Luku 12 - Ata New Testament

Iesua muvikala lamana so lolo noxi'a Tapalisi

¹ Ioxe, mune'e la tamitema tavu'alo e tautauseni mipita mole tainu vile uasi, mimalomaloxo'asi. La Iesua muvikalane'i tatisaipeliou tei lexe, “Ngingi ngalaxa'i laixe no anu isiti noxi'a Tapalisi. A a'oxo latilovosou ilixo so lolo noxi'a to!

² Ia mimi ma'ia tamitema isilavunu la anu ulamanasi, xe mimi ma'ia italumeu la anu upala'asi.

³ Laso vaikala mukalusi ane e ngelomolu no isivoxo la tamitema ilomusou lamana no asosi. Xe vaikala ane ngemunumunusou no anu ngiou mupaila nonano no tani la tamitema ilomusou avasou molu no laxa'u tatani.”

Laixe so tamama'u noxou Mosingesi

⁴ La Iesua muvikala aloxo 'ola, “Ai tamaula, eni avikalangengi lexe mamu so nga'ume'a noxi'a tami­tema so ivau vasimenge usoli. Xo loxo ivenge la i'oxo mi vilela noxinge axova?

⁵ Ia avikalangengi lamana so ngamama'u noxou ena'ei. Ngamama'u noxou anu ane xaviou so uvenge ngasoli ka usu'angengi no navu so mamulo. Ani, avikalangengi lexe ngama­ma'u noxousi.

⁶ Xo ngelavu, tami­tema ilotone'i tangiala kitukitu ta'uve no anu toia tamei soxusi. Ia Mosinge iou si'isou soxu vile noxi'a uasisi.

⁷ Ia tangiala ne mi loxo utiatila uasi, anu tanungenge uua'ulixa'a tangiala avile. Ai, anu ulavusinge laixe xo kisinge laxusou se ne anu mulavusou navasou ane. Laso nga'umolu mi vile uasi.”

Tapala'anixu lamana lexe nenge tamitemaou Kalaisiti mo tamaila uasi

⁸ Xe muvikala aloxo 'ola, “Eni avikalangengi lexe ena'ei uvikala lamana no ie'i tamitema lexe anu vile noxilo la eni Itema ane melo noxou Mosinge avikala lamana no ie'i ta'angelou Mosinge lexe itema anene eni na'a xelimo.

⁹ Ia loxo vile uvikala no ie'i tamitema lexe anu vile noxilo uasi la eni avikala no ie'i ta'angelou Mosinge lexe anu itemaxeli to uasi.

¹⁰ Mo itema loxo uvikala masuaou Itema ane molu noxou Mosinge la vote'i uxolu so susu noxou ne uiasisio. Ia itema ane upupuiou Ulenu Laixe la vote'i so susu anene uiasi uasisi.

¹¹ Loxo itulusinge no anu vaikala no tatasou lavuloto o ikotingenge no laxune'i tatiatila xe taxamani la mamu so u'avuti mo nga'oxo lexe, 'Iu, masi takoline'i axovao?' Ngala­laxinu vaikala lumamo axone uasi.

¹² Xo no voxo anene u'isalili la Ulenu Laixe molu upela'ingexu vaikala ma'ia so ngalemolu.”

Latilovosou itema muxolu no anu mimi latanu ia muxovulaulausi

¹³ Ioxe, mixolu la vile no taine'i tamitema latala muvikalanu Iesua lexe, “Tisao, mamilo musoli muka­lu la vivilo mukaolinu mimiou toe! Nini navikalanu lexe ukalipalanu mo ulosilo pa'usou no anu.”

¹⁴ Ia Iesua mukolinu lexe, “Xo axova, ena'ei mutulusilo atiasi so atilovo­sou mi ane uxolu no taingengi ne? Uasi, anene xaixai noxilo uasi.”

¹⁵ La Iesua muvikalane'i tamitema ne aloxo 'o, “Ngalaxa'i laixe so ngamaxalexu isu'isu iouiou. Xo itema vile masi mimiou ulolotusi ia maulixu temanu uxali no anu anene uasi.”

¹⁶ Ioxe, mukalu la Iesua mu'oxo latilovo aloxo 'o, “Itema vile lamoliou mo mimiou tavu'alo mo xaixu nene'axu mulolutu.

¹⁷ La itema ne muxavutala lexe, 'Eni anavao? Tatasou la'ilali noxilo umomomo no anu xaixo nene'axu uasi.

¹⁸ Laso eni amamulonu tatasou la'ilali ne mo atulusou se'i toxutoxoxu. Xe ukalu la apitanu la'ilalixo xe mimixeli no tatani ne.

¹⁹ Mo so axone la axavutala no anu mi vilela uasi. Xo eni mixemixeli mo la'ilalixo a uai so tautau ie tapiena. Eni axolu vasimelo manamana'usi mo a'ani mo aie mo a'osa kaluxu uasi.

²⁰ Ia Mosinge muvikala lexe, 'Uo nini naxovulaulausi ane. Eni esosovo­sou lexe masi no olovoxo la nasoli. Xe loxo nasoli la ena'ei so uno'u mimi tapiena anu nelalaxinu to ne?'”

