Luku 1 - Ata New Testament

Luku mukaukavunu a'alo mulai noxou Tiopilusi

¹ Itema tila Tiopilusio, tamitema tavu'alo mitovonu mukalu so ikaukavunu a'alosou mimi muka­lusi ane Mosinge muxalixu no tainexi 'o.

² A'alo ne mino'u noxi'a tamitema ane me'a mixolu misaxi­sou mimi ne no ie'i no tava'u manina. Misaxisou xe mixali tamitema so ixaxaisou vaikala ne laso mia'aloxu mune'e noxixe 'o.

³ Ioxe, eni exolu ekilolo laixe no anu mi kikitu no anu a'alo noxi'a, musoko'u no tava'u manina mune'e. Laso maixene e'oxo lexe eni kalumo akaukavunu umulinu u'isa­lili. Xe ukalu, la akalanu ulai noxine nini Tiopilusi ne.

⁴ A'oxo axone mo so loxo na'itisou la nalavu manina no anu mimi ane tamitema mipela'inexu mukalu.

Angelo mupela'u Sekelaia lexe Tioni so uxali

⁵ No voxo ane Eloti muxoli kingi no xale lia ne Iutea, la pilisiti vile muxolu kalumo, ualasou lexe Sekelaia. Anu so laili vile noxi'a tapilisiti ilemolu lexe Apia. Xe semau ne ualasie lexe Elisapeti, ane Aloni ilusunu vile.

⁶ La ane'i ilou xoluxoluxa'a malemalenga no iou Mosinge xo ilixo noxi'a mulapusi so mimulinu lavuloto u'isalili no anu masaxa noxou Tatananenge.

⁷ Ia ane'i ta'ili'a uasi xo Elisapeti imomomo so ipala uasi. La ane'i ilou mixolu axonesi xo mo ane'i tatiatila mukalu.

⁸ Ioxe, no voxo vile la Sekelaia muxolu so upilisiti no tasou Mosinge. Muxolu ne xo anu voxo ane misosovosou so oli'a laili noxou i'oxonu xaixai anene.

⁹ La anu oli'a tamenexu tapilisiti mi'oxonu ilixo so ilounu uala. Ilounu uala so lexe ena'ei ualasou uxali la anu u'unalai no tasou Tatananenge so u'elaxu mi e tuma'u lailaixe. Mi'oxonu ilixo so uala mukalu sila Sekelaia ualasou muxali.

¹⁰ La anu a u'elaxu mi tuma'u lailaixe nonano la ane'i tamitema latala mipita noale so ixolu ivikala noxou Mosinge.

¹¹ Ioxe, Sekelaia muxolu nonano la angelou Tatananenge mupa noxou mo mutulu no avolu tema no tanixu e i'elaxu mi tuma'u lailaixe ne.

¹² Xe Sekelaia mumaisou angelo ne la mukuluke mo mu'o­lo'olo kena.

¹³ Ia angelo muvika­lanu lexe, “Sekelaia, na'ume mamu. Xo Mosinge mulomusou linga noxine mukalu, semameni Elisa­peti ivo'onu iline vile mulu. Ivo'onu laso namoxo'u ualasou lexe Tioni.

¹⁴ La oponeni uleilaxu xe u'osasou iline ne mo osa'ila noxi'a tamitema tavu'alo uxali no voxo ane ivo'onu.

¹⁵ Xo anu ualasou utiatila no iou Tatananenge. Anu uiexu uaini o lexa pakia'u uasi. Mo loxo uxolu no anu nenu oponesio, ivo'onu uao, la Ulenu Laixe uxolu noxou lumamo.

¹⁶ La anu itema ne ulivunixi'a tamitema Ta'isilaeli tavu'alo ilai noxou Tatananenge anu Mosi'a.

¹⁷ Anu uno'u xavi mo umulinu ilixo loxo polopeti Elaitia xo anu uxiunu opone'i tamitema uxali vilesisi noxi'a ta'ili'a. Xe tamitema ane ilomuanu Mosinge vaikalaou la vaikalaou itema 'o uxiunu opone'i mo so ilavu a loxo tamalemalenga. La anu u'oxo axone mo so loxo Tatananenge une'e la ane'i ixolu ilalaxi laixe lumamo.”

