'a tasipisipi no laxalaxalasi.

⁹ Mixolu sila angelou Tatananenge muxali no laxune'i. Muxali la Tatananenge iaxu mutalo no pa'upa'ume'a sika tane'i kalaua misevile.

¹⁰ Ia angelo ne muvi­kalane'i aloxo 'o, “Nga'ume uasi, ngalomu. Eni ene'enu a'alo laixe no anu mi vile so osa'ila tatila noxi'a tamitema mukalusi 'o.

¹¹ Xo no anu taoni noxou Teviti la sema vile mivo'o mo ilie ne anu so upamau­lingengi. Anu ane Mosinge muso­so­vosou so Kalaisiti mo anu Tatananenge ane.

¹² La alemolu sosovo so ngatongonu aloxo 'o. Ngingi ngamaisou keakea ne misu'asou no anu lavalava mo miaisou no anu lusou la'ilalixa'a takau.”

¹³ Angelo ne muvikala mukalu sila alaxu vilesisi ta'angelo so tualasou Mosinge tavu'alo e tavu'alo mipa kalumo. Mipa la milexenu lexe so i'itinu Mosinge ualasou. Milexe aloxo 'o,

¹⁴ “Ta'itinu ualasou Mosinge e uxoxolu teitexi avile. Xe noxi'a tamitema no lialia ane Mosinge u'osasi'a la ixolu lalavu­lusi.”

Tamitema so isaxila'a tasipisipi milai so imaisou Iesua

¹⁵ Ioxe, ta'angelo mixexesi'a so milivu no tualasou Mosinge muka­lu la tamitema so isaxila'a tasipi­sipi mi'oxo lexe, “Ioxe, nenge tapalea talai ne Peteliemu mo tamaisou mi ma'ia muxali a loxo Tatananenge mupela'ingexu 'o.”

¹⁶ Laso ane'i milutu palea milai xo xe milavu­si'ae laso mixalisi'a Malia ilou Iosepu. Mo mimaisou keakea a muai no lusou la'ilalixa'a takau.

¹⁷ Ane'i mimaisou mukalu laso mipala'anixu vaikala ane angelo mulemolu so molomolo ne noxi'a.

¹⁸ Xe noxi'a ane'i mukalusi ane milomusou vaikalai'a tamitema so isaxila'a tasipisipi ne la tane'ililiou manina.

¹⁹ Ia noxie Malia la mikasou vaikala ne no opone mo mimolo taneousi.

²⁰ Xe no anu lailivu noxi'a tamitema so isaxila'a tasipisipi la milalai mo mi'itinu Mosinge ualasousi. Milemolu osa noxou Mosinge xo mimi e milomu­sou mo mimaisou la muxali mu'isa­lili a loxo angelo mupela'axusi.

Ane'i milosou uala noxou Iesua

²¹ Ioxe, muvo'o mo muxolu xo xe voxosou 8-soui, la ane'i mixotonu vasimolu mo milemolu ualasou Iesua. Uala ne angelo mulemolu lumamo mi ne muxolu noxie nenu opone uaosio.

Simioni olie Ana misaxisou Iesua no tasou Mosinge

²² Xe mune'e la Iosepu olie Malia mixolu mimulinu lo noxou Mosisi so lexe lavulo'o ukalu la ixali malemalengala axova. Laso mixolu xo xe voxo loxo lo mulemolu mukalui la milaixu keakea ne Ielusalemo so ipilixinu xoluxoluxu noxou Tatananenge.

²³ Xo mimu­linu lo noxou Tatananenge ane vaikalaou mulemolu aloxo 'o, “Loxo sema ivo'onu ilie ane tei xe mulu, la molomolo ne ngakalipa­lanu lexe noxou Mosinge mu'isa­lili.”

²⁴ Xe ilou mino'a tangiala so i'oxonu ilixo so navu a loxo ule­molu no anu lo noxou Tatana­nenge aloxo 'o, “Tangiala utu tamei o tangiala sovu tamaulu tamei.”

²⁵ La no voxo anene itema vile a muxolu ne Ielusalemo ne, ualasou lexe Simioni. Anu xoluxolu noxou mulapusi mo oponu mututuluou masaxa noxou Mosingesi. Anu muxoxomaiou itema Mosinge musosovosou so uaisou tane'i Ta'isilaeli. La no voxo ne Ulenu Laixe a mupamuxanu Simioni ne.

²⁶ Mo Ulenu Laixe mupela'u lexe usoli tei uasi, uxolu xo mo umaisou itema e Tatananenge musosovosou so Kalaisiti uxalio.

²⁷ Ulenu laixe a mupamuxanu la mu'unalai muxolu no tasou Mosinge. Muxolu la keakea Iesua nenu ilou momu mine'enu noxou Simioni so umulinu ilixo noxou a loxo lo mulemolu.

²⁸ La Simioni mivo'onu no avolu mo muvikala laixe noxou Mosinge aloxo 'o,

²⁹ “Tatananexi, anu umomomo so napilixileli amitema so xaixai noxine 'o alaisi, xo opoleli uai lalavulusi a. Anu muxali aloxo nini nelemolu.

