Luku 14 - Ata New Testament

Iesua mupaipounu itema vile vasimolu musoxosoxo

¹ Ioxe, mune'e no anu Voxo so Ma'ila vilela la Iesua mulai mu'ani no anu tasou tila vile noxi'a Tapalisi. Xe ane'i tamitema mixolu miutitiou laixe.

² La anu itema vile vasimolu musoxosoxo muxolu alai noxou Iesua.

³ Laso Iesua mutali'isi'a tamitema so lavulavu no anu lavuloto oli'a Tapalisi lexe, “Loxo tapaipounu itema no anu Voxo so Ma'ila la anene uxola'u lavuloto o uasi?”

⁴ Mutali'i axone ia ikoli to uasi, mixolu tasiausi. Laso anu muno'u itema ne mo mupaipounu sika mupalusou mulaisi.

⁵ Mukalu la anu mutali'i­si'a tatiatila ne aloxo 'ola, “Loxo vile noxinge ngamaisou ilinge o kaumengi upatolo no taxasou lexa no anu Voxo so Ma'ila la nganava? Umomomo so ngalapunu utelo no voxo anene u'isalili uasi?”

⁶ La ane'i imomomo so ikolinu vaika­laou ne uasisi.

Iesua mupelototo lexe tamitema ilu'ene'isi

⁷ Ioxe, Iesua mumaisi'a tamitema latala ane mosou tani muali'a so ine'e no anu la'ilali anene la ipalea itovonu so lexe ta'ei italupexa no anu tanitanixa'a tatiatila. Mumai­sou axone laso anu mulemolu latilovo noxi'a aloxo 'o.

⁸ “Loxo itema ualine so nane'e no anu la'ilali so taula'i la nalai avile so natalupexa no anu tanixa'a tatatila uasi. Xo loxo 'o io musosovosou tanixu ne noxou itema vile mualiou ane ualasou uua'ulixu noxine.

⁹ Laso itema mualinge ne masi une'e uvikalaneni lexe, 'Naxexesou, xo itema 'o tanixu ane.' La natavulenu maila so naxe­xesou ka nalai naxolu no tanixu vitanisi va'axu.

¹⁰ Laso loxo itema ualinexu lavilelu la nalai naxolu no tanixu vitanisi va'axu. Mo so axone la mosou masi une'e u'avaline lexe, 'Maula soxu 'o, nane'e no anu tanixu alai noxilo 'o.' U'oxo axone laso tamitema ngoli'a nga'ani ne itaxanenixu ane.

¹¹ Itema loxo molu u'itinu la anu ulu'e ane. Ia itema loxo molu ulu'enu la uxolu u'uli ane.”

Ta'oxo laixe noxi'a ane'i ane vote'i so ikolinu uasi

¹² La Iesua muvikalanu itema e mu'avalou so oli'a i'ani ne aloxo 'o, “Loxo na'oxonu la'ilali la na'avali'a tamenexinge o tavivinge o tatu­laneni o tamitema so lamoli no pa'upa'umene uasi. Xo loxo 'o io ikolinu la i'avaline so ngoli'a nga'ani no tatasi'a.

¹³ Na'oxo axone uasi, na'oxo aloxo 'o. Loxo na'oxonu la'ilali la naali'a tamitema ane ta'oloxola xe ane'i ane vasime'a ukaupe mo tava'a ukilikalu xe ane'i ane ie'i selevenu.

¹⁴ Xo tamitema kaini aloxo 'o ane'i vote'i so ikolineni uasi. Laso anu uxali laixe noxine xo ili'i no voxo so Mosinge utulusi'a tamitema talapu no anu soli la molu ulosine lakolisou.”

Latilovo so itema mualai'a tamitema ta'oloxolasi ine'e no anu lavilelu

¹⁵ Ioxe, la itema vile oli'a Iesua mitalupexa so i'ani no latevolo mulomusou vaikalaou ne la muvikala lexe, “Anu laixe manina noxi'a tamitema mukalusi ane ixolu nonano mo i'ani'ani no anu voxo so Mosinge molu u'uli laxune'i tamitemaou.”

¹⁶ Ia Iesua mukolinu mo mu'oxonu latilovo aloxo 'o, “Itema vile mulalaxi so u'oxonu lavi­lelu la muali'a tamitema tavu'alo so ine'ene'e no anu.

¹⁷ Ioxe, no anu voxo loxo muso­vosou la anu mupalusou itema so xaixai noxou so ulai uvikala lamana noxi'a tamitema e muali'a tei. La muvikalane'i lexe, 'Nga­ne'ene'e xo mimi mulalaxi muka­lu.'

