Lomu 7 - Ata New Testament

Latilovo so taula'i

¹ Ioxe tavivilo, ngingi ngalavu laixe no anu lo ane Mosinge mulosou Mosisi tatei. Mo ngalavu lexe itema loxo uxoxolu umamau­lisio la anu uxolu no laxu lo. Xe loxo usolii la anu lo ne usu'asoula uasi.

² Latilovo aloxo 'o. Loxo sema vile itaula'ixu itema vile la lo so taula'i usakine'i ilou. Mo loxo mulue uxoxolusio la sema ne ixoxolu noxou muluesi. Ia loxo mulue usoli la lo so taula'i ne usakinela uasi.

³ Xo loxo mulue usoli uasi, ia loxo semau ilai noxou mulu vile, la ane'i imoxo'e lexe sema masua ane. Ia loxo sema ixoxolu noxou mulue xo xe usolii laso anu ane, lo so taula'i usakinela uasi. Laso loxo itaula'ixu itema vile la anu laixesi, isusu uasi ane.

⁴ Laso tavivilo, ngingi axone kalumo. Ngingi ngepita no anu vasimolu Kalaisiti, mo no anu vote'i anene ngingi ngesoli mukalu. Ngesoli xe ngekalipala no anu lo, laso usakingengila uasi. Ngingi ngaxolu noxou Tatanangengi ala­vua, anu ane mutulu mu'ume no anu soli. Laso vaimomo 'o ngingi ngamomomo so ngaxalixu nene'a­xu laixe no anu xaixai noxou Mosinge.

⁵ Xo tei la susu tava'u no vasimenge mupamuxanengesi. Mupamuxanenge xe telomusou lo u'apinenge lexe, “Ai, na'oxo aloxo 'o uasi, na'oxo aloxo 'o uasi.” Telomusou axone ia tatalo so tasusu uasi. Masaxa so susu ne mu'oki mo muxalixu nene'axu so solisi.

⁶ Ia vaimomo 'o tesoli mo tekalipala no anu lo e mukasinge ne. Nenge tamulinu vote'i so lo ane Mosisi mukaukavunu uasi. Nenge tamulinu vote'i alavua ane noxou Ulenu Laixesi.

Lo Mosisi mulemolu ne so ma'ia?

⁷ Laso axova? Nenge ta'oxo lexe lo ane Mosisi mukaukavunu mi masua? E uasi! Loxo lo uxolu uasi la alavusou susu axova? Xo aloxo 'o. Lo muvikala lexe “Ngaisuisu uasi.” Loxo lo uvikala axone uasi laso axova? Nenge ta'oxo lexe lo ane Mosisi mukaukavunu mi masua? E uasi! Loxo lo uxolu uasi la alavusou susu axova? Xo aloxo 'o. Lo muvikala lexe “Ngaisuisu uasi.” Loxo lo uvikala axone uasiLaso axova? Nenge ta'oxo lexe lo ane Mosisi mukaukavunu mi masua? E uasi! Loxo lo uxolu uasi la alavusou susu axova? Xo aloxo 'o. Lo muvikala lexe “Ngaisuisu uasi.” Loxo lo uvikala axone uasi, laso eni alavu lexe isuisu ne susu axova?

⁸ Tei la aisuisu malaxo uasi. Ia eno'u lavulavu no anu lo lexe isuisu ne masua, la anu loxo mupalusilo so aisuisusi. Xo loxo lo uasi, la susu ne xavinu malaxo uasi.

⁹ Mo tei loxo alavusou lo ne uasi la exolu loxo amaulisi. Ia mune'e xe eno'u lavulavu no anu lo ne la ekuluke xo susu mupala'a avile mo elavu lexe eni asoli ane.

¹⁰ Mosinge mulosinge lo so loxo tamulinusi la tamaulisi. Ia ekuluke xo amomomo no anu uasi la emaisou lexe amauli no anu uasi, uxalixu soli noxilosi.

¹¹ Xo aloxo 'o. Lo mupala'a laso susu mupolo no vote'i anene. Mupolo no vote'i anene xe mu'oxonu loloxo la lo muvikala lexe asolisou susu anene.

¹² Ioxe, laso nenge tavikala axova no anu lo? Lo ne anu molu noxou Mosinge mu'isalili laso anu laixe mo malemalenga.

¹³ Laso axova? Mi lailaixe ne muxalixu soli noxilo? Uasi manina! Sususi tava'u soli noxilo ne. Susu mupolo no anu mi lailaixe ne so uxalixu soli aloxo 'o. Lo muvikala lexe, “Nasusu uasi.” Ia elomuxu susu tava'u no vasimelosi la esusu. Esusu esusu laso lo mupala'anixu susu lexe mutoxoxa'a mo lakolisou solisi.

Mi tamei uxilili ngato'o no vasimenge

¹⁴ Nenge talavu lexe lo noxou Mosinge ne anu molu noxousi. Ia eni, la susu tava'u uxolu no vasimelo mo anu upamupa­muxalelisi.

¹⁵ Eni amaisou ilixo noxilo la talelilili manina. Laso tava'u axova? Xo mi ma'ia amasaxau so a'oxonu la amomomo uasi manina. Ia mi ane amatapianu la utotomu a'oxonusi.

¹⁶ A'oxonu mi ane amatapianu axone, la akuluke mo a'oxo lexe, “Ai manina, lo noxou Mosinge ne uvikala mulapusi.”

¹⁷ Laso no anu opoleli manina la amasaxau susu anene uasi. Ia susu tava'u ane uxolu no vasimelosi la upalusilo no anu susu anene.

¹⁸ Xo eni alavu lexe no anu vasimelosi 'o la mi vile laixe uxolu uasi, anu susu tava'usi. Manina, eni amasaxau so a'oxonu ilixo laixe ia amomomo to uasi.

¹⁹ Amasaxau e amasaxau manina so a'oxonu ilixo laixe ne ia alavusou a'oxonu uasi. Ia susu ane avikala lexe a'oxonu uasi ne, a'oxonusi.

²⁰ A'oxonu axone laso emaisou lexe mi ne no anu masaxa noxilo uasi, susu tava'u no vasimelosi upamuxaleli no anu.

²¹ No anu xoluxolu noxilo la emaisou aloxo 'o. Utotomu loxo amasaxau so a'oxonu ilixo laixe, la tava'u susu ne utanuxu.

²² Xo no anu opoleli manina la a'osasou lo noxou Mosinge so amulinu.

²³ Ia eni amaisou lexe lo vilela uxolu no vasimelo 'o. Lo anene loxo ukala­vusuleli mo upamuxanu vasimelo pa'upa'usou so ulai no anu sususi. Laso anu lo so susu no vasimelo 'o uxililiou lo noxou Mosinge ane amasaxau amulinu.

²⁴ Auo, anavae? Tu'umaxu 'o uvila'isou xavutalaxeli. Ena'ei so u'umeleli no anu vasimelo so soli 'oe?

²⁵ Xo no anu opoleli manina la amasaxau lo noxou Mosinge. Ia no anu vasi­melo 'o la susu tava'u a uxoxo­lusio mo upamuxaleli. Ia eni avikala laixe noxou Mosinge no anu ualasou Iesua Kalaisiti anu Tatananenge. Anu anusisi usu'uli­leli no anu tu'umaxu 'o.