Luku 11 - Ata New Testament

Vote'i so tavikala noxou Mosinge

¹ Xe mune'e la Iesua muxolu muvikala noxou Mosinge no apu vile. Muvikala mukalu la tisaipe­liou vile mutali'isou lexe, “Tatana­nexi, nini napela'ixe no anu vote'i so tavikala noxou Mosinge aloxo Tioni mupela'a tatisaipeliou.”

² Laso anu muvikalane'i lexe, “Loxo ngaxolu ngavikala noxou Mosinge la ngavikala aloxo 'o, 'Mamixe, ualasine ukalipala uxolu malemalengasi. Mo voxo so nini mene na'uli laxune'i tamitemameni une'e 'osi.

³ Voxovoxo utotomu na'itimexe la'ilali umomomo no anu aso anene.

⁴ Mo oponeni ulu'e so susu noxixe a loxo nexi ta'oxonu noxi'a tamenexixe 'o. Mo na'oxonu latolosixe mo so tovotovo ukasixe uasi.'”

⁵ Mukalu la Iesua muvikalane'i aloxo 'ola, “Loxo nini vile nalai no tasou menexine vile no olovoxo lixinu. Mo nalinga noxou lexe, 'Maulao, nalosilo pileti tatalu.

⁶ Xo tulaleli vile mumuamua'i no vote'i xo mo mune'e mu'una no tasilo ia eni la'ilali so a'itixu uasi.'

⁷ Xe loxo itema nonano no tani ukolinu ula noxine lexe, 'Ai natulusilo xo ma'ia? Nexi tetatu mo noxi'a ta'alixeli a teai mukalu. Eni atulu so alosine mi vile uasisi.'”

⁸ La Iesua mu'oxo lexe, “Eni avikalangengi aloxo 'o. Anu umomomo uasi so itema ne uvikala no oponu lexe, 'Atulu asu'ulinu xo anu menexilo ane.' Uasi to! Ia loxo nini noale naolotete tosi, la anu utulu ulosine mi ma'ia nalingau ne.

⁹ Laso avikalangengi lexe ngalinga noxou Mosinge laso anu ukolingengi. Xe mi ma'ia ngakamulinu la upalasi­noxu noxinge. Mo loxo ngapolo­polo no aitenga aneva la anu ukisinu noxinge ane.

¹⁰ Xo anu ane ulinga la uxalisou lakolisou xe anu ane ukakamuli la mimi upalasi noxou xe anu ane upolopolo la aitenga ukisi noxousi.

¹¹ Loxo molomolo vile ulingau sinana noxou momu la ukolinu ulosou milalako, ne?

¹² O loxo molomolo ulingau atolu la momu ulosou tanga, ne? Uasi ane!

¹³ Ioxe, ngingi tamitema so susu 'o tangengixa'a ta'ilinge so nga'itixa'a mimi lailaixe, laso axova noxou Maminge uxolu no tualasou lailaixe? Anu u'osa manina so ulosi'a Ulenu Laixe noxi'a ane'i ane itatali'i noxou.”

Tamitema mikalavoi lexe Iesua muxaxai no anu xavinu Uluaou

¹⁴ Ioxe, Iesua mukusaou angelo masua ane muxolu noxou itema vile. Angelo masua ne mu'oxonu itema anaxu mutomu, ia loxo Iesua mukusaou la itema muvikalala. Xe tamitema latala mimaisou la mikulukemolu kena.

¹⁵ Ia se'i noxi'a mivikala lexe, “Anu ukusai'a ta'angelo tamasua no anu xavi noxou tila noxi'a ta'angelo tamasua e Velisevuli to!”

¹⁶ Xe ane'i se'i mitovonu Iesua mo miuolotete noxou lexe u'oxonu sosovo vile so umaxa'u lexe anu molu no tualasou Mosinge.

¹⁷ Ia anu mulavusou xavutalai'a la muvikalane'i lexe, “Loxo tatemanu tuala vile ikalipa­lane'i so i'otoxa'a ngato'o la anu tuala anene umamulosi. O loxo tatemanu tani vile ixililiie'i ngato'o la ane'i ixolu opone'i vilesisi? Uasi, ane'i ipaxelele ane.

¹⁸ Xe loxo Uluaou oli'a laili noxou ikalipala mo ixililiie'i ngato'o, laso anu pakia'u so u'uli laxunu laili noxou? Uasi to! Ia ngingi nga'oxo lexe eni akusai'a ta'angelo tamasua no anu xaviou Velisevuli.

¹⁹ Mo loxo vaikalamengi lexe akusai'a ta'angelo tamasua no anu xaviou Velisevuli ne manina, laso ane'i tanoxinge ane ikusai'a la ino'u xavi noxou ei? Laso ane, ane'i laili noxinge ne me'a imaxa'u vaikala­mengi lexe manina uasi.