¹⁸ Ia ane'i mukalusi milemolu mimi se'i e mutanutanuxa'a so imomomo ilai uasi. La vile muvikalanu lexe, 'O eni asole ia umomomo so ane'e uasi xo eni elotonu lia sevile mo eni a so alai akililou 'oe.'

¹⁹ Xe vile la muvikala lexe, 'O eni asole ia umomomo so ane'e uasi xo eni elotone'i takau 10 mo eni a so alai atovone'i no anu xaixai.'

²⁰ Xe noxou vile la muvikala lexe, 'O eni asole ia umomomo so ane'e uasi xo eni a etaula'i alavu'a 'osi.'

²¹ Ioxe, itema so xaixai mulivu la mua'alou tilasou no anu vaikalai'a tamitema ne. Sila la'iaxu la muvikalanu itema so xaixai noxou aloxo 'o, 'Napalea nalai no vote'i tiatila xe vote'i avo'avolu no taoni 'o mo na'avali'a tamitema ta'olo­xola xe ane'i ane vasime'a mukaupe xe ane'i ane ie'i selevenu xe ane'i ane tava'a mukilikalu.'

²² Ioxe, itema so xaixai mulai xo xe mulivu mune'e la muvikalanu lexe, 'Tilao, e'oxo loxo nelemolu mukalu. E'avali'a tamitema anene mo a mi'una ia tanitanixa'a tamitema se'i a uxolusio.

²³ La anu tilasou muvikalanu lexe, 'Nini nalai noale no anu taoni ka namulinu vote'i aiue xe votevote'i se so xai. Xe naxalisi'a tamitema se'i ne'ei la nalapune'i no anu vaikala lexe ine'e no anu lavilelu mo so tasilo 'o uana'anasi.

²⁴ Ia avikalaneni manina lexe tamitema e eali'a tei ne imomomo uasi manina so ino'u la'ilali sevile noxilo 'o.'”

Itema loxo umulinu Iesua la ulalaxinu oponu laixe tei

²⁵ Ioxe, ili'i la Iesua mumuamua'i mulai la oli'a tamitema tavu'alo kena. La anu muxiu muvikalane'i lexe,

²⁶ “Loxo itema une'e noxilo ia umatapiane'i momu xe nenu xe semau xe ta'olu xe tavimovimou mo mauli noxou kalumo uasi, la anu umomomo so uxali tisaipelixeli uasi.

²⁷ Xe itema ane oponu u'osa uasi so utavulenu ovu valautu noxou so usoli no anu la umomomo so uxali tisaipelixeli uasi.

²⁸ Aloxo 'o. Loxo itema vile umasaxau utulusou tani vile tatila la anu uxavutala laixe teio. Uxavutala lexe masi lamolisou tani ne ta'eimo, xe ukalu la u'itisou lamoliou lexe umomomo so usivitanoxu avile o uasi.

²⁹ Xo loxo uasi, la masi usoko'u tani tava'u ia lamoli umomomo so ukalusou uasi. Xe tamitema imaisou tani uxolu pa'usousi la imolo sukusou to.

³⁰ La ivikala lexe, 'Uo, itema ne musoko'u tani ia umomomo so usivitanoxu avile to uasi.'

³¹ Mo aloxo 'ola. Loxo kingi vile a so ulai u'oto noxou kingi vile la anu masi uxavutala laixe tei lexe anu xavinu umomomo so u'otoxu o uasi. Xo noxou ta'amiou 10 tausenisi ia kingi olele masi ta'amiou 20 tauseni.

³² Xe loxo uxavutalanu mo ulavu lexe umomomo uasi la upalusi'a tamitemaou se'i so i'alaxa'a tauluaou mi ne ixolu nopaxasio. I'alaxa'a mo ikamulinu vote'i so isolixu tava'u oto'oto noxi'a.

³³ Laso anu axone. Loxo vile noxinge uxiunu tumalou no anu mimiou tei uasi la anu umomomo so uxali tisaipelixeli uasi.

Latilovosou au loxo tu'axu la uasi

³⁴ Xe Iesua muvikala aloxo 'ola, “Au ne anu tu'axu laixe. Ia loxo mi u'oxonu mo tu'axu ukalu la vote'i so tu'axu axovala? E uasi manina.

³⁵ Axone la xaixaisou uasisi. Anu usu'ulinu lemexu xai uasi mo anu mi so tapitanu no anu kau ta'u ka tapei so xai to uasi. Au loxo tu'axu ukalu la usu'asi. Itema loxo sangalou la ulomuxu vaikala ano'o.”