Luku 17 - Ata New Testament

Pelototo so lexe oponenge axova no anu susu

¹ La Iesua muvikalane'i tatisai­peliou lexe, “Anu manina so mimi uxali so ngatulatulaki no anu. Ia masua noxou itema aneva uxalixu tulaki mo upalusi'a tamenexu no anu susu axone.

² Xo loxo tamitema isakinu lavo'o toxoxu ulili no limilaxu ka isu'anu no luaki xe uuo'uo la anu loxo mi vitanisi ane. Ia loxo Mosinge ukolinu susu noxou ne la tu'umaxu e tu'umaxu manina.

³ Ngalaxa'i laixe. Loxo vivine ususu la navikala pakia'u so nalovonixu ilixo noxou. Xe loxo uxiunu oponu mo u'isalilinoxu la oponeni ulu'e so susu noxou.

⁴ Mo loxo ususunixine alaxu 7 no aso vile xe une'e ulu'enu noxine no anu susu noxou alaxu 7 la utotomu oponeni ulu'e noxousi.”

Iesua muvikala lamana so lopala

⁵ Ioxe, ili'i la ta'aposeli mivikalanu Tatananenge lexe, “Na'oxonu lopala noxixe utiatila.”

⁶ La Tatananenge mukoline'i aloxo 'o, “Loxo lopala manina uxolu noxinge ia isusu'a se a loxo masiteti ngiaxu la mi vile uasi. Axone la umomomo so ngavika­lanu ovu 'o lexe uluvu mo ulai utulu no luaki, la anu ulomusi ane.”

Loxo uokuvoi u'oxonu xaixai noxou la u'itinu axova?

⁷ Xe musolonu aloxo 'ola, “Loxo nini vile navikalanu voimeni so ulai umamulonu lia no xai o so usaxila'a tasipisipi. Xe loxo ulivu uxali no tani la axova? Nini tatilasou navikalanu lexe upalea une'e uxolu mo u'ani? Umomomo so navikalanu axone?

⁸ Uasi to! Nini masi navikalanu lexe, 'Nalalaxinu enixo la'ilali xe ukalu la nasakinu lavuluti laixe so navelunu la'ilali une'e noxilo. Ioxe axolu a'ani mo aie xo xe ukalui laso ane, nini na'ani mo naie ili'i.'

⁹ Mo axova, tilasou ulavusou uvikala laixe noxou uokuvoiou loxo ulomuxu vaikalaousi? Uasi manina!

¹⁰ Laso ngingi kalumo loxo nga'oxonu mimi mukalusi ane Mosinge mupalusingexu la laixe loxo ngavikalasinge aloxo 'o, 'Nenge tauokuvoi vitanisi a. Nenge ta'oxonu mi vile laixe so tano'u uala no anu uasi. Te'oxonu xaixai ane mu'isalili noxingesi.'”

Iesua mupaipoune'i tamitema 10 so siki lepelesi

¹¹ Ioxe, ili'i la Iesua mumulinu vote'i so ulai Ielusalemo la mupolo no tainu xale lia ne Samalia xe ne Xalili.

¹² Mulai xe muxali no tuala vile la tamitema 10 so siki lepelesi mine'e mialaxu no vote'i ia mitulu nopaxasi.

¹³ Mitulu nopaxa la mi'ava mune'e noxou lexe, “Iesuao. Tilasixeo, na'ulaunasixe!”

¹⁴ La Iesua mumaisi'a mo muvikalane'i lexe, “Ngingi ngalai ngamaxa'u vasimenge noxi'a tapilisiti.” Laso ane'i a imuamua'i ilalai sila siki muxexesi'a mo vasime'a muxali malemalengasi.

¹⁵ Xe vile no taine'i mumalei lexe vasimolu a laixenui laso mulivu noxou mo mu'ava'ava so mu'itinu Mosinge ualasou.

¹⁶ Anu mulivu xe muxali la mulalusi no tava'u Iesua so muvikala laixe noxou. Itema ne anu so Samalia.

¹⁷ Xe Iesua muvikalanu lexe, “Ai, tamitema 10 mixali malemalenga, ne? Ia ane'i 9 avae?