¹⁸ Ioxe, angelo muvikala axone laso Sekelaia mutali'isou aloxo 'o, “Ia mi ne alavusou lexe manina axovao? Eni amitema tila 'o xe semaxeli tau iexe tavu'alo mukalui io.”

¹⁹ La angelo mukolinu lexe, “Eni Xevilieli a. Eni ane alavusou atulu no laxunu Mosinge. Anu molu mupalusilo ene'e epala'anixu vaikala laixe ano'o noxine a.

²⁰ Ia nini nalopalanu vaikalaxeli lexe maninasou uasi laso avikala aloxo 'o. Nini anaxene utomu avile so navikala uasi. Naxolu axone xo mo uxali no anu voxo u'isalili loxo Mosinge musosovosou, laso ane, nene'axu vaikala elemolu 'o uxali.”

²¹ Ioxe, tamitema ane mixolu noale la mixomaiou Sekelaia so ula. La tane'ilili lexe muxolu nonano no tasou Mosinge maxu­veni xo ma'ia.

²² Mixomaiou xo xe mula la anu umomomo so uvika­lane'i uasi. Laso ane'i milamana lexe anu masi mumaisou mi vile loxo ai saxi nonano no tasou Mosinge ane. Anu mulosilosi no avolu so upela'a lexe mi ma'ia muxalisou ia loxo anaxu la muto­musi.

²³ La Sekelaia muxolu mu'o­xonu xaixai so upilisiti xo xe voxosou mukalui, laso mulivu no tualasou.

²⁴ Xe mune'e la semau e Elisapeti opone. Opone la mimulinu iloxo noxi'a la mitalume mixolu so'io 5. Xe mivikala aloxo 'o,

²⁵ “Ai, Tatananenge tanuxo mo musu'uli­leli 'o. Anu mumaxa'u osa noxou mo mukalusou maila noxilo e so apala uasio.”

Angelo mupela'e Malia lexe opone mo ivo'onu ilie Iesua

²⁶ Ioxe, Elisapeti opone so'io 6 mukalu. La Mosinge mupalusou angelo e Xevilieli so ulai no tuala ne Nasaleti a uxolu no xale lia ne Xalili.

²⁷ La anu mulai noxie vuanga vile ualasie lexe Malia. Vuanga ne ilai noxou mulu vile uasi ia misosovosie so itaula'ixu Kingi Teviti ilusunu vile ualasou lexe Iosepu.

²⁸ Angelo muxali noxie la muvikala lexe, “Aso. Tatananenge musosovosine so u'oxoneni laixe manina la anu a uxoxolu noxine.”

²⁹ Xe Malia milomusou vaikala anene la mikuluke mo tanelili no anu laxu vaikalaou.

³⁰ Ia angelo muvikalane lexe, “Malia, na'ume mamu xo Mosinge mu'osasine ne.

³¹ Une'e la nini oponeni xe ili'i la navo'onu iline mulu vile. La namoxo'u lexe Iesua.

³² Anu ualasou uxali utiatila mo imoxo'u lexe Anusisi U'uli'uli Olu. La Mosinge Anu Tatananenge utulu­sou no anu tanixu kingi noxou ilusunu e Teviti.

³³ Xe anu uxolu no anu tanixu kingi so u'uli laxunu laili noxou Iakovo kaluxu uasi.”

³⁴ La ane Malia mitali'isou angelo lexe, “Mi anene uxali axova? E eni alai noxou mulu vile uaosio.”

³⁵ La angelo mukoline lexe, “Mosinge Anu Ulenu Laixe une'e noxine mo xavinu Anusisi U'uli'uli usu'asine. Laso ili'i nini navo'onu iline vile ilixo noxou malema­lengasi mo ane'i ilemolu lexe Mosinge Olu.

³⁶ Xe tulaneni Elisapeti kalumo, ane sema tila mukalu ia ane kalumo opone mo so'ioxe 6 mukalu 'oe. Ulai ili'i la ivo'onu ilie vile mulu.

