Lomu 3 - Ata New Testament

Mosingesi vaikalaou nene'axu

¹ Ioxe, noxinge nenge ta'ei laili Iuta, la mi vile no anu anene laixe, o uasi? Nenge talavusou taxotosou vasimenge la nene'axu vile laixe o anene mi vitanisi?

² Ia xo ma'i? Anene nene'axu laixe tavu'alo. Mi anene nene'axu mutiatila no anu, ane Mosinge mulosinge lo noxou so tasaxila'u.

³ Ia manina, Taiuta mose'i ilomuanu mo ilopala uasi. Laso axova, nenge tavikala lexe Mosinge vaikalaou nene'axu uasi?

⁴ Uasi to! Tamitema mukalusi ikalavoi ia Mosinge anusisi uvikala maninasi. Loxo no anu vaikalaou muvikala lexe, “Mosixe nini mene namaxa'ine lexe vaikalameni mulapusi. Mo loxo tamitema ito­vonu so ikotixene la nini naua'u­lixa'a ane.”

⁵ Ia tamitema se'i masi ivikala aloxo 'o, “Nenge tamitema muka­lusi ta'oxonu susu, ia Mosingesi ili'ilixo noxou iaxusi. Laso loxo nenge ta'oxonu ilixo masua la anu upala'anixu ilixo noxou lexe iou vilemo manina. Xe axone la anu mane ususu so ukolinu ilixo masua noxinge. Xo ilixo masua noxinge ne u'oxonu ilixo noxou iaxu upala'a avile.”

⁶ Anene kalavoi to, Mosinge ususu uasi. Xo loxo ususu, la anu vote'i so ukotinenge tamitema axova? Ia uasi, ilixo noxou mulapusi.

⁷ Xe masi se'i ivikala aloxo 'o, “Nenge tamitema takalavoisi, ia anu anusisi uvikala maninasi. Laso loxo eni akalavoi la anu u'itinu ualasou xo anu vaikalaou maninasi. Laso axova so la'iaxuou susu noxilo ne mo ukolinu?”

⁸ Ai, kalavoisi ane. Anene iou vilesisi no anu vaikala vile lexe, “Nenge tasusu mo so nene'axu laixe uxali.” Vaikala ne, tamitema se'i ikalavoi lexe eni melo elanu. La mi vile uasi, ane'i me'a ixalisou nene'axu ilixo noxi'a.

Itema vile malemalenga uasi

⁹ Laso telexu axova? Nenge Taiuta talaixe noxi'a se'i? Uasi manina. Loxo elemolu, nenge Taiuta xe tamitema noale'ale iou vilesisi. Susu musakinenge mukalusi.

¹⁰ Xo vaikalaou Mosinge muvi­kala aloxo 'o, “Itema vile malema­lenga uasi manina.

¹¹ Itema vile ulamana no anu Mosinge vaika­laou uasi. Mo itema vile oponu utatamasou Mosinge uasi.

¹² Ane'i latala ne mixiunu tumali'a noxou. Mo ane'i mukalusi ixolu vuluvu­lusi. Vile noxi'a umulinu ilixo laixe uasi. Soxu vile no taine'i uasi e uasi manina.

¹³ La no anu latilovo vile lexe anaxa'a tuma'u masua loxo lulu ua'a'a. Xo anaxa'a uana'ana no anu kalakalavoi so imasuane'i tamenexi'asi. Xe no anu latilovo vile lexe lamalasini masua uxolu no anaxa'a loxo sineke masua.

¹⁴ Ane'i utotomu ito'ome'a no anu vaikala sixula ngato'o.

¹⁵ Ane'i ipalea so ive'a tamenexi'a isoli.

¹⁶ Mo ane'i ixixaoxao so ilosi'a tamitema tu'umaxu mo mamulo.

¹⁷ Ane'i ilavusou vote'i so alauna uasi.

¹⁸ Mo imama'u noxou Mosinge uasi.”

¹⁹ Laso tamaxale axova? Mosinge mulosinge nenge Taiuta lo noxou, mo nenge taxolu no laxu. Anu vaikala no anu lo ne uto'omenge mukalusi. Laso nenge saenenge uxola, xo nenge mukalusi tesusu no iou Mosinge.

²⁰ Itema vile umomomo so umulinu lo so uxali malemalenga no iou Mosinge uasi. Mulosinge so anene uasi. Mulo­singe so talamana no anu susu noxinge.

Vote'isou tamitema ixali tamalemalenga no iou Mosinge

²¹ Ioxe, vaimomo 'o, vote'i so Mosinge umoxo'inge tamalema­lenga no iou ne mulamanasi. Vote'i ne anu mi so lo uasi, iou vilemo manina. Vote'i ne Mosisi oli'a Tapolopeti mia'aloxu tatei.

²² Vote'i anene aloxo 'o. Mosinge molu umoxo'inge tamalemalenga loxo talopala noxou Iesua Kalaisiti. Anene vote'isi'a tamitema latala, iou vilesisi.

²³ Xo nenge mukalusi tesusu, mo loxo nenge menge tatovonu so taxali noxou Mosinge, la tapunengesi.

²⁴ Ia anu muiaiama noxinge so Kalaisiti Iesua anu molu mukalusou tina'unenge so susu. Anu iaiamasi, nenge taxaxai so talotonu uasi.

²⁵ Xo Mosinge musosovosou Iesua so usoli. Usoli no taninenge mo so Mosinge oponu ulu'e noxi'a ane'i ta'ei ilopala no anu sialuxusi. Ioxe, Mosinge mu'oxonu laixe noxi'a ane'i tatei xo ukolinu susu noxi'a avile uasi. Laso axova, anu iou si'isou mane? E uasi, a mukolinu noxou Iesua. Laso axone la tamaisou lexe ilixo noxou Mosinge ulapusi, xo susu ma'ia ne, la ukolinusi.

²⁶ Ai manina mise­vile, ilixo noxou ulapusi. Xo ngamalei, loxo talopala noxou Iesua, la Mosinge uxalinenge talapu no iou.

²⁷ Laso nenge menge ta'itinenge? Ta'itinenge lexe nenge talapu no iou Mosinge xo temulinu lo? Uasi to, tamomomo uasi. Nenge texali talapu no iou Mosinge, xo tava'u vilesisi aloxo 'o. Telopala tepilixi­nenge noxou Iesuasi.

²⁸ Mo vaimomo 'o telavu lexe tamitema ixali tamalemalenga no iou Mosinge loxo ipilixine'i ilopalasi. Loxo tamitema opone'i utulu no anu lo, la ipune'isi ane.

²⁹ Xe nenge Taiuta ta'itinenge lexe Mosinge anu Mosinge Taiutasi? Anu Mosi'a tamitema noale'ale kalumo uasi? Uasi to! Anu Mosi'a kalumo ane.

³⁰ Anu Mosinge vilesisi. Mo vote'i so umoxo'inge tamalemalenga no iou ne vilesisi. Vote'isi'a ane'i ane ixotosou vasime'a xe ane'i ane ixotosou uasi, ane no anu lopalasi.

³¹ Laso axova? Loxo talopala noxou Iesua la anu ulu'enu lo lexe anu mi vitanisi? Uasi, lopala noxinge ne uvalaxu lexe maninasou.