¹⁸ Axova, vilela ulivu une'e so u'itinu Mosinge ualasou uasi? Itema ano'osi so tuala va'axu mo, ne?”

¹⁹ Laso Iesua muvikalanu itema ne lexe, “Natulu mo nalai. Nini nelopala, laso maixene laixeneni 'o.”

Itema ane molu noxou Mosinge upala'a avile ili'i

²⁰ Xe mune'e la Tapalisi mitali'isou Iesua lexe voxo so Mosinge molu u'uli laxune'i tamitemaou uxali a talu. La Iesua mukoline'i aloxo 'o, “Voxo so Mosinge molu u'uli laxune'i tamitemaou une'e la sosovo vile uxali so upala'anixu no ie'i tamitema uasi.

²¹ Ane'i vote'i uasi so ivikala lexe, 'Ngamalei, anu ano'o!' o 'Anu a olele!'. Xo ngalomu, voxo so Mosinge molu u'uli laxungengi a muxali mo uxolu no taingengi 'oe.”

²² La muvikalane'i tatisaipeli lexe, “Ili'i la opongengi utatama manina so ngamaisou voxo vile noxou Itema ane molu noxou Mosinge, ia ngasaxisou uasi.

²³ La ane'i se'i masi ivikalangengi lexe, 'Ngamalei olele. E uasi, ngamalei 'o.' Ia ngalomuxa'a so ngaxexe o so ngamuline'i uasi.

²⁴ Xo ngelavu, lele'e lamixu upisikei no loxotolo ulutu no apu vile so ulai no apu vile. La anu Itema ane molu noxou Mosinge upala'a axone no anu voxosou loxo uxali.

²⁵ Ia tei la anu utavulenu tu'umaxu tavu'alo mo tamitema so laili vaimomo 'o ixiunu tumali'aou.

²⁶ Xo ili'ixone'i tamitema mi'o­xonu no voxo loxo Noa muxolu la anu iou vilesisi no anu voxo so Itema ane molu noxou Mosinge a uxoxolu 'o.

²⁷ Xo ane'i tatei ne mixolu mi'ani'ani mo miie mo mitataula'i xo mo mumomomo no anu voxo loxo Noa mu'unalai no lasipi. Sixe anipa toxoxu muxali sika mumamulone'i tamitema ne mikalu avile.

²⁸ Mo anu axone no voxo loxo Loti muxoxolu kalumo. Xo ane'i mixolu mi'ani'ani mo miie xe milotoloto mo mimaketi xe itotou no xai mo mitutulu tanitani.

²⁹ Sixe Loti muxexesou tuala ne Sotomu la no voxo anenesi navu ilou lavo'o axexaxu mulapau mulu'e a loxo uali 'o sika tatemanu mimamulo mukalusi.

³⁰ Laso ane, anu uxali iou vilesisi no voxo loxo Itema ane molu noxou Mosinge upala'a.

³¹ La no voxo anene itema loxo uxolu no laxa'u tani ulu'e uno'u mimiou nonano no tanila uasi. Xe itema uxolu no xai la ulivu so ulai no tanila uasi.

³² Xe ngaxavu­talanu mi e muxali noxie Loti semau.

³³ Xo aloxo 'o. Loxo itema vile u'apisou maulixu lexe noxou­mo, la maulixu usu'a vitanisi ane. Ia loxo upilixinu maulixu lexe noxou la uasi, la anu upapunu uasi ane, maulixu uxolu laixesi.

³⁴ Mo avikalangengixu voxo so Itema ane molu noxou Mosinge une'e ili'i la aloxo 'o. Masi loxo olovoxo xe tamitema tamei iai ivila'o la uno'u vile ia vile la uaisi.

³⁵ O loxo tasema tamei ixolu tanixa'a vilesisi so imamulonu uiti ngiaxu so palaua la uno'e vile ia vile la ixolu ane.

³⁶ O loxo tamitema tamei ixolu no xai la uno'u vile xe vile uxolusi.”

³⁷ Muvikala axone xe tatisaipeli milomu la mitali'isou lexe, “Tatanenexi, mimi anene uxali a ne'ei?” La Iesua mukoline'i lexe, “No anu tanixu loxo tamitema vasime'a usoli uta'olu no anu la ane'i tangiala ta'ola ipita no anu kalumo.”