²⁰ Ia loxo Mosinge avolu uxolu noxilo so akusai'a ta'angelo tamasua la masi ngalavu lexe voxo so Mosinge molu u'uli laxune'i tamitemaou a mune'e alai noxinge 'oe.

²¹ Loxo itema xavinu utetelisou mimi so oto mo u'oxo latolosou tasou la vote'i so evile u'una uvila'isou mimiou uasi.

²² Ia loxo itema vile xavinu tatila musuku u'otoxu mosou tani ne mo uua'ulixu, laso ane. Anu u'umenu mimi so oto e itema ne mulopalanu so u'oxo latolosou mo utaxusou mimi no tasou ne. Mukalu la uvelunui'a tamenexusi.”

²³ Xe Iesua muvikala aloxo 'ola, “Itema ane menexilo uasi la anu vile noxi'a tauluaxeli ane. Xe itema ane usu'ulileli so upitane'i tamite­maxeli uasi, la anu upaxelelene'isi ane.”

Angelo masua anu umomomo so ulivu uxolu no tanixula

²⁴ La Iesua musolonu aloxo 'ola, “Loxo angelo masua uxexesou itema vile ukalu la ulai uxixaoxao no xale lia esi'esi so ukamulinu tanixu vile so uma'ila no anu. Ukamulinu ukamulinu ia uxalisou tanixu vile uasi. Laso u'oxe, 'E masi alivu no anu tasilo e exolu ka exexe no anu 'o.'

²⁵ Xe loxo ulivu la umaisou tasou a misilapanu mo mipaipounu laixe.

²⁶ Laso anu uno'a ta'angelo tamasua 7-la e ilixo masua noxi'a uua'ulixu noxou. Uno'a ukalu la oli'a i'unalai ixolu noxou itema ne, mole xoluxoluxu mumasua manina no anu ane tei.”

Tamitema ta'ei so i'osa manina?

²⁷ Ioxe, mulemolu vaikala anene la tamitema latala a mixolu milo­musou. Sila sema vile no taine'i mi'ava noxou lexe, “O laixe manina noxie sema e mivo'oneni mo misusuneni.”

²⁸ Ia anu muko­line lexe, “Uasi, aloxo 'o. Anu laixe noxi'a tamitema ane ilomusou vaikalaou Mosinge mo ilomuxu.”

Iesua mulemolu sosovo e muxali noxou Iona

²⁹ Iesua uxoxolu a uvivikala la tamitema a inene'e ipipitasio. La anu muvikala lexe, “Tamitema ane laili so vaimomo 'o ne ilixo noxi'a masuamo. Ane'i imasaxa imolo sosovo vile, ia avikala lamana lexe sosovo vilesisi ane imaisou a sosovo ane muxali noxou Iona.

³⁰ Xo Iona ne anu so sosovo noxi'a Tanenive. Mo axone kalumo noxou Itema ane molu noxou Mosinge xo anu so sosovo noxinge laili so vaimomo 'o.

³¹ No anu voxo so lakoti tatila ili'i la kuini e tatei so xale lia no anu sauti itulu ito'ome'a laili so vaimomo'o la vaikalaie upala'anixu susu noxi'a. Xo ane mele no lia telexu so ine'e ilomusou lavulavu u'asi'asi noxou Solomoni. Ia ngalomu, vile uxolu no taingengi 'o uua'ulixu Solomoni avile.

³² Mo no voxo so lakoti ne la Tanenive kalumo itulu ipala'anixu susu noxi'a tamitema so laili vaimomo 'o. Xo ane'i milomuxu votovoto noxou Iona la mixiunu mo mi'isa­lilinoxu opone'i. Ia ngalomu, vile uxolu no taingengi 'o uua'ulixu Iona avile kalumo.”

Latilovo so lalamo uka

³³ Mo Iesua muvikala aloxo 'ola, “Tamitema ilexexu lalamo ka imulaxu no taxa nonano no tani o no laxu ti'a? Uasi to, ane'i ilavusou imulaxu no tanixu u'isalili mo so loxo ta'ei i'una la lamanasi'a.

³⁴ Ioxe, iengi ne anu loxo lalamo so vasimenge. Xo loxo iengi laixe la lamana u'una no anu vasimenge mukalusi. Ia loxo iengi masua la vasimenge ne isivoxosi.

³⁵ Laso ngalaxa'i laixe xo loxo 'o io lamana no vasimenge lamana uasi, isivo­xosi.

³⁶ Mo loxo vasimenge muka­lusi lamanaxusi la ngiou vile no anu isivoxo uasi. Mo axone la lamana nonano noxinge uiei aloxo lalamo utalosinge.”

Iesua mupala'anixu ilixo masua noxi'a Tapalisiena

³⁷ Iesua muvikala xo xe mukalu la Palisi vile mualiou so lexe ilou i'ani no tasou. Laso anu mu'unalai la mutalupexa so u'ani no latevolo.