²¹ Xe Iesua muvikalala lexe, “Mi anene uxali noxi'a tamitema ane ilolutuxu mimi so vasime'a ia no anu mimi noxou Mosinge la ixolu loxo ta'oloxolamo.”

Anu laixe so tamitema opone'i uauavutiou xoluxolu so vasime'a uasi

²² La Iesua muvikalane'i tatisai­peliou aloxo 'o, “Laso maixene avikalangengi lexe mamu so opongengi uauavutiou xoluxolu­ngenge so lexe nga'ou ma'ia o ngasakinu ma'ia.

²³ Xo temanu mauli so vasimenge a no anu la'ilali xe lavuluti uasi.

²⁴ Ngingi ngaxa­vu­talane'i ta'ola. Axova, ane'i ilavusou itou la'ilali mo imolo? Xe ane'i tani so mimii'a o so iauvaxe. Uasi, xo Mosinge molu ua'a'ane'i. Ia ngingi to ne anu tanungenge muua'u­lixa'a tangiala avile ane.

²⁵ Loxo ngingi vile oponeni uauavuti so naxavutala piena no anu xoluxoluxene, la xavutalameni usolonu lamakisou mauli noxine usuku aso iou vilela? Uasi to!

²⁶ Laso loxo ngamomomo no anu mi se axone uasi la axova so opongengi uauavutiou mimi levianila?

²⁷ Mo ngaxavutalanu xixi sesenu lexe uleme axova. Ane'i sasaie'i so isimenu i'a lavalava uasi. Ia avikalangengi lexe tatei kingi Solomoni mutokolomonu no anu lavulutiou lailaixe umomomo no anu tokolomosou xixi sesenu 'o uasi.

²⁸ Ia xixi sesenu e uleme vaimomo 'o ne, masi ne'iela la tamitema ine'e isilanu mo isexeteluxusi. Laso loxo Mosinge utokolomonu mi vitanisi axone la axova noxinge ane mi mutiatila no anu xavutalaou? Ai, ngingi tamitema so lopala uasisi, anu ulosinge lavuluti ane.

²⁹ Laso mamu so ngauali lexe ngaxalisou mi so nga'ani xe so ngaiexu ne'ei. Opongengi uauavuti uasi.

³⁰ Xo tatemanu xale lialia mukalusi opone'i uuali misevile no anu mimi axone so ixalisou. Ia ngingi Maminge mulavusou mi ma'ia laixe so xoluxolu noxinge ne.

³¹ Laso laixe so ngingi opongengi u'oxoxu voxo ane Mosinge molu u'uli laxune'i tamitemaou. Xo loxo mimi so xoluxolungenge 'o ne anu a upipilixinu noxinge 'oe.”

Tamolo tanengeou mimi ane laixesi

³² Iesua muvikalane'i tatisaipeliou aloxo 'ola, “Ngingi tasipisipi se 'o nga'ume uasi. Maminge oponu ututulu lexe no voxo loxo anu molu u'uli laxungengi tamitemaou la upilixinu mimiou noxinge.

³³ Laso ngasalimunu mimimengi xe lamolisou la ngaiti'a tamitema ta'oloxola. Xe ngaxalixu mengi ulu'ulu so lamoli ane umomomo so mamuxanu uasi. Ngataxusou mimi lailaixe noxinge ane tasiauxu uasi no tualasou Mosinge. Anene, talasikeli vote'isou ipakalinu uasi xe tamimi ixotosou uasi.

³⁴ Xo tanixu mimi lailaixe noxinge uai no anu ne'ei ne, la anene tanixu so opongengi ututuluousi.

Tauokuvoi laixe ixolu no anu lalaxisi

³⁵ Iesua muvikala aloxo 'ola, “Ngingi ngasakinu lavalava mo ngalaxexeu lalamo so lalaxi.

³⁶ Ngaxolu aloxo tauokuvoi ixolu iloxu tilasi'a so ulivu une'e no anu lavilelu so taula'i. Ixolu ilo laixe mo so loxo uxali xe upolopolo no aitenga la alaxu vilesisi ikisinu noxousi.

³⁷ Laixe manina noxi'a tamitema so xaixai ane ixolu ilo laixe no voxo loxo tilasi'a ulivu uxali. Xo avikalangengi manina lexe no voxo anene la anu usinixu lavalava laixe mo uvikalane'i tamitema so xaixai noxou lexe italupexa so i'ani no latevolo. Mukalu la anu molu uveluvelu­nuxa'a no anu mi ma'ia imasaxau.

³⁸ Xe loxo tilasi'a une'e no olovoxo lixinu o loxo koko'a u'ava tei mo umaisi'a tamitemaou ne i'ai uasi iloxusi, la uxali laixe manina noxi'a.

³⁹ Mo ngaxavutalanu ngiou vile aloxo 'o. Loxo mosou tani vile ulavu lexe lasikeli une'e mo ulavusou aso iou u'isalili la umomomo uasi so upilixinu tasou so upakali no anu.

