Luku 18 - Ata New Testament

Latilovo so sema miolotete noxou tiasi

¹ Ioxe mune'e la Iesua mu'oxonu latilovo so upela'a lexe anu laixe so ivikala noxou Mosinge utotomu, itotosa no anu uasi.

² La muvikala aloxo 'o, “No taoni vile la tiasi vile a muxolu. Anu ulavusou umama'u noxou Mosinge uasi mo utaxane'i tamitema malaxo uasi kalumo.

³ La sema vile mulue musoli a mixolu no tuala ne. Ane utotomu mine'e miuolotete noxou tiasi lexe u'oxo latolosie no anu lakoti xo uluaie vile utovonu so u'oxo masua noxie.

⁴ Loxo mivikala noxou tei la anu ulomuxe to uasi. Ia mine'e mine'e xo xe ili'i la muxavutala no oponu lexe, 'Manina, eni amama'u noxou Mosinge mo ataxane'i tamitema malaxo uasi kalumo.

⁵ Ia sema e mulue musoli ne inene'e noxilo iuolotete musuku. Laso eni asu'uline no anu lakoti xo masi ine'e utotomu aloxo 'o la kalakalaxo avile.'”

⁶ La Tatananenge muvikalane'ila lexe, “Tiasi ne ilixo noxou ulapu uasi, ia ngalomusou vaikalaou.

⁷ Loxo tamitema ane Mosinge musosovosi'a lexe tanoxou itatama noxou aso olovoxo utotomu so uutululune'i, la axova? Ulomuxa'a mo ukolinu tama noxi'a palea uasi?

⁸ Avikalangengi lexe ulomuxa'a alaxu vilesisi. Ia loxova, loxo Itema ane molu noxou Mosinge uxali no lialia la umaisou lopala noxi'a tatemanu uxolu o uasi?

Latilovo so Palisi ilou itema so utaxusou taxisi

⁹ Iesua mu'oxonu latilovo vile so upela'a tamitema ane'i ane ikalavoi lexe ane'i talapusi ia tamenexi'a uasi. Muvikala aloxo 'o,

¹⁰ “Tami­tema tamei milai no tasou Mosinge so ivikala ulai noxou. Vile ne anu Palisi xe vile ne anu itema so utaxusou taxisi.

¹¹ La anu Palisi ne mutulu mo muvikala lexe, 'Mosilo, eni avikala laixe noxine xo eni loxo tamitema se'i uasi. Eni loxo tamitema ane ipakali o i'oxo ilixo masumasua o ilailai noxi'a tasema vitanisi uasi. Mo eni loxo itema so utaxusou taxisi e utulu olele uasi.

¹² Mo eni utotomu asosovosou voxo tamei no anu viki vile so a'apixo no anu la'ilali. Xe loxo ano'u lamoli o mi ma'ia la eni alavusou alosine pa'usou no anu 10.'

¹³ Ia itema ane so utaxusou taxisi ne mutulu va'axu sevile. Anu utala utelai uasi mutulu mutangatulusi. La mu'otonu lutunu so umaxa'u mama'u mo muvikala lexe, 'Uo Mosilo, eni amitema so susu a. Nini naiaiama noxilo mo nalosilo lakolisou susu uasi.'”

¹⁴ La Iesua muvikala lexe, “Itema ane so utaxusou taxisi mulivu no tani. Mo eni avikalangengi lexe no voxo anene la anu muxali itema mulapu no iou Mosinge. Ia Palisi ne uasi manina. Xo aloxo 'o, itema ena'ei molu u'itinu, la Mosinge ulu'enu ane. Xe itema ena'ei anu molu ulu'enu, la Mosinge u'itinusi.”

Iesua muvikala lexe ipilixine'i tamolomolo ine'e noxou

¹⁵ Ioxe, ili'i la tamitema mine'ene'i ta'ili'a noxou Iesua so anu umalaxu avolu no kisi'a. La ane'i se'i ne takeakeasio. Mine'ene'i ia tatisaipeliou milavixa'a mo mi'a­pixa'a.

¹⁶ Xe Iesua mumaisi'a tatisaipeliou lexe mi'oxo axone laso mu'avali'a tamolomo io muvikalane'i tatisaipeli lexe, “Nga'italone'i tamolomolo ine'e­ne'e noxilo, nga'apixa'a uasi. Xo no voxo olele la tamitema ane Mosinge molu u'uli laxune'i la ane'i so loxo tamolomolo ano'o.

¹⁷ Xo avikala manina aloxo 'o. Tamolomolo ano'o ilopalane'i uasi, ipilixine'isi. Ioxe, loxo itema vile ulopala mo upilixinu axone uasi la no voxo so Mosinge molu u'uli laxune'i tamitemaou la anu itema anene uxolu nonano to uasi.”

Tatila vile lamolamolixu muvikala noxou Iesua

¹⁸ La tatila vile mune'e mutali'isou Iesua aloxo 'o, “Tisa laixeo, eni a'oxonu mi ma'i so axalisou mauli kaluxu uasi?”

¹⁹ La Iesua muko­linu lexe, “Loxova so nelemelo lexe eni a laixe a? Mosinge anusisi laixe.