³⁰ Vote'i e ne'oxonu so tapamauli no anu, a emaisou no ieli 'oe.

³¹ Vote'i nelalaxinu ne anu upala'a no ie'i tamitema mukalusi.

³² Xo anu lalamo so upela'a tamitema noale'ale, xe anu so u'itinu ualasi'a tamitemameni Ta'isilaeli.”

³³ Simioni muvikalasou keakea axone xe Iosepu olie keakea nenu milomusou la mikisikula manina.

³⁴ Mukalu la Simioni muvikala laixe so xoluxoluxa'a mo muvika­lane keakea nenu Malia aloxo 'o, “Nalomu, noxou molomolo soxu e Mosinge musosovosou 'o la Ta'isi­laeli tavu'alo ixalisou mamulo xe tavu'alo ixalisou pamauli. Mosinge musosovosou ia ane'i latala ixili­liou.

³⁵ Ixililiou laso maixene mi e uxolu no opone'i ne upala'asi. Ia noxine la naxamulinu navunavu a loxo laviso so oto uto'omolu e'eneni avile.”

³⁶ Ioxe sema aululu vile so pela'a ualasie lexe Ana a mixolu. Ane Vanueli olu no anu laili noxou Asa. Tei ane mitaula'i mo ilou mulue mixolu tau ie 7.

³⁷ Mukalu la anu musoli ia ane mixolusi xo mo tau iexe muxali 84 'o. La Ana ne mixoxolu no tasou Mosinge, ilai noalela uasi. Mixolu opone mutuluou mimi noxou Mosingesi la utotomu i'apixe no anu la'ilali mo mivivikala noxou Mosinge.

³⁸ La no voxo ne ane kalumo mine'e misaxisou keakea laso mivi­kala laixe noxou Mosinge. La mia'a'aloxu noxi'a tamitema ta'ei ane mixoxomaiou voxo so Mosinge upamauline'i tatemanu taoni ne Ielusalemo.

Iosepuena milivu milai ne Nasaleti

³⁹ Ioxe, Iosepu olie Malia mimu­linu mimi mukalusi aloxo lo muvikalasou xe mukalui la milivu milai no xale lia ne Xalili mo mixali avile no tualasi'a ne Nasaleti.

⁴⁰ Xe molomolo muxo­xolu la vasimolu muleleme mo pakia'u xe lavulavuou mutatila la iaiama noxou Mosinge muxolu noxou.

Iesua tau iexu 12 ka mulai ne Ielusalemo

⁴¹ Xe no anu tautau ie utotomu ne momu olie nenu milavusou ilai ne Ielusalemo. Milailai utotomu axone so i'oxonu lavilelu so Mosinge Mualasi'a.

⁴² Xe Iesua tau iexu 12 mukalu laso anu kalumo oli'a milai ne Ielusalemo so imulinu ilixo noxi'a mo isosovosou voxo tatila ne.

⁴³ Xe voxosou la'ilali ne mukalu la momu olie nenu milutu so ilivu no tuala. Ia anu maulu soxu Iesua ne anu muxolu ne Ielusalemosio ia ane'i ilavusou to uasi.

⁴⁴ Ane'i ilou mikalavoi lexe anu a oli'a ikei ne la mimuamua'i voxo loloni mukalu. Xo xe no olovoxoe sila ilou mikamulinu no taine'i tamine­mine'i xe tamenexi'a.

⁴⁵ La ilou ikakamuli ikakamuli xo la ixalisou uasisi laso milivu milai ne Ielusa­lemo so lexe ixalisou ne.

⁴⁶ Ilou mixali ne Ielusalemo la mikaka­mu­linu xo mole voxo tatalu. Xe mukalui sila mixalisou muxolu no mataunaxu tasou Mosinge. La muxoxolu no taine'i tamitema so lavulavu no anu lavuloto ne mo a mulolomusou vaikalai'a xe mutata­li'i­si'axu.

⁴⁷ Io anu kalumo muko­linu tali'i noxi'a la ane'i mikuluke mo tane'ilili no anu lavulavuou.

⁴⁸ Xe momu olie nenu mimaisou ne la ane'i mikuluke manina mo nenu mivikalanu lexe, “Alixeli, aloxova so ne'oxonexi aloxo 'o? Nexi noxou mamine oponexi mutamasine xo tekakamulineni.”

⁴⁹ Ia anu muvikala lexe, “Xo ngingi ngekakamulileli so ma'ia? Ngingi ngalavu uasi lexe eni amulinu masaxa noxou Mamilo mo axolu no tasou?”

⁵⁰ Ia ane'i ilamana no anu vaikalaou laxu uasi.

⁵¹ Ioxe, laso anu oli'a milivu no tualasi'a ne Nasaleti la utotomu anu mumulinu vaikalai'a. Ia nenu mimolou taneou vaikalou ne.

⁵² Xe Iesua muxali maulu avile la lavulavuou mu'asi'asi manina. La Mosinge mu'osasou mo tamitema mi'osasou kalumo.