³⁷ Xo nalomu, Mosinge umomomo no anu mimi mukalusi, mi vile ialuxu noxou uasi.”

³⁸ Laso Malia mivikalanu lexe, “Ioxe, uxali loxo nelemolu xo eni sema so xaixai noxou Tatanane­ngesi 'o.” Mukalu la angelo mulutu muxexesie.

Malia milai so imaisie Elisapeti

³⁹ Ioxe, Malia ixolu maxuveni uasi mi'avuti milai palea no xale lia vile. Milai ne la mixali no la'ola'olu mo milai avile no tuala vile ne Iutea.

⁴⁰ Mixali la mi'unalai no tasou Sekelaia mo mivikala aso noxie Elisapeti.

⁴¹ Ioxe, Elisapeti milomusou aso noxie sila ilie no opone mu'avuti mu'oki. La Ulenu Laixe mupamuxane Elisapeti.

⁴² La mivikala tatila aloxo 'o, “Ai, mi ane Mosinge muxalixu noxine ne lailaixe manina, uua'ulixu anene noxixe tasema mukalusi. Xe noxou iline no oponeni ne, Mosinge uxalixu nene'axu lailaixe misevile no anu xoluxoluxu.

⁴³ Ia tava'u axova so nini Tatananenge nenu nene'e noxilo aloxo 'o? Anu mi lailaixe manina.

⁴⁴ Xo loxo elomusine nevikala aso noxilo la alaxu vilesisi alixeli no opoleli mu'osa manina mo mu'avuti kena.

⁴⁵ Nini nelopala noxou Tatana­nenge lexe mi e mupe­la'inexu la uxali. Laso maixene muxalixu nene'axu laixe misevile no anu xoluxolu noxine.”

Malia milexe so i'itinu Mosinge ualasou

⁴⁶ La Malia mi'oxo aloxo 'o, “Taleli u'itinu ualasou Tatana­nenge.

⁴⁷ Xe opoleli u'osa noxou Mosinge e mosou pamauli noxilo.

⁴⁸ Eni exolu a mi vitanisi 'o xo eni sema so xaixai noxousi. Ia anu tanuxo misevile laso usoko'u vaimomo 'o xe ulai ili'i la tami­tema mukalusi ilavu lexe anu mu'oxoleli laixe misevile.

⁴⁹ Xo Anusisi Xavinu ne muxalixu mimi mutiatila no anu xoluxoluxo. Anu ualasou malemalengasi.

⁵⁰ Xe noxi'a tamitema so tatei xe vaimomo 'o xe ili'i, la uiaiamane'i ane'i ta'ei imama'u noxou.

⁵¹ Anu muxalixu nene'axu e xavinu musu­­ku no anu avolu. Anu mupa­xe­lelene'i ane'i ane mitoxa'a no opone'i.

⁵² Tatiatila ane mitulu no anu tanixa'a teitexi so mikingi la mulu'ene'i. Ia tamitema vitanisi la mu'itine'i mo mutulusi'a no anu tanitanixa'a laixe.

⁵³ Tamitema ane misolixa'a la mu'itixa'a la'ilali xo la mikalusou masaxa avile. Ia ane'i ane mixolu no latanu mimii'a la mukusai'a milai mixaxasi.

⁵⁴ Anu musu'ulinu itema so xaixai noxou e Isilaeli. Anu oponu ututu­luou vavalima so iaiama noxou.

⁵⁵ Vavalima e mu'oxonu noxi'a tatiatila tatei. Anu muxali noxou Apala'amu xe musuku noxinge ta'ilusunu la ulai kaluxu uasi.”

⁵⁶ Ioxe, Malia mixolu noxie Elisa­peti. Mixolu xo xe so'io tatalu mukalui laso milutu milivu no tualasie.

Elisapeti mivo'onu ilie Tioni

⁵⁷ Xe mune'e xe voxosie Elisapeti muxali la mivo'onu ilie mulu.

⁵⁸ La tatemanu tualasie oli'a tatulane milomusou a'alosou iaiama toxo­xa'a Tatananenge mu'oxonu noxi'e Elisa­peti ne. Milomusou laso mine'e noxie mo oli'a mi'osa'osa misevile.

