Lomu 5 - Ata New Testament

La'ia no tainenge nenge'a Mosinge a mukalu ne

¹ Ioxe, nenge telopala mukalui la Mosinge mumoxo'inge lexe nenge tamalemalenga. Xo Tatananenge Iesua Kalaisiti molu mupitanenge so nenge'a Mosinge oponenge vilesisi.

² Xe anu mu'oxonu vote'isinge so loxo telopala, laso nenge te'unalai mo a taxoxolu no anu iaiama noxou Mosinge 'o. Taxoxolu mo taxomaiou voxo ane Mosinge uno'inge so nenge'a taxolu no tualasou lailaixe. Nenge talavusou lexe voxo ne a une'e laso osa'ilasou misevile.

³ Ia ta'osasou voxo anenesi uasi, ta'osasou tu'utu'umaxu ane tatavulenu 'o. Ta'osasou xo ma'ia? Ta'osasou xo tu'utu'umaxu anene so u'oxonu pakia'inge.

⁴ U'oxonu pakia'inge mo so loxo tu'umaxu ma'ia uxali la nenge utotomu tapilixinengesi. Tapilixinenge noxou Mosingesi laso nenge talopala taxomaiou voxosou ne.

⁵ Xo lopala noxinge anu umomomo so ulapau vitanisi uasi, nene'axu uxali ane. Xo Mosinge mulosinge Ulenu Laixe mukalu. Mo no anu vote'i anenesi munixi'u sexela noxou no opo­nenge.

⁶ Xo aloxo 'o. Tei la nenge pakia'inge uasi so talu'enu Mosinge tanu. Nenge texolu va'axu avile mo ta'oxonu ilixo vile laixe no iou uasi. Ia no voxo loxo Mosinge molu musosovosou, la Kalaisiti musoli­singe.

⁷ Xo axova? Loxo nenge tamaisou menexinge laixe vile so usoli, la nenge ta'italonu mauli noxinge so tapamaulinu? Mane vilevilesi noxinge imomomo so i'oxo axone. Ia loxo itema vile masua la umomomo uasi manina, tanengexu uasi ane.

⁸ Anene ilixo noxinge, ia noxou Mosinge iou vilemo manina. Anu musexela­nenge misevile. Xo no voxo loxo oponenge mututulu no anu sususio, la anu mupalusou Kalaisiti musoli so mupamaulinenge.

⁹ Kalaisiti musoli xe sialuxu munixisinge laso Mosinge mumoxo'inge lexe nenge tamitema talapusi. Xe ili'i no anu voxo noxou Mosinge e so mamulo la nenge tamamulo uasi, tamaulisi xo taxolu noxou Iesua.

¹⁰ Tei la nenge tauluaou Mosinge mo la'ia noxou muxolu noxinge. Ia Olu musoli no taninenge laso la'ia no tainenge nenge'a Mosinge a mu­kalu ne. Xe Olu mumaulila, laso nenge texalisou pamauli loloni no anu mauli noxou.

¹¹ Mo mi vilela aloxo 'o. Tatananenge Iesua Kalaisiti mupitanenge so nenge'a Mosinge oponenge vilesisi. Mupitanenge axone laso ta'itinu Mosinge uala­sousi.

Atamu anu tava'u soli ia Iesua anu tava'u mauli

¹² Ioxe, nenge talavu lexe itema vilesisi tava'u susu muxali. Susu muxali laso soli uxalisinge nenge tamitema mukalusi. Uxalisinge mukalusi xo nenge mukalusi tasusu.

¹³ Ia axova no anu voxo loxo lo uxali uao? Xo lo uasi laso Mosinge utilovosi'a no anu lo uasi. Ia no voxo anene susu muxolu kalumo.

¹⁴ Xo musoko'u noxou Atamu mune'e avile muxali noxou Mosisi, la soli ne mukasi'a tamitema mukalusi. Xe ane'i ne la ixola'u lo loxo Atamu uasi, xo ilavusou lo vile uasi. Ia ane'i kalumo soli mu'uli laxune'i. Anu axone. Atamu ne anu tava'u mi vile musu'asi'a tamitema latala. Xe itema ane Mosinge muvavali­masou lexe une'e ili'i la anu tava'u mi vile so usu'asi'a tamitema latala kalumo.

¹⁵ Ia mi ane Mosinge ulosinge ne anu uua'ulixu susu noxou Atamu avile. Xo noxou Atamu la tamitema latala mixa­lisou soli. Ia noxou Iesua Kalaisiti la Mosinge mu'oxonu iaiama toxoxu noxinge. Mo iaiama noxou ne munixinixi mo musu'asinge tamitema tavu'alo.

¹⁶ Xe mi ane Mosinge ulosinge uua'ulixu susu noxou Atamu aloxo 'ola. Susu noxou Atamu muxalixu la'ia noxou Mosinge ane ukolinu noxi'a latala. Anene nene'axu susu soxu vilesisi. Ia nenge, la susu mulolutusi. Ia Mosinge muiaiama so anu muxali­xinge talapu no iou mo so ukolinu susu noxinge uasi. Anene nene'axu mi laixe ane mulosinge noxou Iesua.

¹⁷ Xo itema vilesisi ne mulomuanu Mosinge vaikalaou laso soli mu'uli laxunenge tami­tema mukalusi. Ia axova noxinge nenge ane texalisou iaiama tatila noxou Mosinge mo so umoxo'inge tamalemalenga no iou? Xoluxolu noxinge axova? Aloxo 'o. Nenge taxolu la taxolu noxou Iesua Kalaisiti laso nenge ta'uli'uli avile ane.

¹⁸ Ioxe, laso nenge taxavutalanu aloxo 'o. Voxo vile la Atamu mulo­muanu vaikala noxou Mosinge laso la'ia noxou Mosinge musu'asinge tamitema mukalusi. Xe Iesua, la voxo vile mulomuxu vaikala noxou Momusi laso mu'oxonu vote'i so taxali malemalenga mo taxalisou mauli.

¹⁹ Itema vile ne mulomuanu vaikalaou Mosinge laso nenge latala texali tamitema so susu. Xe itema vile ne mulomuxu vaikalaou Mosinge laso nenge tamitema tapiena texali tamalemalenga no iou Mosinge.

²⁰ Ioxe, no anu lo, la Mosinge mumulaxu mo so susu upala'a u'oki avile. Susu mupala'a mu'oki axone, ia iaiama kalumo mupala'a mo mu'oki avile.

²¹ Xo susu muxalixu soli laso mu'uli laxunenge. Ia vaimomo 'o iaiama noxou Mosinge anu mu'uli'uli avile. Xo no anu ilixo malemalenga noxou Iesua anu Tatananenge la Mosinge muxalixu mauli kaluxu uasi.