³⁸ Mutalupexa ia Palisi ne muku­luke xo mumalei lexe Iesua u'oxonu ilixo so ulo'ulo tei no anu ani'ani uasi.

³⁹ Ia Tatananenge muvikalanu lexe, “Loxo noxinge Tapalisi la nga'uinu kapu xe lapelete noxinge laixe. Ia nonano noxinge la mua­na'ana no anu isu'isu mo ili'ilixo masumasua to!

⁴⁰ Ai ngingi ngaxo­vulaulau ane. Xo nge'oxo lexe anu ane muxalixu mimi so vasimenge noale, la uxalixu mimi nonano uasi?

⁴¹ Vote'isinge aloxo 'o. Temanu kapu xe lapelete noxinge ne ngapixivane'i ta'oloxola, laso ane, mimi ne uxali malemalenga so nga'ani no anu.

⁴² Ia anu masua noxinge Tapalisi to! Xo mimi se ngatounu no xai so u'oxonu la'ilali tu'uaxu xe kamakala ma'ia ngaxalisou la sasaiengi so ngaxexenu pa'usou no anu 10 so lexe noxou Mosinge. Ia ilixo ulapu so nga'oxonu noxi'a tamenexinge mo sexela so nga'oxonu noxou Mosinge a tangengivulusiousi. Laso ngapilixinu lavuloto uasi ia mi ane so xavingengiousi a ilixo ulapu ilou sexela.

⁴³ Ngingi Tapalisi anu masua noxinge xo nga'itingengi to! Ngingi ngaxolu u'uli no ie'i tamitema no anu tatasou lavuloto. Mo ngama­saxau lexe tamitema loxo ixalisinge no loxomala la itaxangengi mo ivikala aso noxinge.

⁴⁴ Mo masua noxinge xo ngingi loxo lulu ane utalumexa'a tamitema. Laso loxo imuamua'i no latanu la ane'i ixali nuni'a no iou Mosinge ia ilavusou uasi.”

⁴⁵ Xe itema vile so lavulavu no anu lavuloto mulomusou vaikalaou Iesua ne laso muvikalanu lexe, “Tisa, nelemolu vaikala anene la ulu'enu ualasixe kalumo.”

⁴⁶ Ia Iesua mukolinu lexe, “Ngingi tamitema so lavulavu no anu lavuloto anu masua noxinge kalumo. Xo ngingi ngapilixinu mimi tu'utu'umaxu noxi'a tamitema so itavulenu. La imomomo no anu uasi, ia ngingi ngavaxanu avonge simisou se so ngasu'uline'ixu to uasi.

⁴⁷ Mo masua noxinge, xo ngingi ngapaipounu lulusi'a tapolopeti laixe ia ta'ilusungengisi mive'a­ve'asi ane.

⁴⁸ Laso maixene ngingi ngamaxa'u noxi'a tamitema lexe opongengi vilesisi noxi'a ta'ilusu­ngengi. Xo ane'i mive'ave'a tapolo­peti ka ngingi a ngapaipounu lulusi'a ne.

⁴⁹ Laso lavulavu u'asi'asi noxou Mosinge muvikala aloxo 'o, “Eni apalusi'a tapolopeti oli'a ta'aposeli ilai noxi'a. Ilai ia tamitema i'oxonu masua noxi'a se'i mo se'i la ive'a isoisoli.

⁵⁰ Muso­ko'u loxo Mosinge mukoinu lialia mune'e muxali avile vaimomo 'o la ta'ilusungengi mive'ave'a tapolopeti mo sialuxa'a munixi mula. Ia susu tava'u anene Mosinge uno'u upitanu noxinge laili so vaimomo 'o u'isalili.

⁵¹ Xo sialu musoko'u munixi noxou Aveli mune'e xo mo muxali noxou Sekelaia. Anu ane mivau no tainu tanixu navu xe tasou Mosinge. Ani manina, eni avikalangengi lexe tava'u susu anene mukalusi upita noxinge ngingi laili so vaimomo 'o.

⁵² Masua noxinge ngingi tamitema so lavulavu no anu lavuloto xo aloxo 'ola. Ngingi nge'umenu laki so tanixu lavulavu u'asi'asi. Ngingi menge nga'una uasi ia nga'apixa'a ane'i ane imasaxa so i'unalai ne.”

⁵³ Muvikala mukalu la muxexesou tuala muxolu no anu ne. Ia ili'i la tamitema so lavulavu no anu lavuloto oli'a Tapalisi opone'i ialuxuou manina mo mimaititiou no anu tali'i iouiou.

⁵⁴ Ane'i mimaititiou axone xo milalaxinu opone'i lexe loxo ukolinu upolo va'axu la ane'i itulusou no anu vaikala.