Lomu 16 - Ata New Testament

Polu muvikala aso laixe noxi'a talopala

¹ Tavivilo. Eni avikalangengisie vivinge Vipi. Sema ne utotomu ixaxai so isu'uline'i tatemanu pita noxou Tatananenge ne Senikilia.

² Laso loxo ilai ixali noxinge ne Lomu la ngamaxa'u sexela noxie no anu ilixo noxinge tamitemaou Mosinge mu'isalili. Ane vivinge xo ngingi ngoli'a noxou Tatana­nengesi laso nga'unane noxinge. Xe loxo tu'umaxu vile noxie la ngasu'uline, xo ane misu'uline'i tamitema tavu'alo. Mo misu'ulileli kalumo.

³ Mo ngingi ngalemolu aso laixe noxilo noxi'a Pilisila ilou Akuila. Ane'i tamenexilo no anu xaixai noxou Kalaisiti Iesua.

⁴ Ilou misu'ulileli laixe. Misu'ulileli xe loxo tamitema i'oxo lexe ive'axu su'uli ne, la ilou i'ume uasi. Eni avikala laixe noxi'a ia eni enisisi uasi. Ane'i tatemanu pita no tuatuala noale'ale opone'i axone kalumo. Ane'i latala ivikala laixe noxi'a ilou kalumo.

⁵ Xe ngalemolu aso noxilo noxi'a tatemanu pita e ipita no tasi'a ilou. Mo aso noxilo ulai noxou vivilo e asexelaxu manina e Epainetusi. Anu tei manina noxi'a ane'i ane milopala noxou Kalaisiti ne Esia polovinisi.

⁶ Mo ngalemolu aso noxilo noxie Malia. Xo ane mixaxai tatila so misu'ulingengi.

⁷ Mo aso ulai noxi'a tatulaleli tamei e Anitolonikusi ilou Tiuniasi. Ane'i e noxi'a tekalavusu. Ta'apo­seli ivikalasi'a ilou ne laixe. Ane'i ilou milopala noxou Kalaisiti tei noxilo.

⁸ Mo aso noxilo noxou Amipiliatusi. Nexi noxou oponexi vilesisi noxou Tatananenge laso talelixu misevile.

⁹ Mo ngalemolu aso noxilo ulai noxou Ulivanusi, anu menexinge no anu xaixai noxou Kalaisiti. Mo aso noxilo noxou Sitakisi kalumo, anu asexelaxu manina.

¹⁰ Mo aso noxilo ulai noxou Apelesi. Xo tamitema ilemolu lexe anu itema so umulinu Kalaisitisi. Mo aso noxi'a ane'i ane ixoxolu no tasou Alisitovulusi.

¹¹ Xe noxou tulaleli e Elotioni mo noxi'a ane'i ane ixoxolu no tasou Nasisusi. Ane'i tamitemaou Tatananenge kalumo.

¹² Mo aso noxilo noxi'a Tilivina olie Tilivosa, ane'i tasema so xaixai noxou Tatananenge. Xe noxie Pelisisi ane talelixe misevile. Ane xavineou xaixai noxou Tatana­nenge kalumo.

¹³ Mo aso kalumo ulai noxou Luvusi. Anu itema laixe so umulinu Tatananenge. Mo noxie nenu, xo ane loxo nenilo kalumo.

¹⁴ Mo aso noxilo ulai noxi'a tamitema ano'o. Asinikilitusi xe Velekoni xe Elemasi xe Patolovasi xe Elemesi oli'a tavivinge ane oli'a ixoxolu ne.

¹⁵ Xe noxi'a tamitema ano'o kalumo. Vilolokusi olie Tiulia. Xe Neleusi olie vimou xe Olimipasi oli'a tamitemaou Mosinge u'isalili e oli'a ixoxolu ne.

¹⁶ Ngingi mukalusi ne ngasexela­ngenge ngato'o. Mo ngalavu laixe lexe pitipita noxou Kalaisiti lai 'o ikalanu aso a ulai noxinge ne.

Kaluxusou pelototo noxou Polu si'a Talomu

¹⁷ Ioxe tavivilo eni apelototosinge aloxo 'o. Ngingi masi ngalaxa'i laixe noxi'a tamitema se'i no taingengi. Xo ane'i masi ixalixu vaikala ane uxililiou votovoto loxo ngelomusou. I'oxo axone la masi tu'umaxu uxali la pita noxinge umamulo. Laso ngamaloxo'u vaikalai'asi.

¹⁸ Xo ane'i anene tamitema so xaixai noxou Tatananenge Kalaisiti uasi. Ane'i imulinu masamasaxa no anu vasime'asi. Mo ane'i ilavusou ivikala laixe mo ixilisine'i ane'i ane itilovo laixe uasi.

¹⁹ Apelototo­singe axone xo alavu lexe opongengi ututuluou vaikalaou Mosingesi. Mo vaikalasinge muia­veiave no tuatuala. Laso eni a'osa no anu xoluxolu noxinge anene. Ia amasaxa lexe ngalavu lamana no anu mi ma'ia laixe. Ia no anu mi ma'ia masua la uxolu no xavuta­lamengi uasi.

²⁰ Xo anu voxo alaimanasi so Mosinge ukalusou xavinu Uluaou. Ukalasou mo anu Uluaou uxolu no langenge ane. Laixe, xo Mosinge u'oxonu xoluxolu noxinge lalavulusi mo iaiama noxou Tatananenge Iesua uxoxolu noxinge.

²¹ Ioxe, menexilo no anu xaixai e Timoti mukalanu aso laixe noxinge. Xe tatulaleli e Lusiusi mo Iesoni mo Sosipateli mivikala axone kalumo.

²² Xe eni Tetiusi a. Polu mulemolu vaikala ma'ia la ekaukavunu 'o. Eni kalumo avikala aso noxinge xo nenge vilesisi noxou Tatananenge.

²³ Xe Xaiusi mulemolu aso noxinge. Eni Polu a axoxolu no tasou xe Mosinge ta'olu ipitapita ne kalumo. Xe Elasitusi e itema so usaxila'u lamoli noxou xamani no tuala ano'o ulemolu aso noxinge. Xe vimou Kualitusi kalumo.

²⁴ Iaiama noxou Tatana­nenge Iesua Kalaisiti a uxolu noxinge mukalusi. Vaikala ano'o manina.

Nenge ta'itinu Mosinge ualasousi

²⁵ Ioxe, Mosinge umomomo so u'oxongengi so ngatulu pakia'inge. Ngatulu pakia'inge mo so ngalo­pala no anu vaikala laixe so Iesua Kalaisiti ane evotovotosou noxinge. Xo tateimo la vaikala ne mutalume ia vaimomo 'o mupala'a avile.

²⁶ Mupala'a avile xo vaikalai'a tapolopeti no anu Mosinge vaikalaou muxali lamana noxi'a tamitema no xale tuatuala. Mi ne muxali loxo Mosinge Kaluxu Uasi mulemolu. Xo tamitema mixali lamana laso milopala mo mi'oxonu ilixo ane anu u'osasou.

²⁷ Ai manina misevile. Mosinge anu anusisi lavulavuou. Laso nenge masi taxavutalanu mimi ane mupala'a­nixu no avolu Iesua Kalaisiti. Taxavutalanu mo ta'itinu ualasou ulai ulai utalo uasi. Anu anesi.