Luku 13 - Ata New Testament

Ane'i ane ixiunu opone'i mo i'isalilinoxu uasi la imamulosi

¹ Ioxe, Iesua mulanu vaikala axone mukalu la tamitema se'i mia'alou no anu mi vile masua muxalisi'a Taxalili se'i. Ane'i a mixolu mive'ave'a tamisoposi so lexe noxou Mosinge. Mixolu sila Pailati mupalusi'a ta'amiou la mive'ave'a tamitema ne mole sialuxa'a munixi mo mupita no anu sialuxa'a tami­soposi.

² Mia'alou mukalu laso Iesua muvikalane'i lexe, “Xo ngingi ngexavutala lexe tamitema Taxalili ne susu noxi'a mutoxoxa'a no anu noxi'a Taxalili se'i, laso maixene mi masua ne muxalisi'a? Ne, xavuta­lamengi axone?

³ Uasi to, anene tava'u uasi. Ia avikalangengi lexe loxo ngingi ngaxiunu opongengi mo nga'isalilinoxu uasi, la ngingi ngamamulo axone kalumo.

⁴ O masi nga'oxo lexe tani e mutelai veveni ne Siloamu mulume la muatasi'a tamitema 18 xe misoli axone xo tina'uxa'a so susu muua'ulixu ane noxi'a Taielusa­lemo se'i, ne?

⁵ La uasisi, tava'u axone uasi. Ia avikalangengi lexe loxo ngingi ngaxiunu opongengi mo nga'isalilinoxu uasi, la ngingi ngamamulo axonesi.”

Latilovo so ovu viki unene'a uasi

⁶ La Iesua mu'oxonu latilovo aloxo 'o, Itema vile mutounu ovu viki vile no xai so uaini noxou. Mutonu muxolu xo xe ili'i la mune'e so umalei lexe unene'a. La uasi, nene'axu vile uasisi.

⁷ Laso anu muvikalanu itema so usaxila'u xaixu ne lexe, 'Ai nalomu. Tau ie tatalu ene'e so lexe ano'u temanu ovu ano'o ia axalisou vile uasi. Laso naxeta'u usu'asi xo utanuxu lia so xai vitanisi a.'

⁸ Ia anu mukolinu lexe, 'Tatilao, na'italonu uxolu no anu tau ie ano'osi. Xo amamulonu lia so tava'u xe apeinu kau ta'usou 'o.

⁹ Ioxe, loxo unene'a no anu tau ie u'uli 'o laso ane, uxolu. Ia loxo uasi la naxeta'u mo usu'asi.'”

Iesua mupaipoune sema vile no anu Voxo so Ma'ila

¹⁰ Ioxe, mune'e xe no Voxo so Ma'ila la Iesua muxolu muvoto­voto no anu tasou lavuloto vile.

¹¹ Sila sema vile e mixolu ne angelo masua mukasie mumo­momo no anu tau ie 18. Mukasie laso xine mulanga mo imomomo so itulu imexi uasi.

¹² Iesua mumaisie la mu'avalie mine'e noxou mo muvikalane lexe, “Sema 'o nini naxolu lalavulusi no anu siki noxine ne.”

¹³ Mukalu la anu mumulaxu avolu noxie sila alaxu vilesisi sema ne mitulu mimexi. La ane mi'iti'itinu Mosinge ualasousi.

¹⁴ Ia itema so usaxila'u tasou lavuloto ne la'iaxu so Iesua mupai­poune sema ne no anu Voxo so Ma'ila. La muvikalane'i tamitema latala lexe, “Anu voxo 6 so taxaxai no anu. Laso loxo ngamasaxau su'uli no anu siki noxinge la ngane'e no anu voxovoxo anenesi. Mamu so upaipoungengi no anu Voxo so Ma'ila.”

¹⁵ Ia Tatananenge mukolinu lexe, “Uo ngingi tamitema so kalavoi manina xo vaikalamengi la ngamulinu to uasi! Loxova, no anu Voxo so Ma'ila la ngingi ngalulusi'a takau oli'a tatonikimengi no anu tatasi'a mo ngalaixi'a so iie lexa uasi? Ngingi nga'oxo taxone!

¹⁶ Ngingi ngasu'uline'i tami vitanisi mo ane. Ia sema ano'o, ne Apala'amu ilusunu. Mo Uluaou mukasie mumomomo no anu tau ie 18 'oe. Laso axova, anu laixe so alulusie no anu mi e musakine no Voxo so Ma'ila 'o uasi?”

¹⁷ Anu muvikala axone la tamitema ane mixililiou ne mimaimaila kena. Ia ane'i tamitema latala mi'osasou manina no anu mimi lailaixe e mu'oxonu.

