Lomu 9 - Ata New Testament

Polu muvikalasi'a Ta'isilaeli

¹ Ioxe, eni axolu noxou Kalaisiti, mo avikala manina no anu mi 'o. Ngalomu laixe xo Ulenu Laixe mulavusou opoleli lexe akalavoi uasi.

² Xo utotomu opoleli tu'uma­xu mo atatama voxovoxo.

³ Ata­tamasi'a tavivilo ane no anu vasimexe. Xo aloxo 'o, loxo vote'i, la amasaxa lexe ane'i ino'u tanixo noxou Kalaisiti mo eni axalisou kalipala no navu. Ia uasi, vote'i vile so akalipala noxou Kalaisiti uasi.

⁴ Tavivilo ne, ane'i Ta'isilaeli ane. Ane'i ane Mosinge mumoxo'a lexe ane'i ta'olu mo mumaxa'u iaxu noxi'a. Xe kalumo mu'oxonu konitalaki noxi'a mo mulosi'a lo mo mulosi'a vote'i so i'itinu ualasou mo muvavalima noxi'a.

⁵ Muvavalima tei noxi'a ta'ilusu­ne'i Apala'amuena. La Kalaisiti muxali itema xo nenu mivo'onu no anu laili anene. Mivo'onu la Kalaisiti ne anu Mosinge ane Mu'uli'uli Avile, laso ta'itinu ualasou ulai utalo uasi.

Mosinge muiloune'i tamitemaou

⁶ Ia axova? Mosinge muiloune'i Ta'isilaeli lexe ane'i tamitemaou, ia tapiena noxi'a ilopala noxou uasi. Laso axova, vaikalaou mulapau vitanisio? Uasi, vaikalaou mumauli. Xo se'i no anu laili Isilaeli ne ane'i tamitemaou Mosinge ia se'i ne uasi.

⁷ Latilovo vile aloxo 'o. Ta'ilusunu Apala'amu se'i ne ane'i laili noxou maninasou uasi. Xo Mosinge muvikala aloxo 'o, “Tamitema ane ixali no anu laili noxou Aisakisi, ane'i anenesi laili noxou Apala'amu maninasou.”

⁸ Laxu aloxo 'o. Tava'u so tamitema ixali Mosinge ta'olu xo ane'i ta'ilusunu Apala'amu no anu vasimolu uasi. Tava'u so ixali Mosinge ta'olu xo anu musoso­vosi'a. Ane'i anenesi Mosinge muvavalimasi'a noxou Apala'amu lexe ane'i ta'ilusunu ane.

⁹ Xo tatei muvikalanu aloxo 'o, “No voxo esosovosou la eni alivu ane'e mo Sala ivo'onu ilie mulu.”

¹⁰ Xe aloxo 'o kalumo. Leveka ne, mivo'one'i tailie tamei ane mami'a ilusunexi Aisaki.

¹¹ No voxo loxo ivo'o uao la Mosinge muilounu vile noxi'a no anu masaxa noxou. Ane'i i'oxonu ilixo vile laixe o masua so uiloune'i no anu xaixai noxi'a uasi. Anu mumulinu loxo anu molu mulalaxinusi.

¹² Xo muvikalane Leveka tei aloxo 'o, “Iline ane ulapau tei la u'oxonu xaixai noxou anu ane ulapau ili'i.”

¹³ Mo kalumo no anu Mosinge vaikalaou muvikala lexe, “Eni asexelaxu Iakovo, la asexelaxu Iso uasi.”

¹⁴ Laso nenge tavikalasou Mosinge axova? Tavikala lexe anu mususu? Uasi to, umomomo uasi.

¹⁵ Xo muvikalanu Mosisi aloxo 'o, “Loxo eni aiaiama noxou itema vile la eni aiaiama ane. O loxo eni talelixu itema vile la eni talelixu ane.”

¹⁶ Laso ngamaisou, anu mi so masaxa o xaixai noxou itema uasi. Anu mi so iaiama noxou Mosingesi.

¹⁷ Mo vile aloxo 'ola. No lavukuou Mosinge tamitema mikaukavunu vaikalaou mulemolu noxou kingi ne Isipi aloxo 'o, “Eni etulusine so nakingi mo so lexe a'oxo axova noxine, la xavileli upala'a. Upala'a laso tamitema i'itinu ualasilo no xale tuatuala mukalusi.”