²⁰ Nini nalavusou lo noxou Mosinge aloxo 'o. Mamu so nalailai noxi'a tasema vitanisi, xe mamu so navau itema usoli xe mamu so napakali xe mamu so nakalavoi no anu lakoti, xe nataxane'i mamine olie nenine.”

²¹ La anu mukolinu lexe, “A eni amolomoloxo mo mune'e muxali vaimomo 'o ne emulinu lo anene mukalusi.”

²² Iesua mulomusou vaikalaou ne la muvikalanu lexe, “Mi vile na'oxonu uao. Nalai nasalimunu mimimeni mukalusi xe lamolisou, la naitii'a tamitema ane lamolixa'a uasi. Laso axone la naxalisou mimi lailaixe no tualasou Mosinge. Naitii'a ukalu la nane'e namulileli.”

²³ Itema ne mulomusou Iesua vaikalaou la oponu tu'umaxu xo anu mimiou tavu'alo mo oponu no anu anenesi.

²⁴ Xe Iesua iou mumulinu tatila ne la muvikala lexe, “Ai ialuxu manina noxi'a tamitema mimii'a tavu'alo. Ialuxu so i'una ixolu no voxo so Mosinge molu u'uli laxune'i tami­temaou.

²⁵ Loxo kameli utovonu so u'unalai no anu lalili so sumapi taxanu la ta'oxo lexe, 'Uo umo­momo uasi ane.' Ia loxo itema e mimiou tavu'alo xavinuou so u'una uxolu no voxo so Mosinge molu u'uli laxune'i tamitemaou la umo­momo uasi e uasisi manina.”

²⁶ Xe tamitema ane milomusou muvikala axone la mikuluke mo mivikala lexe, “Iauo, laso ena'ei umomomo so uxalisou pamauli?”

²⁷ La Iesua muvikala lexe, “Mimi ane tamitema imomomo no anu uasi la Mosinge mumomomo no anu ane.”

²⁸ La Pita muvikalanu lexe, “Xo namalei, nexi tepilixinu tualasixe mo mimimexi mukalu, ka temu­lineni 'osi.”

²⁹ La Iesua mukolinu lexe, “Eni avikalangengi manina aloxo 'o. Itema aneva oponu ututuluou voxo so Mosinge molu u'uli laxune'i tamitemaou xe u'umesou tualasou mo semau mo tavimovimou mo momu olie nenu mo ta'olu, la uxalisou nene'axu aloxo 'o.

³⁰ No anu voxovoxo vaimomo 'o xe no anu ane une'e ili'i la itema ne uxalisou lakolisou upita no latanu mo uua'ulixu avile ane mupilixinu ne. Xe kalumo la itema ne uxalisou mauli kaluxu uasi.”

Alaxu tatalusou ane Iesua mupela'a lexe usoli ka utulula

³¹ Xe ili'i la Iesua muno'a tatisaipeliou 12 milai va'axu sevile ka muvikalane'i aloxo 'o, “Ngalomu, nenge'a tatelai ne Ielusalemo 'oe. La vaikalai'a tapolopeti e mikau­kavunu tatei so lexe mi ma'ia uxalisou Itema ane molu noxou Mosinge anu uxalixu nene'axu ane.

³² Xo ane'i ipilixinu no avo'a tamitema noale'ale. Laso ane'i imolo sukusou xe i'oxonu masua mo ituvesou.

³³ La ane'i ipuasou mo ivau usoli ia no anu voxo tatalusou la utulu umaulila.”

³⁴ Muvi­kalane'i tatisaipeliou axone ia ilavusou laxu to uasi xo vaikalaou laxu mutalumexa'a mo ilamana no anu uasi.

Iesua mupaipounu itema vile iou mutomu

³⁵ Ioxe, Iesua mulutu xo xe muxali alai no taoni ne Ieliko la itema vile iou mutomu a muxolu no vote'i pa'umolu so ulingalinga noxi'a tamitema.

³⁶ Xe muxolu la mulomusi'a tamitema latala a inene'e laso mutali'isi'a leviani lexe, “Ane'i inanava to ne?”

³⁷ La ane'i mivikalanu lexe, “A Iesua so Nasaleti a unene'e 'o.”

³⁸ Laso anu musoko'u so u'ava tatila lexe, “Iesua nini ilusunu Tevitio, naiaiama noxilo.”

³⁹ La tamitema e mimuamua'i mine'e la milavixu lexe utalo mo uxolu tasiausi. Ia ava noxou mutilala so muvikala lexe, “Teviti ilusunu naiaiama noxilo.”

⁴⁰ Iesua mune'e sila mutulu mo muvikalane'i tamitema lexe ine'enu itema ne noxou. Ioxe, mixalixu noxou la mutali'isou aloxo 'o,

⁴¹ “Nemasaxau lexe eni a'oxonu mi ma'ia noxine?” La anu mukolinu lexe, “Tatilao, eni amasaxau lexe amaleila.”

⁴² La Iesua muvikalanu lexe, “Ieni ukasi. Nini nelopala laso maixeni laixenenisi.”

⁴³ Sila alaxu vilesisi iou lamanasi mo mumulinu Iesua mulai la mu'iti'itinu Mosinge ualasou. Xe tamitema latala mimaisou mi ne la ane'i kalumo mi'iti'itinu Mosinge ualasou.