Latilovo so ovu masiteti ngiaxu xe isiti

¹⁸ Ioxe, mixolu la Iesua musolonu vaikalaou lexe, “Apela'ingexu voxo so Mosinge molu u'uli laxune'i tamitemaou axova? Atovonu lati­lovo vile aloxo 'o.

¹⁹ Itema vile muno'u ovu masiteti ngiaxu se ka mutapu'u no xaixu. Mutapu'u xo xe ili'i la masiteti muleme muxali ovu tatila e tatila. Laso tangiala mine'e mitulusou tasi'a no anu avo'avolu.”

²⁰ Xe muvikala aloxo 'ola, “A'oxonu latilovosou voxo so Mosinge molu u'uli laxune'i tamitemaou axovala? Aloxo 'o.

²¹ Sema vile mino'u isiti se ka miilanu ilou palaua latalamusou. Miilanu muka­lu xe muai sevile xo laso palaua loloni ne musoxo kena.”

Latilovo so aitenga kitua

²² Ioxe, Iesua mumuamua'i mulai xo la mumulinu vote'isou Ielusa­lemo la mupolo no tuatuala xe no taotaoni ka muvotone'i tamitema.

²³ Mulai xo xe itema vile mutali'i­sou lexe, “Tatilao, axova, Mosinge a upamauline'i tamitema tata'ei mososi?” La Iesua muko­linu lexe,

²⁴ “Ngingi xavingengi so nga'una­lai xo aitenga kitua sesi. Xo avikalangengi lexe tamitema tavu'alo imasaxau i'unalai ia imo­momo to uasi.

²⁵ Xe ili'i mosou tani utatusou aitenga la ngingi ngane'e ngatulu noale so ngapolo­polo mo ngavikala u'una lexe, 'Tatananexi, nakisinu aite­nga­­sixe.' La anu ukolingengi lexe, 'Eni alavusinge lexe ngingi so ne'ei to uasi.'

²⁶ La ngingi ngavikalanu lexe, 'A nexi e nenge'a te'ani mo taie a. Nexi ane nevotovo no loxo­malasixe a.'

²⁷ Ia anu uvikalangengi lexe, 'Uasi, loxo elemolu. Eni alavusinge lexe ngingi so apu ne'ei uasi. Ngingi mukalusi tamitema so ilixo masumasua, ngaxexesilosi mo ngalailai.'

²⁸ La no voxo anene ngamaisou lexe Mosinge molu u'uli laxune'i Apala'amu xe Aisaki xe Iakovo xe tapolopeti mukalusi. Ia ngingi la ukusainge ngaxolu noalesi mole ngatatama mo anangenge ukala­kikisi.

²⁹ Ia tamitema me'a no xale lia no anu isiti loxo aso uxali xe no anu uesiti loxo aso ulu'elai xe no anu noti xe no anu sauti. Ine'ene'e i'una so Mosinge molu u'uli laxune'i ka ixolu ipita i'ani'ani.

³⁰ Mo ngalomu, tamitema se'i vaimomo 'o ane'i iili'i manina ia ane'i ilai i'uli'uli ane. Xe se'i ane i'uli vaimomo 'o la ilai iili'i manina”

Iesua tanuxu Ielusalemo mo mutamasou

³¹ Ioxe, no voxo anenesi la Tapa­lisi se'i mine'e la mivikalanu Iesua lexe, “Nini naxexesou tuala ano'o mo nalai no apu vile xo Eloti a umolo soli noxine.”

³² La Iesua muvi­kalane'i lexe, “Ngingi ngalai ngavikalanu a'a vova ne aloxo 'o. 'Nalomu, vaimomo xe ne'iela la akusai'a ta'angelo tamasua mo apaipoune'i tapipiena. Xe no anu voxo ualisa laso ane, axalisou mi e opoleli a ututuluou.'

³³ Ia vaimo­mo 'o xe ne'iela xe ualisa la eni amuamua'i alaisi. Xo umomomo so ivau polopeti no tuala vilemo uasi, ane'i ivau ne Ielusalemo u'isalilisi.

³⁴ O Ielusalemo, Ielusalemo. Nini nalavusou nave'ave'a tapolopeti isoisoli mo ane'i tamitemaou Mosinge ane upalusi'a ine'e noxine la napalexa'a no lavo'o so isoisoli. Alaxu tavu'alo emasaxau apitane'i ta'iline a loxo kokoa ipitane'i ta'ilie no laxu vivisie. Ia ane'i imasaxau to uasi.

³⁵ Laso ngingi tatemanu tuala ne ngalomu. Tualasinge umamulo mo uxolu vitanisi ane. Mo avikalangengi lexe ngingi ngamaisilo la uasi umomomo no anu voxo ili'i so ngavikala lexe, 'Mosinge u'oxo laixe noxou anu ane une'e no anu ualasou Tatana­nenge.'”