¹⁸ Laso ane. Loxo Mosinge umasaxau uiaiama noxou itema vile, la anu uiaiama noxou ane. Ia loxo umasaxau itema vile oponu uxolu pakia'u la anu uxolu axonesi.

La'ia xe iaiama noxou Mosinge

¹⁹ Ia ngingi masi nga'oxo lexe, “Loxo Mosinge usosovosinge no anu masaxa noxou la axova so utulusinge no anu vaikala lexe tasusu? Xo nenge tamitemasi laso nenge tatalosou masaxa noxou axova?”

²⁰ Loxo ngatali'i axone, la eni avikala aloxo 'o. Manina, ngingi tamitemasi laso nini ena'ei nakala­punu Mosinge? Latilovo aloxo 'o. Loxo itema vile u'oxonu mi vile no avolu, laso mi ne uvikalanu itema ne lexe, “Nexa­lixilo masua to!” Umomomo so uvikala axone? Uasi.

²¹ Mo vile aloxo 'o. Loxo itema so u'oxonu lisi no anu pilika la anu u'oxonu no anu masaxa noxousi. Loxo u'oxonu lisi vile so tamulaxu la'ilali laixe no anu xe u'oxonu vile so tasi'alo no anu, la ei uvikala? E anu mosou ane.

²² Xe Mosinge axone kalumo. Anu la'ia noxou uxoxolu noxi'a tamitema se'i ia anu umasaxau so xavi noxou upala'a. Laso anu uxolusi, ulosi'a nene'axu la'ia noxou so umamulone'i palea uasi.

²³ Ia noxinge ane texalisou iaiama noxou la u'oxonenge iou vilemo manina. Xo mulalaxi so ulosinge xoluxolu laixe no tualasou. Xo axone, la ili'ilixo noxou iaxu upala'a avile.

²⁴ Nenge ane mu'avalinge so taxalisou iaiama noxou ne, nenge so laili noxi'a Taiutasi uasi. Nenge ane so laili noale'ale kalumo.

²⁵ Xo polopeti Osea mukauka­vunu Mosinge vaikalaou aloxo 'o, “Ane'i tami­tema ane tamitemaxeli uasi, la a'avali'a ane. Xe ane'i ane asexelaxa'a tei uasi, la asexelaxa'a ane.

²⁶ Tei la evikalane'i lexe 'Ngingi tamitemaxeli uasi a.' Ia no anu tanixu e elemolu, la tamitema imoxo'a lexe ane'i ta'olu Mosinge anu umamamauli.”

²⁷ Xe Aisaia muvikalasi'a Ta'isilaeli aloxo 'ola, “Manina lexe Ta'isilaeli ixali ilolutu loxo io'io'i 'o. Ia ane'i utuxa'asi ixalisou pamauli.

²⁸ Xo Tatananenge mutilovosi'a tate­manu lialia mukalu. Laso loxo ulosi'a nene'axu la alaxu vilesisi mo loloni.”

²⁹ Mo Aisaia mukau­kavunu no anu Mosinge vaikalaou aloxo 'ola, “Tatananenge Anu Mu'uli'uli umamulone'i ta'ilusu­nenge, ia umamulone'i avile uasi, pa'usi'asi ixolu. Xe loxo uasi, la nenge ukalusi takalu loxo Tasotomu oli'a Taxomola.”

Tavu'alo noxi'a Ta'isilaeli ilopala uasi

³⁰ Ioxe, nenge tavikalasi'a Ta'isi­laeli axova? Xo tamitema noale'ale ne ane'i sasaie'i so me'a ixali tamalemalenga uasi. Ane'i milopa­lasi laso maixene mixali tamale­malenga no iou Mosinge.

³¹ Ia Ta'isilaeli ne sasaie'i so imulinu lo so ixali tamalemalenga. Ia mipu­ne'isi ane, imomomo so imulinu uasi.

³² Mipune'isi xo aloxo 'o. Ane'i ilai no anu vote'i so lopala uasi, mixolusi xo loxo mitulaki no lavo'o vile. Lavo'o ne anu latilovosou Iesua. Ane'i ilopala noxou uasi laso mixolu xo mi'oso no anu xaixai noxi'asi.

³³ Xo no lavukuou Mosinge la anu uvikala aloxo 'o, “Ngingi ngalomu. Eni esosovosou lavo'o vile so tasilo ne Saioni. Lavo'o ne tamitema itulaki no anu mo opone'i uxililiou. Ia ane'i ane ilopala noxou la itavulenu mailasou uasi.”