Lomu 2 - Ata New Testament

Mosinge utilovo, la ulapusi

¹ Ioxe, tamitema i'oxonu susu iouiou axone. Laso ngingi se'i masi ngato'ome'a no anu mo ngavikala lexe, “Iauo, ane'i susu noxi'a u'oki'oki to!” Ia ngalomu, ngingi vaikala so ngalemolu uasi. Loxo ngato'ome'a axone, la anene ngingi ngato'omengesi ane. Xo susu noxi'a ma'ia ngalemolu ne, ngingi nga'oxonu kalumo.

² Xe nenge telavu lexe Mosinge utilovosi'a tamitema so ulosi'a nene'axu susu iouiou anene. Mo loxo utilovosi'a la anu ulapusi.

³ Ia ngingi tami­temasi. Laso axova? Loxo ngingi ngato'ome'a tamitema so susu noxi'a ane ngingi menge nga'o­xonu, la ngamaxale axova? Xo nge'oxo lexe Mosinge ukolinu susu noxine kalumo uasi, ne?

⁴ Xo vaimomo 'o Mosinge uiaiama noxinge mise­vile so ukolinu susu noxinge palea uao. Anu uxoxomaiengi so ngaxiu­nu opongengi mo nga'isalilinoxu noxou. Ngingi ngamaisou sexela noxou axone ia anu loxo ulapu­ngengi uasi. Masi nge'oxo lexe anene mi vitanisi, ne?

⁵ Ngingi kisinge pakia'u mo tangengi uxilili laso ngingi menge ngamolo la'iasinge. Ia no anu voxo loxo Mosinge utilovosinge ulapu la la'ia noxou singe ne upala'asi.

⁶ Xo Mosinge ulosinge nenge tamitema lakolisou umomomo no anu ilixo noxinge.

⁷ La tamitema se'i ne, opone'i ututuluou ilixo laixe. Xo ane'i opone'i utatamasou vote'i so xoluxolu laixe no tualasou Mosinge. Xe imasaxau lexe anu uvikalasi'a laixe mo uvikala lexe isolila uasi. Laso tamitema axone la anu ulosi'a mauli kaluxu uasi.

⁸ Ia tamitema se'i ne, ixavutalane'isi mo ixiunu tumali'aou vaikala manina. Ane'i imulinu ili'ilixo masuasi. Tamitema axone ixalisou nene'axu la'ia toxoxu noxou Mosinge.

⁹ Tamitema latala ane imulinu ilixo masua la itavulenu tu'umaxu mo navunavusou. Anene uxali noxi'a Taiuta mo noxi'a tamitema noale'ale kalumo.

¹⁰ Ia tamitema ane imulinu ilixo laixe la Mosinge ulosi'a xoluxolu laixe no tualasou. Mo anu uvikalasi'a laixe xe xoluxolu noxi'a lalavulusi. Anene uxali noxi'a Taiuta mo noxi'a tamitema noale'ale kalumo.

¹¹ Xo Mosinge umaisinge lexe nenge mukalusi iou vilesisi.

¹² Ioxe, mo aloxo 'o. Axova noxi'a tamitema ane ilavusou lo ane Mosisi mukaukavunu uasi? Ane'i kalumo isusu. Xo loxo isoli, la axova noxi'a? Mosinge u'oxo axo'. Anu ulemolu lo noxi'a uasi, ia anu ukolinu susu noxi'a kalumo. Xe ane'i ane ilavusou lo, la Mosinge utongone'i u'isalili no anu, xo ane'i kalumo isusu ane.

¹³ Xo tamitema ane ilomusou lo vitanisi la imomomo so ixali malemalenga no iou Mosinge uasi. Ia ane'i ane ilomuxu lo la Mosinge umoxo'a lexe ane'i tamalemalenga.

¹⁴ Xe ngiou vile aloxo 'o. Tamitema noale'ale ilavusou lo noxou Mosisi uasi. Ia alaxu se'i ane'i kalumo imulinu mi se'i a uxolu no anu lo ne kalumo. Ilavu uasi manina, laso axova so me'a imulinu no anu masaxa noxi'a?