⁵⁹ Ioxe, mivo'onu ilie xe muxolu voxo 8 mukalu laso tamitema mine'e so i'oxonu ilixo so ixotonu molomolo vasimolu. Mi'oxonu la ane'i so ilemolu no anu ualasou momu e Sekelaia.

⁶⁰ La molomolo nenu mi'oxo lexe, “Uasi to! Talemolu ualasou lexe Tioni.”

⁶¹ La ane'i mivikalane lexe, “Ia noxi'a tatulaneni vile ualasou axone uasi.”

⁶² La milosilosi no anu avo'a noxou molomolo momu so lexe anu umasaxau ilemolu olu ualasou axova.

⁶³ La mupalusi'a ine'enu mi vile so ukaukavu no anu. Mine'enu mukalu laso mukaukavu aloxo 'o, “Ualasou lexe Tioni.” La mikuluke.

⁶⁴ Sila alaxu vilesisi anaxu utomu la uasi mo levexu papaxe so uvikalala. La anu musoko'u so u'itinu Mosinge ualasou.

⁶⁵ Xe tatemanu tualasi'a mimama'u manina. La a'alosou muiaveiave sika tatemanu xale lia no la'ola'olu ne Iutea mukalusi ne mivivikalasousi.

⁶⁶ Mo tamitema ta'ei milomusou a'alo ne mixavu­tala piena mo mi'oxo lexe, “Ai, molomolo ne masi uxali itema kaini axovao?” Mivikalasou axone xo anu mulamana noxi'a lexe xavi noxou Tatananenge muxoxolu noxou.

Sekelaia mulemolu vaikala so pela'a sevile

⁶⁷ Ioxe, Mosinge Ulenu Laixe mupamuxanu Sekelaia so mule­molu vaikala so pela'a aloxo 'o,

⁶⁸ “Ta'itinu ualasou Tatananenge e Mosinge Taisilaeli, xo anu mune'e so usu'ulinenge mo mulotonenge tamitemaou talivu noxou.

⁶⁹ No anu laili noxou itemaou Teviti anu mutulusou itema xavinu so upa­mau­linenge.

⁷⁰ Loxo tatei e anu molu mua'alo no anu anaxa'a tapo­lopetiou.

⁷¹ Anu upamauli­nenge no avo'a tauluamenge xe no avo'a tamitema ane imatapia­nenge.

⁷² Anu mu'oxonu iaiama noxi'a ta'ilusunenge mo anu oponu utu­tuluou vavalima noxou.

⁷³ Vava­lima e mu'oxonu noxou ilusu­nenge Apala'amu.

⁷⁴ Muvava­lima lexe u'umenenge no avo'a taulua­menge mo so ta'oxonu xaixai noxou mo ta'ume uasi.

⁷⁵ Mo so axone la utotomu taxolu tamalemalenga mo talapu no iou umomomo no anu telexu voxosinge 'o.”

⁷⁶ La anu muvikalanu keakea lexe, “Alixeli, ulai ili'i la tamitema imoxo'ine lexe nini polopetiou Anusisi Uli'uli. Mo nini na'uli noxou Tatananenge so nalalaxinu vote'isou.

⁷⁷ Xe anu uili'i la upela'axu tamitemaou vote'i so pamauli mo so ilavu lexe tina'uxa'a so susu ukalu axova.

⁷⁸ Xo Mosinge oponu mamalaxu mo u'oxonu iaiama la upalusou Tatananenge molu teitexi une'e. Anu uxali loxo aso uxali no loxotolo.

⁷⁹ Uxali, laso lamanaxu uiesi'a ane'i ane ixolu no isivoxo mo no maimaixu soli. La anu molu upamuxanu tava'inge so tapolo no anu vote'i so xoluxolu lalavulusi.”

⁸⁰ Ioxe, mune'e la molomolo ne muleme tatila mo tanu mututulu pumuxu no anu xaixai ane so u'oxonu. La muxolu no xale lia esiesi xo mo voxosou muxalii laso mulai mupala'a noxi'a Ta'isilaeli.