⁴⁰ Laso ngingi kalumo ngalalaxi xo Itema ane molu noxou Mosinge une'e no anu voxo mo aso iou ane ngalavusou uasi.”

Latilovo so uokuvoi ane laixe xe ane masua

⁴¹ La Pita mutali'isou Iesua lexe, “Tatilao, axova? Ne'oxonu latilovo ano'o so sixesi o so si'a tamitema mukalusi 'o?”

⁴² La Tatananenge muvikala lexe, “Xo itema tila utulusi'a tauokuvoi kaini axova no taine'i tamenexi'a so isaxila'a mo ivelunu xa'a la'ilali no anu voxosou u'isalili? Anu utulusi'a ane'i ane ulopalane'i lexe i'oxonu xaixai noxou laixe mo lavulavui'a.

⁴³ Laso loxo tila ulivu uxali xe umaisou uokuvoi ena'ei e mutulusou ne a uxaxai axonesio la uxali laixe manina noxou.

⁴⁴ Xo avikalangengi manina lexe tila ne utulusou uokuvoi ne so usaxila'u mimiou mukalusi.

⁴⁵ Ia loxo uokuvoi vile ane u'uli laxune'i tamenexu axone uxavu­tala no oponu lexe, 'Ai, tilasilo ulivu une'e palea uasi ane.' Xe loxo usoko'u so uve'ave'a tami­tema so xaixai tamulu oli'a tasema mo u'ani'ani mo uie xe usipaki la masi axova noxou?

⁴⁶ Aloxo 'o. Voxo vile masi uxolu ulo laixe uasi sila tilasou uxali no aso iou vile ka ukulukenusi. Uxali xe umaisou ilixo noxou axone la ukiaenu ka umulaxu uveisa'ine'i ane'i ane ilavusou ilomuxu tilasi'a uasi.

⁴⁷ Ioxe, uokuvoi ane mulavu mukalu no anu masaxa noxou tilasou ia ulalaxi mo umulinu masaxa anene uasi, la tilasou ukiakiaenu e lapilai uasisi.

⁴⁸ Ia anu ane ulavusou masaxa noxou tilasou uasi xe upolu va'axu la tilasou upuasouxu kalumo, ia malaxo uasi, alaxu vilevilesi. Xo ena'ei uxalisou mimi tavu'alo la ukolinu no anu tavu'alo kalumo. Xe anu ane ulopalanu so upilixinu mi mutiatila no avolu so usaxila'u la ilingasouxu mulolutusi.”

Iesua mune'e la anene uxalixu kalikalipala

⁴⁹ Ioxe, la Iesua musolonu vaikalaou lexe, “Eni ene'e so apilixinu navu no lialia, mo amasaxau lexe u'ani a alala'e 'osi.

⁵⁰ Ia eni so axalisou ilixo so kelele kaini vilemo tei laso opoleli u'avuti mo ututulusi lexe mi ne uxalisi.

⁵¹ Xo nge'oxo lexe eni ene'e so asolixu oto'oto no lialia? E uasi, avikalangengi lexe ane'e aloxo 'o mo so kalikalipala uxali.

⁵² La usoko'u vaimomo mo ulai avile ili'i la kalipala uxali aloxo 'o. Loxo tani vile tatemanu ixolu la ikalipala sila tatalu ixililiie'i tamei xe tamei ixililiie'i tatalu olele.

⁵³ Ikalipala laso itema uxililiou olu xe molomolo uxililiou momu. Mo sema ixililie ilie xe molomolo ixililie nenie. Mo sema tila ixililie ua'ane xe sema itaula'i ixililie ua'ane.”

Tamitema itongonu sosovosou mimi uxali uasi

⁵⁴ La Iesua muvikalane'i tamitema latala aloxo 'o, “Ngingi ngamaisou sauma su'inu molu no anu uesiti une'e sila alaxu vilesisi ngavikala lexe, 'Ai, la'iua masi une'e.' La manina, anu uxali axone.

⁵⁵ Xe loxo ngaxamulinu sivo molu loxo no anu sauti sila alaxu vilesi nga'oxo lexe, “Anu aso masi ialuxu,” la uxali axone.

⁵⁶ Ia ngingi tamitema so kalavoi to, xo ngingi ngatongo laixe no anu mimi ane uxali no loxotolo xe no lialia. Ia mi ane muxali no taingengi vaimomo 'o ne ngatongonu to uasi.”

Loxo evile so ukotinenge la talovonixu mi ne palea

⁵⁷ La Iesua muvikala aloxo 'ola, “Axova so ngingi menge ngaxa­vu­tala laixe mo ngatilovsou ilixo ane ulapusi ua'?

⁵⁸ Laso loxo itema ukotixene mo ngingi a so ngalai ngakoti la nakamulinu vote'i so ngalovonixu mi ne. Xo loxo 'o io ulapuneni natulu no laxunu tiasi la masi tiasi upili­xineni no avo'a tapolisi ka ikalavusunenisi.

⁵⁹ Avika­­laneni manina lexe loxo axone la nini naxolu nakalavusu xo mo nalotonu lamoli umomomo u'isalili loxo misosovosousi ane.”