¹⁵ Alaxu se'i imulinu xo temanu lo Mosinge mumulaxu a muxolu no opone'i. Mo lavulavu sevile lexe mi ma'ia laixe xe mi ma'ia susu a muxolu so upela'a. Laso maixene alaxu se'i opone'i uvikala lexe, “Iu, masi e'oxonu 'o, susu.” Xe se'i uvikala lexe, “Ai, ano'o vote'i laixe.”

¹⁶ Laso Mosinge musosovosou Iesua Kalaisiti so utongone'i tamitema no voxo ili'i loxo anu musosovosou. No voxo anene la tamitema imomomo so italumeu mi vile noxou uasi. Xo anu opo­nenge upala'a noxou avile. Laso loxo eni alanu vaikala laixe noxou Mosinge, la avikala lamana so voxo anene kalumo.

Loxo lo vitanisi, la usu'uline'i Taiuta axova?

¹⁷ Ioxe, ngingi Taiuta e ngalopala no anu lo mo nga'itingengi lexe Mosinge u'osasingexu.

¹⁸ Ngingi ngalavu no anu oponu mo lo ne upela'inge so ngatilovo lexe mi ma'ia laixe.

¹⁹ Ngingi nga'itingengi lexe ngingi tamitema so ngatila'a ane'i ane ie'i mutomu. Mo ngingi so lamanasi'a ane'i ane ixolu no isivoxo.

²⁰ Lo ne ulosingexu lavu­lavu so mi ma'ia maninasi laso ngingi ngapelototosi'a ane'i ane lavulavui'a uasi oli'a tamolomolo.

²¹ Ia axova? Ngingi ngapela'a leviani, ia ngingi menge uasi? Xo ngapelototo pakia'u lexe tamitema ipakali uasi, ia ngingi ngapakali uasi?

²² Mo nga'oxo lexe tamitema ilailai noxi'a vitanisi uasi, ia mi anene nga'oxonu uasi? Mo ngama­tapianu mosi'a tamitema kalavoi, ia ngingi ngapakali no anu tatasou mosi'a kalavoi uasi?

²³ Xe ngingi menge nga'itingengi no anu lo, ia nga'oxonu Mosinge ualasou masua xo ngingi menge ngaxo­laxola'u to!

²⁴ Xo tapolopeti mikaukavunu tatei no anu Mosinge vaikalaou lexe, “Mosinge ualasou muxali loxo nuni'u no taine'i tamitema noale'ale xo tava'u a noxingesi.”

²⁵ Mo vile aloxo 'o. Mosinge mulosinge sosovo noxou so ngaxo­tonu vasimenge. Anu laixe, xo loxo ngalomuxu lo, la anu sosovo ne temanu. Ia loxo ngalomuxu uasi, la anu mi vitanisi.

²⁶ Xe loxo tami­tema ane ixotonu vasime'a uasi ne ilomuxu lo, la Mosinge umaisi'a lexe sosovo noxou uxolu noxi'a mukalu.

²⁷ Laso ngingi Taiuta ane ngalomuxu lo uasi, Mosinge uto'omenge axo', “Tamitema olele ixotosou vasime'a uasi ia ilomuxu lo. Ia ngingi, la sosovo so vasi­menge mo lavuku so lo a uxolu noxinge ia ngalomuxu to uasi.”

²⁸ Mamu so ngaxavutala lexe itema uxali loxo Iuta maninasou xo uxotosou vasimolusi. Nenge taxali tamitemaou Mosinge no anu mi so vasimenge axone uasi.

²⁹ E uasi manina. Mi anene uxali no anu ulenenge. Mosinge usosovosinge no anu Ulenu Laixe. Xe tamitema ivikalasinge axova, la anu so vasimenengesi. Ia loxo Ulenu Laixe usosovosinge, la Mosinge molu uvikalasinge laixe.