Lomu 4 - Ata New Testament

Mosinge mumoxo'u Apala'amu lexe malemalenga no iou

¹ Ilusunenge Apala'amu ne, anu itema loxo nenge 'o. Laso nenge tavikala axova noxou?

² Loxo Apala'amu anu muxali malema­lenga no anu ilixo noxousi, la anu tava'u so u'itinu ualasou ane. Ia uasi, muxali malemalenga no anu xaixai noxou uasi, laso u'itinu no iou Mosinge axova?

³ Xo vaikala vile no anu lavukuou Mosinge uvikala aloxo 'o, “Apala'amu mulopalanu Mosingesi laso maixene Mosinge mukalusou tina'uxu so susu so muxali malemalenga no iou.”

⁴ Aloxo 'o. Loxo itema vile uxaxai xe uno'u lapesou, la anene iaiama uasi. Anene lakolisou xaixai noxousi.

⁵ Ia vote'i so itema uxali malemalenga no iou Mosinge anu mi so xaixai axone uasi. Vote'i ne aloxo 'o. Itema ne uxali lamana no anu susu noxou xe ulopala no anu xaixai noxou uasi, upilixinu noxou Mosingesi.

⁶ Mo Teviti mulemolu mi ne kalumo. Muvikalasou itema loxo ulavu lexe vote'i so umalema­lenga no iou Mosinge ne anu mi so xaixai noxou uasi. Mu'oxo lexe itema axone la u'osa misevile.

⁷ Muvikala aloxo 'o, “Loxo Mosinge usu'asou susu noxou itema vile so ukolinu uasi uiasousi, la itema anene u'osa manina.

⁸ Mo loxo tina'u so susu noxou itema ne mukalu la itema ne uxolu lalavulusi.”

⁹ Xo axova? Osa ne noxi'a ane'i ane ixotosou vasime'asi? O ane'i ane ixotosou uasi imomomo so ixalisou osa ne kalumo? Nenge tevikala mukalu lexe lopala noxou Apala'amu, anenesi vote'i so muxali malemalenga no iou Mosinge.

¹⁰ Ia vote'i so lopala ne muxali talu? Anu muxotosou vasimolu tei kaio mulopala o mulopala tei? Aloxo 'o. Anu mulopala tei ane.

¹¹ Anu mulopala tei xe mukalu laso Mosinge mulosou sosovo ne. Anene sosovo so mi vile muxali mukalu. Mi ne so usosovo lexe tei loxo uxotosou vasimolu uao, la anu mulopala xe muxali malemalenga mukalu. Ioxe, vaimomo 'o tamitema tose'i ixotosou vasime'a uasi ia ilopala. Ilopala laso ixali malemalenga no iou Mosinge. Xe Apala'amu ne anu loxo mami'a tamitema anene, xo tei la anu aloxo ne kalumo.

¹² Xe kalumo anu mami'a ane'i ane ixotosou vasime'a. Ia so ixotosou vitanisi uasi. Ixotosou mo ilopala iou vilesisi loxo mami'a Apala'amu mu'oxonu tatei mi ne uxotosou uao.

Vavalima noxou Mosinge, so si'a tamitema ane ilopala

¹³ Ioxe, mo tatei Mosinge muva­valima noxou Apala'amu so lia lexe upilixinu noxou mo ulai avile noxi'a ta'ilusunu. Ia axova? Apa­la'amu mumulinu lo mo so Mosinge muvavalima noxou axone? E uasi. Muvavalima noxou xo mumaisou lopala noxou mo mumoxo'u lexe mulapusi no iou.

¹⁴ Ia axova? Tamitema se'i i'oxo lexe loxo imulimulinu lo la ixali Mosinge ta'olu. Ia axone la axova no anu lopala noxinge? Xo axone la lopala uxali loxo mi vitanisi. Xe vavalima e Mosinge mu'oxonu noxou Apala'amu tatei ne anu mi vitanisi kalumo, xo tava'u lopalasi.

¹⁵ Uasi manina, lo ne anu tava'u so taxalisou nene'axu laixe uasi. Nene'axu lo ne la'ia noxou Mosingesi. Vote'i vilesisi so tama­xale laixe, loxo lo uxolu uasi. Ia Mosinge mulosinge lo xe taxola­xola'u utotomu, laso tama­xale axova?

¹⁶ Laso aloxo 'o. Tava'u vavalima e Mosinge mu'oxonu noxou Apa­la'amu ne anu lopalasi. Laso noxinge nenge ta'ilusunu Apa­la'amu loxo talopala, la iaiama anenesi une'e uxali noxinge kalumo. Iaiama ne noxi'a tamitema ane Mosinge mulosi'a losi uasi. Anene noxi'a tamitema ta'ei imu­linu lopala noxou Apala'amu. Laso maixene anu maminge nenge talopala mukalusi.

¹⁷ Xo loxo Mosinge vaikalaou mulemolu lexe, “Eni exalixene mami'a laili tavu'alo.” Laso maixene no anu iou Mosinge la anu maminge ane. Anu Apala'amu ne anu oponu mututu­luou vavalima noxou Mosinge. Xo mulavu lexe Mosingesi anu umomomo so uxalixu mauli no anu soli. Mo nenge loxo ta'oxo lexe mi vile uxolu uasi, la anu umomomo so ukoi ane.

¹⁸ Xo anu Apala'amu ne anu usaxisou mi vile no iou so uvalaxu lopala noxou uasi, ia mulopala mu'italonusi. Mulopala mu'italonu laso anu muxali mami'a laili tavu'alo. Muxali loxo Mosinge mulemolu lexe, “Nini ta'ilusuneni ixali tavu'alo.”

¹⁹ Apala'amu ne anu ukalavoinu uasi. Anu mulavu lexe anu sisilisou mukalu xo tau iexu loxo 100. Xe mulavu lexe semau kalumo vote'i so opone uasi xo xavine mukalu. Mulavu axone ia lopala noxou ulapau uasi.

²⁰ Oponu uxiuxiu so vavalima noxou Mosinge uasi. Anu lopala noxou ne muxoxolu axonesi mo mu'itinu Mosinge ualasousi.

²¹ Xo anu oponu mutulu lexe Mosinge xavinu so u'oxonu mi ane muvavalimasou ne.

²² Mosinge mumaisou lopala noxou axone laso anu mukalusou tina'uxu so susu so muxali malemalenga no iou.

²³ Vaikala anene lexe tina'uxu mukalu mo anu malemalenga ne a uxoxolu no anu vaikalaou Mosinge. Ia vaikala anene so Apa­la'amusi uasi.

²⁴ Vaikala anene so singe kalumo. Xo nenge telopala noxou Mosinge lexe anu mupa­maulinu Iesua anu Tatananenge no anu soli. Laso Mosinge ukalusou tina'unenge so susu mo umo­xo'inge lexe tamalemalenga no iou.

²⁵ Xo mi anenesi, laso Mosinge mupilixinu Iesua no anu soli, so ulotonu susu noxinge. Xe mutu­lusou no anu soli so umoxo'inge tamalemalenga no iou.